KHRIHFA PAWL AN THIH TIKAH

Hminsin: Cangantui dinhmun theifiang dingin  "Casiartu Hnenah" ti mi siar hmaisa aw.

[8.1]

Khrihfa tamsawn cun thihnak timi thuhla hi an ruat paih dah lo, a sinan an ruahsal theu tikah thih ti mi hi itthat vek a si tin an ruat. Daiten kan mit kan vun sing, kan hmur le hmai tla hnizik siamsi ten. Kan mit dai thepthi ten kan sin tikah tleunak in in run kulhvel ih Jesui kut nemte cu a rung lang. Cutin Jesuh thawn kutkai aw in vancungmi pawl in in kulhvel ih tleunak sung ihsin tlunsang lamah kai so diahdo in van ah in hruai.

[8. 2]

Voi tamzet mithi vuinak hmunah ka feh tikah a phumtu puithiam pawl in faknak thu an rel ringring ka thei theu. Keimah rori khal in mallai cu ka rak pe dah ko. Mithi an thlarau hmun nuam thleng hrihlo mi tla ka thei dah. Jesuh in kumkhaw nunnak lamzin cu a bi ih mi malte lawng an feh ding a ti. Mithi vuinak ih kan theih mi vekin kan zum a si ahcun vancungram ah kan khat vivo dingih hell ram cu a lawng thluh ding. Mithi ngai ih riahsia ninghang pawl hnem cu a tha zet ko nan thuphan an rel mi cu poi ka ti zet. Cuvek Pathian thuzirhnak cu ka hua sinsin.

[8.3]

Buainak Ka Nei
Bible in ni khatkhat ah Khrih cu A kawhhran hruai dingah a ra sal ding tin i sim. A kawhhran tam sawn cu thihnak sungah phum in a um ti cu a dik ko, ziangahtile A thu ih in sim bangin a thimi siseh a nungmi khal siseh A thoter sal ding ti a si.

1 Korin 15:51-52
51 A dikmi thuthup hi ngaihnik uh: kan zaten kan thi theh lo ding, sikhalsehla a netabik mumek an tum tikah mitthep kar ah kan thlengaw ding.
52 Ziangtin tile mumek aw a than tikah mithi pawl thawhter sal an si dingih annih cu an thi nawn lo ding; cule kannih pawl cu thleng theh kan si ding.

[8.4]

Ka buainak neihmi sawn cu tulai Bible zirhtu tampi in, a thicia mi Khrifa pawl hi vancung ah an rak um an ti. Cuti a sile, ziangruangah Khrih cu leitlun ah anmah hruai dingin a run a tul sal? Ka buainak thu na thei maw?

[8.5]

Nannih cun kan thlarau  cu vanram ah a feh ih kan taksa leitlun ah a tang nan ti men thei. A ngaingai kan ti ahcun kan taksa hi leilungah a tang si loin leilung ah a cang sawn a si.

Semtirnak 3:19
19 Leidip in tuah mi na si ih, leilung ih na can sal tiang na nunnak hrangah na thlanhri put in hna na tuan ding. Leidip in tuah mi na si ih leilung ah na cang sal ding tiah a ti.

[8.6]

Khrih sungih thicia mi pawlin kut ih tuahmi silo, taksa thar an nei ding ti a si ahcun mithi pawl hrangih Khrih ratsalnak tla a tul lo ding.

2Korin 5:1
1 Kannih kan umnak puanthlam a si mi hi leilung ruangpum hi bal theh hman sehla Pathian in vancung ah kan umnak inn a sak mi, kumkhua a siat theilo mi inn kan hrangh a ret ti kan thei.

2 Piter1:14
Kan Bawipa Jesuh Khrih in fiangzet ih i theihter zo vekin hi a thi thei mi ka pumsa cu ka taan cing ding ti ka thei.

[8.7]

A tlun ih kan umnak leilung puanthlam a ti mi hi kan taksa a ti duhsan mi a si. Theihtul mi cu Piter in "ka lei puanthlam"(Lehmi dang vekin) a ti mi khal hi amai taksa a rel duhsan mi a si.

