TIDAI IH BAPTISMA
Hminsin: Cangantui dinhmun theifiang dingin, "Casiartu Hnenah" timi siar hmaisa ta aw.
[10.1]
A tam sawn ahcun Bible sungih um mi thurin danglam zetzet pawl hi fiangfaizet le dikzet ih kan theih duh a sile a thuhram thuhla pawl kan zoh ta a tul a si. Ziangruangahtile baptisma thu tla hi rundamnak thawn a pehtlai aw ih cumi ihsin Jesuh Khrih ah, cuvek thotho in Jesuh Khrih ih rongbawlnak thu kan zohkir ta hrih ding.
[10.2]
Jesuh Khrih in a voihkhat ratnak ahkhan famkimter dingih tumtah mi pa [4] a nei ti hi fiangtak in kan theih a tul. A cangvaihnak le a lungputdan khal cu tumtahnak dikzet ih kan hliakhlai lawngah kan thei thei ding a si.
[10.3]
A Rongbawl Hna:
1. Thukham Hlun dan ti famkim dingah (farasi pawl zirhdan vek silo Pathian ih tumtah dan in)
Mathew 5:17
Moses Dan pawl le profet pawlih thuzirh mi siatsuah dingah a ra, tiah in ruat hlah uh. Cupawl siatsuah dingah ka ra lo, an zirhmi pawl kimter dingah ka ra sawn a si.
[10.4]
2. A sualkailo nun, thawiawknak le thawhsalnak nun hmangin sual ngaidamnak le rualremnak thlenter dingah.
Titas 3:5
Kanmah in thil tha kan tuah ruangah silo in amai zangfahnak ruangah in runsuak a si. Thlarau Thianghlim ih in kholhnak thawngin hrinnak thar le nunak thar kan ngah.
[10.5]
3. Amai hmuihmel ih lang mi Pa ih mizia, sinak le duhdawtnak cu tarlang dingah.
Johan 6:38
Ziangahtile vancung ihsin ka rung tum tikah hin keimai duhmi tuah dingah ka rung lo, i thlahtu ih duh mi tuah dingah ka rung a si .
Kolose 1:13-15
13 Amah in kannih in uk tu thimnak huham sung ihsin in runsuak ih a fahniang uknak sungah in luhpi zo,
14 A fapa thawngin sual ngaidamnak kan ngah ih miluat kan si zo. Khrih cu hmuh theih lo mi Pathian ih hmuihmel langnak a si.
15 Amah cu Fapa tir a siih siammi thil hmuahhmuah hnakin a cungnungbik a si.
[10.6]
4. Amah kha a kil ih lungphum pakhat, le a dungthlun tu pawl kha a innhram dinnak lungphum dang vekin kawhhran innhram lungphum (foundation) rung phum dingah.
Efesa 2:20
Nannih khal dungthlun tu pawl le profet pawl in a hram an phunsuak mi parih sak mi inn nan si ve zo ih a kil ih lungphum cu Amah Khrih a si.
Hminsin : Hi thutum pa (4) hi pom dingin rongbawl hna umzia relfiang a theih thluhlo ruangah a thutum pa 1nk, le pa 2 nk hi cipciar deuh in kan hliakhlai ahcun a fiang tawk ko ding.
[10.7]
BAPTISMA
Thutum 1 nak - Thukham Hlun Daan Famkimter
Baptisma ih thutum thuhla kan ruat tlang hnik pei. Nambat 1. Baptistma petu Johan kha Thukham Hlun profet netabik a si. Thuthlung thar a simi zangfahnak thuthlung tuahnak ding ahcun Khrih thisen luannak le a thawhsalnak a tul.
[10.8]
Johan hi thuthlung thar thuphur tu a simi Khrih ih thu run thlentu a si. Amah cu nelrawn ramcar ih au aw, "Bawipai lamzin sial uh," titu kha a si. Israel miphun tang lai mi pawl in kamcia mi Messiah an congah theinak dingah lamzin sialsaktu a si. Anih cu an rundamnak ding silo in Elijah thlarau in a ra ih, " a lamzin tingil uh," timi thu rung theihter sal dingah a si, cun Khrih in fanghi lak ihsin sangvut hrikfai bangin anmah kha a dangte umter le a hi pawl kha meisa ih siatsuah dingin ralrinnak a pek.
Luka 1:76
Ka fa, nang cu a sangbik Pathian ih profet ti ah kawh na si ding nang cu Bawipai lamzin rak sialsak tu dingah a hmai ah na rak feh ding.
Matthew 3:11-12
11- Nan sualnak nan sir aw ti theihnak ah kei cun tidai in baptisma ka lo pe, a sinan keimai hnu ih a ra dingmi pa cun Thlarau Thianghlim le meisa in baptisma a lo pe ding. Amah cu kei hnakin a tum deuh ngaingai, kei cu a kedam kengtu hmanah ka tlak lo.
12- A kut sungah fang seepnak tangta a keng. Fangngai cu a cuam sungah a khum dingih a hivai pawl cu a mit dah lo mi meisa sungah a paih ding a si, tiah a ti.
[10.9]
Johan in sualsirnak thu le timtuah awknak thu a sim, cumi cu thlengawk nak le timtuah awknak thu a si. Johan pekmi baptisma hi cu a famkim tawk lo. Johan kha Khrih ih thihnak le thawhsalnak hlanah a thi ih Jesuh Khrih thisen luannak locun sual ngaidamnak a um theilo ruangah Johan ih pek mi baptisma kha cun sualnak a tleng theilo ih Khrih ih run ken mi rundamnak hrang timtuahnak ah sualsirnak thu rak sim sungnak lawng a si.
Hebru 9:22
Daan sungih a um vekin ziang hmuahhmuah cu thisen lawngin a tlengfai thi a luan hnu lawngah sual ngaidamnak a um thei a si.
[10.10]
Johan ih baptisma peknak in sualnak in mi a luatter lo. Khrih ih thucah le thawiawknak a tul sawn a si. Sual neilo Pathian Tufano lawngin cumi cu a tuah thei, Johan cu Jesuh Khrih, Pathian tufano ih rak ken mi sual ngaidamnak a um theinak dingah sualsirawknak hrang tim rak tuahtu a si. Johan ih rongbawl hna cu Khrih ih lamzin rak sial a si, Amah aiawh ding le rundamnak laksawng khal a si lo. Cutin Khrih lamzin a rak sial ih, a minung pawl hnenah rundamnak thu a rak theihter, cumi cu Khrih ih hna a si.
Luka 1:77
A minung pawl cu an sual ngaidamnak thawngin nunnak an ngah ding a si tiih simtu dingah.
Johan 1:29-31
29- A thaisun ah Johan in Jesuh a hnenih a rat kha a hmuh ih "leilung sualnak a fehpi tu Pathian Tufa khi zohhnik uh.
30- Ka dungin mi pakhat a ra, a sinan kei hnakin a tum sawn, ziangahtile ka suah hlanah anih cu a rak um zo ti ih a thuhla ka sim rero zo mi pa cu a mah hi a si
31- Amah hi zo a si ding ti ka rak theilo. a sinan amah in Israel mi pawl ih an theihnak dingah tidai in baptisma a pek rero nak san a si ; tiah a ti .
[10.11]
Jesuh Khrih ih baptisma pek a tulzia Johan in a theisuak .
Matthai 3:14
A sinan Johan in a hnenah keimah sawn hi nangmah ih baptisma pek ding ka si, ziangtinso nangmah riangri ka hnenih na rat tiah a sut.
[10.12]
Ziangruangah maw? Ziangruangah tile Jesuh hrangah Daan hnuai ah sualsir a tul lo. Amah sual fa a simi sawn kha Khrih ih baptisma pek a tul sawn ti kha a thei. A sile ziagruangah Jesuh in Johan ih baptisma pek a dil? Himi sannak cu "thutum pakhatnak," ah a um. Jesuh Khrih cu dan ti famkim tu dingah a ra, cumi cu, dingfelnak daan a si. Judah mi hmuahhmuah cu an profet Johan in sualsir ih timtuah aw dingah a ko hai, mi pakhat ih dan thlun le ti famkimnak hrangah a si, cumi ahcun Khrih cu a tel a tul.
Luka 1:76
Ka fa nang cu a sangbik Pathian ih profet tiah kawh na si ding. Nang cu Bawipai lamzin rak sialsak tu dingah a hmai ah na rak feh ding.
[10.13]
Judah miphun a si vekin dan famkimter dingah a tul mi hmuahhmuah cu a thlun (phurhsuak) ve a tul a si. Thuthlung thar le thadeuh ih puithiam sang a si vekin dan thuthlung hlun khal a thlun hmaisa ta a tul a si.
Hebru 5:1-3
1- Puithiam sang hmuahhmuah cu a mipi sung ihsin hrilmi a siih an aiawh tu ah Pathian hnatuan dingih ret mi a si. A hnatuan cu thawinak tuah le sualthlah thawinak pek tla an si .
2- Amah khal kimlonak a phunphun nei a si ruangah ziang theithiam lo le a palhmi pawl parah lungnemnak a nei .
3- Cutin tlaksamnak a neih ve ruang ahcun midang sualnak hrangah silo in amai sualnak hrang khal ah raithawinak a pek a tul a si.
[10.14]
Jesuh Khrih cu Pathian kawhhran tlunih puithiam sang si dingah Pathian ih nemhnget mi a si. Cui hnatuan cu Thlarau Thianghlim ih kholhfainak le hriakthihnak in a thianghlim mi le belruat zo mi asi ih a hnatuan a thok zo. Puithiam sang sinak dingih a tul mi thupeknak hmuahhmuah cu a famkimter thluh zo ih minung sualnak hrangah aiawhsaknak hnatuan dingin a man zo a si.
Kolose 1:18
Kawhhran cu Khrih ruangpum a siih Khrih cu a lu a si . A pum ruangpi ih nunnak hrampi cu amah Khrih a si. Amah cu fapa tir a siih ziang hmuahhmuah lakah pakhatnak le a ziik a si ringring nak dingah thihnak ihsin thawhter a si zo.
