MAK AWKNAK LE NEIH AWKSALNAK

Hminsin:  Cangantui dinhmun theifiang dingin, “ Casiartu Hnenah” timi thu hi siar hmaisa aw.

[12.1]

Kilhimawknak Thu
Thuhla buai ton dan thabik cu thubuai in in cimbuai hlanah kanmah in kan tong hmaisa ding a si. Nupi pasal mak awknak hi kan ram le leitlun pumpi ah natsia ih a can hi thaten kan ruat a tul. Hi sual natsia hi duhdawtnak san theihfeng lonak in a suahpi theu a si. Khrihfa pawl khal thu thaten ruat ta loin an nei aw. Tisa cakhiarnak le duhdawtnak hi thil bangaw ah an ruat sual. Tui santhar kan nuntu khawsak dan pawl khal hin cu tivek ih ruatsualnak dingah tha a pe a si. Relremnak si sawn loin, nu le pa sualnak hin duhdawtnak a suahter tin kan ruat. Kannih hi duhdawtnak sersuaktu cet kan silo. Cutivek nu le pa sualnak kan tuah tikah naute kan hring. Pathian ih remruat caan a kim hlanih naute kan neih tikah, Pathian in kan hrangih a remruat lo mi nupi pasal thawn neihawknak thukham kan tuahih, cu cun a netnak ah makawknak a suahter a si.

[12.2]

Thusuhnak Khungkhai
Kan fala le tlangval pawl ih hmailam an nundan ding thu ah Bawipai lamzin ih kaihruai dingin kan timlam awk a tul ngaingai a si. Zumlotu thawi a bangaw lo mi hngawngkol bat tlang tih a nun zia kan zirh tengteng ding a si. Hi thu ahhin kan fapa lole fanu hi zumtu an si pam tiih kan ruah men lo ding hi a thupi zet a si. Kan fale pawl thu ah thusuhnak khungkhai kanmah le kanmah kan suhawk a tul. Khrih ka thei, Anih cu a nung, a thi ih a thosal ti ka zum tiih an ti ruangah Khrihfa an si cuang lo. An khawmawk ruang khalah Khrihfa an si tinak a si cuang fawn lo. Nitin an nun hi Khrih hrangah an nung maw? Khrih cu an nunnak ih thupi bik a si maw? Johan kuat khat, bung hnih, cang thum le cang li ih a sim mi dan vekin an nung maw?

1 Johan 2:3-4
3 Cun a thupek pawl kan thlunnak ihsin amah kan thei ti kan thei thei.
4 Amah ka thei, ti si in a thupek pawl thlun lo tu cu thuphanper a si ih, thutak cu amah ah a um lo.

[12.3]

Zuknung tuahnak ih zirtir mi, mipi pawl cu pakhat le pakhat an duhaw, ti si loin cakhiarnak ah an tlu sawn a si ti theithiam ko ih kan zirh a tul. Pakhat le pakhat duhdawtnak cu rinlo pi ih a cang theu mi thil vek a silo, cuhnakin minung pawl hin mi duhdawt ding hi kan zir sawn a si. Pakhat le pakhat duhdaw aw dingin duhdawtnak thinlung a puaksuaktertu hi thiamnak le thil titheinak pawl an si tengteng ding. Ngilneihnak, rinumnak, hnuaidornak, mi zangfahnak, fimkhurnak, tivek pawl hi mi pakhat va duhdawtnak ding san hrekkhat pawl an si. Duhdawtnak ding san a mal tuk a si ahcun, a mi hipnak cu cakhiarnak ihsi suak a si sawn ding a bang; cucu mi siatsuah dingih kam mi, Satan ih thang a si.

[12.4]

Tlangval pakhat hnenih cui a bangaw lo mi duhdawtnak ih danglamnak na simfiang ding tikah, cui danglamnak langfiangter tu, hi a hnuailam ih thuanthu hi na sim le a fiang sawn ding a bang:

[12.5]

Zinglam Papar
Mipi tlanlennak ding hrangih tuah mi hringdildel parduum ahcun, parduum sung vahveinak dingah mawi zetzet ih tuah mi lamzin tluanih cin mi pangpar pawl ih mawinak cu duhnung fahran in zingpitten a ra zoh theutu tlangval pahnih an rak um. Zingtin ten, khawfing a cah hnu nazi pakhat hrawngah, a pakhatnak tlangvalpa cu cui parduum sungih lamzin pakhat ah nuam teten fehin, a can can ah cawl phahphah in cutawkih pangpar tintian ih mawi zia zoh kuahko cu na hmu ding.

[12.6]

Nazi pakhat le hrek tluk a rei hnuah, lamzin dang cu zawh hman sehla a pakhatnak tlangval pai tidan thawi ti dan bangaw ngaingai a pahnihnak tlangvalpa cu a rung lut ve. Can khat ahcun, zingthlapit ruah a sur ih thal ni a hung suah le veten, a pakhatnak tlangvalpa cun pangpar pakhat cu duhnung fahran in a zoh kuahko rero. Cui hung par pekte pangpar cun zingpit ni sa cu a dongih a mawi zia cu rel theih lo a si. Cui pangpar ih lunghlu sen vek par hnahkhatte par ahcun zing daifim for khat te a fawr ih, cucu diamond lung tleu vek in a tleu sersi. Cui pangpar cun cui tlangvalpa cu a zel ngah ta. Anih cun cui pangpar cu a mawinak hmuahhmuah ka hawp thluh ding ti si awm takin rei nawn tak a zoh kuahko. Cun cui pangpar ih rim, rim thaw tak cu a kun ih a vun hnim, cule dungah malte a sip ih, cui pangpar cu thla a la, cutin nuam teten a her ih a feh. Cupa a tlanhloh hnu reilo te ah, pangpar ngaina tu a pahnihnak tlangval pa cu a ra ih, ti dan pakhat ti lo bakah, a pakhatnak pai ti dan vek cekci in a zaten a tuah ve a si. A hmaisa pai ti dan lo vekih a ti mi pakhat cu, thla a lak hnuah, kun tahrat in pangpar ko cu dimten a sik ih a la. Cun inn ah thaten a kengih pangpar thutnak mawi zet sungah retin ni mawi tawktak sung a zoh kuahko theu. Hi tlangval pahnih hin cui pangpar cu an sunsak veve ti a fiang zet a si, a sinan zo in cui pangpar cu a sunsak deuh tin na ruat?