2 Piter 4:15-16
15 A tu ih kan lo zirh mi hi kan Bawipai zirhmi a si: kan Bawipa a ratsal tikah kannih a nungmi pawl hi a thicia mipawl hlan ah kan feh hmaisa lo ding.
16 Vancungmi lak ih a upa bik ih thupeknak au thawng, Pathian ih tawtawrawt tum mi thawng a thang dingih Bawipa cu vancung ihsin a rung tum ding. Khrih  a zumtu a thicia mi pawl an tho hmaisa ding.

Himi thu ahcun Cathianghlim ih in sim bangin Khrih cu a liamcia mi mithianghlim pawl hrangah a rasal ding ti cu kan theifiang a si.

[8.8]

Khuiah An Feh
Thih veten kan thlarau cu vanah an kailo a si ahcun khuiah an feh pei? Khuitawk ihsin Khrih an rak hngak pei?

Danial 12:2
2 A thi zo mi minung tampi an nung sal ding; mi tampi cu kumkhaw nunnak an co dingih mihrek khat cu kumkhaw ningzahnak an tuar ding.

[8.9]

A tlun ih ta vek a sile, Kan zaten kannih Khrihfa pawl hi kumkhaw nung dingin, zumlotu an sile kumkhaw ningzahnak hrangah thawhtersal kan si hlan sung hmuahhmuah cu leilungah kan itthat sung ding tinak a si. Zo in in thoter sal ding?

Johan. 5:28-29
28 Hiti a si ruangah nan mang bang hlah uh, mithi hmuahhmuah in a aw an thei ih,
29 An thlan sung ihsin an suahnak tikcu a ra thleng ding: thil tha a tuahtu pawl cu an thosal dingih an nung ding; cule thil thalo a tuahtu pawl cu an tho ding nain hnon mi an si ding, tiah a ti.

[8.10]

A tlun thu ahhin na theihtul mi cu, a thicia mi zumtu siseh zumlotu siseh Bawipai aw an theih canah khuai ah an um ding timi a si. Danial sung khal ah kan hmuhsal mi cu mithianghlim pawl cu nunnak ah thawhtersal an si dingih, mi thalo pawl cu hremnak an tong ding. Himi ihsin kan theihfiang mi cu, mi hmuahhmuah in Khrih ratsalnak hngak dingah leilung (hell) ah an feh ding.

[8.11]

Leilung Ih Itthat
Danial 12:2 ah, mi tampi "leilung ih itthat" mi an thosal ding tin in sim. " Leilung ih itthat" timi cu ziang a duhsan ih cumi in ziang in zirh duh? Pathian in a sim mi cu theihnak hna kan neih ahcun zirter duhmi in nei a si.

[8.12]

A pakhatnak ah, itthat timi cu a langsungte thil a si ih kan itthat a si ahcun kan tho sal ding tinak a si. Pahnihnak ah, kan itthat tik ahcun caan khal ziangvek a si ti kan theilo ih  malte sung maw a si lole kum thawngkhat sung maw kan it a va si hmanah kan hrang ahcun thil bangrep mi an sithluh ko. Keimah khal hi zinglam ka thawh canah nazi pasarih lole pariat a ti hnu hmanah reilo zet vekin ka thei theu. Pathumnak le netnak ah, kan itthat tikah tikcu can kan thei nawn lo nan kan manglam in kan cangvai thei lai. Kan zanmang ah khin harsatnak hmun lole nomnak hmun (paradise) ah kan rak um theu mi tamsawn cun a pahnih in kan rak hmu veve dah cio ko.

[8.13]

Jesuh in zumtu pawl thihnak thu a rel tikah, (itthat) timi tongfang a hmannak san cu a sim hmaisak mi thu kan theih theinak dingah a si. Hivek tongfang a hman hin ni khatkhat ah kanmah le mah hi kan hmu aw fiang leh ding timi in zirh duh ruang khal ah a si. Zir dingih in tanta mi pahnih in kan zoh hnik pei.

