A SIATZO MI MILEM PAWL
Hminsin: Cangantui dinhmun theifiang dingin "Casiartu Hnenah" timi siar hmaisa aw.
[7.1]
Thu El awknak
Milai in Pathian thu a zirthiam tir ihsin tui ni tiang ruatcia thu hi elawk tam zet mi pakhat a si. Ziangmawti zawngin simaw zumnak hi sa khua ah a rungcang, cun rongbawlnak khal hi Pathian in dinhmun nei in mi a kawhnak ihsin ra cangsuak mi a si ve. Mihrek cun Pathian ih fimnak (theihnak)le huham cahnak khi sualnak thu ihsin thusuhnak an tuah theu. Hi thusuhnak hi kan Khrihfa nunnak ah tuisun ni tiangin rel a hlawh nasa. Hi thu rualran zet thu hi pahnih in an um, cumi hnuai ah sakhuanak pawlpi pahnih an um bet. Ruatlawk thu hi siarkop nambat pahnih bangaw mi vek an si.
[7. 2]
Kap Khatnak
A kap khatnak hin thusuhnak buaithlak zetzet thu a rel ih, milai in Pathian ih sinak a hmuhdan pahnih a dingfelnak le a thianhlimnak thu tla a rel cih. Hivek thuruahnak in a suahter mi thu cu Pathian ih ziangkim theitu a sinak le ziangkim tithei a sinak thu hi a si. Ziangkim theitu le tithei tu a si ahcun a hramthok tir ihsin amai duhdan hlir in thil a tuah rero ih, Lusifar dawithlak a si lai ihsin siseh, vancung mi ihsin milai tluksiatnak tiang ih thilcang mi hmuahhmuah khal a zate'n amai ceibawl thluh a si an ti.
[7.3]
A simduh mi cu vancungmi hotu Lusifar khal a siam hlan ihsin uangthuang aw ding le hngal dingin a rak tumcia ih a rak ruatcia tinak a si. Cutin Lusifar le a dang vangcungmi then thum lakih then hnih khal in a dungthlun in in do ding ih, ka hlonhlo hai ding ti khal a tumcia tinak a si. Pathian in Lusifar le a ho pawl kha a ruatcia vekin an tuah mi ruangah siatsuah ding khal a tumtah cia. Kanmai nunnak hrang men ih Pathian tumtah le duhnak kan famkim ter nak ruangah nungcing khal in helram ah kan thleng thei. Ziangruangah? Ziangahtile kannih cu hloral dingih ruatcia mi, tuah thei mi neilo kan si. Runsuah awkdan um lo, suanlam ding umlo, zangfahawknak le thiam thurel ding khal neilo dinhmun kan si.
[7.4]
Milai hi Pathian in a rak sersiam laiah a thinlung tinuam tu dingah milem te vekin a rak tuah. Hiti ih kan ruah a sile milai hi Pathian in amai nomnak hrangah a rak tuah ti lawng hman silo in misual ding hrimhrim in a tuah ti a tul(Rom 3:13; I Jn.1:10). A sile minung hi ziangtin misual ah a cang? Thlemnak ah a tlu. Zo in a thlem? Hmuandum sungih rulpi. Cui rulpi cu zo in hmuan sungah a rak ret? Amah Pathian thotho a si. Cuti a sile rulpi cu zo in a rak tuah? Amah Pathian (Kol.1:16). Minung hi thlemthluk theih dingin zo in a rak tuah? Amah Pathian hlir a si thluh !
[7.5]
Hibang pawl hi kan ruah vivo a sile an zaten Pathian hlir a si, a hramthok ihsin mihrek cu siatralnak le kumkhaw hrem dingah, cun mi hrekkhat cu rundamnak co dingah le kumkhaw nomnak lalram hrangah ti'n a sersiam cia mi an si. Cuti a sile, Jesuh Khrih ih thinglamtah le a thawhsal nun in ziangtluk in man a nei? Dengkher takih kan ruat ahcun Pathian hi mi thleidan a neih ruangah mi hrekkhat kum khua'n harsa tuarih hrem dingah mi a rak tuah tinak a si ding. Cuvek cu ziangkim titheitu Pathian a sinak phuansuah awknak a si thei pei maw? Hi tivek ih el awknak hi Pathian thu in a tidan a si pei maw?
[7.6]
Hi thu zirhnak a pomtu pawl cun Pathian ruahdan cu kannih ih ruahdan vek a silo ih a dingfelnak khal kannih ta a silo ti'n an relrem ding. Bible ih sim mi cu simsawng in Pathian Beltuahtu cun bel tlunah a duhduh in thu a nei an ti. An dik pei maw?(Rom 9:20-21). Cuvek ih a um thluh a si ahcun kan pom ve a tul. Cuhnak ih tampi a tul a um lai hrih. Pathian thilti theinak lengah huham dang a um ahcun ziangtin so Pathian cu ziangkim tithei a si thei ding? A huham dokalh tu an um ahcun ziangtinso ziangkim tithei Pathian a si thei ding? Pathian cu thil tithei bik a si ti cu eltheihlo mi thil a si. Cumi cu thil tenau men a si maw? Thungai ih kan sim a sile, thil titheinak huham hmuahhmuah cu Pathian hnen ah an um thluh ih a rinsan mi pawl hnenah pek mi a nei a si.
A Thu
[7.7]
Ruatlawk thu hi cu thurin-lo thurin ropi tak pakhat a si ti'n ruah a tha bik. Kum zabi pakhat lai ihsin Cathianghlim ngantu pawl hmang khalin Thlarau Thianghlim in ruatlawk nak hnuaiah a rak phuangsuakaw dahlo. Thlarau Thianghlim in Thukham Thar ngantu pawl hmangin thlarau lam thuhla tampi a rak phuangsuak ko, a sinan anmah lakah ti a silo. Thuthimnak ah: Paul in Korin bung khatnak ah rualremnak thu a zirh ih bung hleihnih nak ah a run zirh bet. Matthai bung kulhluan li nak khalah Jesuh Khrih in a voihnih ratsalnak ding thu a rak sim, a sinan ruatlawk thu hi cu Rom cakuat sungah voi hnih leh Efesa cakuat ah voihnih veve a tarlang, cumi cu zirhnak a ti lo. Ruatlawk thu ih an sirhsan theubik mi cu Rom sungah bung kua a hleice in cang kua ihsin kulhluan li nak tiang ah, cumi cu himi bungcang lawng ih famkim khal a si hrihlo nan.
[7.8]
Mi tampi cun a tlun ih kan sim zo mi kumkhaw daih a sinak thuhla hi a sual zawngin an thei ih Pathian ih mizia a silo zawngih simfiangnak ah an rel tum. Hiti'n an ti, a hrilmi pawl cu leilung semsuah hlan in a rak ruatcia zo (Efe.1:2) ziangtizawng khalin rundamnak cu a hlo theilo ih laksak khal a theih nawn lo. Cutin " voikhat rundam catuan daih" ti ah an zirh aw ciamco.
[7.9]
Hi thu hi thungaithlak in kan ruah le kan rel ih kan elawk ahcun tawp le tai ti umlo khop in reltheih mi a si. A sinan cui thu kan ruahfel ngah hnu cun hril ding pahnih te lawng kan nei ti a fiang mei. Pathian hi bikhiah nei vekih ruat in, tlaksamnak le titheilo mi nei ih kan pom cengmang lo a si ahcun, bikhiah neilo ziangkim tithei ti'n kan pom a tul a si. Pathian hi bikhiah neilo a si ahcun Cathianghlim ih kan hmuh bangin minung hmuhdan tawk khal ah, thuphanper le mibum a si a tul. Ziangruangah? Ziangahtile sualnak le a rahsuah thu ah thu a nei kan ti si ahcun amah le mah khi dingfel le thianghlim in a rel aw men ah a cang ding. Hi mi hmuhsaknak ah Pathian cu milemsiat zo mi tuahtu dinhmun ah a cang ih kan theih banlo in sual a suahter tu vek ah a cang. Cule a famkim, a thianghlim le a dikfel mi kan Pathian in mi hrekkhat kha amah thlun tu dingah a tuah ih mi hrekkhat lawngte amah dokalh le a thu el tu dingah a tuah hrim ti ah a cang lala. Cuti a ciangtawk lo a sile hitin, Pathian in mi hrekkhat cu ruahsan ding khal nei nawnlo in a tuah ih Amai remruah cia nak vekin sual ih an tluk le cawhkuannak a phunphun a pekih a kumkhua in hremnak le tiduhdahnak tuar dingah amah lala in a thlah hai fawn.(Matt. 25:46).
[7.10]
Jesuh vekin a dik pei maw? Jesuh cu Pathian hmuihmel kengkawh tu, Pai hmuithlam a si. Curuangah Pathian hi sualnak parih thu neitu a si ahcun Jesuh khalin a nei ve ding. Jesuh Khrih cu Pathian hmuihmel kengkawh tu (Kol.1:15) a si ahcun anih cu bumawknak ah a telpi tu a si ding. Jesuh hin sualnak a tuah mi le kan thei fawn lo, cu ai ah a hlanawknak in sual hripi cu a satcat zo. Curuangah hitin kan ti thlang, kan suak thlang kei uh, ti'n.
[7.11]
Pathian Hi Amah le Mah A Relawk Vek A Si Maw?
Pathian in amai bulpak thu ah, "minung vekih thuphan per ding a silo thu" a rel (Mipum. 23:19). Amah kan zum thei maw? Kan zumlo ah teh ziang hlawknak a um? Milai hi amah te a rundam aw thei maw? Pathian cu a thutiamkam cia mi hmuahhmuah ah a rinum. Tui ni tiang thuphan a per ti kan thei dahlo. Cu cingin rinhlelhnak kan nei lai thotho ding maw? Kan nei a si ahcun amah ka duhdawt in ka pom ti cu ziangtin kan ti thei ve ding? Amah na rin theilo ahcun zodang so na rin thei nawn ding?
[7.12]
Kap Hnihnak
Ruatlawk thu hi khatlam kap a silolam zawngih zoh cun aanhai thlak zet thusuhnak suahter theu tu pakhat a si. Cui thusuhnak cun hmuhdan danglamzet a suahter bet, Pathian in amah le mah a sinak le a mizia a rel awk mi pawl khal diklo ah a cang thluh zik. A sinan a sinak le a mizia thawn bangaw lo zawngin Cathianghlim in a rel ih kan thei hi cu Bible kan theihdan le kan leh dan a diklo tinak sawn a si. A pakhatnak ah, Bible ih sim mi " thutak "timi hi kan simfiang ta a tul. Jn. 17:17b ah Jesuh ihsin Pathian tong mi ah, " Na Thu cu thutak a si" a ti. Pathian Thu cu thutak a si ahcun a sinak le a thianhlimnak thu khal hi Amai thu sirhsan thotho in kan rel a tul. Pathian thu in Amah cu duhdawtnak a si a ti(I Jn. 4:8). Leitlun mi thawn rualremnak a tuah sal(II Kor.5:19). Mi zohman hloral lo ih sualsirnak an neih ding a duh(II Pit. 3:9). Pathian, in Rundamtu cun mi hmuahhmuah thutak thei ih rundam ding hi a duh mi asi (II Tim. 2:4).