[12.7]

A sannak cu a fiang zet. A pakhatnak tlangvalpa in a sunsak deuh a si. A pahnihnak pa hin co tlak khop in a sunsak ko, a sinan a pakhatnak pa hin a sunsak sawn a si. Anih cun cui pangpar siatsuah ding le co duh ah si sawn loin amai si dan kelten a than ih a thinlung sungah cam dingin a sunsak ih a ngaina a si.

[12.8]

Kannih minung pawl khal in mi pakhat khat ih mawinak cu zo thaw hman tawm awlo in kanmah lawngih co kan duh. Kan hrangih mi hleice pawl hi kanmai hrang lawngah hman kan duh, an tuarnatnak ding a si hmanah an thatnak le an mawinak cu co kan duh thotho. Cu tivek duhdawtnak cu mai hrang lawng ruat le mai hmakhaw sial mei mei a si. Duhdawtnak dik cun ngah lam aiin a pe sawn a si. Duhdawtnak dik cun a duhdawt mi cu amai diriamnak dingah a hmang lo, phurrit si sawn loin zalennak sawn a pe a si.

[12.9]

Sil Cukmi Ca
Cumi thawi a bangaw mi thuanthu tla fala tleirawl hrang khalah hman theih a si. Cui fala tleirawl cu hlanlai san ih siangpahrang le siangpahrang bawinu, lal le lalnu pawl ih thuanthu na sim thei a si. Siangpahrang sungkua mi pakhat khat in an duhdawt mi hnenih ca an kuat tikah, an cakuat cu a kuattui hmin cuang erhnak thawn sil an cuk a si. Cun ca va pe dingah ca phurtu an tirh ih, a sinan cui ca ih sil cu a hloh a sile, cucu midang in cui ca an rak siar tinak a si ruangah, ca phurtu cu thah theih a si. Cui cakuat cu rak siar dingih kuat mi lawngin a siar ding a si, midang zohman in siar ding a silo. Pathian in a fanu pawl cu duhdawtnak cakuat bangin a fapa pawl hnenah a kuat a si. A fanu pakhat cio parah sil pakhat cio a cukih cui sil cu cui ca rak dongtu dingih ruat mi pa lawngin a ong ding a si. Hi thuthup, bulpak laksawng cu Pathian ih a rak hril cia mi pa lawngin a co ding a si, midang ih an rak lak a si ahcun Pathian in cotu dingih a rak tumtah mi pa le Pathian ih can khiah cu a ram tinak a si.

[12.10]

Kan hrangih Khrih ih duhdawtnak laksawng cu A thisen in sil cuk a si. Cutivek thotho in nunau pakhat ih duhdawtnak khal cu kop a hril mi pai hrangah sil cuk a si ve. Kannih nu le pa pawl in duhdawtnak ih a san le Khrihfa neihawknak ih a thupit zia tla kan fale pawl kan zirh a si ahcun, Khrih ih taksa ruangpi (kawhhran) balter tu nu le pa mak awknak hi a mal vivo ding a si.

[12.11]

Thlaraulam Hmuhsaknak
Neihawknak hi Khrih le A kawhhran hmuhsaknak a si. Hi neihawknak hin Khrih in thlarau lam ih mo, kawhhran thawn a neih duh mi pehtlaihawknak theihfengnak in pe a si. Kawhhran in Khrih a phatsan ding le Khrih hin kawhhran hnen ihsin a thiarfihlim awk ding hi thil bangaw, ruah ngam lo ding thil a si. Kan rundamnak ruahsannak cu Bawipai parih a thumawk ruangah, A hnen ihsin kan thiarfihlim awk a si ahcun ziangkim kan hloh thluh ding tinak a si. A sinan Anih cun ziangtik hmanah kanmah tanta lo dingin a si lole hnong lo dingin sia a sam zo a si.

Hebru 13:5
5 Nan pawlkom awknak cu duhhamnak a tel lo mi si seh; cun nan neih mi thilpawl ah lungkim uh: ziangahtile anih in, ziangtik hmanah ka lo tanta lo dingih ka lo hnong fawn lo ding, tiah a ti zo a si.

[12.12]

Tuisan mi tampi cun Khrih an hnongih Amah thawi an tuah mi an thukham cu pahbal in, an parah Pathian ih thuthennak le an siatralnak an thlengter a si. Cu tivek thotho in, minung, dan, thinlung lam le thlarau lam neihawknak thutiam pawl khal in cui thutiam pahbal a si tikah thil thalo a thlengter a si. A hleice in uiretnak ihsin bawhsiatnak a ra thlen tik ahhin. Pathian in, Amah ih a kom mi hi zohman ih then lo dingin fiang zetin a sim zo a si.

Matthai 19:6
6 Curuangah annih cu pahnih si nawn loin, pumkhat an si. Curuangah Pathian ih a kom mi cu zohman in then hlah hai seh.

[12.13]

Pathian Ih Kom Lo Mi
Ca thianghlim sungah a bangaw lo mi hngawngkol kan bat tlang lo ding thu kan hmu.

2 Korin 6:14
14 Zumlo tu thawn a bangaw lo mi hngawngkol bat tlang hlah uh: ziangahtile dingfelnak hin dingfel lonak thawn ziang pehtlaihawknak an nei? Cun eng in teh thim thawn ziang pawlkomawknak an nei?

[12.14]

Zumlo tu thawn neihawk hi Pathian ih duhzawng a silo, a sinan cutivek thu awih lo fale pawl, Pathian ih duh zawng hnong tahrat in mai duhzawng a hawltu an um ringring. Rinnak ih kan sungkua lakah mai koppi hawl loin, kan mit cu lenglam ah kan vakter sawn riangri; cutin Pathian ih a remruat lo mi neihawknak kan tuah theu. Kan koppi dingih kan hmuitin mi in Khrihfa ka si a ti tikah, a tongkam cu kan zum mei theu ih, a nuncan ziaza cu kan zoh nawn lo theu. Khrihfa kan si vekin, Pathian sungkua si lo, lenglam mi cu kan nei thei lo ti kan thei ko nan, bum ih kan um ding hi kan pawisa lo theu. Kan duhdawt mi in Khrihfa ka si an ti tikah, an nuncan ziaza thaten zawihnit ta loin an sim mi cu kan zum mei theu. Kan duh mi cu kan duh mei ih, leh hnu ah kan koppi cu a thlengaw vivo ko ding tin kan ruat mei theu. Pathian thu thlun sawn loin, kan thinlung sual ih duhzawng cu kan thlun sawn theu a si. Cutin a bangaw lo mi hngawngkol bat in kan nei aw, curuangah kan koppi thawn buainak tamtak kan neih theu hi mangbang ding a um lo a si. Cule Pathian kan mawhthluk leuhleuh theu fawn si. Hihi Amai mawh maw, kanmai mawh ha a si? Cu tivek neihawknak cu Pathian in a pompi lo, sikhalsehla Khrihfa kan si vekin hi thu ah tuanvo kan nei lo tinak cu a silo.