Matthai 9:23-26
23 Cule Jesuh cu Judah mi bawipa ih inn sungah a lut. Mithi topinak khuangdar tumtu pawl le minung hnok celcel ih an um a hmuh tikah,
24 Nan zate in suak theh uh! Hi nauhak nu cu a thi lo, a itthat a si, tiah a ti. Cutikah an hnihsan theh.
25 A sinan mi an suah thluh veten Jesuh cu nauhak nu ih umnak khaan sungah a lut ih a kut a vun kaih veten nauhak nu cu a hung tho.
26 Cui thu cu a kiangkap ram sung hmuahhmuah ah a thang thluh. " nauhak nu te cu a thi (siatral) lo a itthat." Hitawk ah Jesuh in thihnak parih a thilti theinak cu a tarlang. Mithi pawlin an itthatnak ihsin a aw an thei ban. A huham in thihnak ih thilti theinak  pawl cu a phelhsak ih a kawh mi Lazaras tla a luatter (Johan 11:1-13).

Johan 11:1-13
1 Bethany khua ih a um mi Lazaras an ti mipa pakhat cu a na. Bethany cu Mary le a u Martha an umnak khua a si.
2 (Hi Mary cu Bawipai ke ah zihmui a toih ih a sam in a hnawt tu nu kha a si. A na mi Lazaras cu a tapa a si.)
3 An unau in Jesuh hnenah thu an hei cah ih, " Bawipa na duhdawt mi na rualpa a na a si," tiah an ti.
4 Cumi cu Jesuh in a theih tikah, hi natnak cu Lazaras ih thihnak ding natnak a silo. Hi natnak cu Pathian sunlawi nak a langnak dingah a si ih Pathian fapa in sunloihnak a ngahnak lamzin khal a si ding, tiah a ti.
5 Jesuh in Martha le a nau nu le Lazaras cu a duhdawt zet.
6 A sinan Lazaras a thih thu a theih hnuah cuih a umnak ahcun a hlei in ni hnih a cam ta.
7 Cule a Dungthlun tu pawl hnenah, " Judea ah va feh sal uhsi," tiah a ti.
8 Dungthlun tu pawl cun, " Saya pa, kan dung reilote ah mipi in cutawk ah lungto in a den an lo tum; a tu na va feh sal ding maw"? tiah an ti.
9 Jesuh in, " Nikhat ah nazi hleihnih a um a si lo maw? Zokhal sun khawvang ih a fehtu cu a bah dah lo, ziangahtile leilung ih a ummi tleunak a hmu.
10 Sikhalsehla khawthim sungih a feh ahcun a bah, ziangahtile tleunak a nei lo a si," tiah a ti.
11 Cumi a sim theh in Jesuh cun," Ka rual Lazaras cu a itthat zo; a sinan ka feh dingih ka va thang ding," tiah a ti.
12 Dungthlun tu pawlin" Bawipa, a it a si ahcun a dam ko ding," an ti.
13 Jesuh ih sim duh mi cu Lazaras a thi, tinak kha a si ih dungthlun tu pawl cun itthat menmen a ti a si hmang, tiah an ruat.

[8.14]

Hitin an rel ka thei dah, Jesuh in Lazaras kha a hmin in ko lo sehla cu a thi cia thlarau hmuahhmuah a aw an theih in an rak tho thluh ding, tiin. Jesuh in a dungthlun tu pawl hnenah an rualpa Lazaras cu a itthat ih a hnen va feh in va thang a tum thu a sim hai.

[8.15]

Dungthlun tu pawl in cui thu an theih tikah, Lazaras cu a cawldai men a ti duhsan a si ding tin an ruat. A sim duhsan khal cu, Lazaras a thi a timi a si ko.

Johan 11:11
11 Cumi a sim theh in Jesuh cun, Kan rualpa Lazaras cu a itthat zo: a sinan ka feh dingih ka va thang ding, tiah a ti.