[7.13)
Johan 3:16, Thukham Thar ih sim tambik pakhat, ahhin Pathian in a zumtu hmuahhmuah hloral lo in kumkhaw nunnak an ngah ding thu a sim. Hitawk ih a sim duhbik mi cu duh thlannak thu hi a si. Pathian cu duhthlan theinak neitu a si. Kannih hi Amai hmuihmel kengin sersiam kan si ih curuangah duhthlan theinak kan nei ve ti mi hi thudik a si (Sem.1:26). Kannih khal hi pathian kan si ve tinak a si. Pathian te kan si!(Jn. 10:34). Cuvek in vancungmi pawl khalin duhhril theinak an nei ve; cuti silo sehla Setan ih dodalnak kha thil cangthei a si lo ding.
Titas 1:2 le Johan 14:6 pawl hi Pathian in bikhiah neiih a rel awknak thu a si maw ti mi thusuhnak pawl hi milai ruahdan cun thil harsa a si.
Titas1:2
Cui kan biaknak cu kum khaw nunnak ruahsannak ah hram a bun mi a si. Thuphan a per dahlo mi Pathian in hi nunnak cu leilung sem hlanah in tiamkam zo mi a si.
[7.14]
Pathian thuphan per theilo a si ahcun bikhiah nei Pathian a si a tul.
II Timote 4:8
A tu cu ka Bawipa, a ding mi thuthentu Bawi in cui ni ih i pek ding mi nehnak laksawng ka hrangih in retsak mi cu ka hngak. Cui laksawng cu dingnak sui lukhum a si ih keimai hrang lawngah a silo; duhdawtnak thawn amah a lang ding a hngaktu hmuahhmuah hrang khalah a si.
[7.15]
A dingfel mi thuthentu a si ahcun diklo ih thuthentu cu a si thei lo.
A dingfelnak le thianhlimnak ruangih bikhiah nei Pathian si le silo thu ahcun thusuhnak tuah ding a um nawnlo. Jeim 1:13 sungih thu pawl hi ruattha sal aw.
Jeim 1:13
Cubangtuk hniksaknak cu mi in an ton tikah, Pathian in i hniksak a si, ti ah zohman in ti hlah seh.
Ziangahtile Pathian cu sualnak in a hniksak thei lo ih Amah khal in zohman a hniksak hai lo a si.
[7.16]
Pathian cu sualnak in a hniksak theilo ti cingin ziangtin sualnak tuah tu vekih kan puh thei lai thotho? Pathian ih hlanawk duhnak thinlung mizia cu a laksawng pek mi ihsin a rung langsuak. Amah cu minung dinhmun ah cangih a hlanawknak in minung a duhdawtnak le a ngaihsak nak a tarlang. Cutin Pathian in a Fapa neihsun hlannak in a dingfelnak leh a thianhlimnak mizia khal a run langter ve. Curuangah Pathian hi bikhiah nei a si kan tinak a si. Diknak nun hnawl dahlo ding tiangih bikhiah aw tu cu Amah thotho a si.
[7.17]
Israel pawl ih profet siangpahrang a si mi David in Thlarau Thianghlim fialnak in Pathian ih mizia a hnuailam vek hin a rak then hai.
Saam 145
1. Na maksak zia cu ka tlangau pi ding, ka Pathian leh Siangpahrang; kumkhua in kumkhua tiang na hnenah, lung awi thu ka sim ding.
2. Nitin ten ka lo lawm ding; kumkhua catlo in ka lo thangthat ding.
3. Bawipa cu a lianngan ih, nasa zetin thangthat ding a si. A maksak zia cu theih ban ding a si lo.
4. Na thil tuah mi pawl cu sankhat hnu sankhat ah thangthat ringring a si ding. Mangbangza na tuah mi pawl cu an than ter ding.
5. Minung in na sunlawinak le na huham cu an sim an rel dingih, mangbangza na tuah mi pawl cu ka thinlungin ka ngaihtuah ringring ding.
6. Mi in thilmak zetzet an tuah mi an sim dingih, kei in na tumzia ka phuang ding.
7. Na that zia an rel dingih zangfahnak na neih zia hla in an sak ding.
8. Bawipa cu mi duhdaw tu le zangfah tu a si; a thinheng a har ih duhdawtnak in a khat.
9. Mi hmuahhmuah parah a tha; a tuah mi hmuahhmuah parah lainatnak a nei.
10. Maw Bawipa na semsuah mi hmuahhmuah in an lo thangthat dingih na minung pawlin lungawi thu na hnenah an sim ding.
11. Na uknak sunlawi zia leh na cahzia cu annih in an sim ding.
12. Cuti cun mi hmuahhmuah in mangbangza na tuah mi leh na uknak huham sunglawi cu an thei ding.
13. Na uknak cu kumkhua in a hmun; nang cu kumkhua in siangpahrang na si. Pathian cu a thukam mi hmuahhmuah kimter tu a si. A thil tuah mi hmuahhmuah ah a tha.
14. Harsatnak a tuartu hmuahhmuah a bawmih mi lungnem hmuahhmuah a cawisang a si.
15. Nunnak neitu hmuahhmuah in, beiseinak nei in amah an zoh. An tul tikah anih in rawl a pe hai a si.
16. Khopkham in a pek hai ih a tum a sen ih tul mi hmuahhmuah a pek a si.
17. Bawipa cu a tuahmi hmuahhmuah ah a dik, a tuah mi tinkim ah zangfahnak a nei.
18. Bawipa cu amah a kotu in kiangah a um ringring; thinlungtak ten a kotu ih kiangah a um ringring.
19. Amah a tihtu pawlih poihai mi cu a pe, an aunak a thei ih a run hai a si.
20. Amah a duhtu hmuahhmuah cu hum; a sinan mi thalo hmuahhmuah cu a ti hloral ding.
21. Bawipa cu ka thangthat ringring ding; a semsuah mi hmuahhmuah in a hmin thianghlim cu, kumkhua in thangthat haiseh.
[7.18]
Anih cu cungnungbik Pathian a si ih cui a sinak in amah te a bikhiah aw ih a thianhlimnak, dingfelnak leh duhdawtnak hnatuannak ah a thaap aw. Cutin Amah le mah a hlan aw. Cucu a Fapa neihsun hmangin a si ih a hlanawknak nun le mizia a run puangsuak. A si ko, Pathian cu bikhiah nei mi a si. Anih cu raithawinak hrangih naute pawl ur that tu Molech pathian vek a silo, cuvek tuksumza sualnak a tuahtu pawl meisa ih siatsuah tu Pathian sawn a si. A sersiam mi ti borhhlawh tu le siatsuahtu thil hmuahhmuah thianfaiter nak dingah leh a minung pawl thinlung kilhim ih nuamter dingah meisa bangin a ding ringring tu a si.
[7.19]
Mi zokhal a sualsir ih A hnen ra pansal tu pawl hrangah kumkhaw nunnak pe dingin Pathian in a rakruatcia zo a si. Pathian in mi hmuahhmuah hi a zangfahnak in a rak hril ih, a Fapa neihsun hmangin milai ah rungcang in rundamnak a rung pe. Kannih milai in kan hril hmaisa silo in Ama'n in hril hmaisa sawn a si (I Jn. 4:19). Mi zohman hloral dingih ruat mi an um lo, lung sirnak nei dingin a duh sawn a si (II Pit. 3:9). Cui Pathian ih kauhter mi zangfahnak kut cu kannih in zumnak in rak cohlan ding hi kan hna a si. A sinan Pathian in a pek mi lak sawng cu mi hrekkhat cun an sang dingih hrekkhat cun sang loin an um kei an hloral ding ti cu A fimnak in a theifiang thluh cia. A sinan mi tampi cun an zum ih cahnak huham le fa sinak a pe hai (Jn. 1:12). Hi Bible cang ihsin thu pahnih a ra langsuak. A thu khatnak ah cohlan ding hi kanmai lam (duh thlannak) ti mi leh, " mi tampi cun" a ti ruangah a cohlang le pomtu ding hi mi hmuahhmuah cu an si lo ding ti'n (Matt.7:13-14, Matt.4:17).
[7.20]
Khaukhihnak Ih Duhsan
Khaukhihnak/ruatlawknak timi hi milai in Pathian ih simdan ih simfiang a tum a sile kan ruah that ta a tul. Webster's Dictionary ahcun minung cun hitin simfiangnak an nei.
[7.21]
Khaukhihnak:
1. Khaukhihnak hnatuan lole khaukhih timi
2. Khaukhih cia mi dinhmun lole khaukhih zo timi
3. Van lairel; vawrtawpnak
4. (A Thuzirh). A. Pathian in a hnen thlengih kumkhaw nunnak co dingih ruatcia nak.
( Hi mi hi cangantu cun a hleice in theology lam hawi in a sim tum.
Mi zokhal" timi ah hin kannih khal kan tel ve ti hi hngilh aw hlah).
B. Pathian ih a catuan lairelnak ahcun mi hrekkhat khal pawl hi kumkhaw nunnak cotu ding an si.
( Hi cangantu in hi tawkah an theihpalh theu mi " hrekkhat pawl" ti hi a telh hrim).
[7.22]
Himi thu ahhin khaukhihcia timi simfiangnak kan zoh cih a tul: ruatcia, vaukhan sak cia ti vekin kan hmangih a hleice in Amah riantu dingih a ruatcia nak ahhin a si.
[7.23]
Webster's Dictionary ih simnak vekin a cafang hram kan lailang asile kan Bible theihdan le a Pathian thu zawng ih zoh tikah thumal te lawng sihmansehla a tidanglam ter thluh tu ah acang. Bible ih a cafang langdan kan zoh hnik pei ih kan theih tul mi cu, a "ruatlawk" timi le "a ruatcia zo" ti cu a umnan " ruatlawknak" timi cafang cu a rel lo a si. Hi tongfang hi Thukham Thar lawngih tarlang mi a si. Hi cafang hi Greek tongfang ihsin laksuah a si. A sim duh mi ciah ziang a si pei?
A hnuailam vekin Strong's Greek Dictionary ahcun a simfiangnak a pe:
[7.24]
Hi tongfang hi Greek cun proorizo ti a si ih Pro-or-id-zo ti in a aw a suak. Greek tongfang "pro" timi in a ra ih (Strong's No.4253) a duhsan mi cu "lawk" tinak a si, thimnak ah a hmai ah, a hlan, lole thupi deuh tinak a si, cun Greek tongfang horizon Strong's (No.3724 Greek) ih sim duh mi cu tuanvo peknak ih sim uarnak, cungnungbik ih thupek, a cekci ih simcia nak: a hlankhan ih khaukhih cia, ruatcia, ruatlawk tinak a si.