[10.15]
Johan ih tidai thawn baptisma pek mi cu sualsirnak le timtuah awknak lawng a si, a sinan Jesuh ih tidai thawn baptisma pek mi cu ngaidamnak, rundamnak le rualremsalnak thu a si, cumi baptisma ruangah zumnak thawn Khrih a pom tu cu a thihnak, a phumnak le a thawhsalnak sungah an tel thei a si.
Rom 6:3
Khrih Jesuh thawn kan pehzom awknak sungih baptisma pek kan si tikah a thihnak thawn kan pehzom awknak sung khalah baptisma pek kan si ti hi nan hngilh maw si?
Kolose 2:12
Ziangahtile baptisma pek nan si tikah Khrih thawn phum tlang mi nan siih, cule cuti ih baptisma nan conak ihsin Khrih a thoter tu Pathian cahnak hmual nan zumnak thawngin Khrih thawn thawhter mi nan si.
Rom 6:4
Baptisma kan co tikah Amah thawn phum mi kan siih a thihnak ah khan kan tel ve, cuvek thotho in Pai sunlawinak huham in Khrih kha thihnak ihsin a thawhter bangtukin kannih khal a thar in kan nung ding.
Rom 6:5
A thihnak ah khan amah thawn a thi tlang mi kan si ruangah thihnak ihsin thawhter a sinak ah kannih khal kan tel ve ding.
1Piter3:21
Cumi cu a tu ih nanmah a lo run tu baptisma hi a khihhmuh tu a si. Hi baptisma cu nan taksa pum a bal mi kholhnak ah a si lo, sia le tha thleidannak thinlung thiang thawn Pathian hnenah thukamnak nan tuah a si sawn. Jesuh Khrih a thawhsalnak thawngin nannih tla cu baptisma in a lo run a si.
[10.16]
Zokhal Jesuh Khrih a zumtu le thinlung tak in sualsirnak a neitu cu a sualnak kholh a si zo ih thlarau laksawng khal pek a si.
Dungthluntu 2:38
Piter in an hnenah nan zaten nan sualnak tlansan fingfing uhla Jesuh Khrih hmin in baptisma lak uh, cuti cun nan sualnak ngaidam nan si dingih Pathian laksawng Thlarau Thianghlim nan ngah ding.
Dungthluntu10:45
Joppa ihsin Piter thawn a ra mi Jesuh zumtu Judah mi pawl cu Zentel mi hnen tla ah Pathian in a laksawng Thlarau Thianghlim a burh ti kha an hmuh tikah an mang a bang ngaingai.
1 Timote 4:14
Profet pawl thu an sim ih upa pawl an lu tlun ih an kut an suan zawngih na ngah mi thlarau laksawng kha thlahthlam hlah.
2 Timote1:6
Curuangah na lu tlun ih kut suannak ka tuah lai ih Pathian ih a lo pek mi laksawng kha nung ringring dingin kilkhawi aw ti ah ka lo theihter nak a si .
[10.17]
Thutum 2 nak
Tu cu himi in thutum pahnihnak ti famkim suak nak dingah in hruai (Thutum 2 nak). Johan ih pek mi baptisma a co tu, sualsirnak le timtuahawknak baptisma a co zo tu pawl khal in Khrih ih thihnak, a phumnak le thawhsalnak ah baptisma an co sal a tulnak san cu himi thotho hi a si.
Johan 3:17
Ziangahtile leilungtlun ah Pathian in a fapa a run thlah tikah leilung thuthen tu dingah a thlah lo, leilung runtu dingah a thlah a si.
Dungthluntu 19:4-5
4 Cutikah Paul in Johan ih baptisma cu sualnak ihsin siraw mi pawl hrangah a si. Johan in, ka dungih a ra tu ding pa kha Israel mi pawl in an zum ding mi a si, cumi cu Jesuh a si, tiah a ti.
5 Cumi cu an theih tikah Bawi Jesuh hmin in baptisma an lak.
[10.18]
Midang, thilti theinak baptisma a simi Thlarau Thianghlim baptisma a co zo tu pawl khalin Jesuh Khrih ih tidai thawn baptisma pek mi khal an co a tul thotho a si.
Dungthluntu10:44-48
44- Cuti ih Piter a tong rero laiah a thu sim mi ngaitu hmuahhmuah parah Thlarau Thianghlim a rung thleng.
45- Joppa ihsin Piter thawn a ra mi Jesuh zumtu Judah mi pawl cu Zentel mi hnen tla ah Pathian in a laksawng Thlarau Thianghlim a burh ti kha an hmuh tikah an mang a bang ngaingai.
46- Ziangahtile cu te pawl cu tong phun dangdang in an tong ih Pathian ih maksak zia an thangthat kha an theih ruangah a si. Piter in
47 -Kanmah ih kan ngah zo vekin himi pawl khalin Thlarau Thianghlim an ngah ve a si. Curuangah tidai thawn baptisma la dingah zo in an kham thei ding maw?" tiah a ti.
48- Curuangah Jesuh Khrih hmin in baptisma lak ding ah thu a pek. Cule an hnenih cam dingin Piter an sawm.
Hminsin: Hi zumtu pawl in Thlarau Thianghlim laksawng a simi, a cencilhnak le thilti theinak cu an ngah zo, cumi ihsin Thlarau Thianghlim in a luahkhat hai, pentikos ni bang khan.
[10.19]
Jesuh khan sualsirnak hrang a simi Johan ih pek mi baptisma a co ve a si ahcun rundamnak baptisma khal a rak co ve tinak a si lo ding maw? Cuvek ruahnak cu ziangtluk atthlakza so a si. Jesuh Khrih in Thinglamtah parah, le thlan sungah thihnak neh ih a tuah mi kha a baptisma lak mi a si. Cumi cu baptisma hmuahhmuah ih baptisma a si; ziangahtile cui baptisma a kim lai hlanlo cu Thlarau laksawng ngah theih a si lo. Cumi baptisma ruangah tidai thawn baptisma laknak thawngin Khrih ah pehzom in kan um a si. Tidai ih baptisma laknak ihsin a thihnak, a phumnak le a thawhsalnak ah kan tel ve a si.
Luka12:50
Baptisma lak ding ka nei cumi tuah theh a si hlan cu ka thinlung a bang zet.
[10.20]
Baptisma hin ziang a hmuhsak, ziang a sim ih ziang a pek? A thihnak ah tel ve theinak in pek. Zo ih thihnak? Thlaici tuhmi bangin leilung muruh, thlan sungah tuh in kan um ve thei a si. Zo ih thlan? Culawng silo in in thoter sal ih a nun thar ah in tel ter ve. Zo ih nun thar?
Galati 2: 20 - Curuangah a nung mi cu kei ka si nawn lo; ka sungih i duhdawtih ka hrangah a nunnak petu Pathian fapa sungah zumnak in ka nung a si.
Johan 5:24 -Thungai ka lo sim; zokhal ka tongmi a thei ih i thlahtu a zum ahcun kumkhaw nunnak a nei. Thuthennak a tong lo ding; cutin thihnak ihsin nunnak ah a lut zo.
2 Korin 5:17- Zozo khal Khrih thawn a pehawk tikah mithar a si, a nun hlun cu a cem ih nun thar a thok zo.
Rom 6:4 Baptisma conak ihsin amah thawn phummi kan siih a thihnak ah khan kan tel ve; cuvek thotho in Pa sunlawinak huham in Khrih kha thihnak ihsin thawhter a si bangtuk in kannih khal a thar in kan nung ding.
[10.21]
Kan ruangpum cu a nung ih ap mi raithawi nak vekin kan pek (Rom 12:1) Bawipa in a thimi, hmantlaklo raithawinak a tul lo, a nungmi lawng a duh. A hrangih thi ding in fial lo, Amah in kan zate hrangah voikhat in thihsak zo sawn a si. Baptisma conak ihsin Amah thawn thi ih phum tlang mi si dingah leh Amai hrangih nung dingah in fial a si. Theisual pang hlah aw, Khrih in a co mi baptisma cu Johan ih pekmi baptisma thawn a hla aw tuk thihnak le thawhsalnak baptisma sawn a si. Amai comi baptisma cu baptisma hmuahhmuah ih baptisma a siih, a laksal mi Tidai ih baptisma a conak thawngin kannih khal a thihnak, a phumnak le a thawhsalnak ah in telter ve a si. A thihnak, phumnak le thawhsalnak batisma ah tidai thawn baptisma conak tuah locun ziang dangin kan tel thei ve ding? A dungthlun tu pawlin miphun hmuahhmuah hnen ih an tuah theinak dingah cuvek a rak tuahsak le a rak zirh thluhcia cu a sunglawi tuk ko lo maw?(Matt. 28:19).
Matthai 20:22-23a -
Jesuh in an hnenah hitin a sang, ziang kan dil ti nan thei lo. Ka in dingmi cu nan in thei ding mawsi, ka co ding mi baptisma cu nan co thei ding maw? a ti. Kan co thei ding an ti.
23a Jesuh in, a si, nan in in nan co thei ngai men ding;
[10.22]
A tlun ih a sim mi baptisma hi tidai ih baptisma silo in, sualkailo Pathian Tufano a sinak dinhmun in Amah lawngih tuar thei ding mi harsatnak a rel duhmi sawn a siih, cumi vek harsatnak cu a dungthlun tu pawl khalin A sal an sinak dinhmun ih netabik tuar cio ding mi khal a si ve.
[10.23]
Tuisan minung tampi cu Jesuh ih baptisma co lo in Johan ih pek mi vek sualsirnak hrang baptisma lawng a co tu an um. Kan sualnak thianfaiter taktak kan duh a si ahcun Jesuh ih pek mi a thihnak, a phumnak le a thawhsalnak ah baptisma kan co a tul. Tidai ih baptisma kan conak ihsin kan sualnak a thianghlim ti kan thei ih, Thlarau Thianghlim cu Pathian in laksawngah in pek a si. Ka simduh mi cu thlarau laksawng silo in rinum tak ih in umpinak sawn a si.
