SERSIAMNAK SAN

Hminsin:  Cangantui dinhmun theifiang dingin, “ Casiartu Hnenah” timi thu hi siar hmaisa aw.

[ 3.1]

A  Duhsan Thu Hawlnak

Theihharzet mi thusuhnak hnihsuak zet pakhat cu, “damsan hi ziangha a si?” ti hi a si. Zo khal Pathian a zumlotu pawl cu a ruahmi leh tumtah mi in mawh a phurh hai ding. Ziangah tile Pathian in tumtahnak neizet ih a sersiam mi an si. Curuangah mi tampi cun  hi thusuh nak sang thei dingin ngunngaih takin a sannak an hawl cio. Hitin ol-ai ten an sang hai, “Amah sunloihnak pe dingah” t'in. Hi sannak hi a dik tla a si mei thei ziangahtile khawruah nak di a riamter a si. Citi a sile hi lawng maw lole a dang sannak teh? Pathian ih cangvaih nak leh sersiamnak san hi Amah sunloihnak lawngah a si maw? Pathian in amah sunloih a duh ti cu kei khalin ka zum. Pathianih hna a tuannak san pawl hi cu vialte lawngah cun a si lo. Sersiamnak san khal hi thaten thil kan hmuhthiam ve theinak dingah Pathian ih tumtah mi a si.

[3.2]

Pathian ih cangvaihnak hi thil a sersiam hlan ahcun malte lawng kan thei thei. Cui thil a sersiam mipawl hi in sim hlanah theih thei mi kan nei maw? Curuangah Bible thupuan mi pawlhi an um menmen lo a hleice in minung suahkehnak thu pawl leh tikcu can pawl an phuan awk thuhla pawl hi theihhiarza zet an si. Cuitlunah sersiamnak leng khalin a tumtahmi pawlhi a thlam in kan thei thei. A duhsan mi cu polhawknak cafang fanghra ihsin rel duhsan mi theihfiang thei vek khi a si.

[3.3]

Van Raldonak

A pakhatnak ih kan ruah dingmi cu van raldonak thu hi a si. Vancungmi pawl hi milai pawl lakah an rak umzonak thu hi Bible ihsin kan thei thei ih Amah rian in a hnenah an um thu insimfiang. Curuangah kan ngaihtuahnak le ruahnak khalin Pathian in tumtah mi neilo in a sersiam lo a si ti kan thei thei. Ziangkim a sersiam tikah pakhat a theh cun a tumtah mi pa khat a theh ve tinak a si. Hi thu hngetkhoh kan pom hnget thei a sile Pathian in ziangruangah milai a rak sersiam ti mi khal kan thei thei ve ding a si.

[3.4]

Kan tehton mi ihsin kan zir thei mi cu ralkap bur hnih vanih an rak do awknak thu a si, hihi thilmak zet pakhat a si, ziangahtile hihin Pathian sinak a langter, cui tlunah sualnak thu le Setan pai sinak thu khal kan thei thei. Bible in Setan pa hi a phunphun in a laraw thei ti in sim, “Thuphan pa, rulhreng, rulpi tar, leitlun lal tile Setan” tiin a hmin in sim. Curuangah Pa thian in hi Setan pa hi tahthim thu ah hmangin thu in zirh theu. Piter in a hna a theh hlanah Jesuh Khrih thlun a tum tikah Setan pa ti’n a ti. Ziangruangah tile cui can te ah khan Setan in a ciahneh zo ruangah a si, annih cun Pathian ih thiltum rundamnak kan co ding hi in rak hnaihnok ringring a si.

Matthai 16: 21-23 21 Cui can thawkin Jesuh in a dungthluntu pawl hnenah Jerusalem ah ka feh dingih hotu, puithiam upa pawl le dan zirhtu pawlih kut ah harnak ka tong ding, in that ding a sinan ni thum hnuah nuntersal ka si ding tiah fiangte’n a sim. 22 Piter in Jesuh cu a dang deuh ah a hruai ih a mawhthluk, Bawipa Pathian in duh hram hlah seh, hi bangtuk cu na parah thleng hram hlah seh tiah a ti. 23 Jesuh cu a herih Piter hnenah Setan pa ka hnen ihsin tlan aw, ka fehnak lamzin khamtuna si, ziangah tile hi bangtuk na ruahnak hi Pathian hnen ihsin a ra mi a silo milai hnen in a ra mi a si tiah a ti.