1 Korin. 7:12-14
12 A sinan midang hnen ahcun, Bawipa in a sim si loin, keimah in ka sim: unau zokhal in zum lotu nupi a neih ih, cunu in amah thawi um tlang a lungkim a si ahcun, cunu cu then hlah seh.
13 Cun nunau in zum lotu pasal a nei ih, cupa in amah thawi um tlang a lungkim a si ahcun, cupa cu tlansan hlah seh.
14 Ziangahtile zumlotu pasal cu a nupi ruangah ti thianghlim a si ih, zum lotu nupi cu a pasal ruangah ti thianghlim a si: cuti locun nan fate pawl an thianghlim lo ding;  a sinan tu ah annih cu an thianghlim.

[12.15]

Zumlotu kan koppi in kanmah thawi umtlang an duh a si ahcun an hnenah Khrih ih ziaza kan langter ding a si; a tul a si ahcun kan damsung hmuahhmuah. Kan mak theilo hrimhrim; kan koppi cu kedam sia vekin kan hlon theilo a si.

[12.16]

Pakhat Lawng Rundam A Si Tikah
Zumlotu fala le tlangval cu khatlam khatlam rem tinak in lole dan vekin an nei aw. Cun lehhnu ah, an nupa lakih pakhat cun rundamnak a co ih Khrih thawn an feh tlang, a sinan a dang pakhat cu sual ah a um peh vivo thotho ih, a dang pakhat le Khrih ih pehtlaihawknak ah buainak a tuah thlang. Khrih dungthlun dingih zumtui thubawhcahnak cun insang nupa karlak ah cutivek buainak a thlen theu a si. A cancan ahcun, zumlotu sawn in zumtu a koppi hnenah; "Hril aw, Khrih maw, keimah," tin netabik thusuhnak a tuah thei. Cutik ah zumtu in Khrih a phatsan cuanglo le, zumlotu cun an inn le a nupi lole a pasal cu a tanta thei a si (Mat. 10:34-36). Cuti a sile ziangtin? Tanta mi Khrihfa nupi lole pasal cu ziangtin a um ding? Khrih hnenih rinum dingin hi harsatnak an tuar hnuah, annih cu a tang lai mi an damsung hmuahhmuah lo theih loin nupi lole pasal nei nawn loin umhar lungleng in umter ding maw an si? Nupi lole pasal neihsal theinak le an nun a thar tei thawhsal theinak an nei maw, a si lole zumlotu thawi nu le pa sinak harsatnak sungah an tang ringring ding maw? Thil hlun cu an liam theh zo ih ziangkim an thar thluh zo, Pathian thangthat in um hram seh. Kannih cu mi zalen kan si, Pathian duhzawng ih thil ti dingin mi zalen kan si.

2 Korin 5:17
17 Curuangah mi zokhal Khrih ih a um ahcun, sersiam thar a si: thil hlun pawl an liam thluh zo; ngaihnik, thil ziangkim a thar ah an cang a si.

1 Korin 7:15
15 A sinan zumlotu in a then ahcun, then ko seh. Unau pa a si lole unau nu cu cutivek thuhla ahcun tawnhrem an si lo: a sinan Pathian cun kannih hi rem aw dingah in ko a si.

[12.19]

Hihi Ziang Sualnak A Si?
Neihawk fuh lo sual hi a dang sualnak pawl hnakin a tum sawn maw? Pathian lalram sungih lut theilo dingin in dawnkhamtu sualnak tampi a um kan hmu.

Efesa 5:5
5 Ziangahtile, hurkhuang mi in siseh, mithianghlim lo in siseh, milem betu a si mi mi duhham in siseh, Khrih le Pathian ih lalram ah roluah ding zianghman an neilo ti nan thei.

Thuphuan 21:8
8 A sinan mi tihhrut pawl, zumlotu pawl, mi tenum pawl, mi thattu pawl, mihur pawl, dawithiam pawl, milem betu pawl, le thuphan pertu pawl hmuahhmuah cun meisa le kaat thawi a kang mi mei lipi ah covo an nei ding: cucu thih hnihnak a si, i ti.

1 Korin 6:9-10
9 Mi dingfello pawl cun Pathian lalram an luah lo ding ti nan theilo maw? Bum in um hlah uh: nu le pa sualnak tuahtupawl siseh, milem betu pawl siseh, uire pawl siseh, tawka hur pawl siseh, mipa le mipa, nunau le nunau nom tawltu pawl siseh,
10 Rukru pawl, mi hamtam pawl, zurit hmang pawl, mi relsiat hmang pawl, mi nekrawk hmang pawl cun Pathian lalram an luah lo ding.

[12.20]

Himi ih a sawh duh mi cu sualsir lo pawl an si, tin kan ti thei, cutilo cun, kan zaten mei lipi lam kan pan rero tinak a si ding. Pathian in dingfel lonak hmuahhmuah a ngaidam, nupi pasal mak awknak khal, ti hi ka zum hnget a si.
1 Johan 1:9
9 Kan sualnak pawl kan phuan ahcun, kan sualnak pawl in ngaithiam dingin le dingfel lonak hmuahhmuah ihsin in thiangfaiter dingah anih cu mi rinum le mifel a si.

[12.21]

Mi thattu in mi a that nawn lo, rukru in ruk a ru nawn lo, thuphan pertu in thuphan a per nawn lo, mipa le mipa sualnak a tuahtu le uire pawl in nupa sualnak an tuah nawn lo ti kan zum a sile, a bangaw lo mi hngawngkol battlangnak sual ih mawh nei mi khal in an sualnak ihsin an siraw thei ti teh kan zum maw? Ngaidam theih lo sual cu neihawknak fuh lo si loin Thlarau Thianghlim relsiatnak hi a si sawn. Cuti a sile, hi khawsia thang sungih a tla mi pawl hi ziangruangah ngaidam loin kan um ding? Mithat, rukru, thuphan per le nupa sualnak a tuahtu khal nupi pasal a neih lo a si ahcun, kan ngaidam ding, a sinan nupa sualnak an tuah ih an mawhnak thei awin neihawknak in tuahthat an tum ih an fuh cuang lo a si ahcun, cupawl cu an nunsung hmuahhmuah an sualnak theihsaknak in phuar an si dingih, Pathian lalram ih a pahnihnak mi ah can ding an si.