[7.25]
Webster's Dictionary leh Strong's Greek Dictionary ih sim mi hi fiangten kan zoh tikah an simdan a bangaw aw. Curuangah kei cun khaukhihnak timi tongkam hi ka duh bik. Bible bungcang ih proorizo timi le khaukhih, a si lole ruatlawknak aiih hman mi ruatcia a si lole ruatlawk ti hi ruahthat tul a si.
[7.26]
Khaukhihnak a si lole ruatlawknak ti tongfang hi hmun (4) ah hman a siih a hnuailam ih Bible bungcang ah voikhat cio kan hmu ih: Rom 8:29, Rom 8:30; Efe. 1:5, Efe. 1:11 pawl ah an si.
Rom 8:29
Pathian in a (hrilcia) mi pawl cu a Fapa bangtuk si dingah a dangten a ret hai; cuti cun unau tampi lakah a Fapa cu pakhatnak a si nak dingah a si.
Rom 8:30
Curuangah Pathian ih a dangih a retcia mi pawl cu kawh khal a ko. Cule a (kawhmi) pawl cu thiam a coter ih a sunlawinak khal a tawm hai a si.
Efesa 1:5
Pathian cun Jesuh Khrih sungin a fale si dingah a rak (tum cia zo). Cumi cu a lungawi mi leh a tumtah mi a si.
Efesa 1:11
Ziang hmuahhmuah amah ih tumtah mi leh relcatcia mi vekin a kim theh. Khrih thawn kan pehzom awknak thawngin a minung si dingah Pathian in in hril zo cu mi cu amai tumtah mi a si ih a hramthok ihsin a rak (khaukhihcia) mi a si.
[7.27]
Khaukhih zonak ti leh ruatcianak ti pawl hi thuhmun an si. Tui kan buaimi cu an tican sisawnlo in Pathian mizia kha ziangtin kan relfiang ding ti sawn a si.
[7.28]
Pathian cu ziangkim tithei tu a si ruangah ziangkim hi amai nomnak hrangah a si ti na zum ve maw; a duhdan hlir in ti hi? Cuti a si ahcun, hi leitlun ahhin sualnak le a duhlo zawng thil zianghman a rak um lo ding. Cun Amah Pathian ih duhzawng lawngin thil a um thluh fawn lo. Tlaksiatnak kan ton can ahcun kanmah lala khal in cutin kan ruat theu. Pathian ziangkim tithei a silo titu cu sualnak lawng hi a si theu. Curuangah cuvek si ding cun sual khal a um lo ding. Pathian ziangkim tithei rak silo hmansehla thilti theinak nei tambik a si ti cu zum a tul thotho a si.
[7.29]
Pathian ih duhnak (will) hi voi tampi ahcun thu hnaihnok zet a sinak a um theu. Hitin a sile ziangkim tithei ti mi hi kan zumlo a tul ding. Ziangkim tithei a si ahcun kannih cu milem khih mi bangin a tulnak nakah amah riantu ding men kan si. Pathian ih duhnak a hnaihnok awknak thu a hnuai ah kan zohhnik ding;
Semtirnak 3:19, Pathian "himi hi na ei lo pei," a ti, a sinan Adam cun a ei thotho, Semtirnak 6:6 "-----Cumi ruang ahcun Pathian in minung a rak tuah hi a sir aw," ziangruangah tile milai ih tuahsualnak ruangah a si. A sinan minung cun sual a tuah vivo thotho. Suahlannak 32:9-10 " Zohhnik hi bang pawl cu mi lungruh pawl an si------ curuangah a kham i tum aw hlah, ka thin a heng tuk a si hrangah ka siatsuah thluh hai ding." A sinan a siatsuah hai cuang lo.
I Samuel 8:7 Pathian cun Israel pawl ih siangpahrang si a duh ko nan annih cun an kiangkap ih um miphun dang pawl bangin tisa mi leh thisen suahtu siangpahrang kha an duhsawn, cutikah "Kei cu anmah uk lo dingin in hnong zo " a ti. Ziangtinso mi pakhat ih duhthlan theinak a neihlo ahcun Pathian a hnawl thei ding. Luka 13:34 ah Jesuh Khrih cun Jerusalem fa pawl (A minung) kha arpi in a thla hnuai ih a fale pawl a op bangin humhim ve a duh nan annih in "anduh lo" ih op lamlam hnakin A profet pawl leh A palai pawl kha an thah sak.
[7.30]
A tlun ih kan sim zo bangin, Pathian cun mi hmuahhmuah sual sirawk ding hi a duh a si. A Fapa neihsun leitlun ih a run thlahnak san hi mi malte hrang lawngah a silo. A sinan hi leitlun pathian Setan ( II Kor. 4:4) in, A zangfahnak laksawng kha rak cohlang lo dingin an mit a ti cawtsak thluh ti khal a thei thluh.
II Korin 4:4
Cupawl cun an zum duh lo, ziangahtile hi leilung ih pathian siava in an thinlung cu thim lakah a ret ringring ruangah a si. Thuthang Tha ih tleunak, Khrih sunlawinak ih si a ra mi tleunak cu hmu hlah haiseh ti ah cui pathian cun a phen ringring a si. Cui Khrih cu Pathian vek cekci a si.
[7.31]
Hminsin aw, thutak hmu theilo dingin mi mit cawter tu hi Setan ho khaw a si, Pathian a si lamlam lo. Pathian ih thilti theinak khi a tuahmi in maw lole a tuah theimi in so kan tah ding? Hiti hin zoh sehla, kan pa le pawl hin sobul la in pepawk cu ol-ai ten in tuahsak thei ih, a sinan cumi lawng cu a ti thei mi a si maw? Culawng silo, mitampi cu siatsuahawk pang nak le natsia tivek men khi ziangah an siar lo, a cak deuhdeuh lam hman an um. Kan thilti theinak hmuahhmuah hi mi hmuh ih kan tuah lai mi le kan tuah zo mi pawl silo in kan tuah theinak sawn ihsin tah a si sawn. Pathian khal hi cuvek ciah a si.
[7.32]
Pathian in kannih hi a fial dandan ih tuah ding in milem leh thaicangcop mi thilri bangin in rak sersiam thei ko nan cutin in rak sersiam lo. Ziangah a si pei? Milai hnenah duhthlan theinak a rak pek duh ruangah a si; cui a duhthlan theinak cun Pathian a hril theinak dingah. Cui Pathian duh ding ih duhhril theinak cu milem pawl le thaicangcop thil pawl hnakin duh a um sawn. Milai hnenah Pathian in amah hril theinak a pek mi cu direm thlak bik le sunglawi bik mi a si ih milem le thinlung neilo thaicangcop thil pawl ih thangthatnak le sunloihnak pek mi hnakin Pathian in a duhsawn mi khal a si.
[7.33]
Milai sersiam a si hlan, Setan in Pathian a rak do lai ihsin, Pathian in milai hnenah duhthlan theinak a rak pe lohli cia zo. Setan in (thlak a si hnu ah) milai hnenah Pathian ih pek theilo mi thlemnak(Jeim 1:13) phunphun a rak pe. Cuvekin Pathian khal in a tluse zo milai hnenah sual do theinak a sungah a rak ret. Cun milai khal hin a zumnak hniksak le tuarter a sinak ruangah a thlarau thazang cahnak in Setan raldo theinak a nei ve a si.
Jeim 1:3
Ziangahtile nan zumnak in cubangtuk hneksak harsatnak nan neh tikah tuartheinak a ra ti nan thei.
[7.34]
Setan (Lusifar), vancung mi lak ih fimbik le thil titheibik hin Pathian a dokalh thei a si ahcun ziangkim tithei Pathian a si ti mi hi ruah ding um tak a si. Cun Pathian hi sersiam mi hmuahhmuah tlun ih thuneihnak a neih lawngah ziangkim tithei a si ding. Cuti a si fawn si ahcun milai in siseh vancungmi khal in siseh duhhril theinak an nei nawnlo ding. Ziangkhal sisehla Pathian in a Sangbik le thil titheibik a sinak ruangah Amah duh dingin duhthlan theinak huham cu in pek a si.
[7.35]
A tlun ih rel zomi Setan, Lusifar ih Pathian a rak donak thu ruangah hin kan zum a tulnak thil pathum a um. A pakhatnak ah, Pathian hi ziangkim tithei a si ahcun zianglamkhal le bikhiah neilo a si a tul, a sinan bikhiah nei mi a si fawn. A pahnih nakah, Pathian cu ziangkim tithei sisehla cu Setan in a rak dodal thei lo dingih dokalh dingin duhthlan theinak thinlung khal a nei theilo ding a si. A pathumnak ah, cuti a rak silo ahcun, Setan in Pathian rak dokalh thei hmansehla a zuam zawng cun a rak dokalh ngam ding maw? Setan khal in ziangmawti cin ahcun neh theinak ka nei ve ti cu a ruataw ve a si. Curuangah a mizia hi kan duhlo hmanah Lusifar (Setan) hin kannih hnakin thlarau ram thu a thei kau deuh ti hi cu kan pom ngeingeia tul ih Setan in Pathian hi ziangkim tithei cu a silo ti cu a zum tengteng ding ti cu a fiang a si.
[7.36]
Kan Bible bu hmaisabik (Semtirnak) bungkhat cang khatnak ahhin "a tir in" ti'n a thok. Kanmah te thu kan suh awk ding mi cu "a tirin ziang ?" timi a si. Pathian a um tir ihsin tinak a si lamlam lo. Pathian in tir le hramthawhnak a neilo (Heb. 7:3). Sersiam mi hmuahhmuah hramthok ihsin ti khal a silo, ziangahtile milai um hlan ah vangcung mi pawl an rak um rero zo ti cu kan thei thluh (Thup.12:7-9). A sile ziang a duhsan a si pei? A duhsan cu leilung le a sungih a luah tu ding pawl sersiam thoknak a si ti hi kan theih a tul. Culai ahcun leilung hin pianhmang leh hmuithlam a rak neilo, bel tuahtu (Sersiamtu Pathian) pa hin a ceimawi hrih lo. Kan theihcia vekin leilung in pianhmang le hmuithlam siseh, a sung khalah zianghman a rak um hrih lo; thudangin kan sim a sile a tlolak pi in a um rialrial ih tipi thukpi cu thimnak in a khuh theh. Cutikah Pathian ih Thlarau cu tipi parah cun a leng, cuti'n lei
tlun can cu a rak um a si.
[7.37]
Hitin sersiamnak thar cu a rak thok; Milai tuanthu hramthoknak ihsin. " Tleunak umseh a ti ih tleunak cu a um," timi tongsuahnak ihsin a thok. Ziangruangah tleunak a rak um? Pathian cu cui sersiam thar mi pawl tuah tha dingah a ra thlengih curuangah a si. Cule Amah a thlen in tleunak timi a ra um ve hngal (I Jn. 1:5).
