VANCUNGMI PAWL HMUHSAKNAK                                  

Hminsin: Cangantui dinhmun theifiang dingin, "Casiartu Hnenah" timi siar hmaisa ta aw.

I Korin 11:1-16
1 Khrih nundan ka cawn vekin nannih khal in i cawng ve uh.
2 Ka lo zirhsin mi thuzirhnak pawl nan thei ringringih keimah khal in hngilh lo ruangah ka lo porhzet a si.
3 A sinan nan theih dingih ka duh mi cu: mi hmuahhmuah ih lu cu Khrih a si; nupi ih lu cu a pasal a si ih Khrih ih lu cu Pathian a si ti hi a si.
4 Misenpi hmaiah thla a cam ih thu a phuan tikah a lu a khuh tupa cu a lu (Khrih) mualphoter tu a si.
5 A lu khuhlo in thla a cam ih thu a phuang tu nunau cu a lu ( pasal) mualphoter tu a si ve.Cuvek nunau cu a sam mehkawng sak mi nunau vek a si.
6 Nunau in a lu a khuh lo ahcun a sam tan theh lawlaw seh. Nunau hrang ahcun lu kolh le samtan cu ningzak za a si ruangah a lu khuh sawn seh.
7 mipa cun a lu khuh a tul lo, ziangahtile Pathian ih hmuihmel le sunlawinak langter tu a si. A sinan nunau cu mipa sunlawinak langter tu a si.
8 Ziangahtile mipa cu nunau ihsin tuah mi a silo, nunau sawn kha mipa ihsin tuah mi a si.
9 Mipa cu nunau hrangih tuah mi a silo, nunau sawn kha mipa hrangih tuah mi a si.
10 Vancung mi pawl ih ruangah nunau cun a lu khuh seh, cuti cun a pasal ih huham hnuai ah a um ti kha a langter ding.
11 A sinan Bawipai sungih kan pawlkomnak ahcun nunau cu a mahte lawngin um ding a silo; mipa khal a dangten um ding a si cuang lo.
12 Ziangahtile nunau cu mipa ihsin tuah mi a si vekin mipa khal nunau sung ihsin a suak mi a si ve. Cule Pathian in ziang hmuahhmuah a semsuah theh a si.
13 Misenpi hmai ih lukhuh lo in nunau in Pathian hnenih thlacam cu a mawi nan ti maw? Nanmah ten ruat hnik uh.
14 Leilung tlun thil umdan ah hin mipa in sam saupi zuah cu ningzak za a si ti a lang;
15 A sinan nunau hrangah samsau cu porh tlak a si. A sam sau cu a lu khuhnak hrangah timi a si.
16 Sikhal sehla mi pakhat khat in a el duh a sile kam khat lawng ka lo sim ding: kanmah lak ah siseh, Pathian ih Kawhhran pawl lak ah siseh, nunphung dan dang ziang hman a um lo.

[14.1]
Ca thianghlim hmuahhmuah hi Pathian Thlarau Thianghlim ih thawkkhumnak ih pek mi a si, curuangah Dungthlun tu Paul in hi nun simnak thu a ngan nan, Thlarau Thianghlim in thutak sungah a hruai a si.

 Timote 3:16
Ca Thianghlim hmuahhmuah hi Pathian Thlarau Thianghlim thawkkhumnak ih pek mi a si ih, thudik zirhnak ah le zirhsualnak elnak ah le a sual mi rem salnak ah le dingte ih nitin nunnak ih zirhawknak ah a tha.

Johan 16:13
Sikhalsehla thutak Thlarau a run tikah thudik hmuahhmuah ah a lo hruai ding. Amai thu thu in zianghman a tong lo ding; a sinan a theih mi kha a sim dingih a ra thleng leh ding mi thu tla kha a sim ding.

[ 14.2]
Hi zirhnak ahhin Paul in kan tuah ding ah in zirh duh mi thu pahnih a um. Cui thil pahnih cu Paul in 1Korin bung 11 sungah in sim, pakhatnak ah mai lu a si mi upat ding thu le, pahnihnak ah Bawipa zanriah hman ding thu a si.