[12.22]

Zumtu fala pakhat, voi tampi kan rak sual dah nan pasal ka nei lo tin sual a phuangtu, cu kawhhran pawlkom ah a ra lut a sile, cunu cu kan ngaidam dingih Khrihfa neihawknak ah kan cohlang ding a si. Mak mi nunau pakhat, voi khat lawng a rak sualih cui a sualnak pa thawn rak nei aw dah, a ra lut a si ahcun, cunu cu thlarau lam miphar bangin kan phuar dingih, kawhhran thenkhat ahcun, cunu cu midang thawn neiawk an siang lo. A pasal in nunau dang duh ah cunui lungkimnak tel loin a rak mak tla a si mei thei, a sinan cunu cun sual man a tuar dingih ningzahnak a phur ding a si, cucu kan ralrin a tul! Khrih ih lungput hi a hnuailam ih Bible cangah zohhnik uhsi.

Johan 8:1-11
1 Jesuh cu Olif tlang ah a feh.
2 Cun zingpitte ah biakinn ah a rasal ih, mipi hmuahhmuah a hnenah an ra; cuisin a to ih thu a zirh hai.
3 Cun cangantu, le Farasi pawl in a uiret lai an kaih mi nunau pakhat a hnenah an rak hruai; cule a laiah an ret ih,
4 A hnenah, Zirhtupa, hi nunau hi a uiret laiah, a uiret lai rori kaih mi a si.
5 Tu ah dan sung ahcun Moses in hivek mi cu lungto ih den that dingin thu in pe a si: a sinan nangin teh ziangtin na ti ding? an ti.
6 Hihi amah heknak ding an neih theinak dingah hniksak phah ih an ti mi a si. A sinan Jesuh cu a kun ih, an sim mi thei lo bangin, leilung ah a kutzung in ca a ngan.
7 Cun thu an sut peh thotho tikah, a vantau ih an hnenah, Nan lakih sualnak a neilo tu in amah cu lungto in deng hmaisabik seh, a ti.
8 Cun a kun sal lala ih, leilung ah ca a ngan sal.
9 Cun cui thu a theitu pawl cu, an sia le tha theihnak thinlung inan mawh zia a theihter ih, upabik ihsi thokin a netabik tiang, pakhat hnu pakhat an tlan: cuti cun Jesuh lawng a tang, a laiih ding nunau nu thawn.
10 Jesuh cu a vantau ih nunau nu siar lo zohman a hmuh lo tikah, a hnenah, Nunau nu, khai a lo hektu pawl kha teh khuiah so an si? zohman in thiam lo an lo coter lo maw si? a ti.
11 Nunau nu in, Bawipa, zohman in in coter lo, a ti. Cun Jesuh in a hnenah, Kei khal in thiam lo ka lo coter ve lo: feh awla, va sual nawn aw hlah, a ti.

[12.23]

Nupa pawlawknak cu neihawknak ih cangvaihnak a si, curuangah zokhal hi cangvaihnak ih a pe awtu cu a pawl mi thawn an nei aw tinak a si. A hnuailam ih Bible cang pahnih hi zohton tlang hnik aw:

1 Korin 6:16
16  A sile ziangtin? Taksa zuartu thawi a pehzom awtu cu amah thawn pumkhat an si ti nan theilo maw? ziangahtile, pahnih cu taksa pumkhat ah an cang ding, a ti a si.

Semtirnak 2:24
24 Curuangah mipa in a nu le a pa a tanta dingih, a nupi a kop ding: cutin annih cu pumkhat an si ding.

[12.24]

Jesuh in tikhur ah Samaria nunau a ton ih, nunnak ti a pek laiah, anih in cunu cu thiam lo a coter maw, lole a sualnak a theih thu a theihter men saw? Na pasal hmaisabik hnenah va kirsal aw tin a ti maw (Jn. 4:1-42)? Jesuh cun hi nunau le uiret lai kaih mi nunau thawn an pahnih parah zangfahnak a langter a si, cutivek kan tuah can a si ve lo maw? U le nau tla, a hnuai ih Bible cang nan siar theh cun, lungih den cu nan tum nawn lo ko ding.

Matthai 5:28
28 A sinan kei cun ka lo sim, Zokhal caknak thawn nunau a zohtu cu, a thinlung sungah cunu thawn an uire zo a si.

[12.25]

Thihnak le Makawknak
Mi tampi cun an pasal pawl ih mak zo mi nunau pawl cu pasal an nei sal thei nawn lo tin an ruat. Ram tampi ahcun, mipa in a nupi cu a nupi ih lungkimnak tel loin a mak thei tin dan an nei. Cutivek khatlam ih lungkimnak tel loin nu le pa makawk theih ti mi dan hi mirang (USA) ram khal ah a si.

[12.26]

Hitawk ahhin dinhmun danglam aw verver pahnih kan hmu; mak mi lam (A) maktu lam (B) tla an si. Cutin, (A) cu (B) in an lungkimnak tel loin a mak a si. Pathian mithmuh ah nupa sualnak thu lawng ahhin makawk a thiang ti hi kan theihhngilh lo a tul, cumi lo cu minung lam ih thennak a si ih Cathianghlim in "Pathian ih a kom mi cu minung in then hlah seh," a ti (Mk. 10:9). Nu le pa neihawknak hmuahhmuah hi Pathian in a sunloih ko nan, neihawknak hmuahhmuah hi a nemhnget cuang lo ti kan theih hmaisat a tul. Nu le pa neihawknak cu zumtu veve lakah a si ding a si; zumtu le zumlotu, a bangaw lo mi hngawngkol an bat tlang lo ding a si. Dan vekih neihawknak a si khal le zumtu le zumlotu, a bangaw lo mi hngawngkol bat tlang cu Pathian ih duh lo zawng a si ti a fiang. Nupa sualnak thu ti lo ih thenawk khal hi Pathian duh lo zawng a si. Curuangah rinumlonak thu siar lo ih nupi pasal makawk cu Pathian in a pompi lo ti a fiang, a sinan kan duh khal le duh lo khal le, nupa sualnak thu ahcun makawk hi Pathian in a siang a si!

Matthai 5:31-32
31 Zokhal a nupi a thentu cun maknak ca ken seh, tiin rak sim a si.
32 A sinan kei cun ka lo sim, Mipa dang thawi sualnak thu siar lo ah, zokhal a nupi a thentu cun a nupi a uire ter a si; cun zokhal mak mi rak thitu cu a uire ve a si.