[7.38]
Cuti vekin Pathian in minung hrangih a rak ruatcia mi pawl kha siatbal a thok sal. Setan le a ho pawl dawithlak an si ruangah van raldonak khal a rak thok zo, (Thup.12:8,12,13). Rulpi tiin a hmin dang lakah kawh a si zo (Thup.12:9) ih a mizia in Amah dodal tu a si ti cu Pathian cun a rak hmu zo. Curuangah dingfelnak le ngaihtuahnak thiangih riantu dingah sualnak a rak tuah ti hi a hmaisabik nak a si lo. Josep ih thuanthu (Sem.37-35) ah khan vun ruat aw, a hleice in bung sawmnga cangkul thu ah khan. Sualnak, thatlonak le dokalh duhnak mizia in a khat mi Setan cun a thianghlim le dik mi Pathian ih tumtahnak cu ziangtin a do thei ding? Milai hnenah duhthlan theinak peknak in.
[7. 39]
Pathian in milai hi duhthlan theinak nei dingin a rak khaukhih. Nang khal cui duhthlan theinak zalennak thinlung nei thei ding ahcun na ruahnak kha a zalen hmaisat a tul. Setan hnenah Pathian in milai duhhrilnak thlengter thei dingin zalennak a pekih, milai hnen khal ah cumi rak hnawl le hril theinak zalennak a pek ve. Milai cun cui zalennak a neih mi in Pathian thuthlun a hril a sile laksawng thuthlun lo ding a hril le hremnak ngah ding a si. Milai hnen ih Pathian pek mi duhthlan theinak thu pawl hi Pathian in a Thu in a simfiang thluh. Milai cu Pathian hnenah kir thei a si lole tlansan thei khal a si, amai duhthlannak vekin a um thei.
[7.40]
Milem le thaicangcop men dinhmun le duhthlannak khal neilo sersiam mi pawl in Amah be ding le thangthat ding ih lai a rak relsak thluh cia hi Sersiam tu hrangah ziangtluk sunglawiza so a si? Sersiamtu cu sersiam mi pawl in duhhrilnak phundang ihsin Amah thu thlun ding le be ding ih an duhthlannak A hnen lam ih an pek lawngah sunlawinak a co ding a si. Cumi cu rinumnak le felnak a si. Pathian ih khaukhihcia mi khal a si ih A mi pawl hrangih a rak ruahcia mi khal a si. Pathian cun sangka a ongih mi hmuahhmuah an lut a sile siatralnak ihsin kumkhaw nunnak rundamnak an co thei, cu cu Khrih ihsin a si. Minung ih duhthlan theinak hi Pathian khaukhihnak sunglawi pakhat a si. Thinlung in a Pathian cu a rian ding maw a hnong ding si maw. Hi duhthlannak cu Pathian in milai kutah a rak pe; hihi a rak khaukhih cia mi le khaukhih rero mi a si.
[7.41]
Mi hrekkhat cun Amah an hril ding nan hrekkhat cun an pom lo ding ti hi Pathian in a hramthok ten a theicia zo. A duhnak tuahsuak tu dingah mihrek cu hril an siih a hrekkhat cu hril an si lo. Cui hrilmi (A thluntu dingih hril mi mi malte lawng) cu A thlawsuahnak le thukam mi co dingah a rak khaukhih hai. Milai hrangah a thlun thei ding mi lamzin pahnih a um ding ti cu Pathian in a thei cia, a sinan Amah lala in pakhat khat thlun theinak duhhril theinak a pek ih a khihhmuh sak. A bi deuh mi lamzin a si mi Jesuh Khrih ihsin a feh a hril tu kannih cu Amai Lal sungkua ah in canter(Rom 8:29). Cumi thlun lo in leitlun thil thawn rualpi awk ding a hril tu pawl cu a ral an si (Jeim 4:4) ih an tuh mi thlaici vekin an at lehsal ding (Gal.6:7-8).
Rom 8:29
Pa Pathian ih remruah cianak vekin, Thlarau Thianghlim ih kholhnak thawngin, thu awihnak le A Fapa thisen ih tlenfainak in a hril hai a si. zangfahnak le daihnak ce nan hnenah karhzai sin hramseh.
Jeim 4:4
Rinsan tlaklo milai pawl! leilung thawn rualpi tha si cu Pathian thawn ral awknak a si ti nan thei lo maw? Zokhal leilung a kawmtha tu cu Pathian ih ral ah a tuah aw a si.
Galati 6:7-8
Nangmah leh nangmah bum aw hlah. Zokhal in Pathian cu a dekcok theilo. Milai cun a tuah mi cekci ciar a khawm ding. A taksa duhnak hmunah a tuhtu cun cui a tuahnak ihsin thihnak a khawm ding; Thlarau thlaici a tuh ahcun cui Thlarau hnen ihsin kumkhaw nunnak a khawm ding.
[7.42]
Amah a hriltu pawl cu fa sinak le roco theinak a pe hai.
Johan 1:12
Mi hrekkhat cun an sangih an zum; curuangah Pathian fate can theinak a pek.
[7.43]
Mi hmuahhmuah sualsirnak an neih ding a duh, mihrek cun an neilo ding ti a thei nan.
II Piter 3:9
Bawipa cu a thukam mi kimter dingah a khul a fung a si ti ah mihrek in ruat hman hai sehla a khul a fung a si lo. Nan parah thinsaunak a neih ruangah a si sawn; ziangahtile pakhat te hman siatraknak tong lo te in mi hmuahhmuah an sualnak ihsin an kirsal theinak ding a duh ruangah a si.
[7.44]
Ama'n in hril hmaisa, mi hmuahhmuah in, a sinan mi hmuahhmuah in amah an hril lo. Ziangruangah a si pei? Ziangahtile kan mit ih duhnak, taksa hiarhalnak, uanthuannak pawl hi famkimter kan tum, cule Pathian ih in pek mi kan duhthlannak in cui pawl hril theinak in pek sal (I Jn. 2:16). Pathian in a hril mi hmuahhmuah a ko ih mi hmuahhmuah a hril. Cui a kawhnak rak sang dingih duh a hril tu pawl cu a hrilmi ah an cang, ziangahtile amah thlun ding an hrilsawn ruangah a si. Hi hi a si a rak khaukhih mi cu, a rak tumtahcia mi khal hi hi a si.
[7.45]
A Dotdot In Kan Zoh Ding
Dot # 1. Pathian in minung kha duhthlan theinak a pe ih a duh le Amah a hril dingih a duh le amai duhnak ah a feh thei.
Dot # 2. Pathian cun amah dodaltu a ralpa (Setan, Rulpi) kha amah a zumtu pawl hniksaknak leh zumnak ah an thazang a cah theinak dingah a hmang.
Dot # 3. Pathian ih mi hrilnak cu mi hmuahhmuah hi a mi pawl si dingah le Anih khal cui an duhhrilnak ihsin an hrilsuah mi an Pathian si dingin a si ih mi malte lawngin Amah an hril ding ti khal a rak theicia thluh (Zekh. 8:8; Heb. 8:10).
Zekhariah 8:8
Ni suahnak lam le ni tlaknak lam ihsin ka hruai kirsal dingih Jerusalem ah an umsal leh ding. Annih cu ka minung an si dingih keimah hi an Pathian ka si ding; rintlak zet leh ding zetin ka uk ding.
Hebru 8:10
Cule Bawipa in: " A ra ding mi tikcu can ah Israel mi pawl thawn hibangtuk in thukamnak ka tuah ding; ka dan cu an ruahnak parah ka ret dingih, an thinlung sungah ka ngan ding. Keimah hi an Pathian ka si dingih annih cu ka minung an si ding.
Curuangah a si Pathian in khuahlan laiah Israel sungkua hnenih thuthlunnak a rak tuah; ka dan thu pawl hi an thinlung sungah ka ret dingih, an thinlung sungah an ngankhum ding: cule an Pathian ka si dingih ka mi pawl an si ding ti ah a ti.
Dot # 4. Zokhal amah a hriltu pawl cu an zaten a hmuihmel cuang a Fapa ih pom dingin a rak ruatcia (Rom 8:29).
Rom. 8:29
Pathian in a hrilcia mi pawl cu a Fapa bangtuk si dingah a dangten a ret hai; cuti cun unau tampi lakah a Fapa cu pakhatnak a sinak dingah a si.
Dot # 5. Cui amah a thluntu pawl cu ai awh thihsaknak ruangih thianghlim dingin hrilmi an siih Fapa ah lungawinak an ngah (Rom 8:30).
Rom 8:30
Curuangah Pathian ih a dangih a retcia mi pawl cu kawh khal a ko. Cule a kawh mi pawl cu thiam a coter ih a sunlawinak khal a tawm hai a si.
Dot # 6. Mi zokhal tleunak lamzin a zawhtu cu dingfelnak an co ih, a sunloih ih kumkhaw nunnak a pek bet hai (I Jn. 1:7).
I Johan 1:7
Sikhalsehla amah cu tleunak sungih a um vekin kannih khal tleunak sungih kan um ahcun pakhat le pakhat pawlkomnak kan nei ih a Fapa Jesuh ih thisen in kan sualnak hmuahhmuaha tlengfai a si.
[7.46]
Pathian Ih Tumtahcia Mi
Kawhhran in hi thuzirhnak thu laklawh zet hi simfiang thei dingin thil pakhat te lawng a um ihcumi cu Cathianghlim hi a si. Pathian thinlung cu zo in a thei thei ding? Amah le mah, a thinlung kan hnenah rung phuangsuak aw lo sehla Pathian ih ruahnak le thinlung cu milai theihnak in a ban lo a si. Cui phuansuah awknak cu a hmaisabik ah Ca Thianghlim hmangin, a pahnihnak ah Amai aiawh Pafa neihsun, Thu- Tisa ih cangmi in a phuangsuak aw a si. Pathian in a thu thuk pawl cu a phuansuah si ahcun ziangah kan ruatbet duh rero? A Fapa in siseh, a Thunung hmangin siseh amai mizia pawl kha fiangzetin kan theih a duh ruangah, a hleice in a famkim zia theihter in duh.
[7.47]
Zokhal Timi Cu Mi Hmuahhmuah Hi An Si
Bible hin mi zokhal timi tongfang hi siang takin a hmang, a hleice in Thukham Thar sungah atam cuang. Thukham Thar bu cu Greek ca ih rak ngan a si ruangah hi tongfang cu cafang pahnih kom aw mi a si. Strong's ih simfiangnak bu sungah nambat in rak ngan khummi cafang pahnih a um, # 3956 leh 3588 ah kan hmu thei.
# 3956 ahcun pas; tin a um ih cucu tel thluh tinak a si, tongfang simfiangnak a si; appar. A dik (prim). Thu, zaten, ziangkhal, pakhat ciar, a pumpuluk tivek in san an nei. Hi Greek tong (pas) ih kan zohnak ihsin tumtah mi cu mi hmuahhmuah, zate ti hi a sawh duh mi a si.