[3.5]

Piter hnenih a sim lawng silo in Setan hmin dang pawl a um lai hrih. Cu pawl lakah Tai-ar  siangpahrang (Tyrus)pai thu ah, Setan in paih lo cingih a vahter rero nak leh Pathian doral a sinak thu kan hmu thei a si. Pathianin Tai-ar siangpahrang pai hnenah hmakhatte ih a thlengawknak thu Ezekiel ih a rak simcia nak thu hi hminsin tlak zet a si. Tai-ar siangpa hrangih pa, thlarau sual ih pa Setan ih thuhla relnak a si ti hi hminsin aw.

Ezekiel 28:11-19 11 Bawipa cu ka hnenah a tong sal 12 “Milai pa, Tai-ar siangpahrang ih a tuar dingmi pawl hi ruatin riahsia in um aw, a hnenahcungnungbik Bawipa keimah ih ka tong mi hi sim aw, mi famkim na si ih zohthim tlak na rak si, ziangtluk mifim le mipiang so na rak si. 13  Pathian hmuan Eden ah na rak um ih lung mankhung a phunphun na rak hruk ; Ruby le daimon lung mankhung, lung mankhung aihre, a sen, karnelian le jasper lung mankhun g, safires le emeral le garnet lung mankhung pawl na rak hruk a si. Sui hlawnthil tampina r ak nei; semsuah na si ni ih tuah mi pawl an si. 14  Tihnungza vangcung mi cu nangmah kil dingah ka ret. Ka tlang thianghlim ah na um iha tleu zohzo mi lung mankhung lakah na feh. 15  Semsuah na si ni in thil thalo tuah na thawh ni tiang na nuncan cu zianghman sawisel ding a um lo. 16  Thil na lei na zuarih na buai ih cin le dan neilo in sualnak ah na thleng a si. Curuangah ka tlang thianghlim in ka lo dawi ih a lo kiltu vancungmi’n a tleu mi lung mankhung pawl lak ihsin a lo dawihlo a si. 17 Mipiang na si ruangah na hngal ih na hminthannak in mi aa hnatuan a lo tuanter, cu ruangah leilung ah ka lo hlon ih siangpahrang dangdang ih ralrinnak dingah ka lo tlansan. 18  Thil na lei na zuarnak ah hin a bal mi tampi na tuah ruangah na biakinn hmuan pawl tlana balter thluh a si. Curuangah khawpi cu meisa in ka ur ih leilungah a ciam zo a si. A lo zoh tu hmuahhmuah in vutcam ih na can kha an lo hmu. 19 Na van a duai. Na cem ta a si: A lo theitu miphun hmuahhmuah cu an tuk a sum: nangmah vek ah kan cang pang ding, ti an phang ding” tiah a ti.

[3.6]

Setan Hmuihmel

A tlun Bible cangih kan hmuh theimi cu Pathian in Tai-ar siangpahrang pa hi Setan ih hmindang in a hman thu a si. Hitawk ahhin Pathian in Setan ih thu le hla pawl a langternak thu malte kan hmu thei. Malte'n kan vun ruattha sal kei uh. Hi Bible catlangin in simmi cu Setan(Tai-ar siangpahrang ti ih kawh mi) hi Eden hmuanah a rak um. Tai-ar siangpahrang pa hi Eden hmuanah a rak um dah lamlam lo, curuangah Pathian in leitlunih a nu le a pa a rak rel dahlo nak a si. Cuitlunah na theih ding mi cu Pathian in Tai-ar siangpahrang hnenih thu a sim tikah amah kha a cangtheitawk in a sawhkhih ringring, a sinan Setan ih thu a sim tik ah Tai-ar siangpahrang, sualnak hramih lalpa; dunglam thu phentu tin a ti theu. Curuang ah Pathian hin Setan ih ruangrai thuhla leh mizia a rel tinten, Jesuh in a hnuai ih Bible bungcang hmangin Farasi pawl a tidan vek hin kan hmu thei.

Johan 8:44 44 Nannih cu Setan nan pa ih fate nan si; nan pa ih duhnak nan thlun duh ve a si, a hram thok ihsin anih cu mithat a siih thudik ah a ding dahlo. Ziangah tile anih cu a sungah thudika um lo, anih in thuphan a per tikah a mai sidan a thlun ve mi a si. Ziangah tile anih cu thuphan a pertu a si ih thuphan hmuahhmuah ih pa a si.