Titas 3:5 -
Kanmah in thil tha kan tuah ruangah silo in amai zangfahnak ruangah in runsuak a si. Thlarau Thianghlim ih in kholhnak thawngin hrinnak thar le nunnak thar kan ngah.
1Korin 3:16
Nannih cu Pathian biakinn nan si hi nan theilo maw? Pathian Thlarau ih umnak inn nan si.
Dungthluntu 19:4-5-
Cutikah Paul in Johan ih baptisma pekmi cu sualnak ihsin a siraw mi pawl hrangah a si. Johan in ka dungih a ra tu ding pa kha Israel mi pawlin an zum ding mi a si. Cumi cu Jesuh a si tiah a ti cumi an theih tikah Bawipa Jesuh hmin in baptisma an lak.
Marka16:16
Zokhal sisehla a zum ih baptisma a co ahcun rundam a si ding. A sinan a zumlo tu cu hnon a si ding.
1Piter 3:21
Cumi cu a tu ih nanmah a lo runtu baptisma khihhmuh tu a si. Hi baptisma cu taksa pum a balmi kholhnak ah thukamnak nan tuah a si sawn. Jesuh Khrih a thawhsalnak thawngin nannih tla cu baptisma in a lo nun a si .
[10.42]
Mai Hmuhdan Ih Rel
Rundamnak cu a lakin a si timi a dik vekin, cumi cu a thu ih zirin a si timi khal hi a dik ve a si. Cumi ih tul mi hrekkhat cu in ti famkim sak thluh zo ih a hrekkhat cu kanmai tuanvo in a um. Hi thu le hla ih rinhlelnak a neitu cu, tuah hmaisak ding mi Jesuh tong ngah ta lo in Pathian ton an tum lokmei vekin ka ruat.
Johan14:6 -Jesuh in keimah cu lamzin le thutak le nunnak ka si. Keimah ihsin siarlo zohman ka Pa hnen an thleng theilo.
[10.25]
A Fehdan
Rundamnak hi thil cangsuak vivo dingmi ih hmaisabik thil a si. A pakhatnak ah lungthleng nak in a thawkih thlan tiang a peh vivo. Cui thil ra cang rero ding mi pawl lakah baptisma hi a thupibik mi pakhat a si ve. Rundamnak fehsuak rero dingmi hrangah thil tul dang khal tampi a um lai, a sinan an zaten thil pakhat thu ah an hngat aw thluh a si, cumi cu Sual raithawinak a si ih Jesuh Khrih in Thinglamtah parah a famkimter zo. Raitluan, thawinak pek mi, Pathian Tufano in a Pai thupeknak vekin a thisen thianghlim cu sual ruangih Pathian sunlawinak co banlo mi hmuahhmuah hrangah a thlet a si (Rom 5:8). A zangfahnak le thawinak a pek mi ruangin Jesuh Khrih a zum taktak tu pawl hmuahhmuah cu Tufano nunnak ca uk sungah an hmin khum theh an siih, Khrih thisen in an sualnak a kholhfai ih Thlarau laksawng pek in an um.
1Piter 1:18-19
18 Nan pu le nan pa ih an lo rohta mi thathnemnak umlo nan nundaan ihsin a lo tlensuak tu cu ziang a si ti nan thei ko. A siatthei mi sui le ngun bangtuk a si lo.
19 A lo luatter tu cu a sunglawi mi Khrih thisen a siih Khrih cu soiselnak umlo raitluan tufa bangtuk a si .
Johan 1:29
A thaisun ah Johan in Jesuh a hnenih a rat lai kha a hmu ih leilung sualnak fehpi tu Pathian Tafa khi zoh hnik uh.
1Korin 6:19-20
Nan taksa ruangpi cu Pathian in a lo pekmi le nan sungih a nungmi Thlarau Thianghlim ih biakinn a si hi nan theilo maw? Nannih cu nanmai ta nan silo. Pathian ta nan si zo man pek ih leimi nan si curuangah nan taksa cu Pathian sunlawinak ah hmang uh.
Johan 3:16
Ziangahtile Pathian in leilung hi a duhdawt zet ruangah a fapa neihsun a pekih amah a zum tu hmuahhmuah cu thilo in kumkhaw nunnak an nei ding.
Matthai 26:28
Himi hi ka thisen a si Pathian thukamnak hngetter tu le mitampi sual ngaithiamnak hrangih ka thlet mi thisen a si.
Thupuan 21:27
Sikhalsehla cui khawpi sungah a thianglo mi zianghman a lut lo ding ningzak za thil a tuahtu le thuphan pertu khal an lut lo ding. Tufa nunnak cauk sungih hmin nganmi lawng an lut ding.
Johan 1:12
Mi hrekkhat cun an suang ih an zum, curuangah Pathian fate can theinak a pek.
Dungthluntu 2:38
Piter in an hnenah nan zaten nan sualnak tlansan fingfing uhla Jesuh Khrih hmin in baptisma lak uh, cutin nan sualnak ngaidam nan si dingih Thlarau Thianghlim laksawng nan ngah ding.
[10.26]
A Rahsuah
Cuticun Pathian ih duhdawtnak maksak ruangah, Jesuh Khrih ih raithawinak thawngin Pathian ih miphun thianghlim ah kan cang zo.
Efesa 2:19 Cuti a si ruangah nannih Zentel mi khal mikhual le ramdang mi nan si nawn lo, Pathian ih miphun pawl thawn a bangrep mi nan siih Pathian innsang ih sungtel nan si zo.
1Piter 2:9
Sikhalsehla nannih cu hrilcia mi miphun, siangpahrang ih puithiam, miphun thianghlim, Pathian ih miphun bulce nan si. Khawthim sung ihsin khawruah harza tleunak sungih a lo ko tu Pathian in mangbangza thil a tuah mi pawl tlang aupi dingih hril mi nan si.
[10.27]
A Zangfahnak Le Zawnruahnak In Runmi Kan Si.
Efesa 2:5
Kan sualnak ruangah thlarau lamah mithi cia kan si ko nan Khrih thawn nunnak ah in thoter sal, Pathian ih zangfahnak thawngin run mi nan si.
Titas 3:5
Kanmah in thil tha kan tuah ruangah silo in amai zangfahnak runagah in runsuak a si. Thlarau Thianghlim ih in kholhnak thawngin hrinnak thar le nunnak thar kan ngah.
[10.28]
Amah Ih Pekmi Zumnak Thawngin.
Efesa 2:8
Ziangahtile nannih tla cu Pathian zangfahnak in run mi nan siih cui runnak cu amah nan rinsannak thawngin nan ngah mi a si. Hi runnak ngah ruangah zohman porh aw ding nan silo ziangahtile an tuan an tuah thei ruangih ngah mi a silo, Pathian ih laksawng a si.
Galati 3:26
Zumnak thawngin nan zaten Pathian ih fa nan si.
[10.29]
Bawipai Hmin Kan Kawh Tikah
Dungthluntu 2:27
Bawipai hnenah bomnak dil in a au tu cu humhim an si ding, a ti.
Dungthluntu 4:12
Rundamnak cu amai sung lawngah a um leilung pumpuluk ah Pathian ih pek mi runtu dang le run thei tu hmin dang zohman an um lo tiah a ti.
[10.30]
Pathian In Khrih Cu Thihnak Ihsin A Thoter Ti Kan Zum
Rom 10:9-10
Jesuh cu Bawipa a si tiah na hmurka in na phuang ih Pathian in thihnak ihsin a thawhter sal tiah na thinlung in na zum cun rundam na si ding
10 Ziangahtile kan zumnak thawngin Pathian thawn rualremnak kan co; kan phuannak thawngin runnak kan ngah.
[10:31]
Cumi Cu Amai Tongkam Fimnak In A Fiang.
Johan 5:34
Hiti ih ka ti tikah theihpi tu minung ka neih a tul ka tinak a si lo. Runnak nan ngah theinak dingah ka sim mi a si.
Timote 3:15
Bible Thianghlim cu na nauhak te lai ihsin na thei zo ti kha hngilh hlah aw. Cui Cathianghlim cu Khrih Jesuh na zumnak sungin rundamnak ah a lo thlen tu fimnak a lo petu a si.
[10.32]
Rundamnak Hrang Kan Thinlungih Um Mi
1Kor. 15:2
Nan hnenih ka phuancia mi Thuthang Tha a si ih hnget zetin nan pom a si ahcun runmi nan si.
[10.33]
Thuthang Tha hi ka zahpi hrimhrim lo ziangahtile Pathian huham in a zumtu hmuahhmuah rundamnak an ngah, a hmaisa ah Judah mi hrangah a si ih cuisin Zentel mi hrangah a si.
[10.34]
A Net Tiang Harsatnak Tuarsuak Tumsawn Uh.
Matthai 10:22
Keimai ruangah mikip in an lo hua ding sikhalsehla a netnak tiang a tang theitu cu runsuah an siding.
[10.35]
Baptisma In Jesuh Khrih Thihnak Sungah Kan Tel
Marka 16:16
Zokhal sisehla a zum ih baptisma a co ahcun rundam a si ding, a sinan a zumlo tu cu hnon a si ding.
Galati 2:20
Curuangah a nungmi cu kei ka si nawn lo, ka sungih a nungmi Khrih sawn a si. A tu ih ka nung ka ti mi hi cu i duhdaw ih ka hrangah a nunnak a petu Pathian fapa sungah zumnak in ka nung a si.
Galati 3:27
Khrih thawn pehzom awknak sungah Baptisma pek nan si zo ih a tu ahcun amah Khrih nunzia nan keng a si.