# 3588 cu ho; a si ih telthluh tinak a si. Nu thu siseh pa thu siseh cun palak thu khal siseh an tel thluh. Aw niam aw sang zaten an tel thluh; simfiangnak, catlang ngan mi (vei hnihkhat cu tongkoseh danglam (idiom) vekih ngan hrelh hrim cang a um theu), pakhat, himi, hi nu, hi pa, tivekin hman mi tongfang a si.
O ho cafang cu # 3739 ah kan hmu thei (mi hmuahhmuah timi tongfang thawn a kaihhnoih aw).
[7.48]
Hi tongfang hi an pahnih in kan hman tikah, a simduh mi cu mi zokhal a si lole bulpak mi zate ti a si.
[7.49]
Mi zokhal ti mi tongfang hi Pathian khaukhihcia mi thurel tikah buainak thlentu thu pakhat a si. Pathian ih ruatfel thluhcia mi tiah a cang a si. Hi tongfang ihsin Pathian ih rundamnak thutum ahhin zo hmuahhmuah an tel tihi a fiang a si, cumi in a rundam ding mi cu hlawm dangten a rak ret khawl cia tinak a si. Pathian in a zangfahnak cu mi hmuahhmuah hrangah a tuah ih, cumi cu leilung semsuah hlan ihsin a rak tumcia zo mi a si. Pathian in amai hnen ihsin suak mi zumnak kha a tarlang ih, cumi cu a sersiam mi lakih mi mallai in sual nomnak cu hnawl ih amah thlun an hril sawn ding ti ruat in a si. Anih cun kan hlanin in rak duhdawt zo. Kan hril hlanah in rak hril zo, a sinan a tiamkam mi a laksawng cu a sawmnak rak dongsong tu pawl lawngin an congah ding a si. Anih cu mi thinnau mi pawl hrangah thuthlung Pathian a siih a si vivo lai ding. Ziangkim ahhin tulnak a neihter. Amah in hitin a ti, " Hitin nan tuah asile cutin ka tuah ding," tin. Mi hrekkhat cun rundamnak hi a lak a si ti'n an tang menthei, a dik ve ko, a sinan tulmi umlo ih a lak menmen thil a silo. Zokhal cumi a pomlo tu cu Khrih zum si loih vanram thlen tum vek a si.
Johan 14:6
Jesuh in, " Keimah cu lamzin le thutak le nunnak ka si Keimah ihsin siarlo zohman ka Pa hnenah an thleng thei lo.
[7.50]
Johan 3:16 sungih kan hmuh thei mi cu: " Mi zokhal (Khrih) a zumtu hmuah an hloral lo ding," ti a si.
Johan 3:17 A hrekkhat kan siar tikah hitin a si, " leilung cu Amah (Jesuh) in rundam dingah."Theih ding mi cu, zokhal in zate huap thu in an rel dah lo. Thuthimnak in;
[7.51]
Ka fanu te hi a tlangpi thu in zanlam nazi 2 ah tlawng an tum ih 2:30 hnakih tlailo ah inn ra thleng ding awm a si, a sinan a thlen theu tikcu caan ah a thleng rori ding tinak a si cuanglo. A tumtahnak dawn theitu thil tampi a pah thei mi le pah theilo mi tampi a um ve. Curuangahhi tongfang "ding" a si lole "lo ding" timi hi a si rori ding ti a rel theih cuanglo a si. "si thei "silo thei" ti thawn bangaw a si ih cucu a cang hlei sarihnak ah kan hmu thei. Himi hi catuan daih rundamnak timi thurin kengkawhtu pawl hrang ahcun pomluh a harsa vio ding.
[7.52]
Pathian cun thleidannak a nei lo. Milai zokhal a thliarhran cuang lo. zovek khal a ti se dah lo. A ngilneihnak cu mi hmuahhmuah tlun ah bangran ten a thlenter.
Dungthluntu 10:34
Piter cun a thawh ih, " Pathian cun zozo khal bangran ten mi a zoh a si, ti kha a tu ihsin kan thei.
I Piter 1:7
Pathian tihzahnak nan neih mi parah unau tlaihsannak bet uh; cule Khrihfa unau tlaihsannak parah duhdawtnak bet uh.
[7.53]
Bible ih sim mi thutak cu a hnuailam ahhin kan hmu thei.
Johan 1:12 "Amah a zumtu pawl hnenah Pathian fa si theinak huham a pek hai."
Hminsin: Khrih cun a zumtu pawl hnenah huham a pek.
[7.54]
Pa Pathian leh Khrih cu pumkhat an rak sile (an kom in) Khrih khal in Pathian a sinak in amah pomtu pawl hnenah huham a pek ve tinak a si, cumi ihsin thil phunhnih kan zirngah a si.
1. Cuti'n Pathian in sersiam mi pawl hnenah huham a pe.
2. Milai khalin duhthlan theinak huham a nei ih cumi hmangin a duh a hril thei.
Johan 5:24 cun fiangten a sim peh vivo ih A aw kan theih ih a run thlah mi a fapa ih a rundamnak kan zumih kan rak cohlang a si ahcun thihnak lan in nunnak kan co thei ve ding a si. Pathian cu hnaihnoknak tuahtu Pathian a silo (I Kor. 14:33). Hiti a si ruangah kanmai nunnak thuhla khal kanmai kut ah a ret a si ti in theihter tu Bible cang pawl hi daithlan ding cu kan si lo lawlaw.
Filipi 2:12.
Curuangah, ka duhdawt mi ka rual leh uh, nan hnen ka um laiih ka thu nan thlun ringring vekin leh, cuhnak hmanin a thupi sawn mi cu, nan hnenih ka umlo canah ka thu nan thlun ding hi a si. Runnak famkim nan ngahnak dingah tihzah leh thia phah in tuan rero uh.
[7.55]
Mi zokhal hi thutak ihsin tiavai tu cu amai thihnak hawltu a si.
Jeim 5:19-20
19. U le nau pawl, nanmah lakah pakhat khat thutak ihsin a pial ih a dang pakhat in a hruai kir a si ahcun,
20. Zinpeng ihsin misual a hruaikirtu in cui misual thlarau cu thihnak ihsin a runsuak dingih a sualnak khal tamzet hmansehla ngaidamnak a ngahter ding a si, ti hi cing ringring uh.
[7.56]
Milai ih duhthlannak thu cu kan rel seksek zo, a sinan Pathian ih duhnak thinlung kha ziangha a si? Pathianin ziang a duh? II Piter 3:9 ahcun Pathian ih thinlung cu tampi'n a langsuak zo a ti! "II Piter 3:9 Bawipa cu a thukam mi kimter dingah a khul a fung a si ti ah mihrek in ruat hman hai sehla a khula fung a si lo. Nan parah thinsaunak a neih ruangah a si sawn; ziangahtile pakhat te hman siatralnak tong lo te in mi hmuahhmuah an sualnak ihsin an kir sal theinak ding a duh ruangah a si." Pathian ih lungtum cu mi hmuahhmuah rundam ding hi a si, mi malte hlawmkhat te tivek lawng ih runsuah ding hi a silo, a sinan mi tampi cu mah leh tumtah cu an nei cio.
Van INN ah "mi hmuahhmuah" ti mi tongfang in a hruailut thluh.
[7.57]
Pathian in a lakih a pek mi laksawng thuhla hi himi tongfang maksak le awm-ang taktak kan hman rero hin a fiangter deuhdeuh. Hi thu cangthlan pawl hi tha takin ruat awla fimkhur zetin siar aw.
Matthai 10:32-33
32. "Mi pakhat in mipi hmai ah ka minung a sinak kha a tanpi ngam a si ahcun vancung ka Pai hmai ah ka tanpi ve ding.
33. Sikhalsehla mipi hmai ih i hnongtu cu vancung ka Pai hmai ah ka hnong ve ding."
[7.58]
Matthai 18:4-5
4. Vancung Uknak ih a tumbik cu mi tang a dortu hi nauhak vekin thinlung a neitu a si
5. Cun ka hminin hi nauhak pa te bangtuk a cohlangtu cu keimah cohlangtu a si.
[7.59]
Johan 4:14
Sikhal sehla keimah in ka pek ding mi tidai a in tu cu an ti a hal nawn lo ding. Keimah in ka pek ding mi tidai cu a sungah cirhti ah a cang dingih cumi cun nunnak tidai le kumkhaw nunnak a pe ding, ti ah a ti.
[7:60]
Johan 12:26
Zokhal keimah i rian duhtu cu ka umnak ah an um ve ding. Cule zokhal keimah i riantu cu ka Pa in upatnak a pe ding, ti ah a ti.
[7.61]
Johan 12:46
Zokhal keimah i zumtu cu khawthim sungih a um lonak dingah hi leilungtlun ahhin tleunak in ka ra zo.
[7.62]
Dungthluntu 2:21
Bawipai hnenah bomnak dil in a autu cu humhim an si ding; a ti.
[7.63]
Dungthluntu 10:43
Profet hmuahhmuah in amai thu cu an sim ih amah a zumtu hmuahhmuah in a hmin ih cahnak thawngin an sualnak ngaidam a si ding, ti ah an ti.
[7.64]
Dungthluntu 13:26-27
26. Ka phunpi Israel mi Abraham ih tefasin pawl leh hitawk ih Pathian a ra betu Zentel mi pawl hi runnak thuthang hi kan zate hrangih pek mi a si.
27. Ziangahtile Jerusalem ih a rak um mi mipi pawl le an hotu pawlin Jesuh cu rundamtu a siti ah an rak theilo, Profet pawlih rak ngan mi sabbath tin ten an siar mi thu khal a tican an thei lo. A sinan Jesuh an thahnak in Profet pawlih tongkam kha an kimter a si.
[7.65]
I Johan 4:15
Zokhal Jesuh cu Pathian Fapa a si ti a phuangtu cu Pathian thawn pehzomnak an neiih Pathian khal amah thawn pehzomnak a nei ve.
[7.66]
I Johan 5:1
Zokhal Jesuh cu Messiah a si ti a zumtu cu Pathian fa a si. Cule zokhal sisehla Pa a duhdawttu cun afale khal a duhdawt a si.
[7.67]
A hlanih kan sim zo bangin milai cun Pathian lole leitlun thil hi a hril sawn thei. "Curuangah mi zokhal hi leitlun thawi rualremnak a tuah tu cu Pathian ih ral an si ding (ral pawl).
Jeim 4:4
Rinsan tlaklo milai pawl! Leilung thawn rualpi tha si cu Pathian thawn ralawknak a si ti nan theilo maw? Zokhal leilung a kawmthatu cu Pathian ih ral ah a tuah aw a si.
[7.68]
Rom 6:24 cun danglam deuh hlekin a sim ve; a thenkhat cu kan theih dahlo mi tla an si men ding. Pathian ih sungkua ahhin, kannih cu zangfahnak, Amai zangfah ih rundam mi kan si. Zangfahnak hi misual runsuahnak ih Pathian ih pharh mi a ban thacak a si. Kannih hi a rak hlovai mi (Rom 3:23) mi kan rak si, tumtahnak rak thelh ih Pathian zangfahnak kutcak rak caan zotu pawl kan si.