[3.7]

Jesuh Khrih hin Farasi pawlih pa le pawl theih olten a rel dahlo nan an thlarau thu lawngte a rel ringring. Cuvek ciah in Pa Pathian khal in Tai-ar siangpahrang ih pa cu a rel dahlo nanthlarau pa Setan cu a rel ve ringring. Tai-ar siangpahrang pai thu kan siar tinten Setan ih thu kan rel tinak a siih Pathian a dokalh hlanih a hmin cu Lucifer ti a siih Amai sersiam mi asi.

[3.8]

Ezekiel cabu silo in khui tawkah Setan ( Tai-ar siangpahrang ) hi Eden hmuanah a umnak thu kan hmu thei? Setan hi mifel famkim a sizia khal kan hmu ih fimnak leh mawinak, cui tlun ah lung mankhung phunkim le leitlun lennak in an hmuhsak hai. Mangbangza a lang nak thu pawl cu cang hleili le hleinga nak ah kan hmu thei. Setan hi khuahlan ahcun Pa thian tlang thianghlim ah a rak to ih lungto mawi lakah a rak tlangleng dah. Pathian ih hriakthih a rak siih cherub in a  tuammawi ih (vancung lakah thuneihnak sangbik a rak pe) sinaktha a rak pe. Setan hi sual a hawl hlan ahcun nun famkim nei a rak si.

[3.9]

Sualnak hi ziangti’n a rung lut? Ziangti’n a ra cang? Bible ih sim vekin a lennak, a mawinak pawl in uanawknak a suahter ih a sersiamtu upat leh sunloih hnakin amah leh mah a upat aw ih a cawimawi aw. Cutin Setan cun a  thinlung in sualnak leh dokalhnak a suak ih cumi in uanawknak sangka hramah a hruai ih a ma’n cui sangka khal a ong. A zalennak thinlunga hmang ih thudik hrillo in sualnak a rak hril sawn a si cu.

[3.10]

Ruattha sal hman. Setan hi sualnak ih a rak luh hlan ah khan amah ah zianghman mawh neilo mi dingfel a rak si. Hlan ahcun Setan hin Pathian kha soisel ding umlo in a rak rian dah zo. Ziangtluk in sersiam mi lakah a rak cawisang ih lennak tiang a rak pek ti thu kan hmu thei. Setan hin Pathian a duhdawtnak a phatsan tikah Pathian thinlung a rak natzia cungaihtuah ban thil a rak silo.

[3.11]

Setan hi a sersiamtu pa a hoisan lawng silo in thildang khalah a nuncan ziaza dang khal a se thluh, thildang tampi khalah a siat theh ruangah ram tampi tla cu an tumsuk phah thluh.Curuangah a ro luahmi vancung ihsin leilungah dawithlak in a rak umnak a si.

Isaiah 14:12-17 12 Maw Babylon siangpahrang deirel arsi, nang cu van ihsin na tla zo, tuihlan ahcun ram tampi na neh a tu ahcun leilungah vuakthlak na si. 13 Vanah kai na tumih a sangbik arsi tlunah na tohkham ret na tum. Khuavang pawl an to khawmnak saklam ah siangpahrang bangtuk ih to ding na rak ruat. 14 Khawdur tlunah ka kai dingih cungnungbik bangtuk ka si ding na ti. 15 A sinan a thuknakbik hmun ah dirhthlak na si zo 16 Mipi pawlin  theplo aanglo in an lo zoh dingih, leilungtlun a hnin thehtu leh ram tampi a khur tertu cu hi pa hi maw a si? 17 Khua tampi a siatsuahtu leh leilung ramthing ih a cangtertu cu a mah hi maw si?

[3.12]

Setan Ih Tumtah Mi

Pathian ih thinhengnak ahhin Setan hi a sualsir awlo in dokalh duhnak leh amah le a mah thiamco awkter a tum riangri. Pathian ih thuthennak a tong leh ding ti a theiih can malte sung lawng ka nei ti a theih fawn ruangah, a can neihsun tawite ah, leitlun hmuntin ah vak in Pathian ih mi pawl hi siatsuah a tum vivo. Balaam in Balak kha Israel pawl siatralnak lamzin ih a thlem bangin Setan khal in duhhamnak, cahnak le hngalpuarnak ih khat dingin a thlem tum ringring a si.

I Piter 5:8 8 Fimvar te in um uh! Ralring te’n um uh! nan ral Setan cu deh ding hawlin a huk rero mi kiosa bangin a tawivak rero a si.