[8.16]

A dungthlun tu pawl in a " itthat" ti mi an theihthiam lo ruangah, Jesuh in Lazaras a thi ti in a simfiang.

Johan 11:14
14 Curuangah Jesuh in fiangten a sim ih, Lazaras cu a thi zo, a ti.

[8.17]

Lazaras cu thlan sung ihsin kawhsuak sihmansehla, thlan cu a itthatnak hmun le lamzin-sangka men a silo maw?

[8.18]

Herhkawinak le Suangtuahnak
Ziangruangah Khrihfa tampi in an thih veten vancung ah feh ding ti an pom cio? Cumi kan theihsualnak bik pakhat cu kanmai duhdan ih kan zum mei theu ruangah a si. Cumi vek cu kan buainak bik pakhat a si ih Cathianghlim ihsin suanlam kan hawl tum lok mei theu, a sinan a tamsawn ahcun Pathian thu herhkawi le mai ruahdan zawng thu men a rak si theu.

[8.19]

Leitlun huap ih thuthang tha simtu le zirhtu larzet pawl khal in thutak thu hi ka ruahnak ih luar deuh tiangin an herhkawi theu. "Thih veten vanram thlen hngal" timi ruahnak tanpi in hitin an sim theu,"taksa thawn thenawk le Bawipai hnen um" a si lole, "Taksa thawn thenawk cu Bawipai hnen thlen," tin. Cumi cu Bible ih simdan an si lo, a bungcang an tarlang hmanah. Dikzet vekih an tarlang mi cu si thei vek bangnak tla a um men ding nan, a dikciah cuang lo; Pathian thu herhkawi an si ih cuvek an tuah ruangah ningzak sawn ding an si. A dikmi cu a hnuai ih ta vek hin a si.

2 Korin 5:8
Kan thinlung a khoh, kan ral a tha ih mai duh vekin cang thei sehla hi kan leilung taksa inn hi tanta in Bawipai inn ih um kan hril sawn ding.

[8.20]

Thih hnu ih Bawipai hnen um duh timi le thih veten Bawipa thawn um taktak timi hi an dangaw zet. A ngaingai te ti ahcun hi kan taksa hlun thawn thenawk ih Bawipa thawn umtlang ding cu Pathian sungkua lakah a duh lo tu zo a um pei? Cuvekin Pathian thu hi mai duhdan zawngih herkawi tu cu a thlarau nunnak hrangah tihnungza a si.

2 Piter 3:16
Cakuat a ngan mi hmuahhmuah sungah hi thuhla a telh tik poh ah cubangtuk in a ngan theu a si. A cakuat mi sung ah thuhla hrekkhat a ngan mi cu theih a har mi an si ruangah mi aa le mi hngethngai lo pawl cun, Cathianghlim caang dangdang ih sullam an hrilhfiah sual vek thotho in, a ping a peng hlir in an sim a si. Cuti cun anmai par lala ah siatralnak an thlenter.

[8.21]

Cuvek thurin diklo tanfung ah a diklo in caang dangdang an hmangih Pathian thu zir paih lo mize pawl an hruaipeng thluh. Mi tamsawn Khrih thu a thlun ih a ratsalnak a hngaktu pawl cun an theifiang ih, taksa thawn thenawk ih Bawipa thawn umtlang ding cu ka duh a si an ti ngam, a sinan kan taksa thawn kan thenhnih awk veten Bawipa thawn umtlang cih ding tinak a si lo. Cutin a sim mi a si lo ruangah cuti zawngih Pathian thu a lakawi tu cu mi sualral a si.

[8.22]

Rukru Lungsir
Thinglamtah par ih rukru lungsir pai thu kan zoh ding. Thih veten vanram kai titu pawl in lungsir mi rukru pa hi an tahthim theu. "Jesuh khal in a thih ni rori ah rukru pa kha vancung ah a hruai,"
an ti. Himi thu (Lk. 23:43) hi zoh tha sal awla Jesuh in vanram thu a rel lo, paradis ti lawng a sim.