[12.27]

Nupi nei pa cu a nupi a silo mi nunau pakhat thawn an sual ih, cu nu neih duh ah a nupi a mak a sile, a nupi cu ziangtin a um ding? Hi nu ih mawhnak cu ziang a si? Ziangruangah Pathian in cunu cu pasal nei nawn lo dingin a si lole a fate pawl cu pa nei nawn lo dingin a hrem ding maw? Cunu cu a tuartu a si ruangah, hrem a si ding maw? Cathianghlim cun kum note nuhmei pawl cu cakhiarnak ih an tluk ding le Pathian thawi an hlatawk ding hnakin pasal an neih ding hi a forh sawn a si.

1 Timote. 5:11-14
11 A sinan nuhmei no deuh pawl cu rak telh aw hlah, ziangahtile Khrih dokalh in an cakhiarnak a than tikah, pasal neih an duh theu;
12 An rinnak hmaisa an hlon ruangah, thiam lo coter in an um.
13 Cu hleiah, zet an zir ih, inn khat hnu  inn khat an vaktawi vivo; cunzet lawng si loin, an rel lo ding thu tiangtiang rel in, mirel hmang le mi thu ih rak hrolh aw ve hmang khalah an cang.
14 Curuangah nunau no deuh pawl cun pasal nei in, fate tla nei hai sehla, innsang tawlrel in, an ral cu sawiselnak tikcu remcang hrimhrim pe lo hai sehla ka duh.

[12.28]

Nuhmei pawl in nuthlawi pawl hnakin an cakhiarnak an supaw thei lo sawn maw si? Kum mal nuhmei cu hi tivek thlemnak ah an tlu ol a si ahcun, kum mal nuthlawi khal an tlu ol ve thotho a si. Nuhmei cu humhim in nuthlawi cu Pathian in a hrem maw si? Pathian in duhsak cuang mi a nei maw si (Dung 10:34). Pathian in thihnak ruangih pa neilo nauhak pawl cu a dang pa nei sal dingin a duhsak ih, a sinan tlansan mi nauhak pawl cu pa neih a siang nawn lo maw si? Pasal lole nupi thihnak hi rinum lonak le thenawknak ruangih nupi lole pasal hloh hnakin a na sawn maw si? Mawh neilo mi hrem hi Jesuh ih tidan maw a si? Nupa thenawknak thinharnak in a vuak ih a palbet mi pawl parah kawhhran thuthennak ih rahsuak rapthlak pawl tla kan hmu zo. Khrihfa pawl cu mai hma tina tu pawl an si, an ti mi ka rak thei dah; kan zate parah Pathian in zangfahnak nei hram seh.

[12.29]

Pathian In Nupa Thenawk A Hua
Pathian in nupa thenawk a hua. Mi hlothlau lole thluak kimlo an si lo ahcun, zohman in then aw dingin an nei aw lo. Pathian in nupa thenawk a hua, mipa le nunau pawl khal in nupa thenawk an hua ih nauhak pawl khal in nupa thenawk an hua a si. Cuti a sile, ziangruangah innsang tekdarh tampi an um?

[12.30]

Tuisan mi tampi in an cakhiarnak a san tuk hi duhdawtnak ah an ruat. Mi tampi in cakhiarnak ih an um hi duhdawtnak ih um ah an ruat aw. Duhdawtnak le taksa cun pehzomawknak malte lawng an si. Taksa cun duhdawtnak hi lenglam ah a langter lawng hi a si. Duhdawtnak cu thinlung lam le cumi lamih mi hiptu Thlarau lam thil a si. Duhdawtnak thu famkim zetih ngan mi, 1 Korin bung hlei thum hi zoh aw; thaten le famkim ten siar aw. Cumi ah cakhiarnak, cucu duhdawtnak thu ah, a tel le tel lo zoh aw.

[12.31]

Mak Timi Hi Ziang A Si?
Thukham Hlun Hebru tong simfiangnak ahcun, makawknak lole then ti mi cu (Strong's #1644 Hebrew-gerash) neih mi sung ihsin dawisuak tin a tarlang, a hleice in, umnak ram ihsi dawisuak lole then tanta, makmi (nunau), feh suakter, dawisuak rori, harsatnak, norsuak tin a tarlang.

[12.32]

Thukham Thar Greek tong simfiangnak ahcun, makawknak lole then ti mi cu (Strong's #630 Greek-apluo) zalennak famkim pek, cucu, thawventer tinak, thlah, umter lo (fehsuak), lole (tahthimnak cun) thih ter, ngaidam lole fehsuakter, ngaidam, fehter, phoih, thlahsuak, thlah, zalennak pek tin a tarlang.

[12.33]

Himi ihsin fiangtei kan hmuh thei mi cu khuahlan tong Hebru, Greek lole tuisan Mirang tong khalah thenaw cu thenaw a si ko. Nupa sinak bansan cu Thukham Hlun le Thukham Thar khalah thenaw ti a si. Thlarau Thianghlim in Paul hmangin Pathian ih hnonnak thu a relnak, Rom 11:22 ih A sahtan mi a ti mi hin thennak thu a rel a si ko lo maw? Heb. bung ruk, cang li ihsin cang ruk le bung hra, cang kul hluan ruk le kul hluan sarih ah, Pathian hnen ihsin thlarau lam thenawknak thu kan hmu thei a si ko lo maw?

Rom. 11:22
22 Curuangah, Pathian ih that zia le tihnun zia hi ruat aw: a tlu mi pawl hrang ahcun a tihnung; a sinan nang ih hrang ahcun a tha, a  thatnak sungih na um peh vivo ahcun: culo cun nang khal sahtan na si ve ding.

Hebru 6:4-6
4 Ziangahtile, voikhat ti eng zo mi, le vanlam thilpek tepzo tu, le Thlarau Thianghlim tawmpi tu ih tuah a si zo mi,
5 Le Pathian thu tha le a ra thleng lai ding mi san ih thilti theinak a tepzo tu pawl hrang ahcun,
6 An tluk a si ahcun, sualsirnak nei dingih tithar sal ding cu thil cang theilo a si; anmah ah Pathian Fapa cu an khenbet thar sal ih, langhngan in anih cu an timualpho a si.

Hebru 10:26-27
26 Ziangahtile thutak theihnak kan co hnu ah kan sual hrim a sile, sual hrangih thawiawknak a um nawn lo,
27 Thuthennak, le dodaltu pawl dolh thluhtu ding thinhengnak mei-alh ruahsannak tihnungza pakhat lawng a tang sawn a si.