1Piter 3:21
Cumi cu a tu ih nanmah a lo runtu baptisma khihhmuh tu a si. Hi baptisma cu nan taksa pum a bal mi kholhnak a silo, sia tha thleidannak thinlung thiang thawn Pathian hnenah thukamnak nan tuah a si sawn. Jesuh Khrih a thawhsalnak thawngin nannih tla cu baptisma in a lo run a si.
[10.36]
Zumtu pawl cu a thihnak lawngah silo in a phumnak le a thawhsalnak khal ah kan tel a si.
Rom 6:3-7
Khrih Jesuh thawn kan pehzom awknak sungih baptisma pek kan si ve tikah a thihnak thawn kan pehzom awknak sung khalah baptisma pek mi kan si ti hi nan hngilh maw si?
4 Baptisma pek kan si tikah amah thawn phum mi kan siih a thihnak ah kan tel ve, cuvek thotho in Pai sunlawinak huham in Khrih thihnak ihsin a thawhter bangtuk in kannih khal a thar in kan nung ding,
5 A thihnak ah khan amah thawn a thi tlang mi kan si ruangah thihnak ihsin thawhter a sinak ah khan kannih khal kan tel ve ding.
6 Kan nun hlun cu Khrih thawn thinglamtah parah khencih a si zo ti kan thei cumi cu sual in a khat mi kan nunnak hlun ih cahnak huham cu a cemral theh ding tinak a si. Cuti in sualnak ih sal kan si nawn lo.
7 Ziangahtile mi pakhat cu a thih tikah sualnak huham in a parah thu a nei nawn lo.
Kolose 2:12
Ziangahtile baptisma nan co tikah Khrih thawn phum tlang mi nan si; cule cuti ih baptisma nan co tikah thihnak ihsin Khrih a thoter tu Pathian cahnak hmual nan zumnak thawngin Khrih thawn thawhter mi nan si ve.
[10.37]
Zumtu diktak pawl cun a dik mi sualsirnak thawn Baptisma an la a si.
2 Kor. 7,10
Pathian riahsiatnak cu thinlung thlengnak ah a hmangih runnak a suahter curuangah cui riahsiatnak ruangah sir awknak zianghman a um lo, sikhalsehla milai riahsiatnak menmen a si ahcun thihnak a suahter.
[10.38]
Voikhat baptisma co tu kan si zo, curuangah kan sungih a um mi ruahsannak kaihnget ringring dingin kan tha kan suah ding a si.
Rom 8.24
Ziangahtile ruahsannak lawngin run mi kan si, kan ruahsan mi kha kan hmuhthei a si ahcun ruahsannak a si ngaingai lo, zo so a mit ih a hmuh thei mi cu a ruahsan dah?
[10.39]
Hi a thlawsuah ruahsannak neitu kan si zo ruangah tu ahcun hngakhlap zet le thinsau zet in a ratsalnak kan hngak a si.
Hebru 9:28
Cubangtuk in Khrih khal minung sual tlengfai dingah raithawinak ah voikhat a pe aw a si. Cule voihnih nak a langsal dingih cutik ahcun sualnak thu ah si nawn lo in amah hngak tu pawl rundam dingah a si ding.
[10.40]
Rundam kan sinak cu:
1, Pathian zangfahnak le zawnruahnak kan co ruangah,
2, Pathian duhdawtnak le a zangfah thinpemnak kan co ruangah,
3, Pathian ngaithiamnak le rualremternak kan co ruangah,
[10.41]
Rundam kan si theinak dingin:
1. A hmin (Jesuh) kawh theinak zumnak kan neih a tul,
2. Sualsir, amah zum ih a thu thlun a tul,
3. A thihnak, a phumnak le a thawhsalnak ah kan tel a tul,
4. A ratsal ding ruahsannak cu thinsau zet in a net tiang kan hngah a tul.
[10.42]
Cu lawngah:
1. Khrih thawn roco tu ah tuah kan si.
2. Pathian uknak sungih luh theinak pek kan si.
3. Taksa thar le kumkhaw nun neitu ah in tuah.
4. Kan Bawipa Jesuh Khrih thawn kumkhua in kan um tlang.
[10.43]
Phungdan Le Serhsang Pawl
Kawhhran serhsang le phungdan phun tamzet a um ih cupawl cu uk awknak (kawhhran) ah siseh, Pathian miphun hmuahhmuah hrang ahcun serh thluh dingih kawh kan si tin a ruat an um. Leitlun ah miphun tampi an um ih zokhal in anmah sersang le nunphung an nei cio.
[10.44]
Zokhal in an hlan thuanthu ihsin nunphung le sersang a thawhdan le a hmandan khal an nei cio. Thuthimnak ah; Mexico mi pawl in may ni 5 khi mahte ukawk ni tin an hmang, Judah pawl ih lantakpuai an hman bangin, cuvek thotho in Brazil pawlin Mardi Gras, cun Germany in Octoberfest tivek tla an lawm theu.
[10.45]
Keimai hmuhdan ah, United States tla hi phundang zet ih Pathian tumtahnak hmuhsak tu a si ti an a langter, America ih cuanghmuarnak te cu, mi palbeh mi ramdang lak ihsin hruaisuah mi a rak si, a sinan amai nunphung le serhsang thotho a hringsuak a si. Cui serhsang ni pawl ahcun July 4 tla a tel, cumi cu Lungawi thusimnak le Tuanpi Ni an ti. Himi ihsin ka sim duhmi ciah cu, Pathian ih miphun thinghlim vek mi danglam hleice cu an um dah lo ih ziangtik khalah an um lo ding ti mi hi a si. Anih cu amah ten a todelh aw, ziangruangah tile miphun zarawi tongkhawm an si ruang lawngah silo in thlarau lam pawlkompi a si ruang khalah a si sawn.
[10.46]
Pathian Miphun Thianghlim
Pathian miphun cu hi leitlun ah a hrekkhat cu umlai hmansehla hi khawvel thil silo in thlarau ram thil sawn a si. Hi lei taksa in a tawn in a tuam thei lo. Leitlun thil pawl cun anmah hmunram mizia thawn mil aw zetzet in bangpit le zon mi tla an nei theu ko, a sinan anih cu ram mi pianhmang hrimhrim a cuang dah lo ih a ram mi vek khal in a um dah lo.
[10.47]
Pathian ram sung ahcun Africa mi, Asian mi le Europe pawl tivek a um lo, Protestant le Catholic pawl ti khal an um lo, Jesuh Khrih hrangih a hlan aw mi zum tu lawng an um. cui ram ahcun hnaset, kebai, mitcaw tivek a um lo. a sang tuk a niam tuk tivek, a thau tuk a tawl tuk tivek, mi lian tuk mi farah tuk, hmelmawi le hmelsia, mi hminthang le thanglo tivek khal a um lo.
[10.48]
Pathian ram minung pawl cu a phaw lenglam taksa hnakin sunglam thlarau ihsin a theih theih deuh. Pathian ram timi hi leitlun ralsannak le buainak lak ihsin suak mi sihman sehla nehnak a co lai hlanlo a ra lai ding mi san khi thinsau zet in a hngak a si. Leitlun thil vek silo in, Pathian ram uknak phung le dan cun hmailam can hrangah in timtuah cia sawn, hmailam thilcang ding pawl hrangah.
[10.50]
Tidai Ih Baptisma
Tulai ah mi malte lawngin tidai ih Baptisma co a thupitnak an thei. Tidai ih baptisma cu thihnak ihsin nunnak sungih in hruailut tu thlarau lam sangka a si. Jesuh Khrih kan zumnak langtertu sangka khal a si. Sangka khatlam ih a um mi khawvel nun ih a nungtu pawl cun zianghman tla theilo in sualnak lamzin an zawh rero men. A sinan himi sangka zawh in a fehtu pawl cun an khawvel nun pawl kha an that, an phum hlo ta, ih a har mi zin bi te, Jesuh Khrih rak zawhcia zo mi hneksaknak ih khat Pathian ram lamzin cu an zawh ih nun thar in an nung sawn a si. (2Tim. 3.12). Cun, "Tuahnak tello zumnak cu a thi a si," zo khal Khrih thawn an pehzom awk tik ahcun mi thar a si. A nun hlun cu a cem ih nun thar a thok zo, (Bung 6 sung, " Thuthlung Kilhimnak," zoh aw, cun, thuhlawm (6.26 ihsin 6.32) "Thinglamtah Hnatuan Thuahhnih") tiang thawn.
Johan 10:9
Kei cu sangka ka si keimai sung ih a lut tu cu rundam an si ding, an lut an suak dingih hrampi a hning mi an hmu ding.
Filipi 3:13-14
Ka u le ka nau pawl cumi cu ka co ngah zo, tiah ka ruat hrimhrim lo ka tuah mi cu pakhat lawng a si ka dunglam ih a liam mi thil kha hngilhsan tahrat in ka hmailam ih a um mi kha ban dingah ka dawi rero a si.
14 Curuangah hmuitin mi lam ah zuam man laksawng ngah dingin dingten ka tlan, cui laksawng cu Pathian in Khrih Jesuh sung ihsin kumkhua nung dingah in run komnak kha a si,
2Korin 5:17
Zozo khal Khrih thawn an pehzom tik ahcun mi thar a si, a nunhlun cu a cem ih nunthar a thok zo.
[10.51]
Tidai Baptisma conak hi Pathian hnen ih thupuan, Amai thupek tongkam hmisinnak a si ih cumi hrangah theihpinak thil tampi a tulter lo. A sinan mihrek cun tul in an thei (Dungthluntu 8:36-37)A thuphuan mi thu kha theithiam dingin a duh sawn. Cule cui thu a phuangtu in thinlung tluangtlam zet i an phuansuah ding kha a duh fawn.