[ 14.3]
Paul ih duhbik mi cu Thlarau kaihhruainak thawngin kan hnen ih a sim mi thil pahnih kan thlun ding hi a si. Kawhhran minung hmuahhmuah thlun dingah felfai zet, bet tul nawn lo le hrelh mi khal um lo in a ngan. Ziang ti hman in thleng a sianglo , Curuangah a bet, hlon le ti danglam ding ih zirhnak kan thlun a si ahcun hi thu theihter tu ih thuneihnak kan dokalh thawn a bangaw a si. Cuvek in Pathian kaihhruainak le a Thu dokalhcu sual, thu awihlo sual tin kan rel thei. Cumi cu hi mi bung thoknak cang 1 le 2 ihsin kan thei thei.

1Korin 11:1,2
1 Khrih nun dan ka cawn vekin nannih khal in i cawng ve uh.
2 Ka lo zirh mi thuzirhnak nan thei ringring ih keimah khal in hngilhlo ruangah ka lo porh zet a si.

[14.4]

Hminsin, “ Nan thlun vekin” a tilo, “Ka lo zirhsin mi vekin” a ti.

[14.5]

Nan Uktu Pawl Upat Uh
Paul in, amah dungthlun tu a si hnu ah Pathian minung nunau siseh mipa khal in Pathian ih tuahter a duh mi a tarlang cih. Taksa lam khal in Pathian kan theih dan le a thupek kan hmuh dan hi langter ve ding kan si. Cui taksa ih pekawknak langter mi khal cu vancung mi pawl ruangah a si.

[14.6]

Thupek Mi
Paul in cui Pathian ih thuneihnak thu ahcun, Khrih hnen ihsin Pathian le a Pa hnen ih thleng mi a si tin a rel.

Paul in a zirh bet duhmi cu mi pa in a tlun ih thuneitu Khrih a upat ding ih cumi langternak ah mi hmai ih thla a cam le thu a phuan tik ah a lu khuh mi a ong pei ti a si. Paul in nunau ih pekawk dan le mipa ih pekawk dan a bangawk lonak a theifiang. Mipa pawl in mipi hmai ah awsuak in thla an cam le thu an phuan tikah an lu khuh an ong pei ziangahtile Pathian ih hmuihmel le sunlawinak langter tu an si, tin Paul in a simfiang. Hmuh theihlo Pathian, Thlarau Pathian kan biak vekin hmuhtheih lo lukhuh on tikah mipa in Pathian ih thuneihnak sungih a pek awknak a langter.

[14.7]

Cu vek thotho in nunau pawl khal an tlun ih thunei tu mipa hnen ih an hlan awknak langter nak ah mipi hmaiih thla an cam le thu a phuan tikah an lu khuh ding in a zirh fawn. An lu par ih thuneihnak cu mipa kut ah a um ih cumi cu an lu khuhnak in a langter. Cimi cu an tuah tul mi a si, ziangahtile nunau cu mipa ihsin tuah mi a siih mipa sunlawinak hrangah a si. Vancungmi pawl hman ih theih tlak in thla a cam le thu a phuan tikah mipa hnen ih thuneihnak a pek zia kha a lukhuhnak in a langter ding a si. Cutin mipa in Pathian thuneihnak a langter vekin nunau khalin a lu a khuh tikah vancungmi pawl hnen ah Pathian ih thuneihnak a langter ve a si. Nunau in hmuhtheih thil a lukhuhnak in hmuhtheih in a tlun ih thuneitu mipa a upatnak a langter. Mipa in mipi hmai ah thla a cam le thu a phuan tikah a lu khuhlo in a um a si ahcun a lu a si mi Khrih a mualphoter ih nunau khal in a lu a khuhlo a si ahcun a lu a si mi mipa a mualphoter tinak a si. Nunau pawl in Bawipa ruangah an pasal an upat a tul ( Efe.5:22) ih mipa upat lo tu cun Bawipa a upat lo thawn a bangaw a si.

Efesa 5:22
Nupi pawl, Bawipa ahcun nan pasal pawl kha upat uh.

[14.8]

Theihsual Ding Umlo.
Mihrek in “mipa” a ti mi hi pacang lawng a siih “nunau” hin nu lawng a rel tin an ti men ding. Cimi cu a sual, ziangahtile nunau hmuahhmuah in pasal an nei thluh lo, a sinan nunau in mi hmai ih thla a cam le thu a sim tikah a lu a khuh lo ahcun a lu a mualphoter a si.