[12.34]

Pathian in thenawk hi a hua ngaingai, nu le pa khal in an fate pawl beng hi an duh lo, a sinan cucu a rak tul theu a si. Nu le pa in fate beng hi an duh lo, a sinan an beng, Pathian in thenawk a hua, a sinan Anih in mi a then theu, hihi a dik lo ih na ruah a sile Jeremiah 3:8 hi zoh awla Israel in thlarau lam ih a uiret tikah ziang a cang ti hi zoh aw. Uiretnak hremnak dingah Pathian in thenawknak a rak hmangih tuisan ih nu le pa uiretnak thu khal ah cui a thinlung cu a danglam cuang lo a si.

Jeremiah 3:8
8 Cun dungtolh Israel cu a uiretnak san thuhla hmuahhmuah ruangah ka mak ih, maknak ca ka pek tikah; mi rinum lo a unau nu Judah cun a tih cuang lo, anih khal a feh ih, hlawhhlang a tuan ve thotho kha ka hmu.

[12.35]

Dan Ih A Tel Ve Lo Mi
Matthai bung nga, cang sawm thum cang khat le cang hnih ah, Jesuh in Thukham Hlun ih makawknak thu a rel sal, a sinan hi thu ah kan ruahnak a remsal a si. Mi zokhal a nupi a maktu cun cunu cu a uiretter a si a ti. A simbet mi cu, cunu a rak thitu khal a uire a si a ti. Hi zawn ahhin Jesuh in ziang a sim ih ziang a zirh ti hi thatei kan ruah a tul a si.

[12.36]

Khrihfa nupa cu bangawk lonak a phunphun ruangah (nupa sualnak tel loin) an thenawk a sile remawk salnak le fanawksalnak a um thei lai. A thenawk sung a rei tukih nunau lole mipa cu thlemnak sungah tlu in nupa sualnak a rak tuah. Cuti a si ahcun a sualtu le a sualpi mi cu an uire a si. Hi thu ahhin nunau lole mipa in maknak ca a neih hmanah a si lole dan a bawtsia lo a si hmanah a sual thotho a si; Pathian thuneihnak le Pathian cun nupa sualnak ti lo ih thenawk cu a pompi lo a si.

[12.37]

Pathian hnen ihsin minung kumkhua ih thenter theitu sual pakhat lawng a um; Thlarau Thianghlim relsia hi a si, cuvek thotho in Pathian mithmuh ah, nupa catuan ih thenter theitu sual pakhat lawng a um ve, cucu rinumlonak, fel lonak, nupa sualnak lole uiretnak ti mi hi a si. Hi sualnak ih rahsuah cu nu le pa neihawknak ih thukham tawpternak lole thihnak a si. Uiret san mi nunau lole mipa cu an neihawknak thukham ihsin a luat ih hi luatnak ahhin nupi pasal neihsal theinak khal a tel. Uiret san mi cu Pathian ih duhzawng hawl dingin zalennak pek a si. An duh len nupi pasal nei loin an um thei a si lole nupi pasal an nei thei. Mitin thilpek hleice co mi kan nei cio, thenkhat cu nupi pasal nei loin an um ih Khrih hnenah an hlan aw, thenkhat cun nupi pasal an nei ih Khrih an rian. Curuangah Pathian in nu le pa neihawk hi a remruat mi si na cingin, thenawknak a thlen hmanah, Pathian ih thilpek pawl cu lakhloh an si cuang lo, a kel a si.

1 Korin 7:7
7 Ziangahtile mipa hmuahhmuah keimah vek hin um thluh hai sehla ka duh. A sinan mi kipin mai phutawk cio Pathian thilpek an nei, pakhat in phun dangin, cun a dang pakhat in phun dangin.

Rom 11:29
29 Ziangahtile Pathian ih thilpek pawl le kawhnak cu sirawk salnak um lo a si.

[12.38]

Thenkhat hrang ahcun hihi pom harsa zet thil a si, a sinan kan zaten voikhat sual thawn kan rak neiaw zo ti kha mangsal uhsi. Sual hi kan duhdawtnak hmaisa a rak si ko nan, tu ahcun midang ih ham mi kan si ih, Anih cun hlan ih kan dinhmun ruat loin in cohlang zo a si; A thisen in in kholhfai zo ih puan var in hruhter zo a si. Cutin Amai hnenih kan um ve theinak dingah tu ah kan hrangah hmun in remsak rero a si.

[12.39]

Pathian in Israel a rak mak tikah, a dang mo, kawhhran a rak hmu ih, tu ah, tui san ah, kawhhran cu ham in a um a si. Kum tampi hi zirhtirnak thawi a ralsan aw mi rak pomtu mi tampi hrang ahcun hihi pom harsa zet a si mei thei, a sinan hi thutak cu a danglam dah lo a si.

[12.40]

Dik Ih Theihawknak In Mi A Siatsuah
Mawh nei lo, le hnemnak le zangfahnak a tul sawn mi sual a sir mi zumtu pawl cu hnonnak le demnak sawn pe in kum tampi sung tu ah kawhhran in a rak hrem, a rak ngainep ih an covo a rak hnawl sak a si. An rak tuar mi mawhnak cu an nupi lole an pasal ih uiretsannak hi a rak si. Pathian khal hi uiretsan a rak si ih, tu ah nupi a neih sal ding hi a dik lo kan ti ding maw si? Hi thu ziangtin na sang ding ti hi fimkhur aw, na rundamnak rori khal hi thu ah a thum aw mei thei a si. A dik lo kan ti a sile, A lalram sungih kan luh ding kan khamaw tinak a si ding; A ham mi, A kawhhran kan sinak kan pom lo tinak a si ding.

[12.41]

Sual A Tuahtupawl Teh Ziangtin?
Mai neihawknak ihkhun hi midang thawi nupa sualnak tuahnak ih a hmangtu an um, cu pawl cu ziangtin kan tuah ding? Hi mi rinumlo pawl a dem tu hmuahhmuah hnenah, hi lawng hi kan tong thei, "Sual a nei lo mi in hmaisa bik ah deng seh," ti hi (Jn. 8:3-11).

