A VAIVUAN MI HLON AW

Hminsin:  Cangantui dinhmun theifiang dingin, “Casiartu Hnenah” timi thu hi siar hmaisa aw.

[16.1]

Kawhhran rinum, kawhhran fate ih kawhhran timawi tu member pawl cu thungaithlak, nun hlanaw mi Khrihfa, an pa le pawl le an pu le pawl ih rak tidan thlun in rinum zetih khawm awtu pawl an si. Hi pawl hin pawlkomawknak a si lole biakkhawmnak dan dang zianghman an thei lo ih a hawl khal an tum lo. An tidan kel a silo mi cu an tih ih fehsual tin an ruat a si. Bawipa rian hi an duh mi cu a si, a sinan an rian duhdan cu member meimei, cucu lothlotu, cetzung ih hnatuantu, ngakaitu, le lettama dinhmun vekin a si. Kawhhran hruaitu pawl cu member meimei pawl ih ban theihlo mi fimnak le tha zetih zirhtir mi pawl tin an hmu a si.

[16.2]

Hnatuan mipa lole nunau hrangih a umsun kawhhran hnatuan cu hruaitu-upa (deacon) lawng hi a siih, cui upa dinhmun cu a hlan ih dinhmun thawn an bang aw nawn lo. Kawhhran fate, pawlkom fate pawl hin kawhhran tum, pawlkom cak thawn kan khel aw tin an ruat aw theu. Hi kawhhran tumpipi pawl hin pawlkom tete pawl hi an uk thluh a si, rampi huap sumdawng ropi pawl in dawr fate te, le khaw khat ih pursumleilawnnak thu ah a uk bangin. Mipi tam le mal hi kawhhran in thil thupi zetih a ngai tikah, cui an ruahnak cu khuahlan kawhhran fehdan ih hruaikir sal dingah a har zet a si.

[16.3]

Tui san ahcun, member tampi a nei mi kawhhran ih mi tampi khawmawk hi kan uar ih dan ah kan neih thlang. Cutivek dan pomnak ihsin dungthluntu pawl san ih kawhhran dinhmun hi kan hloh a si. Kawhhran khawmawknak cu mithiam pawl ih hoha nak in cawhphur awknak ah le puai tuahnak vekah a cang a si. Cutivek lungput neitu  cun mithiam pawl, an thlung le dar, thusim thiampawl tivek lam lawnglawng hi a au aw a siih, cucu mankhung taktak awnmawi thilri le pulpit mawi takih engser thawi ceimawinak in a bet hrih fawn si.

[16.4]

Kawhhran mipi cu tong ding theilo khop in ka ang heuheu ih kan um tikah, nel um zet mi kawhhran sungkua ah kan cang theilo a si. Khrih ih ham mi kawhhran cun thianhlimnak hnipuan mawi a hruh nawn lo ih, mi mit la, mi tampi hip tum in mi hipnak hnipuan sawn a hruh a si. Khrih cun a hril mi mo cu Amah ti lungawi dingin a thuam nan, minung in amah nomnak dingah kawhhran cu a thuam sawn a si. Minung cun kawhhran hi mi tampi a hip ih mi tampi in an cohlan theinak dingah mi hip tum in santhar tidan phunphun le hnipuan thawn a ceimawi rero thlang. Jesuh hi mi hip tu bik si nawn loin, lehnak lole mi enkolnak pawl tla hi mi hiptu sawn ah an cang thlang a si.

[16.5]

Milai Nunphung Cu An Ral Cuahco
Tui kan san ih riahsiat thlak tak thudik um mi pakhat cu, kawhhran dan thuanthu maksak um na cingin, Europe ramih kawhhran tampi cu an thi rero thlang a si. An biakkhawmnak biakinn mak taktak cu khawvel mipawl ih hman dingah zuar rero a si thlang. Ziangruangah an tla sia? Khrih ih taksaruangpi vekin hna an tuan lo ruangah a si. Ziangtin an tlu? Pathian mipawl ih thlarau lam tul mamawh mi le nitin tul mamawh mi an pe lo. Thlarau lam sungkua an sinak hngilh in, hi kawhhran tumpipi le biakinn ropi taktak nei mipawl hin ziang thaw hman cawhpolh lo mi, thutak hlirhlang an phuang lo, cutin Pathian ih mi thianghlim pawl ih thlarau lam tul mamawh mi an pek lo ruangah an tlusia a si.

[16.6]

Mai kawhhran ih tidan thlun in, hi thuanthu ih kawhhran ropi pawl hi pakhat hnu pakhat an tlu a si. Hlanlai ih an rak tidan mai kawhhran nunphung leivut lakah anmah te thawthang theilo in an tuah aw a si. An ceiawknak, luar zetih an thuamawknak thil pawl cu an mithmuh ah a tekzam thluh a si. Thi lo ih a nung lai mi pawl in a ziam cuahco mi milai ih sunlawinak pawl ra zoh dingin mi an sawm rero. An biakkhawmnak cu tidan kel ringring, thong theutheu le dai reprep, mawinak zianghman nei nawn lo ah a cang. An tohkham sau bal le an biakinn rop pawl cu zianghman lo, thuanthu, le khualtlawng pawl hipnak men ah an cang thluh a si. Sunglawi zet ih an rak hruh mi puithiam kor ahcun a uanawk nak a rak um ih, cucu zianghman lo ah a cang ta.

[16.7]

A fiang zet mi thil pakhat cu, mi depde, minung thinlung tuahthatnak ding thu thatei a phuang lo tu rongbawltu pawl hin thuthang tha diktak hi ziang an siar lo hi a si. Pathian hnatuannak ih tlaitluan um peh vivo dingin Pathian tuurual pawl kha an rak timtuah lo a si. Ti awkternak korfual bal a hruktu puithiam pawl in tongkam tha bang si in mi siatsuahnak tongkam an tongsuak a si. Cupawl cu Pathian rongbawlnak ih kawh lo mi, mai phurnak meimei ih rongbawltu pawl an si. Cupawl cun sumpai hlawknak, le an cawm lo mi le thlarau manna diktak haal kuahko mi tuurual pawl ih simfaknak le pompinak cu an beisei lailai. Pathian ih tuurual pawl cu thutak haal in le Pathian thu zirhnak, nunpinak le zohthim ding hawl in an thi cuahco a si. Ti awkternak korfual bal hruhtu, rongbawltu deu pawl ih rongbawlnak pawl cu thli lakih leivut bangin zianghman lo ih a can hi mangbang ding a um ding maw? Cutin Europe rampi cu tumsuknak lamzinpi ih a feh vivo a si ahcun, America le a dang ram pawl teh cui zin an zawh lo ding kan ti thei pei maw?