[14.9]

Hminsin: Pasal nei nunau hmuahhmuah a tilo, nunau hmuahhmuah nu siseh fala khal ti a si.
Mipa lukhuh lo ding, tile nunau lukhuh ding ti mi hi vancungmi pawl ruangah a si.

 [14.10]

Hi Thu Tarlang A Tulnak
Vancungmi then thum lakih then hnih pawl in Pathian thuneihnak elsan in ral an thok. Cui vancungmi pawl cun Pathian thuneihnak le humhimnak cu dunglam hoisan in anmai duhdan le cakhiarnak diriam ter an tum thlang. Curuangah Pathian in a thuneihnak thutiam cu rinumnak thawn langhngan in a tarlang. Curuangah vancungmi pawl ruangih tuah mi thotho a si.

[14.11]

Pathian Lawngin A Hmu
Vancungmi pawl in minung thinlung hi thei thluh thei hai sehla cu, hivek ih tarlangnak hi a tul lo ding.

1 Siangpahrang 8:39
39 A thlacamnak run ngai hram aw. Na umnak vancung ihsin run ngai hram awla, a sualnak run ngaidam hram awla run bawm hram aw. Nangmah lawngin mi hmuahhmuah ih thinlung na thei. (Mi pakhat fingfing parah an umdan vek in tuah aw,).

2 Sansiarnak 6:30
Vancung na umnak in run thei awla an sualnak run ngaithiam aw. (Minung ih thinlung le ruahnak cu nangmah lawngin na thei). An tuah mi ciar zohin an thu run rel awla,

1 Samuel 16:7
A sinan Bawipa in a hnenah, “Mi sangzet le mi piangzet si hman sehla zoh duh hlah amah cu ka hnon zo mi a si, ziangahtile milai zohdan in ka zoh lo. Milai cun a lenglam thil an zoh, kei cun an thinlung ka zoh a si,”tiah a ti.

Jeremiah 17:9-10
“Minung ih thinlung cu zoso a theithiam ding? Ziangdang hnakin mibum hmangbik a si! Damter dingah a har zet, a natnak a bese tuk! Keimah Bawipa in milai ruahnak cu, ka hmu ih an thinlung ka hniksak. Mikip in an nuncan dan in ka zoh ih, a tuah mi vekin ka tuahrul ve,” a ti.

1Piter 3:4
Pathian ih mit ah a man a sunglawi bik mi mawinak taktak cu, nan thinlung sungih a um mi, a tar theilo mi lungnemnak le thindaihnak sawn ah a um a si.

[14.12]

Pathian lawngih theih thei mi an si

Hebru 4:12
Pathian ih thu cu a nungih a cak fawn. Kap hnih ih a hriam mi ralnaam hnakin a hriam sawn. Nunnak le thlarau an tonawk nak le hlikhlok le thlik an pehawknak tiang tlang ko in a sun thlek thei a si. Milai thinlungih duhnak le ruahnak tla a thei thluh a si.

[14.13]

Vancungmi pawl in kan ruahnak an hmu in an thei theilo ih, awnlo ih thla kan cam mi kan ruahnak le kan suangtuah mi an theilo. Kan thlacamnak, kan thuphuan mi le kan harsatnak ruahmi pawl khal, aw in kan ausuak lo ahcun ziangvek a si ti an thei theilo.

[14.14]

Ruat, Ngaihtuah le Awnlo Thlacam
Awnlo ih thuphuansuah ti mi ka thei dah lo. A sinan a thupten (awnlo) thla kan cam ih thu kan phuang a si ahcun mi pa in lukhuh on kher a tul lo ih nunau khalin lu khuh tengteng a tul lo, ziangahtile vancungmi in ziang a cang ti an thei cuanglo. Cuti a si ruangah, awnlo thlacam thu ahcun hmuhtheih thil langternak hi  cu thlun kher a tul lo. Vancungmi pawl cu milai vekin hmuh theih le theih thei mi thil lawngah an ralring thei. Cuti silo sehla, raltho tu vancungmi pawl in a dang vancungmi pawl ih thinlung an thei thluh dingih an sungter thluh ding. Cule, a dang vancungmi then thum lakih then hnih pawl cu Pathian ah an rinum ti tla an thei thluh ding.