[12.42]

A phunnawi mi mipi in siseh, Khrih khal in siseh, a uiret lai ih kaih mi nu cu an dem lo a si ti hi kan mang kei uh. Khrih in cunu cu a dem lo a sile, Pathian hmai ih sual a sir mi le a sual a phuang tu cu dem dingin kannih cu ziang saw kan si? Mi pakhat cu hlan ih a sualralnak, ruk a ruknak, mi a bumnak, thuphan a pernak, ritnak thil a hmannak lole a rak tuah mi pawngneknak pawl thawn tuisan kawhhran ih a ra lut a sile, kan rak tuah ding thabik cu Khrih ah a sual ngaidamnak a um ti theihter ding hi a si. Mi pakhat cu mipa le mipa sualnak tuahtu, nupa sualnak tuahtu, a si lole taksa zuar a si hmanah, ngaidamnak tidai a in thei a si, a sinan nupi pasal nei, a nupi lole a pasal a phatsan tu cu a ra ih a sualsirnak thu a rel tikah thenkhat cun ngaidam an duh lo ih cohlan sal an duh lo a si. Johan kuat khat, bung khat, cang kua ih thu pawl hi thatei kan ruat sal a tul. A hmaisabik ih lungto dengtu dingah kan tlak maw tlak lo ti hi kanmahte kan suhawk sal a tha.

1 Johan 1:9
9 Kan sualnak pawl kan phuan ahcun, kan sualnak pawl in ngaithiam dingin le dingfel lonak hmuahhmuah ihsin in thiangfaiter dingah anih cu mi rinum le mifel a si.

Hi zawn ahhin, thuthennak thu thawn pehpar awin pakhat cio hnen ih thu in simtu cathianghlim hi thatei kan zohsal ih kan ngaihtuah a tul.

Matthai 7:2
2 Ziangahtile mi thu nan thennak lala in nanmah khal thuthen nan si ve ding: cun mi nan tahnak tahfung lala in nanmah khal tah nan si ve ding.

[12.43]

Khrih ih taksaruangpi (kawhhran) rak hremtu, Paul cu cui taksaruangpi lala ah Dungthluntu ih tuah a sile, mipa siseh nunau siseh, mi zo hnen khalah Bible ih sim mi rongbawlnak cu tuah loin kan um ding maw si? A thlengaw mi nunnak, cui nunnak ah Thlarau Thianghlim hnatuan le cui Thlarau ih thilpek kan hmuh a sile, Pathian ih hnatuannak ruangih sual a sir mi cu kan hnong thei maw si?

[12.44]

Thuphan pertu in mibum hmang a hmuh tikah, "Kei cu thuphanper hmang ka si, a sinan mi bumhmang tluk cun ka sual lo," tin a ruataw. Mibum hmang in teh ziangtin a ruat ve ding tin na ruat? Neihawknak thukham pahbal lo tu pawl hin a pahbal tu pawl hi ol zetin kan mawhthluk mei theu, cutluk ih sual mawhnak kan nei ve lo maw si?

Jeim 2:10
10 Ziangahtile mi zokhal dan pumpi in a thlun ding nan, pakhatte ah a tidik lotu, cu pa cu a zate parah a sual a si.

[12.45]

Kan unau mit sungih hnawmhne fate kan buaipi hlanah kanmai mit sungih thingphek hi kan ruat ta a tha. Kan nunnak ah Pathian ih ngaidamnak kan beisei a si ahcun midang par khal ah cui ngaidamnak sup lo dingin kan ralrin a tul.

Matthai 6:14-15
14 Ziangahtile mi an mawhnak nan ngaithiam a sile, van ih nan Pa khalin a lo ngaithiam ve ding:
15 A sinan mi an mawhnak nan ngaithiam lo a si ahcun, nan Pa khalin nan mawhnak a lo ngaithiam ve lo ding.

[12.46]

A Tel Lo Mi Thu Zohfiahnak
Matthai bung ruk, cang sawmthum le pahnih ah, Jesuh in, "Nupa sualnak thu siar lo ah, zokhal a nupi a thentu cun cunu cu a uiretter a si; cun zokhal mak mi rak thitu cu a uire ve a si," a ti.

[12.47]

Jesuh zirhtirnak ih tumtah mi felfai tei kan theihthiamnak dingah hi bungcang ih thu hi thatei kan zohfiah a tul. A pakhatnak ah, Jesuh in, nupa sualnak siar lo, a dang thuhla ruangih a nupi a thentu cun cunu cu a uiretter a si, a ti. Ziangruangah? Hi thu kan theihfeng theinak dingah Korin kuat khat, bung sarih, cang nga ih sim mi, pakhat le pakhat nupa cakhiarnak hrep awk lo ding thu, hi kan zoh a tul. Hi bungcang ihsin a fiang zet mi cu pasal in a nupi a hrep a si ahcun a cakhiarnak a riam lo ruangah amah le amah kilkhawi aw thei nawn loin satan ih thlemnak sungih olsam zetih tlu thei dinhmun ah a ret tinak a si.

[12.48]

Nupa sualnak thu si loin a dang thuhla ruangih a nupi a thentu Khrihfa unau zokhal in cunu cu amah ten a umter ih a ngaihsak lo tinak a si. Nupa thenawknak hi nupa sualnak ruang lawngah a si lo ruangah, Pathian mithmuh ahcun, cui thenawknak cu ram dan in a pompi a va si hmanah, nupa thotho an si lai a si.

Hi Pathian ih pompi lo mi thenawknak ih rahsuak cu hihi a si, Pathian thu ih kan hmuh vekin a nupi ih cakhiarnak le nupa sinak covo kha a pasal in a hrep tinak a si.

1 Korin 7:3-4
3 Pasal in nupi hnenah a co ding  awm duhdawtnak hlan seh: cutivek thotho in nupi khalin pasal hnenah tuah seh.
4 Nupi in amai taksa parah thuneihnak a nei lo, pasal sawn in a nei: cutivek thotho in pasal in amai taksa parah thuneihnak a nei lo, nupi sawn in a nei a si.

Pasal in hi Pathian ih a pek mi nupi covo hi a nupi hnenih a pek lo a si ahcun, a nupi cu thlemnak sungah a tlukter a si ih ruangah pasal khal in cui sualnak ih mawh cu a phur ve ding a si.

[12.49]

Nupi nei mipa zokhal in, cu nui tlaksamnak cu can remcang ah la tahrat in a sualpi a sile a uire a si, ziangahtile Pathian mithmuh ah cu nu cu pasal nei lai a si. Nupa sualnak (rinum lonak) siar lo, a dang thuhla ruangih nupa thenaw cu cohlan a silo, ziangahtile nupa sualnak ruangih a silo mi thenawknak hrimhrim cu Pathian in a pompi lo a si. Mak mi cu mipa a va si khal len hi dan thotho hi thlun ding a si. Pathian ih a kom mi then dingin cathianghlim in thuneihnak in pe lo a si (Mat. 19:6). Ka nolhsal ding, nupa sualnak siar lo ih nupa thenawknak hmuahhmuah cu Pathian mithmuh ah cohlan a silo a si.