[16.8]

Kawhhran diktak hi Europe ram a si lole khui ram khal ah thi lo ih a nun theinak ding ahcun, milai ruahdan ih Koliat tiatia kawhhran biakinn tumpipi si sawn loin, Pathian ih tumtah mi David tiate kawhhran fate sawn in a nung ding a si. David in Koliat ih lu a tan vek rori in, Pathian in milai ropitnak dingih sak mi Babel innsang pi cu a ticim zo a si. Europe lole khui tawk ih kawhhran pawl khal Pathian hnenih an kirsal ding a si ahcun, kawhhran fate, duhdawtnak ih khat kawhhran, inn khat hnu inn khat ih a khawm aw mi dungthluntu pawl san ih kawhhran vekih a tuah awk sal a tul. Hitivek kawhhran hi tukhal tu diktak umnak kawhhran diktak, David vek kawhhran, hi ni netabik san ih Pathian ih kawhhran cu a si.

[16.9]

Vaivuan Mi
U le nau tla, Jesuh Khrih ih kawhhran cu thlarau lam ih amah lam hmuhtu thlun theinak thazang a neih nawn lo ruangah kum thawng hnih sung a vaivuan rero zo a si. Kaihruaitu, lamhmuhtu pakhat hman a rak nei lo a si hrimhrim lo; a tir ihsin lamhmuhtu, Bawipa ih a rak cawhtho mipawl in a fehnak ding lamzin thaten an rak hmuh zo. Thungai ih kan ti a sile, cupawl cu amah Jesuh rori ih zirhmi an si ih, tihnungza sualnak zin bek lakah, a dik lo mi thu phuannak le zirhtirnak lakah thatei mi kaihrui theitu an rak si. Cupawl in lamzin dik ih feh dingin tha le zang in tanta ko nan, zumtu tampi in zinthar zawh an hril sawn a si. An zirhtirnak thar cun an lamzin nuam teten a pengter ih, cui lamzin cu remthat sal a si lo ahcun, a danglam zet mitawpnak ah a thlen hai ding a si. A danglam zet mi lamzin thlun hi an tum rero thlang a si. Dungthluntu pawl ih zirhtirnak lamzin si sawn loin, cui lamzin ihsin mi hruai pengtu ding zirhtirnak sual pawl an thlun sawn a si. Cui a famkim lo mi an lamzin khihhmuh tu cun zirhtirnak sualah a hruai ih, cui zirhtirnak sual cu puarthaunak lungkhol lakah, thil ti sualralnak le then awknak ih anmah siatsuah dingih ruahman mi a rak si; milai ih zirhtirnak pawl thlun dingin milai in cupawl ih lamzin ah siatralnak lungto pawl an ret a si.

Matthai 15:8,9
8 Hipawl hin an ka in in naih ih, an hmur in in cawimawi; a sinan an thinlung cun in hlat zet a si.
9 Milai thupek pawl cu thurin vekin an zirh ih, in biaknak cu a lak men a si.

[16.10]

Galilee tili ih kan to mi lawngpi cu Jerusalem thar ah himdamtei in thlentu dingih ruahman mi a si, a sinan kanmai zumlonak ruangah kan lamzin cu riahsiat thlak zetin kan hloh zo a si. A r ongbawlnak ah Khrih ih tong mi tongkam hmaisabik cu, "Sual sir uh" ti a si. Greek tong ahcun, "metanoeo," ruat awsal, lehhnu ih thatei ruat awksal, cucu, thil cang hnu tinak a si. Hi cafang hman dan ah Thuphuan 2:5 ih hman dan hnakih tha sawn Bible cang dang ka hmu lo, hitawk ah Jesuh ih nun in sim mi cu "Curuangah khuitawk zawnah na tlu ti ruatsal aw, (a cang zo mi, nan cangvaihnak pawl lole nan tlaksamnak pawl kha ruatkir sal uhla ngaihtuah sal uh) cun sual sir uhla, hnatuan hmaisa pawl kha tuan sal uh (nan ruahnak thleng uhla, a tir ih nan rak tuah mi kha tuah sal uh)" ti hi a si, cucu nan lamzin remtha sal uh tinak a si.

Thuphuan 2:4-5
4 Sihmansehla demnak malte ka lo nei, na duhdawtnak hmaisabik na tanta ruangah.
5. Curuangah khuitawk in na tlu ti mangsal awla, siraw aw, cun hnatuan hmaisabik pawl kha tuan sal aw; cuti locun na hnenah ka ra lohli dingih, na farvannak ko cu a hmun ihsin ka thawn ding, na sirawk lo ahcun.

[16.11]

Na Mangngaih Dah Maw?
Tuisan ih kan hmuh mi dan le dun thawi a um mi kawhhran le kum zabi pakhatnak ih kawhhran fate te, innsang kawhhran hin bangawknak malte an nei. Hi innsang kawhhran pawl hi Asia khawmual pumpi ih khawte le khawpi pawl ih zuk a ceimawi a si. Ziangtin cui lamzin ihsin hla takah kan thlengih, ziangtin kirsalnak lamzin kan hawlhmu thei ding? Cuhnak ih thupi sawn thusuhnak cu, Dungthluntu san ih kawhhran, duhdawtnak ih a khat mi Khrih le a thluntu pawl ih kawhhran ah kirsal a tumtu taktak hi kan lakah zotal an um maw? ti a si.

[16.12]

Ziangah Malte Lawng An Si Ringring?
Sualnak ih a cimsiat mi khawvel; sunglam ih a siatral rero mi khawvel; amai cakhiarnak ih a cimsiat mi khawvel ah kan tlangleng a si. Rundamnak, cucu a hloral rero mi pawl ih ban theih a si konan, an ngaihthah men a si. Ziangruangah rundamtu an tul zia a theihfiang tu hi mi maltak te lawng an si? Mangbang ding maw kan si? Mi tampi ih zawh mi lamzin cu siatralnak ih mi thlentu lamzin kaupi a siih, kumkhaw nunnak ih mi a hruaitu lamzin cu a bi zetih mi malte lawng in cucu an hmu, tin Jesuh in in sim zo a si.

[16.13]

A hmin men Khrihfa tampi cun, an khawmawk ringring a si ahcun, kawhhran tumpi ih tohkham sau ih to hi him zetin an ruat aw ih, cui kawhhran ih tawpnak cu, vaivuannak lole pilralnak a va si hmanah cui kawhhran ih korfual zimte kai ih um hi an lung a kim thotho. A tihnun zia a theitu, a ra thleng tengteng ding mi thil thalo le thil tihnung hmusuak dingin lamzin khihhmuh tu, cucu Bible tinak a si, hliakhlaitu cu mi malte lawng an si.