[10.52]
Thuthlung Hmuhsaknak
Dan hlun lai ahcun Israel fate pawl khan Pathian in an hnen ih a tuah mi thuthlung hmuhsaknak ah vunzim an rak tan. Cui hmuhsaknak ruangah Pathian ih hril mi minungah an cang. Thuthlung thar ahcun, tidai ih Baptisma hi an thuthlung hminsinnak vek in a pek hai ih a mi thianghlim puithiam rinum vek in Pathian in a ret lala. Tidai ih Baptisma cu thuthlung thar zumtu pawl hmuahhmuah in nunthar ih an nun ding le puithiam dinhmun ih timtuah awknak a si.
Dungthluntu 7:8
Cule Pathian in Abraham cu vunzim tannak dan kha a thukamnak hminsinnak ah a pek. Curuangah Abraham in a fapa Isaak a suah hnu zarh khat ah a vunzim a tansak. Isaak in a fapa Jakob ih vunzim a tansak ih Jakob in a fapa hleihnih cu an vunzim a tansak. A fapa hleihnih cu kan phun cithlah tu kan pupa hminthang pawl an si.
Kolose 2:8-13
8 Ralring uh, minung fimnak zianghman santlainak neilo, pakhat le pakhat bum awknak fimnak hmang tahrat in zohman in sal ah lo tuah hlah haiseh. Cubangtuk fimnak cu Khrih hnen ihsin a ra mi a silo minung leh van leh lei karlak ih um uktu thlarau pawl ih thuhla zirnak ihsin a ra mi a si.
9 Ziangahtile Pathian sinak cu Khrih a minung sinak sungah famkimzet in a um ih.
10 Amah thawn nan pehzom awknak thawngin nunnak famkim nan hnenah pek a si zo, Khrih cu thlarau uktu hmuahhmuah leh thunei tu hmuahhmuah tlunah cungnungbik Bawi a si,
11 Khrih thawn nan pehzom awknak thawngin vunzim tanmi nan si, cui vunzimtannak cu minung tuah mi a si lo, Khrih ruangih tuah mi a siih sual hiarnak tisa caknak sung ihsin luat khi a si,
12 Ziangahtile baptisma nan co tikah Khrih thawn phum tlang mi nan si, cule cuti ih baptisma nan lak tikah thihnak ihsin a thoter tu Pathian cahnak hmual nan zumnak thawngin Khrih thawn thawhter mi nan si ve,
13 Hlanlai ah nan sualnak ruangah le dan lengih a um mi Zentel mi nan si ruangah thlarau lam ahcun mithi nan rak si, sikhalsehla a tu cu Khrih thawn hmunkhat ah Pathian in a lo nunter zo. Pathian in kan sualmawhnak hmuahhmuah in ngaidam zo.
1 Piter 2:5
Nanmah khal ra uhla a nungmi lungto bangtuk in thlarau biakinn saknak hrangih Pathian ih hman mi lungto si uh. Cutawk ah puithiam thianghlim hnatuan nan tuan dingih cohlan tlak mi thlarau raithawinak kha Jesuh Khrih thawngin Pathian hnenah nan pe ding.
1Piter 2:9
Sikhalsehla nannih cu hrilcia miphun siangpahrang ih miphun puithiam thianghlim Pathian miphun bulce nan si. Khawthim sung ihsin khawruahhar za tleunak sungih a lo ko tu Pathian in mangbangza thil a tuah mi pawl tlangaupi dingih hril mi nan si.
[10.53]
Tlinnak Dingah
Puithiam si ding cun zumtu pakhat cio in, Khrih sungah zumnak a neih, a thihnak, a phumnak le a thawhsalnak ah telin tidai ih baptisma a lak a tul.
[10.54]
Baptisma Pakhat Ah Thiltul Pahnih
Baptisma ah thil pahnih a um, Pakhatnak ah, puithiam hna hrangih timtuah hleice nak a si, a pahnihnak ah, puithiam ding hrangih hriakthihnak a si ih cuipawl cu Pathian ih duhnak tuah dingin huham pek an si ih, cumi cu leitlun ih Thlarau lam hnatuannak hi a si. Cui thil pahnih cu kan nunnak hrangih Pathian tumtah mi a famkimnak dingah kan tuah tul mi an si. Zumtu hmuahhmuah hi puithiam hnatuan dingah kawh kan si. Cui kawhnak ti famkim dingah a dangtei ret (ti thianghlim), timtuah, hriakculh leh thilti theinak pek mi kan si a tul.
[10.55]
Kan theih tul mi thupizet cu, baptisma ahhin thil pahnih a um ko nan, serhsang pakhat a si ti hi. Pathian pakhat, zumnak pakhat, baptisma pakhat a si ih cumi ah thianhlimternak ih timtuahnak le thuneihnak hrangih hriakthihnak khal an pahnih in an tel ih a tikcu lawng te an bangaw lo men thei. Ziang a va si hmanah, baptisma pakhat ih thil pahnih tuah mi ti hi a si mei. Kawhhran serhsang ah hi cumi lawng thil pahnih um a si lo. Bawipa zanriah kil thu khalah thil pahnih a um; a taksa hmuhsaknak ah (Sang) le Khrih thisen sungih thuthlung thar hmuhsaknak (No) tla an si.
Efesa 4:4-6
4 Pathian in a lo kawh tikah a lo kawh mi ruahsannak cu pakhat a si vekin pum pakhat a um ih thlarau khal pakhat a um.
5 Bawi pakhat a um, zumnak pakhat a um, baptisma pakhat a um.
6 Pathian pakhat a um ih mi hmuahhmuah ih Pa a si. Amah cu ziang hmuahhmuah tlunah Bawi a si; ziang hmuahhmuah sungin hna a tuan ih ziang hmuahhmuah sungah a um.
[10.56]
Hriakthih
Aaron, Saul le Elisha pawl Pathian in hriak a thih bangin, baptisma hmangin Pathian in a minung hmuahhmuah hnenah thil titheinak a pek a si, ziangahtile Bawipa Jesuh Khrih a thluntu (Zumtu) hmuahhmuah cu Thlarau Thianghlim in thil titheinak a pek hai ih a Taksa pumkhat sungah hriakthih mi an si, curuangah Thlarau pakhat sungih tidai in ding an si.
Suahlannak 29.7
Cule sahriak lak uh la a lu ah nan culh pei.
1Siangpahrang 19.16
Nimshi fapa Jehu cu Israel siangpahrang ah hriak culh aw. Nangmah a lo aiawh tu dingah Aber Maholah khua mi Shafat fapa Elisha cu hriak culh aw.
1 Samuel 10.1
Cule Samuel in Olive siti palang pakhat a lak ih Sual ih lu parah a toih ih Saul cu a hnam hnu ah Bawipa in a miphun Israel uktu dingah nangmah cu sahriak a lo culh a si. A minung pawl na uk dingih an ral pawl ih kut sung ihsin na luatter ding. Amai minung pawl uk dingah Bawipa in a lo hril zo a si, ti theihthiamnak cu hibangtuk in a si ding.
1Korin12.13
Cubangtuk in kannih khal hi Judah mi le Zentel mi ti ah si hmannungla miluat e, sal e tin um hmannungla kan zate in cui ruangpi pakhat sung ahcun thlarau pakhat ih hnim mi kan si ih kan zaten cui thlarau pakhat in dingah pek kan si zo.
[10.57]
Thlarau Laksawng
Thlarau laksawng timi cu zumtu diktak pawl hnenah maksak cuang le danglam hleice in Thlarau in a pek mi thil titheinak a si. Cui thil titheinak cu Thlarau in amai duhdan ih a pek mi an si. Laksawng pawl cu kawhhran a simi Pathian uknak tuahthatnak hrangah in din tha tu dingih pek mi hmanrua (Thlarau lam thil titheinak) an si. Cuitlunah, Khirh ih taksa tuahthatnak hrang khalah a taksa peng pawl ih tul mi hmuahhmuah a phuhhruk sak vivo a si.
IKorin12.4-7
4 Thlarau laksawng cu a phunphun a um , a sinan cui laksawng pawl hmuahhmuah a petu cu thlarau amah lawng a si.
5 Bawipai hnatuan hi a phunphun a um a sinan kan ren mi Bawipa cu amah pakhat lawng a si.
6 Hnatuan theinak hi a phunphun a um a sinan cui hnatuan theinak cu zozo hnen khalah an tawk ciar in a petu cu Pathian amah thotho a si.
7 Kan sungih thlarau a um kha pumkhat in a langih cumi cu mi senpi thathnemnak a si.
1 Korin12.11
Hi hmuahhmuah a petu cu thlarau pakhat lawng a si. Amai duh vekin laksawng dangdang kha pumpak hnenah a pek fingfing .
1Korin12.25-26
25 Cuti cun ruangpum pahra then theiawknak zianghman a um lo taksa then pakhat le pakhat parah zawnruahnak an nei sawn a si.
26 Taksa then pakhat a tuar ahcun taksa then dang khalin an tuarpi ve. Taksa then pakhat sunlawinak a ngah ahcun a dang tla in an lungawi pi ve a si.
Efesa 4.16
Amai uknak thuai ah taksa par ih then dangdang pawl cu remten a pehkhawm awk ter. Hlikhlok ruh cang pawl in taksa pumpi cu hmunkhat ah an kaihkhawm theh. Curuangah taksa parih then dangdang cu anmai hnatuan ding ciar an tuan tikah taksa pumpi cu a zaten duhdawtnak in a thangso a si.
[10.58]
Thlarau laksawng ti leh thlarau laksawng pawl ti hi a dangaw ngaingai mi thil (2) an si. Jesuh in Pai hnenah hnemtu thlah dingin kan ai ah in dilsak, cumi cu, Thlarau Thianghlim a si. Jesuh vekin cui Pathian ih laksawng cu kan hnenah a ra ve. Zumtu pawl ih taksa cu thlarau ih Biakinn a si ih thlarau in cui Biakinn sung cu a luah ringring.
1Korin 6.19
Nan taksa ruangpi cu Pathian in a lo pek mi leh nan sungih a nungmi thlarau thianghlim ih Biakinn a si hi nan theilo maw? Nannih cu nanmai ta nan silo Pathian ta nan si.