[12.50]

A pahnihnak thu; mak mi nunau a thi tu ih thuhla hi zohhnik uhsi. Nupa sualnak (rinum lonak) thu siar lo ih thenaw cu Pathian mithmuh ahcun nunau siseh mipa siseh thenaw taktak an si lo ti hi kan theih ringring a tul, curuangah nupa sualnak (rinum lonak) hin, cucu thenawknak thuhla a si taktak a si ahcun, ziangvek hmual a nei ti hi thatei kan hliakhlai a tul. Nupi pasal an thenaw taktak a si ahcun, cucu thuhla dang ruangah si loin, nupa sualnak (rinum lonak) ruangah an then aw a si, ziangahtile thuhla dang ruangih thenaw cu Pathian in a pompi lo. Nupa sualnak ruangih a thenaw mi cu thenawknak taktak a si. Cucu Pathian in a pompi ih cui neihawknak cu Amah in a phelh zo a si. Neihawknak cu Pathian in a phelhsal rori a si ahcun, cui a thenaw mi nunau le mipa cu nupi pasal nei sal thei an si, curuangah nupa sualnak siar lo, thuhla dang ruangih mak mi a rak thi tu cu a uire a si, ziangahtile cui thenawknak cu Pathian in a pompi lo a si. Khatlam zawngih kan rel a sile, nupa sualnak ruangih mak mi a rak thi tu lala cu mawh a neilo a si, ziangahtile cui thenawknak cu Pathian in a pompi a si. "Thenaw" ti mi tongfang Greek tong ih simfiangnak hi zohsal nan duh thei men. Cucu uiretnak sual a tuahtu hi thlarau lam ih "mi thi" kan timi vek hi a si. Hihi Rom bung sarih cang hnih le cang thum ih thusuhnak sannak a si. Uiretnak ruangah Pathian in neihawknak dan hi a phelhsal a si lo ahcun cui neihawknak dan ih tawnhrem mi kan si.

[12.51]

Pathian cu Israel thawn an nei aw, a sinan Israel cun pathian dang pawl thlunnak in thlarau lam nupa sualnak (rin um lonak) a rak tuah ruangah Pathian in Israel cu a mak ih a dang nupi, cucu kawhhran a si, a nei (Jer. 3:8). Nupa sualnak hin thenawknak hi thiamcoter lo sehla cu Pathian in kawhhran a neih hi a dik lo mi a si dingih, cutin hi pehzawmawknak ihsin hrin mi thlarau lam fate pawl hmuahhmuah cu lakfa an si dingih Khrih ih thlarau lam ro cotu an si thei lo ding a si. A zangfahnak ruangah cui neihawknak cu cutivek a silo, Pathian thangthat in um hram seh.

Galati 4:7
7 Curuangah nang cu siahhlawh na si nawn lo, fa na si sawn a si; cun fa na si ahcun Khrih zarah Pathian ih ro cotu na si.

[12.52]

Mi tampi in hi Bible cang (Matthai 5:32) sungih Khrih ih a sim mi "siar lo" ti mi hi thupi ah an ngai lo, a sinan Bawipai thu cu Bawipai thu a si. Hi thu tidanglam tumtu hi zo a siih ziang thuneihnak in a tidanglam tum?
Pathian thu hi tidanglam kan duh a si lole kanmai ruahnak vekin kan herkawi duh taktak maw si? Kan tum a si ahcun, a hnuailam ih tarlang mi vekin kanmai siatralnak dingah kan tuah a silo maw?

2 Piter 3:16
16 A cakuat pawl hmuahhmuah khalah, cumi sungah hi thu pawl hi a sim vekin; cui ca pawl ah thu hrekkhat cu theih har zet an si, cupawl cu zir lo pawl le a hnget lo mi pawl in, cathianghlim dang pawl an merhkawi  bangin, an rak merhkawi, anmai siatralnak ah.

[12.53]

Hi ca a siartu mi thenkhat cun, "Nupa sualnak thu ruangih thenawknak ngaidamnak in cui nupa sualnak cu tha kan pe ah a cang lo maw si?" an ti thei. Rukru pa kan ngaidam tikah rukruknak hi tha kan pe tinak maw si? Thuphanper hmang kan ngaidam tikah thuphan pernak hi tha kan pe tinak maw si? Pawngnek tu khal kan ngaidam hi pawngneknak tha kan pe tinak maw si? Sualnak tha kan pe lo ti langternak dingah sualsir mi cu dung kan tunsan ding maw si? Khrihfa nun ih rah tha a suahtu mi tampi hi sualnak vutcam le nupa thenawknak ihsi hungsuak an si ti hi kan zaten kan hmu a si. Uiretnak sual sungah a tlu leuhleuh ih thlarau lam nun ah rah tha suah ih a thosal tu pawl lakih mi pakhat cu Samaria nunau nu hi a si, sun khat ah anih cun Jacob tikhur ihta tidai khuat khat a suakih Judah mi pakhat, Jesuh ti mi pa ih tihalnak cu a riamter a si; anih cu voi nga pasal rak nei dah mi a si. Pathian in cu nu cu a fehsan men lo ih Anih cun A hmin a kotu zokhal a fehsan men lo a si. Pathian cun a siat zo mi thil pawl hman a duh a si.

Saam 51:17
17 Pathian ih raithawinak pawl cu thinlung kekkuai hi a si: maw Pathian, nang cun a kekkuai mi le a siraw mi thinlung cu na hnong lo a si.

Matthai 12:20
20 A phusuih mi phaipheng kung cu anih in a khiak lo dingih, a mut rero mi buri hri khal a timit lo ding, nehnak ih thuthennak a thlahsuak lai hlanlo cu.

[12.54]

Samaria nunau nu cu a phusuih mi phaipheng kung bangin Jesuh hnenah a ra ih, nunnak ti nung ih tidamnak le ngaidamnak huham cu a co a si. Anih cun a thinlung kekkuai le sualsir in Jesuh cu a tanta ih a mi pawl hmuahhmuah cu Jesuh hnenih fehnak lamzin a hmuh hai a si. A nun in man a nei maw? Jesuh in cu nu cu a dem lole cu nu cu a sidan vekin a hmang maw? Pathian in kan zate hnenah cutivek ngaidamnak thinlung le Jesuh ih neih mi zangfahnak cu in pe hram seh.


<Bung Hmaisa I A Sung Um Thu I Bung Neta>