[16.14]

Mi hrekkhat cun, an lawng cu rapthlak takin a pil cuahco ti an theih hmanah, cutawk ahcun himnak an hawl tum bet thotho. Ziangruangah? Hi luatnak ding khawruah harza ruangah a si. Milai khawruahnak ah luatnak a um lo. Mi hrekkhat lala cun, thlengawk a tul zia, lamzin thar zawh sal a tul zia cu an thei ih, lawng hnatuan tu, mawngtu le thuneitu pawl (kawhhran le kawhhran hruaitu pawl) thawn thurelkhawmnak neih an tum. A sinan, siatralnak ton rero lai khalah, diklonak cu phuangin lamzin dangih feh ding duh lonak, riahsiatnak cu reilo te ah an hmusuak sawn a si. Tuahthat a theih nawn lo ti an theih tik ahcun an hnukdok aw sal theu a si. Mi hrekkhat cun nasatak in thudik thawn an do a si.

[16.15]

Ngamtu Malte
Tifinriat ih rapthlak zia tih loin lawng ihsin a dawp ngamtu mi malte lawng an si. Khuitawk kan thleng ih khuitawk ah kan um ti khal an thei lo, a sinan rinnak arsi ih lamhruainak in khuilam kan pan ti cu hngetkhoh zetin an theifiang a si. Kirsalnak lamzin cu lam sau a siih a har khal a harsa zetih, an tawn mi buainak le harsatnak ruangih tha a nau mipawl cu lamtluan ah an nunnak hloh in, cutin an mipum khal a vaivuan vivo ko. Mi rinum in teh an tumtahnak hmun an thleng pei maw? Bawipa in, " Thleng ding," a tawp tiang an rinnak an kaihnget ih anmah a kotu le anmah lam a hruaitu hnen ihsin lam an pial lo a si ahcun, tiah a ti.

[16.16]

Kirsalnak Lamzin An Hmusuak
Jesuh Khrih ih kawhhran kan si vekin, kan kirsal theinak dingah, khuitawk hmun ihsin lamzin kan pial thok ti kan vun man sal ih, cui hmun cu theifiangin zin dangih kan feh ding hi a poimawh ngaingai a si. Ziangtik in Kawhhran in a hnatuan hmaisabik pawl a rak thok? A duhdawtnak hmaisa cu ziang a rak si? Hmainawr kan tum le veten hi thusuhnakpawl hi kan zaten kan san ta a tul. A pakhatnak ih kan duhdawt mi cu Jesuh Khrih a si tengteng ding a si; kan pawl, kan sungkua, kan dinhmun, kan lennak, kan puarthaunak lole kan cakhiarnak pawl an si thei hrimhrim lo. Kan nunnak lal tohkham parah dodaltu um loin Khrih lawng hi a to ding a si, cutin kan nunnak ih a mamawh mi rei daih lo thilpawl hin in tibuai hrimhrim lo ding a si.

[16.17]

A hmaisabik hnatuan pawl cu ziang an si? Hlanlai kawhhran, Thukham Thar ih dungthluntupawl kawhhran ih kan hmuh mi zumtu u le nau duhdawtnak le sunsak awknak a silo ding maw? Pathian duhzawng tuah a duhtu pawl hi kan unaupawl an si lo ah, zo saw an va si rero ding? Mi tampi cun Dungthluntu pawl ih hnatuannak cabu hi hlan lai kawhhran thuanthu ih kan hmuh thei umsun le thabik, hnatuan hmaisabik pawl an tuansuah can le hmun kan theihnak ding cabu a si tin an pom. Dungthluntu pawl ih hnatuannak cabu ah bung kul hluan riat a um. Pathian duhzawng thupi bik ih kan rak retnak hmun kan hmufiang sal a si ahcun, unau, hi Dungthluntu pawl ih cabu vekin kan nung thok sal thei thlang ding a si; Dungthluntu cabu bung kul hluan kuanak ding hrangah kan nung thei thlang ding a si.

[16.18]

Kawhhran tumpipi ih him lonak tanta in dunglet kirsal a tumtu, tuisan zumtu mipum karhzai rero lakah tel ve in kan thei aw, a sinan mi tampi cun khuitawk ah kan kirsal ding a si lole ziangruangah kan kirsal ti theifiang loin theihfeng lonak sungah an ke an kar a si.

[16.19]

Hril Ding Thil Pahnih
Kawhhran ih lamzin, thutak le nunnak ih kirsal kan tum tikah hril ding thil pahnih kan hmai ah a rak um a si. Milai thuanthu ahhin hihi a um ringring mi thil a rak si. Hril ding thil pahnih a um ringring. Pathian tanta in thing theirah cu ka ei ding maw a si lole Pathian cu rinsan in cucu ka hnong ding maw? Dungthluntu pawl kawhhran dan kan thlun ding maw a si lole tidan thar, milai ih tuah mi dan sawn kan thlun ding? Hlanlai kawhhran biakkhawm dan a thluntu innsang kawhhran ah ka tel ding maw a si lole dungthluntu pawl ih Thukham Thar kawhhran ah kirsal in, an zirhtirnak ah hngetkhoh zetin um peh vivo ka tum ding maw?

Dungthluntu 2:42
42 Cutin annih cu dungthluntu pawl ih zirhtirnak le pawlkom awknak ah, sang phel tlangnak ah le thlacam tlangnak ah hngetkhoh zetin an um peh vivo.

[16.20]

Tidan Kel In
Lamzin pakhat cu a dang pakhat hnakin a kau sawn, harsatnak a mal sawn ruangah feh a ol deuh. A dang zin khat cu a bi, a kelkawi, a suk a so a tam, dodalnak, harsatnak le tihphannak in a khat. Hi lamzin pahnih lakah hril ding mi cu a langfiang zet a bang. A hmaisa cu hril olsam zet a bangih, cui hril olsam zet, mi tampi ih hril theu mi zin cu zin thalo a rak si. Bawipa ahcun, zin olsam cu hril lo ding mi a rak si ringring.  Sodom le Gomorrah phairawn ih nunnomnak a hriltu Lot ih thinlung thlunin thil kan ruah lo ding hi theifiang uhsi, cuhnak in putar micak, a tar hnu khalah harsa zet, sihmansehla tlangram a hril sawntu, Caleb ih ruahnak le thinlung sawn thlun in thu le hla kan ruat ding a si. Ziangruangah Caleb in tlangram a hril? Ziangahtile Bawipa za ah za rinsan a tlak zia a theifiang ih, cui Bawipa rinsannak cun rundamnak le netnak diktak ah i hruai thleng ding ti a theifiang.