[14.15]

Thungainak Langter Dan
Pathian fapa le fanu kan si bangin hi thuzirhnak kan thlun tikah Pathian thuneihnak par ih kan lungput dik a langter. Cui thuzirhnak kan thlun ahcun vancungmi then thum lakih then hnih,Pathian hrangih rin um tu pawl, lam ah kan tel ve a si. Cui vancungmi pawl cu ni khatkhat ah an rung dingih Amah(Pathian) lam ih a hlan-aw tu pawl in rung hruai ding.

[14.16]

1 Korin 11:7 hnu lam ahhin Paul in nunau in siseh mipa khalin hi thuzirhnak an thlun ding a tulnak san hi phun dangdang in a sim. cumi cu hitin a si, sersiam tir lai ihsin mipa hi nunau ihsin tuah a silo, nunau sawn hi mipa ihsin siam mi a si thu a rel. Cutin nunau ih thuneihnak cu an lu a si mi an pasal ah a um ti a langter. Himi ruangih thubuai umlo nak dingah, nunau le mipa hi pumkhat an si, curuangah anmah te veve in zohman umthei an silo timi Paul in in theihter.

[14.17]

Thil Umdan Ihsin Nan Theilo Maw
Thlarau Thianghlim kaihhruainak hmangin Paul in hitin in sim, lukhuh nak thu ahcun a dik mi kha kanmah te cek aw dingah in forh ih, cumi cu kan sungih um Thlarau Thianghlim khal a lungkim ding a si a ti. Sunglam um Thlarau in cui thil pawl cu samsau le sau lo thu ih kan thinlung ruahnak le uar zawng tiangin a theihpi thluh ding a si. A tlangpi thu cun mipa pawl cu sam tawi ding, le nunau cu sam sau ding ih ruat a si. Mipa pawl cun an neihcia mi lukhuh (sam) cu an hnawl. Nunau lehthung cun an samsau thawn an lukhuh an duh, an ningzahphen hrang men ah. A ngaingai te cun an sam sau cu an mawinak (sunlawinak) hrangah Pathian ih pek mi a si. Hi thuthimnak hi zohthim dingah in pek mi a si ti a fiang, “Thil umdan ihsin na theilo maw,..(1Kor.11:14)

[14.18]

Ziangti a si hmanah, nunau pawlin an lukhuhnak ih an hman mi, puan a si lole thildang khal an sam in aiawh seh ti a umlo. Thla an cam le thu an phuan tikah khuh le on theih mi an lu parah a um hrimhrim cu a tul. Cuti a silo ahcun, ziangahso an lukhuh cu thlacam le thuphuan can lawngih fial an si ding? An lu khuhnak ah an sam lawng a tawk ahcun thlacam le thupuan lawngih khuhter ding cu thil atthlakza ah a cang ding, nunau cun a khuh ringring thei ding a si si. Pathian in cuvek thil atthlakza a tuah lo ding.

[14.19]

Thu Kap Hnih Ihsin
Tuisan kawhhran tamsawn cun lukhuh a tul nawnlo ti mi thuken an uar hai. An lu khuhnak dingah an sam a sau cun a tawk a si tin an ruat. Kawhhran hrekkhat in, mi tamsawn lungkim ih tuah mi dan a si ahcun an tuah ve men. Mi hnenah, Thukham Thar hi ziangzat kan thlun a tul tin sut awla mi tamsawn cun, “a zaten” tin an lo sang ding. Khrih ih thupek mi pawl hi in ti rethei tu a silo, kan ti ih, Dungthluntu pawl ih tuahdan thluntu ding kan si ti kan pom ahcun, ziangtinso hi thuzirhnak cu kan hrial thei ding?

1 Johan 5:3
Ziangahtile Pathian kan duhdawt ti cu a thupek mi kan thlun tinak a si. A thupek mi cu kan hrangah thlun har a silo.

2 Thessalon 2:15
Cuti a si ruangah u le nau tla, kan thusim mi in siseh, nan hnen ih kan cakuat mi in siseh kan lo zirh mi thudik pawl cu kaihnget uhla khohzet in ding uh.