[7.70)
A kutcak a pharhkau kan timi hi ziangha kan simduh? A kut kan pawk lai hlanlo cu kan sualnak ih thi ngeingei ding mi kan si. Kannih cu zumnak (kan kut) ruangih zangfahnak ih rundam (kan kutih a um mi) kan si (Efe. 2:8). Zumnak leh ruahsannak pawl hi unau faphir an si; then theih an silo ruangah rundamnak ah lotheihlo ih tul mi (Rom 8:24)an si. Curuangah zangfahnak co thei dingah tuannak kan tul nawn lo, Pathian in a lakin laksawngah in pe zo ih cumi cu Jesuh Khrih thisen in sualmawh neilo ah in tuah, a sinan kan rundamnak hrang ahcun kanmai tuan a tul. Ziangtin? Pathian in kan nunnak runtu dingah a zangfahnak cu a run sungbung ih a sinan kan rak cohlan lo a sile hlonhloh in kan um ding a si. Curuangah cui Pathian pek mi zangfahnak kauhter mi cu kan zumnak kut rori in kan kaihhnget a tul. Kan mit men duhlo ruangih kan hmuh theilo ahcun kan hlothla thotho ding a si. Curuangah kan zumnak hnatuan hi can a um lai ah kan tuan a tul. A fate si thei ding ruahsannak thawn kan hngah a tul. Cui zumnak cu kan lalut duh a si ahcun Pathian in kanmah ah a thunlut ding a si. Zumnak cu Pathian thu theihnak in a ra (Rom10:17). Nauhak kan si laiah kan pa le ih thuthlun le pom kan tum vekin tu ahcun van ih kan Pa ih thutiam thlun le pom a cu thlang. Kannih hi zumnak, hnatuannak le ruahsannak in run mi le thiamcoter mi kan si.(Efe. 2:8-9).
Jeim 2:24
Hiti a si ruangah minung cu zumnak lawngin silo in a tuahnak thawngin Pathian thawn rualremnak a co ti nan thei a si.
Rom 8:24
Ziangahtile ruahsannak lawngin run mi kan si. Kan ruahsan mi kha kan hmu thei a si ahcun ruahsannak a si ngaingai lo. Zoso a mit in a hmuh thei mi cu a ruahsan dah?
[7.71]
Hi Bible catlang hi kan zoh ding ih thabik a si ko ding, I Jn. 2:3-4.
I Johan 2:3-4
3. Pathian ih thupek mi kan thlun ahcun amah a theitu kan si ti a fiang a si.
4. Mi pakhat khat in Pathian ka thei ti ah a ti nain a thupek mi a thlun lo ahcun thuphan per a si ih a sungah thudik a um lo.
[7.72]
Rom 8:28 cun Amah a duhdawt tu pawl hrang ah cun an thatnak dingin a tuahsak ti'n in sim. Pathian kan duhdawt timi cu kan duhthlannak Amai hnenih a lakih pek khi a si. Cumi cu kan zumnak kut in famkimter ding a si. Amah ih duh kan hril sawn ruangah a tumtah mi famkimter tu dingah in ko. Ziangruangah? Ziangahtile duhdawtnak thawn Amai duhnak ah kan ap aw thluh. Curuangah a thiltum cu kanmah ihsin ti famkim a si ding (Matt.6:10). "Leitlun ih na duhnak (keimah in) tuah (famkim) zo a si vekin vancung khalah (kensoh) kim ve seh.
[7.73]
Sualnak ihsin a ra kir saltu pawl nunnak Pathian (Rom 8:29)in a sim mi a si. Pathian in a fimnak in hihi a thei, san hmuahhmuah ah a tangmi (remnant) amah thluntu dingah an um ringring ding ti hi. Cumi cu a ruatcia mi pawl an si, A Lalram cotu dingih a ruatcia mi pawl cu. Cubang pawl cu a kawh mi an si fawn. A kawh mi pawl cu thiam a coter ih a sunloih vivo hai (Rom 8:30).
[7.74]
Rom bung kua a cang kua nak-hlei khat tiangah Pathian in a fale pawl a hrilnak kan hmu, annih cu a thutiam fa le sual sal ihsin luatter mi pawl an si ih...........Pathian in Esau hrelh in Jacob nauta deuh a hril. Cutikah Jacob cun fa upa sinak a rak ngah ih cucu a pai thlawsuah conak dingah a si ih a u Esau lawngte cun a fapa upa sinak a rak ngaihthah.
Semtirnak 25:34
Cule Jacob in sang le tihang a suan mi cu a pek. Esau in a in a ei hnuah a tho ih a feh. Fatir a sinak covo cu zianghmanah a siar lo.
[7.75]
Hi hi Rom 9:12-14 thu hin a simfiang bik ding.
Rom 9:12-14
Pathian in Rebeka hnenah cun," A u in a nau a rian ding," ti ah a ti. Ca Thianghlim khalin, "Jacob cu ka duh dawt, a sinan Esau cu ka hua" a ti.
[7.76]
Hi thil umtuzia hi a pakhatnak Adam leh Adam pahnihnak Jesuh ihsin khaikhin a theih. Adam hmaisa hi sual himtliang ih rak sersiam mi a sinan cui himtliang a sinak cu sualnak in ruk sak a rak si ih a sinan Adam neta sawn -Jesuh Khrih cun sual hrimhrim a rak nei lo, ih Pathian kha hril in Pai vorhlam ah a to (Rom 5:14; I Kor.15:22,15:45). A sile tui cinah Pathian in a hril mi pawl hi midingfel lo a si lole mi lungruh kan ti thei lai ding maw? Pathian cu a dingfel ih duhdawtnak in a khatmi a si, a thluntu ding pawl khal Amah in a hrilsuak hai. Hi lamzin pi cu mizapi hrangah a on sak hai ringring a si. Pathian hi zangfahnak a neihnak ruangah kan mawhthluk in Amah duhhriltu ding pawl a hrilsuahnak ruangah teh mawh kan phurh thotho ding maw si? Pathian hi midang hrangih zangfahnak a neitu pawl hnenah A zahngaihnak a langter, a si lole Amah thlun duhlo tu hnenah a langter a si hmanah ziangso a diklonak um?
Rom 8:10-17
10. Khrih nan sungih a nun ahcun Thlarau cu nan hrangah nunnak a si; ziangahtile sualnak ruangah nan ruangpi cu a thi ding na'n nannih cu Pathian thawn remter mi nan si zo.
11. Thihnak ihsin Jesuh a thotertu Pathian ih Thlarau nan sungih a nun ahcun thihnak ihsin Khrih a thawhsal tertu Pathian in nan sungah a Thlarau a umternak thawngin a thi thei mi nan taksa ruangpi cu nunnak a pe ve ding a si.
12. Curuangah ka u le ka nau tla minung kan sinak danih duhzawng in nung ding kan silo.
13. Minung nan sinak dan duhzawng ih nan nung a sile nan thi ding; sikhalsehla sualnak nan tuah theu mi pawl kha Thlarau bomnak in nan that a sile nan nung ding.
14. Pathian Thlarau ih hruai mi pawl cu Pathian ih fa an si.
15. Ziangahtile Pathian in a lo pek mi Thlarau cu sal ah a lo tuahtu ding Thlarau a silo ih tihphang in a lo tuahtu khal a si fawn lo. Cui Thlarau cun Pathian ih fa le ah a lo tuah sawn ih Pathian hnenah, "ka pa, ka pa" ti ih kan au theinak thazang in petu khal cu Thlarau a si.
16. Cuti kan au ahhin Pathian ih Thlarau in kan thlarau a pehzom ih Pathian fa kan sinak kha a fiangter.
17. Fa kan si ruangah Pathian in a minung hrangih a retcia mi thlawsuahnak, a cotu ding kan si; cule Pathian in kan hrangih a retcia mi khal Khrih thawn kan co tlang ding. Ziangahtile Khrih tuarnak a tuar ve tu kan si ahcun a sunlawinak kha kan tawm aw ve ding a si.
[7.77]
Pathian ih mithmai tha cu kannih in beisei ban ding kan silo ih kannih ih hlawhsuah theih khal a silo, zumnak le ruahsannak thawn Amah a thlun duh tu pawl hrangah Pathian in alak liolio ih a pek mi laksawng a si. Zumnak cu thinlung sung ihsin hawlsuah, hmuhsuah le thlacam ih ngahsuah mi a si; curuangah zumnak cu diknak hnatuan in a langter.
Rom 9:16
Curuangah ziangtinkim ah hin minung ih duhnak le tuahnak ruangah silo in Pathian ih zangfahnak a um ruangah a si theh a si.
[7.78]
Pathian in a thil titheinak langter nak ah sal an tan laiah khan Faro siangpahrang pa a rak hmang, cuvek in tui ni khalah sualsal sungih in hruailut tu mibum hmang Setan a hmang lala, Setan cu thuthen a si zo, thih ding lawng a hmabak lai. Faro siangpahrang pa khal kha cu vek in a hmang. Pathian in thu a then ko nan a minung Israel pawl hmai ih a huham langter a duh ruangah Tipi sen an kan hlanah an hmai ah a thil titheinak a hmuhter ta.
[7.79]
Jesuh Khrih ih thisen (Tipi sen) in Setan kha Pathian ih tikcu can a kim tikah siatsuah leh ding a si thu a theihter zo. Israel fate pawl cu Goshen (Izip) ramah kum zali lenglo an rak um. An zate'n Izip mi sinak tiangin an neih thluh. Curuangah ramdang ukawk dan a cozah thu khal theih mi an nei lo, leitlun ahhin Faro lo cu theih mi dang an nei lo. An van a sang, a sinan danlo vekih mithat tu Moses ih thupeknak vekin ziangah inn le lo tlansan tiang a tul? An thawnsuahnak ding ahcun thilmak thlenter a tul. Curuangah thilmak phun hra a thlenternak a si. Cumi lawngin a cakzet mi Izip miphun pi cu Israel pawl mithmuh ah an tlawm lam ta, Hi thilmak tuahnak dingah tuah tu ding an um a tul ih fiangfai zet le rapthlak zet thil tuahnak a tul a si.