Joshua 14:12-14

12 Curuangah tu ah cu lai ih BAWIPAI a rak sim mi, hi tlang hi i pe aw; ziangahtile cu lai ah cutawkah Anakim mipawl an rat thu le cui khawpi pawl cu tum taktak le kulh nei an si ti na thei: a sinan BAWIPA ka hnenih a um a si ahcun, BAWIPA ih a rak sim bangin, kei in ka dawisuak thei hai ding a si.
13 Cutin Joshua in anih cu mal a sawm ih, Jephunneh ih fapa Caleb hnenah Hebron cu ro ah a pe a si.
14 Curuangah Hebron cu tui ni tiang Kenez mi Jephunneh ih fapa Caleb ih ro co mi ah a cang, ziangahtile anih in Israel ih BAWIPA Pathian cu a thlun pumhlum a si.

[16.21]

Tu Le Tu
Khrifa ka si vekin, kawhhran hrangih Pathian ih khawkhan cu ziangtilam zawng khalin remthat kan tum a si ahcun Pathian hnakih ropi sawn ah kan tuah aw tinak a si. Pathian ih tumtah mi lole din mi ziangkhal kan remtha kan ti mi cu zianghmanlo men rori a si ti a fiang. Satan hman in ziangtik hmanah Pathian aiih ropi sawnin a hmu aw dah lo. A ruahnak sual maksak hman in amah le amah Pathian thawn bangaw tiang lawng a ruat aw a si.

Isaiah 14:14
14 Mero cungsang parah ka hungkai ding; Cungnungbik vek ka si ding.

[16.22]

A tul a si ahcun, kawhhran hi kanmai ta a silo ti hi kum tin, thla tin, ni tin ten, tu le tu kan man sal cingcing a poimawh! Kawhhran cu Khrih ih ta, A lei mi, A cawm mi a siih, cui kawhhran hrangah a ra sal ding a si. Thil kan neih mi kanmai ta a si mi cu ti danglam theinak thuneihnak kanmah in kan nei ko, a sinan mi dang ih ta a si mi cu, ziangtilam khalin ti danglam theinak, bet theinak, sup theinak kan nei lo a si.

[16.23]

Kawhhran cu Khrih ih a hril mi palai pawl ih pekawknak le tuan retheihnak ihsin din mi a rak si. Anih in cucu thlarau inn tin a tarlang a si. Khrih hi kawhhran dintu, fatir a si ih, cui innsaknak ih lungto rem mi hmaisabik, simduh mi cu, Anih hi a kil ih lung tangkai bik a si. Hi thlarau inn cu Khrih ih dungthluntu pawl le profet pawl ih zirhtirnak lungphum parih din mi a si ih, Amah ih a rak phum mi lungphun siar lo a dang lungphum parah zohman in sak theinak an nei lo a si. U le nau tla, kannih cu hi thlarau inn ih phar son mi a nung mi lungto pawl kan siih, cucu Hell kawtka hman in a neh theilo a si.

1 Korin. 3:11-13
11 Ziangahtile zohman in lungphum dang, phum zo mi, Jesuh Khrih lo bak an phum thei lo a si.
12 Tu ah mi zokhal in cui lungphum parah sui, ngun, lung mankhung, thing, cangpawl, hrampi in an sak a si hmanah;
13 Mi tin ih hnatuan cu a lang thluh leh ding: ziangahtile ni in cucu a phuang leh ding, cucu meisa ih fiah a si leh dingih ruangah: cun meisa in ziangvek mi tin ih hnatuan khal fiah a si leh ding a si.

Efesa 2:19-20
19 Curuangah tu ahcun mikhual le ramdang mi nan si nawn lo, mithianghlim pawl thawn ramkhat mi le Pathian ih sungkua nan si;
20 Cun dungthluntu le profet pawl ih lungphum parih din mi nan si, Jesuh Khrih cu a kil ih lung tangkaibik a si;

1 Piter 2:5
5 A nung mi lungto nan si bangin, nannih cu thlarau inn din mi, puithiam thianghlim, Jesuh Khrih zarah Pathian ih cohlan tlak, thlarau lam thawinak pawl hlantu ding nan si.

[16.24]

Hell kotka ih kan din mi a hmin men kawhhran, hngalnak, zianghman lo, lungrual lonak, dik lonak le mai tanghmasialnak parih din mi kawhhran pawl cu a doneh a si. Tlakrawh, lungto le erhcarnak, thing, thlalang, kahpathir, sui, ngun le lung mankhung thawi sak mi kan innpawl cu an siat ih, cui lungto pawl cu tu ahcun a tlusia mi kawhhran pawl ih thlanlung ah an cang a si. Cui kawhhran lungrualnak cu zirhtirnak sual le pawl thenawknak in a siatsuah ih a cimter a si. Hi a diklo mi kawhhran cu lungto parih din mi a rak silo ih, a thleng aw rero mi milai ih ruahnak vutnel par sawnih din mi a rak si.

[16.25]

Jesuh ih a din mi inn ahcun an nunnak ih Amah a pakhatnak ih a rettu hmuahhmuah hrangah umnak khan a um. A kawhhran cun Amai zirhtirnak, A dungthluntu pawl hnenih a rak pek mi cui zirhtirnak cu a zirh a si. A zirhtirnak cun milai ti lungawi a tum dah lo ih, cu hnakin Pathian ti lungawi a tum sawn a si. Cucu ten umnak sualkhuh tumnak a si dah lo, cu hnakin Pathian thutak, nunsimnak pawl, thupek pawl le Khrih hmuihmel nei dingih in thuamtu ding nunphung pawl zirhtir dingih ruahman mi sawn a si. Cuti a sile, ziangruangah A kawhhran cu kanmai hmuihmel keng dingin tuah kan tum rero?

[16.26]

Thurkhawm Thupomdan (Smorgasbord Theology)
Hi tongfang a thei dah lo tu pawl hrangah, Smorgasbord timi cu mai hmeh duhduh thur vivo theih dingih hun mi rawldawr hmin ihsin hmansuah mi tongfang a si. Hi rawldawr cun mikhualpawl hrangah rawl a phunphun le hmeh kheng pawl mai duhduh hril dingin an rak ret cia a si. Cutin mikhual cun a pakan sungah a duh mi a la dingih a dang cu a tan thei. Dan le dun vekin silo, innsang ih duhdawtnak thawi khawmawk duh sawn ruangah, dan le dun vekih biakkhawmnak ihsin a hnukdok awtu hrekkhat cun riahsiat thlak zetin hi thurkhawm Pathian thupomdan hi an fehpi a si. Dungthluntu pawl ih zirhtirnak le tidan pawl sung ihsin an duh mimi an hril ih, a dang cu an tanta. Mi thenkhat cun anmai duhdan thawn milaw dingin an tuah ih, an kawhhran ih zirhtirnak pawl cu dan ah a si lole anmai hrang lawngah can an tum a si. Zirhtirnak a si lole dungthluntu pawl ih tidan an duhzawng a silo mi pawl cu a
hnuailam ih thu sirhsan panga (5) lakih pakhat khat hmangin an hnawl men a si.