Rom 8:11
Thihnak ihsin Jesuh a thoter tu Pathian ih thlarau nan sungih a nun ahcun thihnak ihsin Khrih a thawhter saltu Pathian in nan sungah a thlarau a umter nak thawngin a thithei mi nan taksa ruangpi cu nunnak a pe ve ding a si.
[10.59]
Thlakthleng
Thlarau Thianghlim hin kan sungih umhmun a khuar tikah kan sungih a um mi pawl kha a tharin in thlakthleng sak thluh. Sualnak ih khat nunhlun pawl kha a thil titheinak huham in a siatbal thluh ih kan nunnak ah tan a rung khuar. Kanmai duhnak sual kha a tumsuk ter ih in nehsak vivo cule sualnak hram kha a run thlakthleng ih Thlarau rah kan rah theinak dingin le sualsirnak cu rah ih Pathian cohlan tlak si dingin in thlakthleng sak thluh a si.
Galati 5:22-23
22 Sikhalsehla Thlarau ih a rahter mi cu duhdawtnak, lungawinak, hnangamnak, thinlung saunak, mi zangfahnak, thatnak, rintlak mi sinak,
23 Lungnem tangdornak leh thinlung sup theinak tla an si. Cubangtuk rah umnak ahcun dan cu a tul nawn lo.
[10:60]
Thlarau Thianghlim in kan sungih hna a tuannak ruangin kan thangso thok ih Khrih hmuihmel bangnak ah kan thanglian vivo ih Pathian riantu pitling ah kan hung cang thei a si.
Rom 8:29
29 Pathian in a hrilcia mi pawl cu a Fapa bangtuk si dingah a dangten a ret hai; cuti cun unau tampi lakah a Fapa cu pakhatnak a sinak dingah a si.
[10:61]
Danglamnak Dang
Thlarau Thianghlim thilpek leh Thlarau Baptisma hi thil danglam aw mi an si. A dungthlun pawl kha Thlarau baptisma an co hlanah Thlarau Thianghlim thilpek an rak co cia, thilti theinak huham a burhnak ah khan. Himi kan zoh tikah Thlarau baptisma nak leh Thlarau thilpek timi hi thuhnih dangaw mi an si.
Johan 20:22
22 An parah a thaw a thawt ih, Tharau Thianghlim rak co uh!
Dungthluntu 1:5
5 Johan cun tidai thawn baptisma a lo pe; a sinan ni malte sungah Thlarau Thianghlim thawn baptima pek nan si ding.
[10:62]
Dungthlun pawl kha Jesuh Khrih vanih a kai hlan ihsin Thlarau laksawng an rak ngah cia a sinan Penticos ni a thlen hlanah kha cun Thlarau baptisma an co hrih hai lo.
[10:63]
Nun Thar
Zokhal a zumtu taktak cu Thlarau Thianghlim in nun thar in a zem cio hai. Hi nun thar kan timi cu voihnih suahsalnak a si ih nui pum sungih suahnak silo in thlarau hrintharnak a si. Hi Thlarau hrintharnak cu rundamnak ih hrinsuah mi a siih Khrih ih thihnak, a phumnak le a thawhsalnak ih kan tel vete'n a thok a si. Tuh lo mi ci cu a rah dah lo. Khrih sungih nunthar kan neih mi hi Khrih thawn leilung ih tuhcih kan si ruangih rahsuak mi a si. Khrih in a nung mi raithawinak hrangih in kawh laiah ziangtin kan thi thei ding? Nung cingin teh ziangtin phum kan si thei ding? Ziangtin kan pianthar thei ding? Himi hrangih a tulmi hi Khrih amah in a rak tawlrel cia thluh zo. Taksa lam silo, thlarau lam sawn in a siih, cumi cu tidai ih baptisma conak in a si. Himi hi Khrih ih thihnak, a phumnak le a thawhsalnak ihsin nun thar ah kan thlun theinak lamzin umsun a si.
[10.64]
Voikhat Lawng (Meisa leh Lei)
Thuthlung Thar sungah thilcang mi malte lawng ngan mi kan hmu thei. Ka simduh mi cu voikhat a sim nan a simsal lo mi thil pawl khi a si, cui thil pawl cu profet hmaisa pawl in duhsan nei zet ih an rak sim cia mi kha an si.
[10.65]
Cutivek thilcang mi cu Dungthluntu cabu sungah pahnih kan hmu thei. Thil voikhat rak thleng mi a veikhatnak Thlarau Thianghlim baptisma peknak kha (Dung. 2:2-4) a zial aw mi meisa lei kha an rak hmu cio ih cucun an zate'n a baptist hai ih thlipi hrang bangin van ihsin aw an thei.
[10.66]
Hi thuhla rak phuang cia tu cu profet Joel a siih Penticos ah a hmaisabik a famkim cih ih cumi cu Piter in a simsal.
Dungthluntu 2:16-21
16 Ziangso a si ti ahcun Profet Joel ih a rak simcia mi a kimnak sawn a si. Profet Joel ih simcia mi cu:
17 'Pathian in, ni netabik lam ahcun hitin ka tuah ding; mi hmuahhmuah parah ka Thlarau ka burh ding; nan fapa leh nan fanu pawlin ka thu an phuang ding; nan tlangval pawlin langnak an hmu ding; nan patar pawlin mang an man ding;
18 A si, ka salnu le ka salpa pawl tlun khalah cui ni thla ahcun ka Thlarau ka burh dingih ka thu an sim ding.
19 Tlunlam vanah mangbangza ka tuah dingih thuailam leilung par khalah khawruahhar ka tuah ding. Thisen leh meisa le meikhu sahzet a um ding,
20 Ni a thim dingih, thlapi khi thisen bangin a sen ding; Bawipai Ni ni maksak leh ni sunglawi a thlen hlan deuh ahcun,
21 Bawipai hnenah bomnak dil in a au tu cu humhim an si ding,' a ti.
[10.67]
Khai a zial aw mi meisa lei kha ziangtik hman ah a um lehsal nawn lo ih profet Joel ih rak sim vekkhan an rak tuan thokih an ti famkim cutco. Thlarau Thianghlim hin mi voi tampi baptisma rak pe khalsehla hitivek larnak hi cu ziangtik hmanah tarlangnak a um nawn lo (Dung.4:31, 8:17, 10: 44-46, 11: 15, 19:6).
[10.68]
Thuthlung Hlun ih profet netabik pai thu kha Thutlung Thar ah ngan mi a um, theihdan tlangpi ahcun Baptist tu Johan a si. Johan cun hitin a ti, "kei cun tidai in sualsir dingah ka lo baptist ih; a sinan ka hnu ih ra tu ding Pa cu kei hnakin a ropi sawn, a kedam hri phoihtu hman ka tlak lo: Anih cun Thlarau Thianghlim leh meisa in baptisma a lo pe ding:"(Matt. 3:11).
[10.69]
Hi thu hi thuah hnih in an kawm awk thu kan hmu thei. Johan ih sim mi ahcun Farasi leh Sadusi mi pawlih an tuan mi hna pawl kha a sual ti in a rel ih curuangah an hnatuannak kha hmailam ah meisa in fiah an si leh ding thu kha Noah san lai ih milai sualnak ruangah tidai in leitlun a rak kholh vek khan a si thu hinah in sim.
I Korin 3:13
13 Cun an hnatuan mi fingfing kha ziangbangtuk a si ti cu Khrih Ni ah a langter ding; ziangbangtuk hnatuan a si ti kha meisa in a hniksak dingih a fianter ding.
II Piter 3: 5-7
5 Hlanlai pi ah Pathian in a thu in lei le van hi a tuah a si ti an thei nan a theilo vekin an um ding. Leilung cu tidai sung ihsin sersiam mi a siih tidai in tuah mi a si.
6 Cule tidai thotho, tilik tidai in leilung hlun cu a siatsuah a si.
7 A sinan a tui a um mi van le leilung hi meisa ih siatsuah dingah Pathian ih thupeknak thotho in zuah hrih ding mi an si. Pathian a hmuhsuam tu pawl thuthen an si ni le siatralnak an ton ni hrangah zuah mi an si.
Matthai 3:11-12
11 Nan sualnak nan sir aw ti theihnak ah kei cun tisa in baptisma ka lo pek, a sinan keimai hnu ih a ra ding mi pa cun Thlarau Thianghlim in le meisa in baptisma a lo pek ding. Amah cu kei hnakin a tum deuh ngaingai; kei cu a kedam kengtu hmanah ka tlak lo.
12 A kut dungah fangsepnak tangta a keng. Fangngai cu a cuam sungah a khum dingih a hivai pawl cu a mit dah lo mi meisa sungah a paih ding a si, ti ah a ti.
[10.70]
Baptist tu Johan ih thusim mi meisa khan Jesuh le a dungthlun pawl hnatuan an thawh laiah Thlarau Thianghlim ih rak pek mi baptima kha a simduh mi a si men thei. Tulai san ah teh cui meisa cu a langsal thei maw? Pathian ih a duh ahcun, a langsal thei a si.
[10.71]
Tikcu Dang
Zentel pawl kha Thlarau Thianghlim baptistma an rak co laiah khan thil danglam hleice, hminsin tlak thilcang mi pakhat a um. Annih zentel hmaisa pawl kha cu baptisma an lak hnu, tidai ih baptisma an co lai ah thlarau laksawng kha Thlarau Thianghlim in a pek ih cuihnu lawngah tidai thawn baptisma an la cih. Hi tivek thilcang mi pawl khal hi profet Amos ih rak simcia mi a famkimnak ding hmuhsaknak thotho a si. (Amos 9:11,12).
Dungthluntu 15:16-17
16 Bawipa in, himi hnu ah, ka ra kirsal dingih a tlu zo mi David ih uknak cu ka tungding sal ding. A siatbal mi cu ka sak dingih ka cakter sal ding.