[8.23]

Paradis a ti mi hi hmun le ram thu relnak a si lo, a umzia dinhmun a relnak sawn a si. Pathian ih Hmuan, Eden ti ih kawh mi a si. Hmun dai le thianghlim te a si; duhkimnak hmun a si. Vancungram khi paradis pakhat a si ko. Sihmansehla cumi lawng maw Pathian ih paradis um ? Paradis hi vancungram hmin pakhat men a si maw a si lole hmundangpi so a si? Jesuh in rukru pa hnen ah, tuisun ah paradis ah ka hnenah na um ding a ti, a sinan Jesuh kha khami ni ah vancung ah a feh cih maw? A sannak cu, Feh lo ! Jesuh a thih ni ah vancungah a fehcih lo a si ahcun paradis timi hi vancung a si thei pei maw? Thihnak a tuar sun ih Jesuh a fehnak kipah rukru pa in a thlun vivo. Cumi ni ah Jesuh vanah a kai maw a tum so? Paradis timi teh vanlam ah maw hnuailam ah so a um?

Matthai 12:40
Jonah cu ngapi pum sungah ni thum le zan thum a um vekin Mi Fapa khal leilung sungah ni thum le zan thum a um ve ding.

[8.24]

Jesuh cu ni thum sung rori leilung sungah a um cumi a kim lai hlanlo a Pa hnenah a so lo. Mari Makdalin hnen ih a lang lai khal ah a tham ter hrihlo. Ziangah? Van ih a kai hrih lo ruangah a si.

Johan 20:17
Jesuh in Mari cu, " I kai hlah! Ziangahtile Pa hnenah ka thleng hrih lo. A sinan ka unau pawl hnenah va sim awla ' an Pa a si ve mi ka Pa, an Pathian a si ve mi ka Pathian hnenah ka feh ding a ti, tiah va sim aw," a ti.

[8.25]

Paul in Efesa pawl hnen ih ca a kuat mi ah hi thu hi fiang zetin kan hmu bet, Khrih in vancung a kai hlanah leilung a niamnak hmunah saltang pawl hruai dingin a feh ta, timi thu hi.

Efesa 4:8-10
8 Ca Thianghlim in, "A sangbik hmun a thlen tikah, ralkaih mi tampi a khor; minung hnenah laksawng a pek," a ti mi kha a kim a si.
9 Cule "hung thleng," ti cu a tican ziangso a si? A tican cu a hmaisabik ah leilung hmun niambik ah a vung thleng tinak a si.
10 Cuti cun a rung tum mi cu a hung thleng mi thotho a siih, vancung le van leng khalah a thleng ti cu van le leilung hmuahhmuah ah amah cu a khat theh ti hmuhsaknak a si.

[8.26]

Himi simnak thu hi David siangpahrang pa ih a rak phuan mi ihsin kan hmu thei ih, kan neihsiah thil pawl hi hnuailam ah kan kenglut theilo ding timi in sim; lut a ti ih a dikfiang zet. Kannih khal kan kaiso hlanah kan tumlut ta a tul, cun kan neihsiah pawl khal hi hnuailam paradis ah maw tlunlam vancung ah maw kan keng theilo ding tin in sim fawn.

Saam 49:16-17
16 Mi pakhatkhat a len vivo tikah le a lennak cu a karh sinsin tikah na lung se hlah.
17 A thih tikah zianghman a keng theilo ding; a lennak in thlan ah a thlun lo ding.

[8.27]

Jesuh cu an thah ni ah leilung sungah a feh ih nithum sung rori a vung caam ta. Himi thu ihsin kan rel thei mi cu paradis a ti mi hi tlunlam ah a um lo lei hnuai lam ah a si ih, vancungram a si lo. A thasawn le mawihmang deuh mi hmin dang kan sim a sile, Abraham ih tang khal paradis ti a theih ve, anih hi zumnak ih kan pa a si ih amah ihsin miphun hmuahhmuah tla thlawsuah in an um ding.