[16.27]

1. Hi tidan lole zirhtirnak cu kum zabi pakhatnak lawngih hman dingin ruahman mi a si.

2. Hi tidan lole zirhtirnak cu hi cakuat a dongtu, phunhnam pakhat hnen lawngih kuat mi a si, hmun dang ih um a dang kawhhran pawl hrangih tumtah mi a si ve lo.

[16.28]

3. Hi zirhtirnak pawl lole tidan pawl cu cui can ih fimthiamnak dinhmun lole umnak hmun le ram dinhmun ih zirin hman ding mi a rak si, cupawl cu tuisan ah hman theih an si nawn lo.

[16.29]

4. Hi zirhtirnak lole dungthluntu ih tidan cu mi pakhat ih ruahnak lole Bible ngantu ih tidan men a rak siih, Pathian ih thinlung taktak a langter lo a si.

[16.30]

5. Cutivek zirhtirnak pawl lole dungthluntu pawl ih tidan pawl cu tuisan mipi lole kawhhran ih hman dingah tumtah a rak silo, hman a si hmanah, thuthennak dan vek men ih ngai ding a si.

[16.31]

Cutivek ih tuah kan duh a si ahcun, dungthluntu pawl ih zirhtirnak pawl thlun lo dingin thiamcoter awknak thu dang tampi kan nei thei ti a fiang, riahsiat thlakzet in mi tampi cun cutivek in an tuah a si. Tu ih kan rel rero mi, tui santhar mipawl, a hmin men zumtu pawl cu Thuthentu cabu netnak ah an dinhmun cu tong hlun hman ih tarlangin a um. Siangpahrang ih thu kan ngai duh lo tikah, siangpahrang kan nei lo thawn a bang aw!

Thuthentu 21:25
25 Culai ah Israel ah siangpahrang a rak um lo: mitin in mai mithmuh ih tha an ti mi cu an tuah cio.

Jeremiah 16:12
12 Nan pa le pawl hnakin thil nan tisual sawn a si; ziangahtile, ngaihnik, nan zaten mai thinlung sual ih suangtuahnak cu nan thlun a si, cutin ka thu nan ngai lo a si:

[16.32]

Hlanlai kawhhran ih an rak tuah vekin inn khat ah kan khawmaw aw a sile, hlanlai kawhhran ih an rak tidan vekin rawl kan ei tlang, thla kan cam tlang, Pathian kan thangthat tlangih Pathian thu kan ngai tlang a si ahcun, ziangruangah hlanlai kawhhran ih zirhtirnak le tidan pawl hmuahhmuah cu kan thlun lonak ding? A zatei kan thlun thluh kirsal lo ding a sile, ziangruangah saw kan kirsal rero duh? Ziangruangah saw dan le dun ih kaiawk mi kawhhran pi cu kan tlansan duh? San a nei mi thuhla pakhat lawng a um, cui kawhhran tumpi ahcun
zirhtirnak lole tidan pawl cu nitin thlun dingin thaten kan zirh theilo, curuangah hitin kan ruat, kawhhran te deuh, dan le dun ih kaih aw lo deuh mi mipi lak ahhin kan zirh neh thei ding mi, kan theih duh mi in sim thei tu ding mi, kanmai ruahnak pawl lole diklonak pawl thawi mi dang kan va neh theinak dingah can tha in petu ding mi kan hmuh thei ruangah a si sawn.

Isaiah 30:8-10
8 Tu ah feh awla, an hmai ah cucu cabuai ah ngan aw, cabu sungah hminsin aw, cutin a ra thleng ding mi can ah cucu kumkhaw hrang a si ding:
9 Cutin hi miphun cu mi dodal hmang miphun, thuphan perhmang fatepawl, BAWIPAI dan a ngai duh lo tu fate pawl an si:
10 Hmutu pawl hnenah, Hmu aw hlah, tiin le profet pawl hnenah, Thil dik kan hnenah phuang aw hlah, ngai nuam thil in sim aw, thuphan phuang aw, ti tu an si:

[16.33]

Lungrualnak, Hmunhma Neilo Phengphehlep

Tuisan ih Khrihfa tampi cun Bible hi anmai duh dan zawngin an hrihfiah. Bible ihsin Pathian tongter sawn lo in, an duhdan vekin Pathian an tongter ih, anmai pomdan bawmtu dingah Bible cang cu an duhduh in an la. Ruahnak cu hnar (mitin in pakhat cio kan nei) vek a si ruangah, zumnak bulhrampi a si mi lo ahcun, kan sim mi a bangaw cio lo, thinlung hmunkhat kan nei lo a si lole ruahnak bangaw kan nei cio lo.

[16.34]

Hihi hawizawng lo a si ti men loin dan ih kan hman ruangah, bumnak nasa tak sungah kan thleng a si. Cutin ziangvek kawhhran khalah thlarau lam lungrualnak pumhlum a um thei lo ti tiangin kan zum a si. Ziangahtile hi bumnak hi kan zum ih, pom lo ding mi cu pom dingin mifim au aw bawmtu kan sersuak. Kan rinnak cu Khrih parih a thumawk phot cun kan bangawk lonak pawl hmuahhmuah thawn pakhat le pakhat kan cohlang aw duh mei a si.

[16.35]

Hi tiang lawng kan thlen lai a si ahcun, a besia tuk hrih lo, a sinan kan simduh mi cu zirhtirnak thu ih lungrualnak neih zuam lo ding lole dungthluntu pawl ih tidan pawl thlun lo ding ti silo in mai dinhmun sidan te pom hi a si. Pakhat le pakhat kan dik lonak kan cohlang aw a si ahcun cucu pakhat le pakhat kan sualnak kan cohlang aw tinak a si. Khawvel ahcun, hihi thil tha a si ko, a sinan Khrih le a kawhhran ahcun, hihi pom theih lo lawlaw a si.

1 Korin 5:12-13
12 Lenglam mi pawl tiangtiang kei in ziangah thu ka then ding? a sungih umpawl cu nanmah in thu nan then a silo maw?
13 A sinan lenglam ih umpawl cu Pathian in thu a then a si. Curuangah cui mi sualral cu nan lak ihsin dawisuak uh.

[16.36]

Mah le mah thu kan then awk a si ahcun, kan unau dang ih kan sualnak pawl in sawh rero a tul lo ding. Zirh theih mi kan siih kan nundan ziaza thu ah midang ih thu in sim kan siang a si ahcun, kan Khrifa sungkua ah lungrualnak cu a thleng ding a si.