[7.80]
Cutin a theihternak can a cem cun Israel pawl in Moses kha Tipi Sen kan in leiro lakah an thlun. Simduh mi cu Israel pawl khan Moses kha khuitawk khalah thlun ding an si. Cuti ih an thlunnak ihsin Faro le a ralkap pawl, a minung pawl hnenah Pathian ih hremnak thuthennak umzia an phuangsuak thawn a bangaw ih, ramdang miphun hnakin Pathian huham cu thil a tithei sawn ti an thei ding a si. Pathian in a minung pawl (amah betu dingih hril mi pawl)hnen ah a zangfahnak a langter tikah duhsan a nei a si, ziangahtile a dikmi Pathian a si. Pathian in nung cingih thi mi thinlung a hakter, cumi cu Pathian an theihnak ding le zumnak dingah Pathian in can a pek lo ruangah a silo. Faro ih zanmang kha Faro hrangah a lehsak tu kha Josef a silo maw?. Ziangruangah Izip mi pawl kha Pathian in mangtaam ihsin a humhim hai tikah an pathian dang le khuavang pawl hlon in Pathian nung an biak sawn mei lo? Moses biak mi Pathian ih zangfahnak le hminthan zia cu a mak tuk, Izip mi pawl in ca in an thuanthu ah an rak ngankhum, hi tluk a si cingin ziangruangah Faro hi a lung a rak ruh ter. ( Sem. 41:38-39)? Cuti a sile ziangruangah a si pei Pathian hmai ah misual a si ding? Hi hi a lungruh dingah Pathian ih tuahmi a si; cuvek ciah in a lungruhnak cu a rehter lehsal (Suah. 5:2).
Semtirnak 41:38-39
38. Faro cun, "Hi pa vekin Pathian thlarau ih umpi mi midang khuiah so kan hmuh ding," ti ah a ti.
39. Cu veten Faro in Josef hnenah, Pathian in hi thil hmuahhmuah hi a lo hmuh ruangah nangmah aiin thil a thei thiam sawn le mifim sawn zohman an um lo.
Rom 9:17-18
17. Izip ram Faro siangpahrang thu khalah Ca Thianghlim in, "Nangmah cu siangpahrang ah ka lo tuah ih leilung hmuahhmuah ah ka cahnak huham na langter ih ka hmin na thanternak dingah ka lo hril a si," a ti.
18. Curuangah Pathian in a duhmi poh kha a zangfah ih a duhmi poh kha an thinlung a ruhter a si.
[7.81]
Pathian in amah a duhdawttu, a rinsantu le a thuthlun tu pawl parah a zangfahnak a langter ih a thuthlun duhlo tu pawl parah a thinhengnak a langter a si ti kan thei. Kannih hin amah sang dingin kan ralring maw - in sersiamtu Amah khi, ziangah hivek tuah dingah mi na hril? ti'n. Ziangvek in in timtuah ih a thinlung sung ih tumtah dandan in in umter hmanah a tumtahnak famkimnak ding a si ahcun sersiamtu Pathian cun sersiamtu'i thuneihnak a nei thotho lo maw si?
[7.82]
Ziangruangah Pathian in mi hrekkhat mi farah, mi caw le thiamnak neilo ah a tuah ih mi hrekkhat hmuah milian, mi hminthang le mithiam ah a tuah, a ti theilo ruangah mawsi? Siangpahrang a tuah ih kutdawh khal a tuah, an pahnih in kan tul mi an si. Pathian cu a thianghlim mi le a dik mi a si ih a thinhengnak a langter khal hi thildik a si. A thinhengnak co tlak mi kanmah vek a si mi pawl hnenah a thinhengnak thlengter loin a zangfahnak in hmuhter riangri hi thudik a silo maw si? A thin saunak ruangah a maksak mi a sunlawinak cu a zangfahnak belkheng (amah a duhdawttu) pawl hnenah a langter thei hrih a si, cuipawl cu amai sunlawinak hrangih a rak tumtah khawlcia mi le thuamcia mi an si. Cumi cu saltaan lai ih Judah mi pawl lawng silo a kawh mi kanmah Zentel hrang khalah tinak a si.
Rom. 9:19-24
19. A sinan nanmah lakih pakhat khat in ka hnenah, "Hi ti a si ngaingai ahcun, ziangtin saw Pathian in mi a mawhthluk thei ding? Pathian ih duh mi le tumtah mi cu zoso a el thei ding?" tiah in sut ding.
20. A sinan, ka rual, cutin Pathian a sawn ngamtu cu zoso a si? Bel in bel tuahtu'i hnenah "Ziangah so hitin i tuah ti ah a sawn dah maw?"
21. Thungai in kan ti a sile bel tuahtu cun tlak leilung kha a duhduh ih tuah theinak a nei; a duh a sile tlak hlom khat ihsin bel pahnih a tuah thei; pakhat cu tikcu can sunglawi can ih hman dingah, a dang pakhat cu nitin hman men dingah, a tuah a si.
22. Cuvek thiamthiam in Pathian ih thil tuah dan khalah a si. A thinhengnak langter ding le zokhalin a huham an hmuhnak ding a duh. Sikhalsehla a thinhengnak a tuartu ding le siatsuahnak a tongtu ding pawl par ahcun a thin a sau zetih mi a zawi theizet fawn.
23. Cule a famkim mi a sunlawinak khal cu langter a duh ih a cotu dingih tincia mi kan si ruangah a zangfahnak dongtu kannih parah a sunlawinak cu a run burh.
24. Ziangruangah tile kannih cu amai kawhmi a minung kan si; Judah mi sung ihsin kawh mi lawng silo in Zentel mi sung khalin kawh mi kan si.
Efesa 1:3-14 sung ahcun Jesuh Khrih sungih um mi pawl hrangih an thlawsuah thu a rel.
Efesa 1:3
Kan Bawipa Jesuh Khrih ih Pa le a Pathian cu thangthat si koseh! Ziangahtile Khrih thawn kan pehzom awknak thawngin vancung ih thlarau thlawsuahnak a phunphun kan hnenah in pe.
[7.83]
Khrih sungih um ding hi duhhrilnak, kanmai hriltheih a si (Jn.1:12). Pathian in kannih (Khrih a cohlangtu pawl) hi leilung sem hlan ihsin a hril mi ah kan si ti'n a sim. Cumi cu, a Fapa a cohlangtu ding pawl cu Pathian in a dangten a retcia (ti thianghlim) kan ti mi kha a si. Zumnak thawn cui ke a karpi tu pawl cu thianghlim le soitong lo in an duhdawt mi Amah hrangah an nung ding a si.
Efesa 1:4
4. Leilung a sersiam hlan hman ihsin Pathian in kannih cu Khrih thawn kan pehzom awknak thawngin Amai hmai ah mi thianghlim le mawh neilo mi si dingin Amai ta ah in rak hril zo.
[7.84]
Jesuh Khrih zumnak (kanmai duhhril) thawngin Pathian in amah zumtu pawl cu a van sungkua si dingah a rak khaukhih in a rak ruatcia zo, ziangahtile cumi cu a lungtum a si.
Efesa 1:5
In duhdawt ruangah, Pathian cun Jesuh Khrih sungin a fa le si dingah a rak tumcia zo. Cumi cu a lungawi mi le a tumtah mi cu a si.
[7.85]
Hi hnatuan hi Khrih a cohlangtu pawl hnenah ti karhzai vivo a si.
Efesa 1:6
Pathian cu a sunglawi mi a zangfahnak, leh a duhdawt mi a Fapa sungin laksawng in pek mi ruangah hin thangthat si koseh.
[7.86]
Khrih ih himtliang thisen suahnak ruangah kumkhaw sual ngaidamnak a tuah thei ih cucu a Pai thu a tlunnak leh amah a rinsan tu pawl hmai ih a pek mi zangfahnak ruangah a si.
Efesa 1:7
Ziangahtile Khrih a thihnak thawngin kan sualnak cu ngaidam a si zoih a luat mi kan si zo. Pathian in a zangfahnak cu kan hnenah tamzet in in pek ruangah,
[7.87]
Anih cun kan theihnak tiang a tipung ih hibang pawl theithiam thei dingah fimvarnak in pe.
Efesa 1:8-9
8. A zangfahnak cu a va tum lawmmam so!
9. Pathian cun a fimnak le a thuk mi thu neihnak in a tumtah cia mi cu a tuahsuak ih, Khrih sungin kimter a duh mi a thuthup cu kan hnenah a langter zo.
[7.88]
Pathian ih khaukhihnak lungtum hi a hrilmi pawl finkhawmnak a si ih Khrih ih kawhmi pawl, minung vek a si mi vancung mi pawl thawi umtlang dingah a si.
Efesa 1:10
Tikcu can a kim tikah Pathian in famkim ih a tuah tum mi cu: van ah siseh, leilung ah siseh siam mi thil hmuahhmuah hi finkhawm theh ih Khrih kha lubik ih ret khi a tum mi a si.
[7.89]
Pathian in a fa ih a ret mi pawl hrang ahcun an hrangih a ruatcia vekin a ro an co ding.
Efesa 1:11
Ziang hmuahhmuah hi Pathian amah ih tumtah mi le relcat cia mi vekin a kim theh. Khrih thawn kan pehzom awknak thawngin a minung si dingah Pathian in in hril zo; cumi cu amai tumtah mi a siih a hramthok ihsin a rak khaukhih cia mi a si.
[7.90]
Curuangah kannih khal a pakhatnak ih Jesuh a sunloih tu cu in cawisang ve dingih in sunloih vivo ve ding a si.
Efesa 1:12
Curuangah Khrih sungih ruahsannak a nei hmaisabik tu kannih in Pathian hnenah sunlawinak pe uhsi.
[7.91]
Kan Nunnak Hi Amai Hrangah
Kan cohlannak hi kanmai zumnak in a siih cucu Pathian ih thutak Thu kan theihnak le kan rinsannak in a si ih, cule Pathian in in tiamkam cia mi Thlarau Thianghlim in in hminsin. Cucu kan hnenah pek a si zo ih amah a ratsal hlan tiang kan rundamnak kilkhawi sak dingah a si.
Efesa 1:13-14
13. Nan hnenah runnak a thlenter tu Thlarau Thianghlim a dik mi thuthang cu nan theih tikah nannih khal Pathian minung nan si ve. Khrih nan zum ih Pathian in amai ta nan sinak langternak ah nan parah hminsinnak a khen; cui hminsinnak cu pe dingin a lo tiamcia mi Thlarau Thianghlim kha a si.
14. Pathian in a minung hnenah a kamcia mi kan ngah tengteng ding ti langternak ah cui Thlarau Thianghlim cu amahkhan a si ih a minung hnenah cui luatnak tlamtling in a pe ding ti kan theihfiangnak tla a si fawn. A sunlawinak cu thangthat si koseh.
[7.92]
Thunetnak ah, zokhal Pai duhzawng a tuahtu cu Khrih ih unau, farnu leh nu ah an cang.
Matthai 12:50
Zokhal sisehla vancungih a um mi ka Pa ih duhnak a tuahtu hmuahhmuah cu ka unau, ka farnu leh ka nu an si thluh, ti ah a ti.
Hminsin: Hi duhthlannak hi thil olte a si, cucu Pathian ih duhnak tuah men lawng a si. Kannih cun hril men ding kan si ih mitin in bulpak in kan rundamnak kha Jesuh Khrih zumnak in kan hril lo a sile kan hnong a si mei; hi hi kan mai lam tuanvo a si (Jn.1:12).