Luka 16:19-31
19 " Veikhat ah milian zet pakhat a um ih hnipuan mankhung bik in a tuamaw ih nitin nuamzet in a nung.
20 Lazaras an ti mi mi farah zet pakhat a um ve ih a pumpuluk in hma a khat theh.
21 Milian pai cabuai ihsin a tlak mi rawl tilfuan sar dingah milian pai sangka ah an hruai theu. uico an ra ih a hmai cu an ra liak theu.
22 Mi farah pa cu a thi ih vancung ih rawleinak puai ah Abraham kiangih to dingah vancungmi pawl in an fehpi. Milian pa cu a thi ve ih an phum;
23 Cule Hell sungah a tla ih tuarhar zetin a um. Cuphah in tlunlam a hun zoh ih lamhlat zet ah Abraham le a kiangih lazaras kha a hun hmu.
24 Cule a au ih, "ka pa Abraham,  i zaangfah hram aw. Lazaras kha fial aw la a kutzung kha tidai ah hnim sehla ka lei daiter dingah ti i run thlerh seh; ziangahtile hi meisa sungah ka tuar a har tuk a si!" tiah a ti.
25 Sikhalsehla Abraham in, ' ka fapa vun ruat hnik! na nun sungah khan thil tha hmuahhmuah na ngah theh zo ih Lazaras cun thil tha lo lawnglawng a co. A sinan a tu ahcun anih cu hitawk ah hin nunnuam in a um ih nang cu harnak na tuar a si!
26 Cuitlun ah kan karlak ah horkuam thukpi a um ih curuangah hitawk ihsin na hnenah rat a duh mi zohman an ra theilo ih na umnak ihsin kan umnak khal ahhin rat duhtu an um khal le an ra theilo a si,' a ti.
27 Cutikah milian pa cun 'cuti a si ahcun maw ka pa Abraham, ka pai inn ah Lazaras kha hei thlah hram aw.
28 Cutawk ah unau pa nga ka nei, Lazaras kha va feh sehla annih tal cu hitawk tuarnak hmun ahhin an ra thlen lo nak dingah ralrinnak va pe seh, tiah zangfah ka dil a si,' a ti.
29 Abraham cun, 'Na unau pawl ralrinnak petu dingah Moses le profet pawl an um a si. An sim mi kha rak ngai hai seh,' a ti.
30 Milian pa cun, 'Ka pa Abraham, cuti lawng cun a tawk lo. Mi pakhat thihnak ihsin a tho ih an hnen a thlen ahcun an nun sualnak cu an thin ding,' tiah a ti.
31 Sikhalsehla Abraham cun, " Moses le profet pawl thu an ngai duhlo ahcun mi pakhat thihnak ihsin tho hman sehla an lung duh cuanglo ding.,' a ti," tiah Jesuh in a sim.

[8.28]

Profet Thuphuan le Tahthim Thu
A tlun ih cangkarceh thu hi tahthimnak vekin an rel men theu, a sinan Jesuh in tahthim thu a zirh tikah Lazaras ti vekin an hmin ngai in voiziat a hmang?  A sannak cu voikhat hman lo, ti a si. Jesuh in tahthimnak thu a sim tikah bawi pakhat, pacang pakhat, lole milian pakhat tvk. in a rel theu men. A sinan hinah cun cuti si nawn lo in Lazaras tiih kawh mi mi pakhat hnenih thilcang mi a simnak ah a hmin ngai in a rel. Kutdawh a si mi pa ih thu a sim. Lazaras hi mi pakhat ti men a silo, thutak zirhfiangnak dingah Jesuh in  thungai ih a cangmi thuanthu a vun rel sal mi a si.

[8.29]

Mithi Umnak Hmun
Cathianghlim sung ahhin Mirang Bible sung ihsin "hell" ti ih an leh mi cafang pali a um. Cui pawl cu Thuthlung Hlun ah Sheol, le Hades, Thuthlung Thar ah Kehen le Tataros ti tla an si.