1 Korin 11.31
31 Ziangahtile kanmah le mah thu kan thenawk a si ahcun, mi in thu in then lo ding a si.

[16.37]

Kawhhran ti mi cu lung nung ih sak mi thlarau inn a si. Inn ih hngetkhoh zia cu an saknak ih an hman mi thilri parah a thum aw a si. Man khung lo le thilri tha lo thawn kan sak a si ahcun, cui inn a hngetkhoh ding cu beisei hlah uhsi. Pathian ih inn saknak ih kan hman mi lung nung pawl cu a dik lo mi an si ahcun, a inn pumpi cu a tawntai ding a si. Kawhhran ih thlarau innpi saknak ih hman mi thingtum le lungto tin in Khrihfa sungkua a khihhmuh ti hi malten ruat ta hnik uhsi. Inn khat ih um mi cu zirhtirnak lole tidan ah kan thenthek awk a si ahcun, sungkua khihhmuhtu cui kawhhran ih lungto cu lung dik lo an siih, a inn pumpi cu cutawk zawn ihsin a siat ding a si.

[16.38]

A hngetkhoh mi le a harhdam mi kawhhran cu a dik mi (a harhdam mi) zirhtirnak lungrualtei a pomtu sungkua hngetkhoh le harhdam thawi sak mi a si. Kawhhran inn ruangpi ih lungto tumpipi cu sungkua vekih kan hmuh a si ahcun, lungto fate te pawl khal an tangkai ve ngaingai a si. Cui lungto pawl cu bulpak kanmah khihhmuh tu an siih, pakhat le pakhat lungrualnak thawn sihkhawm aw ton in ding tlang ding an si. Kan lungrual lo a si ahcun, ziangtin Pathian ih lalram cu kan din thei ding?

Amos 3:3
3 An lungrual lo a sile, mi pahnih cu an feh tlang thei ding maw?

[16.39]

Zirhtirnak ih lungrualnak cu ziang siarlo in kan feh vivo ding hi Pathian ih in duh mi taktak a si tin na ruat maw? Thlarau ih lungrualnak cu thil cang theilo tumtahnak a si tin na ruat taktak maw? Khrih ah thil ziangkim a cang thei ti hi na zum lo maw si? A hnuailam ih Bible cangpawl hin na ruahnak an lo tuahtha mei thei.

Rom 12:16
16 Pakhat le pakhat thinlung hmunkhat pu in um uh. Thil sangpi ruat loin, mi nauta pawl kha pawl sawn uh. Nanmai ruahnak ah fim awter hlah uh.

Rom 15:5-6
5 Tu ah, tuar theinak le hnemnak Pathian in Khrih Jesuh ih sim vekin pakhat le pakhat parah thinlung hmunkhat puin lo umter hram seh:
6 Cuticun Pathian, kan Bawipa Jesuh Khrih ih Pa cu thinlung pakhat le hmurka pakhat in nan sunloih theinak dingah.

1 Korin 1:10
10 Tu ah u le nau tla, nan zaten thu hmunkhat sim in le nan lakah thenawknak um loin, thinlung hmunkhat le thuthennak hmunkhat ah famkim zetih nan zom-khawm awk sawn theinak dingah, kan Bawipa Jesuh Khrih hmin in ka lo dil.

1 Korin 12:25
25 Cuticun taksa ruangpi ah thenawknak um loin; taksapeng pawl hin pakhat le pakhat bangrep in an ngaihsak aw ton sawn ding a si.

Efesa 4:3
3  Remnak hri ih tawn awknak ahcun Thlarau ih tanrualnak nei ringring dingah zuam tento in.

Filipi 1:27
27 Nan nuntu zia kha Jesuh Khrih thuthang tha thawi mil-aw in um phot mei seh: cuti cun ka rat ih ka ra lo hmuh ah siseh, nan hnenih ka um lo ah siseh, nan cungcang thu ah, thuthang tha rinnak hrangah thinlung hmun khat pu ih tan la tlangin, lungrual zetin nan ding hnget ih;

Filipi 2:2
2 Thinlung bangaw ih nan um theinak dingah, duhdawtnak hmun khat neiin, thu rualaw, le thinlung pakhat ih um in, ka lungawinak kimter uh.

1 Piter 3:8
8 A netabik ah, nan zaten thinlung hmunkhat ten um uh, pakhat le pakhat parah zangfahnak nei aw ton in, unau vekin duhdaw aw uh, mi zangfah thiam si uhla, mi pawlkom thiam si uh:

[16.40]

A Thenthek Awmi Sungkua/Insang
Mitin bulpak cio in eng, thutak eng lamih kan feh lai hlanlo cu kan nunnak ah Setan ih hnaihnoknak hi langhngan in a lang dah lo ti hi na mangngaih dah maw? Kawhhran ah tanla loin le thathnemnak neilo in, kawhhran tokham sau ih karkhat voi khat lole vei hnih nuam takih kan to lai ahcun kan ralpa in hnaihnok dingah in tim hrih lo. A sinan, Pathian thu thungaithlak in kan thlun ih dungthluntu pawl ih zirhtirnak le tidan thatei kan thlun thok tik ahcun, thil hi mangbangthlak takin a thleng aw theu a si. Hlanlai kawhhran tidan thlun in, dungthluntu pawl ih kawhhran lam kan pan veten, Setan hin thungaithlak zetin in thlingthla a si.

[16.41]

Rinlopi'n kanmah thawi naibik ih um duhdawt mi le ni tin kan nunnak ih kan rualpi tha pawl cu hmakhat te ah kan ral ah an cang. Hihi a hleice in kanmai inn, mai sungkua lakah a dik rori mi thil a si. Rundam lo mi pawl sinak dinhmun kan dungtun lai ah mi thenkhat ih dodalnak kan tong ding ti cu kan rak thei, a sinan thuk sinsin in, Khrih hnenah a pumhlum ih hlan awknak nei dingih kan tumtah tik ahcun ral cu kanmai inn, kanmai sungkua, le kanmai nupi pasal lak ihsin mangbangthlak takin an hungsuak a si. A hmin men in kawhhran khawmnak le cangvaihnak ah zarh tin mai phur dandan ih kan tel lai ahcun ziangkim a tluang thluh, a sinan thungaithlak ih Pathian hnatuan dingin kan nunnak kan hlan awk tik ahcun thuhla dang pi a rung thleng theu. Curuangah a si rongbawltu thlahlawh kan peknak tin mi hrekkhat in an ti theu, cutin annih in kan hrangah in tuansak ding a si tiin.