[14.20]

Cun hi thupek, (nunau lukhuh)nak ah an samsau lawng a tawk lo ahcun, thlacam le thuphuan can lawngih fial ti mi teh ziangtin kan simfiang ding? Kan theihcio bangin tulai Khrihfa nunau lakah mipa sam vekin elawknak ah tawiten sam met nunau hmuh ding an tam zet thlang. Ziangvek khuh dan so a si? Nunau in thlacam le thuphuan nakah lukhuh ding ti tikah, an sam sau lawng khi Bible in a fial mi a silo ti thei hram aw. Sam sau cu Pathian ih pek mi a si, Pathian in ceimawi-awk a siang ko, a sinan a thupek mi a silo.

[14.21]

Tulai nunau hrekkhat pawl in samsau zuat khal hi buaithlak an ti zet, “Thlacam tinten buaipi ringring a tul, sam tla a siatsuah sawn” a si lole “ atthlakza thil tla a si” an ti theu. Thuthlung Thar sungih thupek mi hmuahhmuah hi mipa pawlin Khrih thuthlun ding an daithlang loih nunau khal in mipa upatnak an peknak pawl kha vancungmi pawl hnen ih langter nak dingah tumtah mi a si. Hi thuzrihnak kan thlun nawnlo a si ahcun vancungmi pawl hnen ah ziangvek thucah kan thlen pei? Kan nunau pawl hin patphiar mawi  tete hmangin an sam dunglam ah an tom ih malte lawng an khuh  tikah khin ziang an tarlang? Daithlan ruangah a siih Pathian fial mi le thupek an ngaihsak lonak tla a tarlang bet.

[14.22]

Ti Dan Dang
Ti dan dang pakhat um theu mi cu, lukhuh ringring thu a si. Thlacam le thuphuan lai ih lukhuh hi thulunnak hmuhsaknak a si ahcun khuh ringring a tha sawn mei lo ding maw? Hi thuzirhnak hi thuthlunnak hmuhsak nak a siih ke kholhsak awk ding thu vek a si. Nunau hrang ih lukhuh ringring thiltha a si ahcun mipa pawl khalin ziangtluk hlum can khal ah lukhum lo in an um ve a tul ding tin ka ruat. Cutin kan tile, pakhat le pakhat ke kholhsak awk ringring ding thu tla kan hmu thotho.

[14.23]

Hi thuzirhnak ih tumtah mi hi, mipa in ziangtik hmanah lukhuh lo le nunau khal in lukhuh ringring ding ti va si sehla. Khuh ringring timi hi ziang poi a cang pei? Sual a si maw? Hruaitu dinhmun in, Khrih sungih zalennak kan neihmi hlon in peklo mi dan thar dang kan bet a si ahcun A tuurual pawl sal dinhmun ah kan hruaipeng thawn a bangaw ih sual a si. Curuangah cuvek  zirh le cui zirhnak  thlun khal cu sual a si. Nunau, a tidan kel si ruangah khuh ringring tum in, a fa le cu thlacam le thuphuan can lawngah khuh dingin a zirhtu cu Farasi pawl sualnak vek a nei a si, an “sim nan anmah cun an tuahlo.”

Matthai 23:3
Curuangah an lo sim mi hmuahhmuah cu nan tuah le nan thlun ding mi an si, sikhal sehla an thil tuah mi cu cawng hlah uh; ziangahtile an sim mi vekin anmah in an tuah lo a si.

[14.24]

Nunau hrekkhat pawl cun thulunnak langternak ah khuh ringring a tha sawn tiin te zetzet in an tuah ih an luthlung khuh ban fangfang in an tuah. Titer awknak men a silo ahcun ziang sipei maw? A tam ah maw mal ah maw Pathian thu ih ngan mi vekin thlun mei uh sila cem ni neilo hi thu el awknak hi a reh thei ding.

Fiangter A Tul

1Korin 11:16
Mi pakhatkhat in a el duh a si khal le, kanmah lak ah siseh Pathian ih kawhhran pawl lakah siseh nunphung dan dang zianghman a um lo.

[14.25]

Himi thu ih cang netabik hi hrekkhat hrangah theih a harzet. Keimah khal in ka tuat tha nasa. A cang hmaisa pawlih a sim mi lukhuh le khuhlo thu ah, Paul in a zirh thehzo mi kha an thlunlo khal le a poi lo a tinak a silo. Hi thu hi a zaten kan thlun dingih zirh mi hlir an si ti kan theih a tul.