[8.30]

Jesuh ih in zirh mi Lazaras le milian pai thu ihsin kan theih tul mi cu, mithi hmun (Hades) timi ah an thleng, a sinan milian pa cu malte dang deuh harsatnak hmun (Kehen) ah a um ih Lazaras cu hmun nuam ( Paradis ) ah a um. Greek tong ih mithi hmun a ti mi hi Hades a si. Lazaras le milianpa kha an pahnih in mithi hmun Hades ( hell) ah an thleng veve. A sinan an umnak hmun ahcun kuampi in an lak a dang ih hmun hnih ah an then aw, cumi ih hmun khat deuh cu Abraham ih tangnuam a siih paradis ti'n kawh a si, a dang deuh milian pa ih umnak sawn cu Kehen a si ih harsatnak rapthlak hmun a si. Cui an lak ih kuampi a si lole kua pi cu a sung thuk ah vancungmi tla thla pawl hrangih tuah mi hmun a um, cui pawl cu vancung ramnuam tlansan in leilung nunau pawl rung sualpi tu an si. Vancungmi pawl hi Pathian fapa pawl ti khal in kawh an si (Job 1:6).

Semtirnak 6:1-4
1 A cuih san ah leilung pumpuluk ah milai cu an karhzai vivo ih fanu tampi tla an hring.
2 Cun Pathian fapa pawl in a cuih fala pawl an mawi zia an hmuh tikah an duh mi an thit.
3 Cutikah Bawipa in, "Milai hi kumkhua cun ka nungter lo pei, ziangahtile taksa nei mi an si. A tu thok ihsin kum za le kul hnakih tam an nung lo pei," tiah a ti.
4 A cuih san le cui hnu hmanah Pathian fa pawl le leilung nunau pawl ih hrin mi fate pawl cu mikei vek ih a tum zetzet mi an si. Anmah tla cu khuahlan san ih mi hminthang le mi raltha zet pawl an si.

Judas 1:6
6 An thuneih theinak sungah um duh lo in an umnak hmun a tlansan tu vancungmi pawl kha cing ringring uh. Annih cu leilung khawthim sungah kumkhua in thir cikcin in khih an si ih a maksak thuthennak ni ah Pathian in a siatsuah leh hai ding.

[8.31]

Cuvek an si ruangah Pathian in a hruai ih khawthim sungah thawng a thlak hai, cumi cu netabik thuthennak tiang an umnak ding hmun Tataros timi hmun a si.

2 Piter 2:4
4 Vancungmi a sual mi pawl cu Pathian in zuah lo in hell sungah a hlon thlak ih cutawk khawthim sung ahcun temtawn in an um ih thuthennak ni hngak in an um.

[8.32]

Kan thuzir mi kan vun zohsal pei. A thi mi hmuahhmuah in Khrih sungih um siseh umlo mi khal siseh mi thi umnak hmun "Hades" ah an feh thluh ding. Hades cu tlunlam ah silo in hnuailam ih um a si. Hades cu hmun thum ah then a si ih miphun thum umnak hrang ding a si. A pakhat nak hmun cu Lazaras ih umnak Abraham tangnem a si lole paradis a si. Cutawk ihsin Khrihfa pawlin Khrih ih ratsalnak le thawhsalnak an hngak ding. A pahnihnak hmun Lazaras ih hmuh ban mi le theih ban mi cu Kehen a si. cutawk cu milian pai umnak le harsat tuarnak hmun  a si ih, rundamnak a co lo tu pawl in cutawk ihsin thawhsalnak, thuthennak le hremtuarnak an hngak ding. Cumi ahcun an umnak hmunnuam tlansan ih leilung fanu pawl ra sualpi tu vancungmi pawl khihbet in an um ih thuthennak an rak hngak ding. Kan simsal ding, vancungmi pawl hi "Pathian fapa pawl" ti ih rel an si theu.