[16.42]

Insang pabik in duhdawtnak ih khat dungthluntu pawl ih kawhhran ah, hlanlai kawhhran ih an rak tuah mi tuahsal dingin le dungthluntu pawl zirhtirnak pawl le tidan pawl thlun dingin a tumtah tikah a tlangpithu in dodalnak cu ruahban lonak hmun ihsin a ra suak theu. Mangbangthlak takin an duhdawt mi an nupi in tui an umnak kawhhran tlansan ding cu a duh lo ih, tui an dinhmun hnakih thuk sawn in Pathian thawi nai aw ding cu a duhzawng, a si lole a phurzawng a rak silo theu.

[16.43]

Khrihfa ti aw na cingin, nupi pawl hin an pasal ih thlarau lam kaihhruainak thu cu lungruh zetin an ngai duh lo ih an thlun duh lo. An thu awih lonak ih thiam an co awkternak cu an pasal pawl ih thu hi Pathian hnen ihsin ngah mi a silo tiih zumnak a si, cutin, an pasal ih thu cu kan thlun a tul lo tin an ruat. Anmai ruahnak ahcun nuntu khawsaknak ah siseh thlarau lam ah siseh an pasal pawl ih thungai a tul lo tin an ruataw aw. An pasal pawl hnakin Pathian hnen ihsin thu theihnak nei sawn dingah an ruataw sual a si lole an pasal pawl cu bum in an um tin an ruatsual.

[16.44]

An zaten an si lo hmanah, Pathian thu thluntu kawhhran ih nunau tamsawn cun an pasal ih thuneihnak hnuai ah um dingin mipi theih ah thu an kam, a sinan Pathian ih kaihhruainak thu ah an pasal hnakin fimnak neisawn le theihnak nei sawn ah an ruataw theu. Hi thu ah Pathian khuilam ah a tang ti cu fiangten a lang. Hihi milai thupek a si lole vancungmi ih thupek khal a silo; hihi Pathian ih thupek a siih, cucu kan hnenah hril ding pahnih, thuawihnak le thuawih lonak in tanta a si. Thu kan awih lo a sile, ziangtin Pathian fate kan si kan ti thei ding; ziangtin Khrih cu kan Bawipa tin kan ti thei ding?

Luka 6:46
46 Ziangruangah ka lo sim mi pawl hman tuah loin, Bawipa, Bawipa, tin in ko?

Efesa 5:22-24
22 Nupi pawl, Bawipai hnen ih nan tuhlut awk vekin, nan pasal hnenah tuhlut aw uh.
23 Ziangahtile Khrih cu kawhhran ih lu a si bangin, pasal cu nupi ih lu a si:cun anih cu taksa rundamtu a si.
24 Curuangah kawhhran cu Khrih hnenih a tuhlut awk bangin, nupi pawl khal thil ziangkimah an pasal hnenah tuhlut aw hai seh.

1 Korin 11:1-3
1 A dungthluntu si uh, kei khal Khrih dungthluntu ka si bangin.
2 Tu ah, u le nau pawl, thil ziangkim ah in cin ringring ih, nan hnenih ka lo pek vekin, thurosiah nan thlun ruangah, ka lo fak zet hai.
3 A sinan, mipa tin ih lu cu Khrih a si ih; nunau ih lu cu mipa a si; cun Khrih ih lu cu Pathian a si, ti nan theih ka duh.

1 Johan 2:3-4
3 Cun a thupek pawl kan thlun a si ahcun, cumi ihsin amah kan thei ti kan theifiang.
4 Amah ka thei, ti si ih a thupek pawl a thlun lotu cu thuphanper a siih, thutak amah ah a um lo.

[16.45]

U le nau tla, innsang ih lungrualnak a um hlan sung cu kawhhran sung khalah lungrualnak a um thei dah lo ding a si. Nupi le pasal cu Pathian thu ah can an hmang tlang ding a si. Hngalnak le dodal awknak cu hrial in lungrual tei um an tum ih ruangah thutak an hawl sawn ding a si. Lungrual an tum rero laiah, innsang ah thuhla buai cu a um ko ding, a sinan cui thuhla buai, a lang lo mi cu, a rak um ringring zo. Cui thuhla buai phorhsuahnak in lungrual tumnak mit thawn cui thuhla buai rel thiam theinak mi a pe a si. Kan bangawk lonak pawl kan phorhsuak tikah, milai ih thiamco kan tumnak pawl cu a pilral thluh sawn a si. Dodalnak hnipuan hruhin, hngalnak cun duh a nung lo zet mi a lu cu a tung dingih thuphan ih pa cu cui thuhla buai ih a tel mipawl ih thinlung sungah thlaphannak le rinhlelhnak ret tumin hna a tuan buai ding a si. Kan ralpa cun lungrualnak ihsin a ra suak ding mi huham cu a thei ih, innsang ah lungrualnak um lo dingin a kham theilo a si ahcun, cui lungrualnak cu kawhhran sung khalah a thleng dingih, cui lungrualnak cun Pathian ih huham a run keng lut ding ti khal a thei a si. Nupi le pasal cu taksa, thinlung, le thlarau ih lungrualnak an neih hlanlo cu pumkhat taktak a si theilo.

Matthai 10:36
36 Cun mi pakhat ih ral cu amai sungkua lala an si ding.

Matthai 12:25
25 Cun an ruahnak cu Jesuh in a thei ih, an hnenah, Mah le mah a thenaw ih a do aw mi lalram kipin siatralnak an thleng; cun mah le mah a thenaw ih a do aw mi khua lole innsang kip in an dingsuak theilo ding:

[16.46]

Kawhhran sungih cahnak thuthup cu lungrualnak parah a thumaw a si. Kawhhran ih lungrualnak a um lo a si ahcun cui kawhhran cu sam nei nawn lo Samson vek a si ding.