[7.93]
Pathian Theihcianak
Pathian in khuahlan kum reipi ihsin thil thleng ding pawl khal hi a Profet pawl hmangin a rak relcia thluh thei a si ti cu zakhat ah zakhat a dik mi a si. Cuvek zumtlaklo thu ihsin Pathian in thilcang ding le milai umdan ding hmuahhmuah khal a zaten a khuahkhirh thluhcia a si timi ruahnak a suak. Cun a hmaisabik ih ruahnak ra lang mi cu, Setan ih a neih bangin minung hi Pathian khalin a nei ve ih rangtotu pa in a rang kha a kamkharh in keh le vorh ah a duhtawk ih a herter dualdo bangin a duhtawk in a khuahkhirh a si ti'n. Pathian cun thoknak le cemnak a nei ve lo ti hi hngilh hlah uhsi. Anih cu kumkhua ihsin kumkhua tiang a um ringring mi a si. Pathian cun ziangkhal zokhal a tumtahnak famkimsuahnak ding ahcun a hngaksuak thei a si. Pathian cun profet pakhat khat hnenah zanmanglam in maw, larawknak in simaw a lang ih cui profet cun Pathian ih thucah cu a minung pawl hnenah a run phuang duh lo, a si lole a minung pawl in a phuan mi cu an lung duh lo a si ahcun Pathian in profet dang pakhat khat a si lole midangpi khal a thursuak in a hrilsal thei. Israel mi in Pathian dungtun in an Messiah cu an hnawl ih Pathian khal in a Lalram sangka cu Khrih hmin ih a rak cohlang tu pohpoh hrangah a on sak, Rom bung hleikhat sungah kan hmu.
[7.94]
Pathian a tlansan tu, a kawhnak khal a thei paih nawnlo tu le a nunzirhnak khal a dongsong duh lo tu tampi an um ringring ding bangin a thuthlun tu, le Thlarau in kawhhran pawl hnenih a simmi thei thei dingih theihnak hna a neitu khal mitampi an um ringring ding a si. Cupawl cun a thu an thlun ringring ding, Pathian in an duhthlannak a neihsak ruangah silo in, Pathian an duhdawt ih an duhhrilnak Amai hrangah an hlan sawn a si (I Sam.15:22). Hibang pawl hi a thangso mi a belruat hmanraw tha, tuu khaltu ih aw theitu turual pawl bangin a aw theitu an si (Jn.10:4). Cui mi malte pawl Pathian tumtah leh a duhdawtnak ti famkim saktu ding pawl an si.
[7.95]
Pathian in mifel lo pawl khal a thansoter thei, amah hnong tu an si hmanah; Amah dokalhtu rori pawl khal a tumtah mi ti famkim tu dingah a hmang thei hai. Cuvekin Lusifar, Faro, le Juda pawl tla a rak hmang hai. Khrih ih ratsalnak ding khal hi leitlun thatnak ruangah silo in leitlun sualnak ruang sawn ah a si, Matthai bung 24-sungah kan hmu. Thim thuneihnak in a sersiam mi pawl a hnaihnok ruangah Pathian in a kutcak a suah ve.
[7.96]
Khaukhihnak Thu Leh Sihte Vuun
America ramih um mi pakhat pa cu nelrawn ah a um ih zingtin lamleng in a suak theu. Voikhat cu khua a rungtlai vivo tikah hmun daihnem ah beunak ding a hawlih bungkungpi tek hnuai ah a va beu ngah. Cui hnemdai ahcun a to ih sihte vun (tlang) sek a hmu ih phurzet in a zoh rero.
[7.97]
Cui sihte vun cu a zoh rero tikah a kua sungah tuah mi thil tampi a um ih sihte pawlin can reipi an rak tuan zo ti a theisuak. A sungah khaan tumzet pakhat siangpahrang nu ih ti tit nak ding le a pa pawl in an va pawlnak ding a um. A lengah a kiltu an um ih ralpawl an rat tikah ralrinnak aw a pe hai. Sihte pawl ih vuun tuahdan hi mangbang thlak tak a si.
[7.98]
Sihte hnatuantu pawl cun anmah le lamzin cio ihsin an lutsuak rero ih an pumrua ai ih rit leh sau cu an pu in an phur lut celcel. Sihte pakhat hi rit phurin a rung luh tikah a dang pawlin lamzin an rak kian ih an lan awk thluh hlanlo an rak hngak aw. Cuvek pawlkom pi cu aw! Hitin a rualrual in an tlang durdo nan an thawm le vang cu zianghman theih ding a um lo; cuitlunah ziang kan tuah ding ti cu an thei aw thluh fawn, an zaten duhhril theinak cu an nei cio ko nan lungrual ten an tuan tlang hliarhlo. Cumi cu Pathian ih kawhhran hnatuannak ah ziangtluk in zohthim tlak a si ti a hmusuak.
[7.99]
Hi pai theih awksuah mi cu a hmuh mi sihte pawl hman theihnak ah siseh, pawlkomnak ah siseh a tluk lo zia a theiaw suak, a thinlungten ziang ka tuahsuak ve ding tin mangbang in a ruat aw rero. Cutikah funghreu te a la ih a keneh neh ruk hrawngin a tah hnu ah cui sihte vun cu rikulh in a kulh. A zoh ringring hai ih cui a hminsin mi rinkulh sungin silo in sihte pawl cun hmunhla pipi ihsin rawl an rak thiar nerno hai kha a hmu. A rei hlanih a theihsuah lehsal mi cu cui sihte pawl cun a rei hlanah vunnel in an vuun cu an sek vivo ih pawng liailliai ah a hung cang, a sinan an thuhla a ruat bet vivo. Cutikah sihte pawl fehnak zin ahcun rawl kho a siah hai ih cucu meisa in a ursak. Cutikah meisa tih ah cui sihte pawl a tam sawn cu an vuun par ahcun an kai ciamco ih meisa thawi a hlatnak ah tan an khuar ciamco, a sinan sihte aa deuh pawl cun cui meisa sung ahcun lutin an paih kangaw ciamco. Hithu pawl a ngaihtuah hnu ah thil pakhat ka hlawhtling tin a ruat aw aw, cumi ruangah a netnak ahcun a kiangkap minung pawl in an hliakhlai.
[7.100]
Cu pa cun ziangtin ka tuah hrih ding ti suangtuah laiah hitin thu a ruatsuak leh. Sihte pawl cu an vak nohnoh ciamco ih a hrekkhat tla cu a korzal tiangin an hung kai hai, cutikah a thingthla hai ih a hak zet mi mathai (cithlum)cu a rak rin mi kulh laifang, an kaw tlangah a siah hai. Cule sihte pawl cun an duhtawk in an keu theilo nan an lu in an nor ciamco ih meisa thawi hlat awknak ah an hi thawn. Sihte pawl hman theihnak ih rak banglo pa cun an hnen ihsin thil tampi a zirsuak ih a tumtahnak a hlawhtling tariai a si. Hi pai dinhmun hi sihte lakih rak tel ve tluk a si. Hi sihte pawl nun ihsin kan zirsuah ding mi cu khai rinkulh le meisa kha Pathian Thukham Hlun vek a si ih khai mathai te kha Jesuh Khrih Thisen ihsin kan co thei mi Thukham Thar vek a si. In tuahtu kan Pathian in kan sinak mizia hi a rak thei thluh. Tuu vek (sihte) kan si zia khal a thei thluh ih kan vahhloh zia khal a thei (Isa.53:6) ih A mai hnen ah ziangtin in hruailut sal ding ti khal a thei thluh cia. Hi thu silo in a dang thu khal lo ruah ding tampi ka nei lai hrih.
[7.101]
Tu cu khuahkhirh timi thu ka sim duh. Sihte cetcang dan khi zohman in an khuahkhirh dah lo, a sinan amah te'n a burpi in a kilhim thluh thei. Ziangtin a si ding? Mi pakhat khat va khuahkhirh ding cun a duhhrilnak thinlung va neh ih, kiang le kap thil pawl ihsin a theihnak le a hmuhnak kha va cimneh ngah ta a tul. Pathian ih in rak hrilsuaknak ahhin a pek mi laksawng kha hlonhlo tu dingah a silo nan, a pek mi a fimnak le theihnak in A sersiam mi umzia cu a thei ih duhhril theinak a pek mi kiangkap thil pawl cu a khuahkhirh thluh. Pathian lawngin thu a nei, kan hril mi ih zirin meisa alh sungah kan thiral ding maw a si lole a cabuai kan kil tlang ding. Thutawpnak ah, kan zaten Rom. 5:8 ih zirh mi thu hi hngilh hlah uhsi.
Rom 5:8
Sikhalsehla Pathian in ziangtlukin so in duhdawt ti cu a langter: misual kan si hrih cingin kan hrangah Khrih cu a thi.
[7.102]
Pathian hin sual dingin in rak sersiam lo. Milai hnenah hin ol-ai ten duhthlan theinak a rak pe zo. Pathian hin a siatzo mi milem te bangin in rak sersiam lo. Cui milem khal cu phun dang in a rak tuahlo, a sinan kannih hi milem tuahmi pawl kan si le kan siat thluh ta phawt a tul a si. Sualin in rak ti se thluh zo, a sinan Pathian in Jesuh ih Thinglamtah zin a zawhtu pawl cu a finkhawm hai ih a tuah tha (rundam) sal hai a si.
A Siatzo Mi Thil Pawl Hi Pathian In A duh.
Saam 51:16-17
16. Thawinak pek mi cu na duh mi a si lo. Na duh sisehla cu ka lo pe zo ding. Meiur thawinak khal na lungawi mi a silo.
17. Maw Pathian, ka lo pek mi thawinak cu A kuai mi thinlung a si. A kuai mi le sualsir mi thinlung cu na hnong lo ding.
Isaiah 57:15
15. Keimah cu kumkhua ih a nung mi Pathian, a sang mi le a thianghlim mi Pathian ka si. A sang le a thianghlim mi hmunah ka um; a sinan rinsannak le beiseinak nan neih salnak dingah thinlung kuai mi leh thinlung nem mi hnen khalah ka um a si.
Isaiah 66:2
2. Lei leh van pumpi hi keimai semsuah mi an si. Thinlung nem mi, sirawknak thinlung a nei mi le ka thu thlunih i tihzahtu pawl par ahcun ka lung a awi a si.
Thuphuan 22:17
17. Thlarau leh Mo thar in , " Ra aw," an ti. Hi thu a theitu hmuahhmuah in, "Ra aw," ti ah an ti ciar ding. Ti a haltu hmuahhmuah in ra uh; nunnak tidai a duhtu hmuahhmuah in man pek lo in ra in uh.
I Kor. 13:12
12. A tu thil kan hmuh dan cu thlalang sungah fiang lemlo ih a thlam kan hmuh vek khi a si; sikhalsehla cutik ahcun hmaiton ten kan hmu ding. A tu ih thil ka theih mi cu a kimlo; a sinan cutik ahcun a kim zet ding. Pathian ih i theihnak a kim zet bangin ka theihnak khal a kim zet ve leh ding.
*Pathian in a bun theilo ding le a neh lo ding mi thil zianghman a tuah lo.