Mipum. 31:16-17 16-17 Balaam thu ngai tahrat in Peor ah Israel misenpi pawl Bawipai hmai ah misual hlawhhlang bangtuk in a cantertu hi nunau pawl an si, ti nan thei lo maw? Curuangah a si Bawi  pai minung pawl parih natsia a thlennak kha!

Thuphuan 2:14 14 Sikhalsehla na parah lungkimlonak malte ka nei, nanmah lakah Balaam thu zirhnak a thluntu mi hrekkhat an um; Israel mi pawl milem hnenih pek mi rawl einak le nupa sualnak in sualnak sungih hruai dingah Balaam in Balak kha a fial a si.

[3.13] Setan in tumtahnak pakhat lawng a nei. Thinhengnak lawngin a khatih leitlun ih JesuhKhrihkawhhran siatsuah dingin a rung tum. A ka ihsin fihnung za thisen, hurkhuannaklam thu, thinlung siatralnak, do awknak, mi hronak awkam siava pawl a khaksuak ih Pathian ih ram thianghlim hmunah thang a kam. Hihi ziangruangah a si pei? Setan hin ziangruangah Pa thian ih mi thianghlim pawl siatsuah a tum, ih kanmah tiangin in kaihhnoih nak? Ziangtin kan tuah ding? Setan in kanmah ihsin Pathian tumtah mi tisiat dingah ziangtin in kaihruai theu? Pathian in a milai sersiamnak san thuhla ihsin a cangvai thok ko ding.

Thuphuan 12:9-17 9  Rulhreng tumpi, khuahlan rulpi, khuavang a si lole Setan ti ih kawh mi, leilung pumpulukmibumtu cu van ihsin an hlon. A vancungmi pawl thawn leilung ah an vuakthlak. 10 Cule vancung ah aw ringtak ka theiih, “Pathian rundamnak a thleng zo! Pathian in siangpahrang a sinak huham a langter zo! Messiah in thuneihnak a langter zo! Ziangahtile Pa thian hmai ah kun in a sun a zan in kan unau sual a puhtu cu vancung ihsin hlon a si zo. 11 Ka unau pawl in Tufa thisen leh thudik an phuanmi thawngin nehnak an ngah zo. An nunnak pe siangih thih khal an ngam a si. 12 Curuangah vancung leh lei ih a um mi hmuahhmuah nan lungawi uh ! A sinan leilung letifinriat hrang ahcun tih an va nung so! Ziangahtile khuavang nan hnen a rung thleng zo ih can reipi a nei nawn lo ti a theih ruangah a thin a heng ngaingai” ti ah a ti. 13 Rulhreng in leilungah in thlak ti a theih veten fapa hringtu nunau cu dawi a thawk. 14 A sinan nunau nu cu a hrangah remcia mi hramlak ih zuannak dingah a tum zet mi mu pi ih thla pahnih an pek. Cutawk ah rulhreng ih siatsuah theilo dingin kum thum leh a hrek sung an kilkhawi ding. 15 Cule nunau nu cu tilian in fen seh tiah a ka sungin tidai a suahter ciamco. 16 A sinan nunau nu bawm dingah leilung cu a ka a ang ih rulhreng ka sungin a suakmi ti dai cu a rak dolh theh. 17 Rulhreng cu nunau nu’i parah a thin a heng tukih nunau tefa pawl Pathian thukham a thluntu leh Jesuh ih phuan mi thutak a tlansantu hmuahhmuah do dingah a poksuak lala. Setan ih thinhengnak hin kawhhran sungah a phunphun in a tokhrok ih kawhhran cu nawr tu ralkap vek ti in a rak co dah mi leitlun pumpi hi co sal dingin leh Jesuh Khrih ih huham lethazang hi neh thei dingah tumtahnak a nei a si.

[3.14]

Minung Sersiam San

Dungthluntu Paul in hitin a ti, “vancungmi pawl khal thuthennak kan tong ding ti nan theilo maw si (I Cor.6:3)?”Cuti a sile kan lak ahhin vancungmi tlathla pawl kan lakih ret hi a tum tah mi a si maw? Himi dingih sersiam teh kan si maw? Cun Setan hin kan siatnak ding thu a hawl maw si? Hi thu hi ruattha sal aw; Pathian in vancungmi hmunthum then hmunkhat arun dawithlak nakah khan Khrihfa kan sinak lakah hin thlemnak, harsatnak, tlaksiatnak, lungzurnatnak leh thihnak tiangin a mi thianghlim pawl parah thuthen in in siatsuah thluh.