Job 1:6
6 Bawipai hmai ah van mi pawl an ra suah ni a thlen tikah Setan khal cu an hnenah a tel ve.

[8.33]

Mirang Bible ahcun, Hades ti mi hi Hell ti in a let. Kehen hi Hell ti leh Tataros tin a let. Curuangahkhuimi khi ziang bik a si ti theifiang ding cun Greek dictionary kan ron a tul. A netnak ahcun pomharsa kan ti zet khal le kan theihsuah dingmi cu, Khrihfa hmuahhmuah cun Khrih a ratsal tikah thli lakah Amah tong dingih an kai hlanah Khrih bangin  Hell(Hades) ah an vung feh hmaisa ve ta ding. Cui can a kim tikah, paradis hmunnuam ih  rak itthat tu, Khrih ih piangthar pawl cu Khrih Amah thawn laksoh tlang in an um ding. Cui hnu ah, hmundang hmun hnih ih tang mi pawl an thosal ding ih thuthen in an um ding. Cui thuthennak ahcun, rundamnak co lo tu pawl cu thihnak le Hades timi mithi hmun cop in meidiil ah an thla ding.

Thupuan 20:13-15
13 Cule tifinriat in a sungih ummi mithi pawl a hun suah. Thihnak le mithi khua khal in an hrencih mi mithi pawl an hun suah ve. An zaten an hnatuan cia mi vekin an  thu then a si.
14 Cule thihnak le mithi khua cu tilipi vek a si mi meisa sungah thlak an si. (Hi tilipi vek meisa cu voihnih thihnak kha a si.)
15 Zokhal nunnak cabu sungih a hmin ngan a silo mi cu tilipi vek meisa sungah hlon an si.

Hminsin: Hell timi Hades hi mei lipi le kaatmei a silo, thuthennak hnu ah cui Hell cu mei lipi sungah thlak ding sawn a si. Mei lipi cu khui ah a um? Kan umnak tla a si men thei so khaw.

2 Piter 3:9-12
9 Bawipa cu a thukam mi kimter dingah a khul a fung a si tiah mihrek in ruat hman hai sehla, a khul a fung a silo. Nan parah thinsaunak a neih ruangah a si sawn; ziangahtile pakhat te hman siatralnak tong lo te in mi hmuahhmuah an sualnak ihsin an kirsal theinak ding a duh ruangah a si.
10 Sikhalsehla Bawipai Ni cu rinlo pi ah fifir bangin a ra ding. Cuih Ni ah van pawl cu huuk celcel in an hloral dingih van ih a um mi ni le arsi le thlapi pawl tla an kaang dingih an siatral theh ding. Cule leilung cu a parih um mi thil hmuahhmuah thawn an hloral ding a si.
11 Hibangtuk in ziang hmuahhmuah an siat theh ding ruangah nan nunnak cu a thianghlim mi si sehla Pathian hnenah pek ding a si.
12 Pathian Ni, van pawl a kang ih siatsuah theh an si ni le van ih a um mi hmuahhmuah meisa lingin a titter theh ding ni cu ra thleng zang hram seh tiah Pathian Ni nan hngak rero lai ahhin napi in zuam uh.

[8.34]

A tlun cangkarceh te hin thu cikfelnak a tuah, " Ziangvek minung na si a tul?" a ti. Thusuhnak tha zet a si.

Mathai 25:44-46
44 Cule annih in 'Bawipa, ziangtik ah so na ril a rawn, na ti a hal, mikhual na si, hnipuan neilo in na um, na nat i thawng na tlak kan lo hmuh ih kan lo bom duh lo?' tiah an ti ding.
45 Siangpahrang in 'Thu ngai in ka lo sim: mi nautabik pakhat nan bom duh lo kha, keimah in bawm duh lo a si,' a ti ding.
46 Cuihnu ah cu pawl cu kumkhaw hrem hmunah an feh dingih miding mitha pawl cu kumkhaw nunnak ah an feh ding," tiah a ti.