1 Korin 11:2
Ka lo zirhsin mi thuzirhnak nan thei ringringih keimah khal in hngilh lo ruangah ka lo porhzet a si.

[14:26]

Kan tarlang thluh zo vekin a cang netabik thu cu hitin theihthiam a tul. Kawhhran ah mi pakhatkhat a ra khawm ih Pathian thupek thlun dan danglam zet ih a ruat a sile, hi kawhhran cun tidan phun dang kan hmang lo ih midang khal in kanmah vekin an hmang theh hai ti hi thei seh ti tluk a si.

[14.27]

Thuthlung thar hmuahhmuah kan thlun thluh kan ti rero mi hi kan thlun ngaingai silo ahcun kan ban a cu thlang. A thu bet tum, hlon tum le thleng khal tum nawn loin duhdawtnak thinlung thawn a sim mi hi a sim vekin thlun mei tum sawn uhsi.

[14.28]

A Thu Bet Mi
Nunau in mi senpi hmai ih thlacam le thuphuan tikah a lu a khuh a sile a lu a simi mipa ih thuneihnak a tarlang a si. Cu tiih a tuahnak cun mipa cu Pathian hmuihmel kengih tuahmi a si kha a langter fawn. Nunau in Pathian hnen a tong (thlacam) le Pathian hrang a tong (thuphuan) tikah Pathian sunlawinak hmaika ih ding a si ruangah a lu a khuh pei, cutin Pathian hmai ah a pasal sunlawinak a khuhsak vek a siih a tuah ding hrimhrim a si.

[14.29]

Nunau in a lu a si mi mipa hi Pathian hmuihmel keng, le a sunlawinak hrangih tuahmi a si ti pom duh si loin, a lu a khuh a si ahcun a dik cuang lo. Lukhuh cu vancungmi hrang hmuhsaknak men…..nunau lu a si mi mipa ih thuneihnak langtarnak tongkam aiawh ih hman mi a si. Thulunnak thinlung nei silo ih a lukhuh a tum men a si ahcun a hrangah thiltha a si cuang lo. A pasal thuneihnak sunsak le upat tu nunau lawngin an lu khuh hai seh.

[14.30]

Nunau pawl in misenpi hmai ih thlacam le thuphuannak ah an lu an khuh tikah Pathian in mipa hnen ih thuneihnak a pekmi an thlun ti a langter ih an lu an khuh lo a sile cumi, mipa thuneihnak cu an hnawl thawn a bangaw a si. Nunau in hi thuzirhnak hi a umzia le a san a theihlo a si ahcun kawhhran in tuah tengteng dingih hnek ding a silo. Mipa thuneihnak pek cuang si loin a lu a khuh a sile tiawkter- a lem men a si. A lu a khuh duhlo a si ahcun an innsang ah siseh, kawhhran mipi hmai khalah a lu a si mi mipa ih thuneihnak a hnawl a si, a sinan cumi cu mi hmuahhmuah theih ih a nun duhdan a si ruangah a damsung cutin tuah koseh. Cuti ih lukhuh a duh lo ahcun kawhhran senpi hmai ah a sinak a tarlangaw ih, mualphoza in mi senpi hmuh ah a lu a metkawng tluk a si.

[14.31]

Khrihfa mipa cun a lu a khuh lo tikah Khrih ih thuneihnak a tarlang sawn a si. Mipa pawlin thlacam le thuphuannak ah lukhuh lo ding timi an el a si ahcun an tlun ih thunei tu Khrih an mualpho ter ih Pathian thu an ngailonak a langter fawn. Pathian hmuihmel keng le A sunlawinak hrangih tuahmi an lu kha mipi hmuh an siang lo. Cuti an tuah tikah Khrih thuneihnak an hnawl thawn a bangaw a si. Cuvek pawl cu thuawih lo, midanglam le lungruh an siih kawhhran lak ihsin dawi tlak an si. Jesuh Khrih cu Bawipa a si ti an el thawn a bangaw a si. Thinlung takih Pathian rongbawl tumtu hrangah cumi cu thil harsa a silo. Pathian rongbawl duhnak thinlung na neih mi na langter mei lo ding maw? Anih cun nangmah lo rian ding le lo rundam dingah a neihsun Fapa nunnak a pek a si.