17 Cuti cun leilungtlun miphun hmuahhmuah ka hnenah an ra dingih ka hrilcia Zentel mi hmuahhmuah khal an ra ding.
[10.72]
Zentel mi pawl hnen ihsin a thluntu pawl cu Thlarau Thianghlim in baptisma a pe cio hai ih a sinan mi zokhal Thlarau ih baptisma lak ai in tidai ih baptisma la cio dingin a forhfial hai. Zentel pawl hin tidai ih baptima an lak hlanin Thlarau baptisma an co thei maw? Pathian ih tul a ti ahcun an co thei ve a si.
[10.73]
Net Kharnak
Pathian fale pawl hi nasa tei sualnak a sir awtu, ngaidamnak a diltu pawl, sualnak sir awtu pawl an si. Annih cu Khrih ih thihnak, a phumnak leh a thawhsalnak a tawmpi tu pawl an siih cucu tidai ih baptisma in a si. A thu thangtha hrangah an tim an tuahcia ih Thlarau Thianghlim ih hriakthihnak ih a thianhlimter hnu ah hnatuan thei cio dingin huham tla a pe ih cutin puithiam sang vekin, rualremnak, thianhlimnak thawn Lalram thianghlim din in an nunnak an hlan aw a si.
"Bawi pakhat, rinnak pakhat, baptisma pakhat"
[10:74]
Bawipa Zanriah
"Ka Bawipai hnenih ka ngah mi kha nan hnenah ka lo zem ve hai."
Dungthluntu Paul ih sim mi hi kan zoh tikah Piter lole a dang dungthlun pawlih zirhcop a silo ti a lang. Kanmah vekin Thlarau Thianghlim hnenin a ngah ve sawn thu in sim a si.
[10.75]
Sang
"Cui zan an phatsan zanah sang a la ih a phel ih"
Paul in hi serhsang thil hi Khrih an phatsan zan ihsin a rak thok a si tin a rel; himi hi thinglamtah parih a thisen a thlet hlan, a dungthluntu pawl thawn zanriah netabik an kil tlang thoknak a si ve. Sang cu a la ih lungawi thusim thlacamnak a neih hnu ah a phel.
[10.76]
"Cun Anih in lungawi thu a sim theh hnu ah, a phel ih hitin a ti, la uhla ei uh: himi hi ka taksa nan hrangih ka pek dingmi cu a si: keimah in cin ringring nak ding hrangah run tuah uh a ti."
Ziangruangah a si pei Khrih hin a taksa hmuhsaknak dingah sang a rak hman? Jesuh Khrih cun Israel fate pawl kha lungpi in nelrawn ramcar ah a rak thlun zo; ziangah cui lungto silo in sang a rak hril sawnnak (IKor. 10:4)? A cang thei mi cu ziangruangah a si pei tile sang (mana) cu van ihsin run pek mi a siih kilhim mi a si, sang cun nunnak khal a pe fawn (Johan 6:31-35).
[10.77]
Capernaum khua biakinn ah Jesuh cu dungthlun pawlin an rak tanta ziangahtile Amah kha nunnak sang a si thu a zirhnak ruangah a si, Anih cu mana sang vek a bangih van ihsin rung tum mi nunnak petu ding a siih hi sang, a taksa lawngin kumkhaw nunnak a pe, kumkhaw catuan nunnak a pe.
Johan 6:47-51
47 Thudik ka lo sim: a zumtu cu kumkhaw nunnak a nei.
48 Keimah hi nunnak sang cu ka si.
49 Nan pu leh nan pa pawl cu nelrawn ah mana sang an ei na in an thi thotho.
50 Sikhalsehla vancung ihsin a rung tum mi sang hi cu phundang a si ih a eitu hmuahhmuah cu an thi lo ding.
51 Keimah hi vancung ih a rungtum mi sang nung ka si. Zokhal hi sang a ei ahcun kumkhua in a nung ding. Ka pek ding mi sang cu, hi leilung in nunnak a ngah theinak dingih ka pek mi, ka taksa hi a si, ti ah a ti.
[10.78]
Jesu'i pek mi taksa ai awhtu sangih a simduh mi cu, a mankhun zia lawng mai kha silo in a lei mi thil thu khal a simfiang duh. Amai taksa cu thinglamtah parah a phel ih a kawhhran pawl hmunkhat te ih pawl awk theinak ding le zomawk theinak dingah sang kha kanmah hmuhsaknak dinhmun in a hmang ve, cumi cu a Taksa a si. Cule Amah le Pa cu pumkhat an si vekin kannih khal hi Amah thawn pumkhat ah kan cang.
I Korin 10:16b-17
16b Cule sangreu kan phel tikah le kan ei tikah Khrih ih taksa ruangpi kan tawm aw a si lo maw?
17 Sanghlom pakhat ruangah kannih kan zate hin mi tampi kan sinan pumkhat kan si, ziangahtile sanghlom pakhat a tawm aw mi kan si.
Johan 17: 20-22
20 Anmah hrang lawngah thla ka cam a si lo; an thusim mi a thei ih keimah i zumtu ding pawl hrang khalah thla ka cam.
21 An zaten pakhat an si theinak dingah thla ka cam a si. Ka Pa nangmah cu ka sungah na um ih kei khal na sungih ka um bangin annih khal um ve hram haiseh. Nangmah in i thlah hi leilung mi pawl in an zum theinak dingah annih cu pumkhat ah cang hram haiseh.
22 Nangmah leh keimah cu pakhat kan si vekin annih khal pakhat ih an can theinak dingah nangmah ih i pek mi sunlawinak kha anmah khal kha pe ve aw.
[10.79]
Sang kan la kan timi cu Jesuh Khrih thawn taksa pumkhat ih kan zomawknak kan langternak a si. Thlarau ah tisa khat ih kan zomawknak langternak le a kekkuai mi Jesuh Khrih taksa a man khun zia langternak a si.
[10.80]
Thinglamtah parah khan taksa pumkhat lawng kha a kekkuai, cutin sang hlomkhat cu kawhhran pakhat vek a si ih, cui taksa pakhat Khrih Amah kha lu a si.
Kolose 1:8
8 Kawhhran cu Khrih ruangpi a siih Khrih cu a lu a si ih ziang hmuahhmuah lakah pakhatnak le a zik a si ringring nak dingah thihnak ihsin thawhter a si zo.
[10.81]
Tuisan kawhhran pawlin Bawipa zanriah kan hman dan hi Khrih in tlunta khaan ih a rak pek ih a hmandan thawn a bangaw nawn lo mi tampi a um thlang. Kan thucah phuan mi a dang thlang.
Cumi in ziang thucah a thlenter ih, ziangvek thucah kan sim?
[10.82]
Tulai kawhhran tamzet cun, Bawipa zanriah ih sanghlom phel mi thu ah kan hmandan a danglam nasa. A pakhatnak ah thilnu rawi mi sanghlom tampi kha phel in kan hmang mei theu. Cule sangpheng khal ah kan tuah ih a hlan ih kan tuah mi kha phun dangdang ah a cangih cahnah paa te in kan tuam ih zem dingin kan tuah, a netnakah a phak tete ah an cang. Cumi ihsin ziangvek thucah kan phuang, ziangvek danglamnak a nei?
[10.83
Kawhhran in sanghlom kan phel mi pawl cu a zem ih a tuah tikah a kenkawh mi thil pakhat cu, thilnu-colh a simi sual a tel a si. Cumi cun ziangtin sual neilo Khrih ih taksa cu a hmuhsak thei ding? Khrih ih ruangpum pakhat lawng nunnak petu a si ahcun ziangtin sanghlom tampi phel in pumkhat a si mi zumtu pawl kan zem thei ding? Khrih ih Taksa pum pakhat hnak ih tam a um ih cumi ahcun nunnak huham thawn a tel mawsi?
I Korin 5:6-7
6 Mi hngal nan si hi a dik hrimhrim lo. Tongthimnak ih, "Thilnu malte in sanghlom zaten a thoter theh," ti nan thei dah a si lo maw?
7 A thiangfai mi si dingah nan lakih a um mi thilnu tello in rawhthar mi sanghlom ah nan cang ding; nannih cu thilnu tello sanghlom nan si ti ka thei. Kan Lantak Puai tufa a si mi Khrih cu raithawinak ih pek a si zo ruangah kan Lantak puai cu a thok zo a si.
Puithiam Hnatuannak 2:11
11 Bawpai hnen ih fanghun thawinak nan pek mi hmuahhmuah cu thilnu rawilo mi an si thluh pei. Bawipa hnenih mei ur thawinak nan pek mi cu thilnu siseh, khuai tizu siseh rawilo mi hlir an si pei.
[10.84]
Biskut sanghlom cu cuti kan hman tikah milai phuahcop ruahnak in kan cawng men a si lo ding maw? Cuvek milai fimnak hmangih cawncop mi Khrih taksa lem (Khrih dang )cu kan rak cohlang thei ding mawsi?
Isaiah 14:12-14
12 Maw Babylon siangpahrang, deirel arsi, nang cu van ihsin na tla zo! Tuihlan ahcun ram tampi na neh a tu ahcun leilungah vuakthlak na si!
13 Van ah kai na tumih a sangbik arsi thlunah na tohkham ret na tum. Khuavang pawl an to khawmnak ah saklam tlang parah siangpahrang bangtukih to ding na rak ruat.
14. Khawdur thlunah ka kai dingih Cungnungbik bangtuk ka si ding, na ti.
II Thessalon 2:2-4
2 Thinlung hnokin um hlah uh; cun Bawipai Ni cu a ra thleng zo a si, an timi khalah mangbang in um hlah uh, ti ah ka lo dil. Cubangtuk ih a titu in kanmah lehlam, sim cianak an rak nei, a si lole thu an simnak ah an telh, a si lole an cakuat sungah an ngan, ti tla in in ti ding.