[3.15]

Hi thu hi ruattha leh aw, Pathian in sersiam hna a tuan laiah khan thil pakhat cio parah tum tah a rak nei. Vancungmi hmunthum then hmunkhat pawlin Setan ih dungthlun in cui hna cu an run tlansan. An hmabak mi cu netabik thuthennak a siih, an hnatuan ding tanglai mi sunzom dingin vancung ihsin hlonthlak an si. Curuangah kannih Pathian fale pawl hi thlem thlu dingah bomnak phunphun thawn in thlem rero a si ti hi kan theih ringring dingmi a si. Cun a sunlawinak a rak caanzo mi kha Amah zumtu pawl a netnak tiangih tuarsuak thei tu pawl hnenah ap lehsal a si ding.

Thuphuan  2: 26-27 26 Nehtu a si mi leh tuah haiseh tiih ka duhmi a net tiang a tuahtu cu ka Pa hnen ihsin ka ngah mi thuneihnak kha an hnenah ka pe ve ding. 27  Miphun dangdang tlunih uknak thu an hnenah ka pe ding; thirfung thawn uk theinak le tlakbel bangin khuai theinak thu an hnenah ka pe ding.

Thuphuan 21:24-26   24 Leilungmi hmuahhmuah in cui khawpi tleunak thawngin fehnak an hmu dingih leilung tlun siangpahrang pawlin cui khawpi sungah an lennak sumsaw an keng ding. 25 Cui khawpi kawtka pawl cu sun nihlawh in an ong, an khar nawnlo ding, ziangahtile cu tawkah zan a um lo. 26 Leilung miphun hmuahhmuah in an lennak cu cui khawpi ah an rak keng ding.

[3.16]

Pathian in a dawizo mi vancungmi pawl kha anmah hnak tamsawn in a rak ai-awhter hmana si menthei, a sinan cuti rak si ta bang sehla buainak khal an tong sinsin ding tinak a si. Cuvekin Pathian in amah dokalhnak hi a huat tuk ruangah a sersiam mi hmuahhmuah hi vancungmi pawl hnakih niam deuh in a rak ret. Cui sinak niamdeuh ih a ret cingin amah anrak dokalh thotho. Cuvek dinhmun a si ruangah minung hicun a cahlonak ihsin thlemnak do ding ahcun Thlarau Thianghlim tanpinak a tul ringring. Milai sung ahhin, Pathian in mi pakhat a sersiam ih cumi cun sualnak hma le umdan a thei thluh. Minung lak ihsin Pathian in a hril dingmi cu sual tuah ruangih nomnak hnakin felnak a hril sawntu, Setan aiih Amah Pathian hril sawntu le thihnak aiih nunnak a hril sawntu an si ding.

[3.17]

Pathian in zumtu hmuahhmuah hi Jesuh Khrih ah in finkhawm leh dingih thlemnak parah nehnak in pe hai ding; cun thlemtu pa leh sual mipuhtu pa cu a nehsak hai dingih a thlak mi vancungmi pawl khal kha an thosal dingih amai tumtahnak vekin a kimter thluh hai dinga si. Hitivek ih harsatnak an tuarnak ruangah vancungmi pawl dinhmun thlengtu dingah antling nasa ding.

I Kor. 6:2-3 2 Pathian mi pawl in leilungih thu hi an then leh ding ti hi nan theilo maw? Cutin leilung thu thentu nan si ding ruang ahcun nanmah lakih  thu nepnawi, thu terek tete pawl cu nanmahte’n nan relcat theilo maw? 3 Vancungmi pawl hman an thu kan then leh ding ti hi nan theilo maw si? Cuti a si ruangahhi leilung kan nunnak ih thuhla pawl cu kan rel thei a tul a si.

[3.18]

Pathian hin a mi rinum pawlih thlarau hi sankhat hnu sankhat a thur vivo hai a si. A sinan a rak dawizo mi vancungmi pawl ai ah mi paziat a samlai ti lawngte cu amah lawngin a thei, cule ziangtik ah a cem leh ding, cun nehnak a cozo tu pawl hin ziangtik ah an rawlsengnakcan a cem ding ti pawl hi amah lawngih theih thei mi thil a si. Kannih ngaidam cia, thisen ih leimi fa pawl hi nikhat nini ah vancungmi pawl kan aiawh leh ding a si, A VA MAK VE!

 <Bung Hmaisa |A Sung Um Thu |Bung Neta>