3 Zohman in lo bum hlah haiseh. Ziangahtile netabik ral thawhnak a thlen hlan le hell ih tla dingmi Mi Sualral pa a ra thlen hlan ahcun Bawipai Ni cu a ra thleng lo ding.
4 Misualpa cun midang in pathian ih an ruah mi le biak dingih an ruah mi hmuahhmuah a dodal dingih cu pawlih tlunah a ret aw ding. Pathian biakinn sung khalah a lut dingih to tahrat in keimah hi Pathian ka si, a ti ding.
Galati 1:6-8
6 Ziang karlo te canah Khrih zangfah lailatnak thawn a lo kotu cu nan dungtun ih thuthang tha dang nan pan lohli ka hmuh tikah ka mang a bang ngaingai.
7 'Thuthang tha dang,' a um ngaingai ruangih ka ti mi a silo; nan thinlung a lo hnaihnok tu le Khrih Thuthang Tha thleng a tum rero tu minung an um ruangih ka timi a si.
8 Kanmah siseh, vancungmi khal siseh, nan hnenih kan phuancia mi Thuthang Tha silo in thuthang tha dang simtu an um a si ahcun hremhmun ah thleng hai seh!
[10.85]
Hi thu hi thaten ruat hnik aw, sanghlom zate in mi bulpak zate in an ngah a sile, cui a ngah mi cu ziang a si pei? Anmai bul ih neih mi Khrih taksa a si maw?
[10.86]
Jesuh Khrih ih taksa cun kawhhran a hmuhsak. Kawhhran timi cu ziangha a si? Mi pahnih maw pathum si maw Khrih hminih a umkhawm mi pawl khi an si. Hiti a sile ziangtin so mi bulpak lawng hi kawhhran, Pathian Inn, Khrih taksa, sutpi ban le thutak phum awknak ah a can thei ding?
Matthai 18:20
20 Ziangahtile ka hmin in mi pahnih siseh, pathum siseh, nan pumkhawm awk tikah nan hnenah ka um ve a si, ti ah a ti.
I Timote 3:15
15 Sikhalsehla ka tlai pang a si ahcun Pathian insang a si mi kawhhran sungah ziangbangtuk in so ka umtlan dan a si ding, ti kha hi cakuat mi in a lo sim ding. Pathian insang cu kumkhua ih a nung mi Pathian ih kawhhran a siih cui kawhhran cu thudik hram tohnak le a ding hngettu thuam a si.
[10.87]
Sang hlomkhat kan phel tikah a kekkuai mi Khrih taksa kan mang ringring a si. Kan zem awk tik khalah Amah thawn pumkhat kan si ih, Amah thawn pumkhat kan si tikah kannih khal pakhat le pakhat kan zom aw ve tinak a si.
I Korin 12:12-13
12 Khrih cu taksa ruangpi bangtuk a si. Taksa ruang cu pakhat a sinan taksa then cu tampi an si.
13 Cubangtuk in kannih khal hi Judah mi le Zentel mi ti ah si hmannungla, mi luat e, sal e ti um hman nungla kan zate hin cui ruangpi pakhat sung ahcun Thlarau pakhat ih hnim mi kan siih kan zate hin cui Thlarau pakhat cu in dingah pek kan si zo.
I Korin 12:25-27
25 Cuti cun ruangpum parah thenthek awknak zianghman a um lo; taksa then pakhat le pakhat parah zawnruahnak an nei sawn a si.
26 Taksa then pakhat a tuar ahcun taksa then dang khalin an tuarpi ve. Taksa then pakhat sunloihnak a ngah a si ahcun a dang tla in an lungawi pi ve a si.
27 Nan zate'n Khrih ruangpi nan siih pumpak ciarin a taksa then nan si fingfing.
[10.88]
Khuathai
Cuvek thotho in khuathai khal cu
"Cubangtuk thiamthiam in, zanriah an ei theh hnu ah khuat khal a lakih hih khuat cu ka thisen ih nemhnget mi Pathian ih thukham thar a si. Nan in tinte'n keimah theih ringring nak ah tuah uh; ti ah a ti."
[10.89]
Paul in a zirhnak cu a pehsal ih, Jesuh Khrih in sanghlom a lak ih a zem vek thotho in khuathai (sabit ti retmi) cu a la, lungawi thu a sim hnu ah a dungtluntu pawl hnen ah a pek ih an zate'n cui khuthai cun a zem ih a in ter vivo, a ti. Dungthluntu pawl khan an zate'n khuathai an nei ciar nan ziangruangah anmah le khuathai sungah thlet in a in ter cio hai men lo? Ziangah khuat pakhat tengteng a rak hmang? Ziangruangah tile sanghlom pakhat in Amah ah pumkhat kan sinak a langter vek in khuathai pakhat ihsin a malsawmnak kan hmang tlang ve a si, - A Thisen sung ih thuthlun mi cu. Cutin lungawi thu sim hnu ah Amah thawn pakhat le pakhat kan zate'n kan zomawknak ah khuathai cu kan zem ve, cui sabit ti cu a thisen hmuhsaknak ah kan in. Khrih ih khuathai cun Pathian in Khrih hmang ih sual ngaithiamnak a pek mi thucah a phur a si. A thisen cu thuthlung thar nemhngetnak a si. A khuathai cu a thar le a tha sawn mi thuthlung, Pathian tufa sual neilo ih leisak mi hmuhsaknak a si, cumi khuat sungah dan ih camsiatnak sung ihsin in luatter tu thisen a um.
[10.90]
Sang thawn pumkhat sinak kan hmangih hmunkhat ih in retkhawm tu Jesuh Khrih ih taksa hngilhlonak ah kan tuah a si. Cuvek thotho in a thar mi le a tha sawn mi thuthlung cu khuathai in in mangter ringring. Hi thuthlung thar cun Pathian tiamcia mi ngaithiamnak cu Jesuh thisen ruangah a famkim mi ah a cangih cui thisen hmuhsaknak ah sabit ti cu kan hmang tlang.
[10.91]
Sang hlomkhat Bawi pakhat, sang phel tampi cu cui sang pakhat ihsin suak mi zumtu pawl hmuhsak in, cumi cu tu ahcun Khrih taksa pakhat, kawhhran sungah in finkhawm thluh.
[10.92]
Khrih thisen ih lei mi khuathai pakhat, thuthlung thar pakhat cun kan rundamnak thu in theihter.
I Korin 10:16
16 Bawipa zanriah hmannak ih kan hman mi khuathai hrang Pathian hnenah thla kan cam, lungawinak kan pek ih, kan in tikah hih khuathai in Khrih ih thisen kan tawm aw a si lo maw? Cule sangreu kan phel tikah le kan ei tikah Khrih ih taksa ruangpi kan tawm aw a silo maw?
Efesa 1:7
7 Ziangahtile Khrih a thihnak thawngin kan sualnak cu ngaidam a si zo ih a luatmi kan si zo. Pathian in a zangfahnak cu kan hnenah tamzet in in pek ruangah,
[10.93]
Keimah In Cin Ringringnak Dingah
Pathian thu hnawlnak hmunram ah kan um ti kan hmu thei, curuangah paamnak tong thei kan si, rawl paamnak silo Thlarau rawl sang nung tleunak sawn khi. Hremnak le hneksaknak pawl in in tibuai hmansehla ei ding ti le rawl kan tlaksam lo ahcun in rundamnak thu hi hngilh men ding kan silo. Ti le rawl cu neilo in harsa hmansehla a rei hlan ah in neitu hnen ah kan thleng cing ding a si. A sinan cui rundamnak maksak cu kan theihhngilh pang a si ahcun ziangtinso siatralnak in kan luat thei ding? Cumi cu kan cin ringring a tul.
Hebru 2:3
3 Cuti a sile kannih in hitluk ih rundamnak maksak hi zianghman ih kan siarlo a si ahcun ziangtinso hremnak cu kan luat thei ding? Bawipa amah rori in hi rundamnak thu cu a hmaisabik ah a than ih a mah theitu hmuahhmuah in a dikzia kha kan hnenah an langter zo.
[10.94]
Pathian in hi serhsang hi a thawi awknak kan cin ringring theinak dingah le thuphan hlolak kan zum men lo nak dingah in pek a si.
I Korin 15:2
2 Nan hnenih ka phuancia mi thuthang tha a si ih hngetzet ih nan pom ahcun run mi nan si. Nan pom hnget lo a si ahcun zumtu nan si hi a lak a si ding.
[10.95]
Pathian ih duhdawtnak cu tah ruallo a si! Tidai ih baptisma le Bawipa zanriah pawl hi Pathian Lalram a si mi kawhhran sungih serhsang thupi zet an si. Hi thil pahnih hi rundamnak hrangih hman mi serhsang umsun an si. Baptisma hi rundamnak rahsuah mi thil a siih Bawipa zanriah hi cui rundamnak theihhngilh lonak ding hrang an si. Bawipa zanriah cun cui rundamnak cu in theihter ringring ih ruahnak tlaktlailo lak ihsin in kilhim fawn.
[10.96]
Jesuh Khrih in kan sualnak hrangih a thlet mi thisen cu kan theihhngilh dah lo nan cumi ih a lei mi thuthlung thar cu kan hngilh theu. Cui thuthlung kan rundamnak cu a man a khung tukih sual neilo Pathian Fapa neihsun ih thisen lawngih tlen thei mi a si. Kan hrangih a thlet mi thisen cu mankhung zet a si ahcun a leisuah mi thuthlung thar ih man khunzia khal kha ruat hnik aw.
[10.97]
Tu cun khuathai cu na hmur ih na vun dai veten a thisen ih lei mi thuthlung cu thei ringring aw. Jesuh in hitin a ti, "Hi no cu Thukham Thar, ka thisen ih leimi thuthlung thar a si" a ti.
[10.98]
Hi thil pahnih tlunah, Thukham Thar sungah serhsang dang um hai hman sehla, hi pahnih lawng hi kan rundamnak rahsuahnak serhsang pibik an si.