[16.47]

Lungpi Le Harsatnak Hmun Karlak
Zangfahza, Siangpahrang sual Ahab cu a huham le a thuneihnak hmuahhmuah thawn siangpahrang hna a tuan, a sinan lungto le hmun harsa ih um in amah le mah a theiaw aw. Khatlam kam ah, Bawipa (lungpi) in a thuphuangtu Elijah hmangin ralrinnak pek a si ih, khatlam kam ah, thil tithei, lungruh, rinum lo, a nupi Jezebel (harsatnak hmun) in thil harsa tak tuah ding anih cu phut a si fawn si. Riahsiat thlak takin, hi dinhmun ah mi hrekkhat cu tui ni ah an dingih, cupawl lakih mi hrekkhat cu hruaitu an si. Khatlam kam ah, annih cu cawhpolh lo Pathian thu in a sawh hai ih, khatlam kam ah, annih cu mi puarthau le lungruh an nupipawl in an thihthaih fawn si. Cuiruangah mi hrekkhat cu an nupi pawl in nasatuk in an thihthaih ih ruangah an nupi pawl ti lungawinak dingah Pathian ih fiang zetih a sim mi nunsimnak pawl cu hrial tahrat in milai ih khawruahnak fim taktak tla an sersuak a si. Mangbangthlak tak a simi cu, hipawl hin thuthlung thar dan hi a pumhlum ten kan thlun thluh tiih an tiawk hi a si. Nupi tampi cun lukhuh ding thu, biakinn sungih daitei um ding thu, le ziangtilam hman in zirhtu an silo ding thu a si lole mipa parih thuneihnak an neih lo ding thu ti pawl tla hi an buaipi a si. Nan nupi pawl ih thinhengnak malte sung daiter a duhtu zirhtu pawl, thaten ruah uh cutivek ih tuahnak ruangah, lehhnu ah Pathian ih thuthennak nan tong ding ti hi thei uh. Hipawl hin thuthennak rapthlak sawn kan tong ding ti hi an hngilh zo maw si? Pathian an tihzahnak an hloh zo maw si?

Jeim 3:1
1 Ka u le nau tla, thuthennak nasa sawn kan tong ding ti thei in, zirhtu tampi va si hlah uh.

Thufim 9:10
10 BAWIPA tihzah cu fimnak ih bulhrampi a siih, mithianghlim ih theihnak cu theihthiamnak a si.

[16.48]

Cutivek mipa pawl hmuahhmuah cu mi ralhrut an siih, Pathian ih tuurual kilkhawitu dingah an tlak lo a si, ziangahtile an innsang mi pawl hman an uk theilo a si.

1 Timote 3:4-5
4 Amai iinsang thatei uk thei tu, zah umnak hmuahhmuah thawn a fate pawl a nehtu, a si ding;
5 (Ziangahtile, mi pakhat in amai iinsang uk dan ding hman a theih lo ahcun, ziangtin saw Pathian kawhhran cu a kilkhawi thei ding?)

[16.49]

Thlemnak Ruangih Tontaihnak
Sia le tha theihnak thingkung rah ei lo dingih thupek cu Evi sersiam a si hlanah Adam hnenah pek a rak si. Adam hnenih amah bawmtu tha pek a si tikah, anih hin a nupi hnenah hi thupek hi a sim tengteng ko ding. Ziangahtile Evi in hi thupek hi rul hnenah luar sawn hmanih a sim sal theinak hin hi thupek hi thaten a thei ti a fiangih, a pasal ih ralrinpeknak cu thei na cingin a bawtsia hrim ti a lang. A thil tha lo tuah mi hi thaten a theifiang a si. Ziangruangah saw cu tlukih bawhsiatnak rapthlak cu a tuah?

[16.50]

Khrih cu thlaler ramcar ih thlem a rak si laiah, Setan in a rilrawnnak riamter ding hlawknak khihhmuh in lungto cu sang ih canter dingah a rak thlem a si. Evi a thlemnak ah teh ziang hlawknak a khihhmuh? Pathian in thihnak thu ah a lo bum men a si tiin Setan ih a thlemnak cu Evi in rak zum hmansehla, Evi cun thinnak a tihnak lawng a hloh ding, ziang hlawknak hman a co lo ding, a sinan Setan cun Evi hnenah hlawknak a rak tiam a si. Anih in Evi hnenah thingrah na ei a sile, na mit a vang dingih pathian na bang ding a ti. Hihi hlawknak tumpi co ding tiamkamnak thawi thlem mi thlemnak taktak a si; boruak pumpi uktu si ding, thuneihnak, huham, lennak le ropitnak co ding hlawknak a si, tu ah...cucu it-um tak a siih, Evi in a rak tuah a si!

[16.51]

Cawisan mi si duhnak, mai nunnak a si lole midang nunnak parih thuneitu si duhnak, tla hi san khat hnu san khat ah a rung thlengaw vivo a si. Evi hi tawntai sawn ih tuah rak silo sehla cu, amah le a leh hnu ih rung um mipawl hin khawvel danglam tak an rak sersuak ding nan, minung in thil tha sawn an tuah ding tinak si loin; tui kan umnak khawvel hi suan ding zianghman a um lo a si.

[16.52]

Pathian si a duhnak thinlung ruangah, anih cu a pasal ih thuneihnak hnuaiah ret a rak si. Adam cun Bawipa hnakin a nupi ih thu a thlun sawn ruangah, a cithlah pawl khal cutivek thlemnak tong dingin ruat mi an rak si. Curuangah Pathian thu an ngai ding maw a si lole an nupi pawl ih thlemnak lole bumnak an thlun ding ti hi pasal pawl in thu bawhcahnak tuah ding a rak si ringring. Nunau pawl hi thuneihnak nei duh an rak si hrimhrim ih, mipa pawl khal duhdawtnak an co ding a si ahcun cui thuneihnak cu mi kut ih pek duh mai an rak si.

[16.53]

A fimnak in Pathian in mitin hi Amai taksaruangpi, kawhhran, ah Amai duhdan vekin in bunkhawm a si. Anih in mipa pawl hnenah dan tuah dingin, thatei mi kaihruai dingah le mai tanghma sial loin Amah rian dingah thuneihnak a pe zo a si. Anih in hi mipa pawl lakih mi hrekkhat cu hmun hlatpi ah thlah dingin palai ah a hril hai a si. Midang cu Amai aiih thusimtu dingah, a cau mi le a tawntai mipawl thazang petu ding le nunsimtu dingah hril an rak si. Mi hrekkhat lala cu thuthang tha ih nunnak thar thlarau lam ci tuhtu dingah hril an siih, midang pawl cu cui ci thang dingin le pitling dingin tidai toihtu dingah kawh an si ve. Hi rongbawltu pawl lak ahhin Pathian in nunau lak ihsin a hril mi zohman an um lo, nunau pawl cu innsang nu dingah le mi bawmtu ding an si sawn. Pathian in a run theihter hai can ahcun Pathian thu cu an phuang ve thei ko. Mi va zirhtu ding a si lole mipa pawl parih thunei ding cu an silo nan, zumlotu pawl hnenah a hleice in nunau pawl le nauhak pawl hnen ahcun thuthang tha cu an sim ve thei. A netnak ah, kawhhran khawmawknak ah daitei um ding ti le Thlarau Thianghlim ih a pek mi thupawl a si lole Pathian ih thuneihnak a pek mi ti lo cu, mai thinlung suak thu ziangkhal sim lo ding ti kha cing ringringin, nunau hin kawhhran ah hruaitu upa hna a tuan thei, upa (elder) cu a tuan theilo a si.

[16.54]

Pathianpawl Nan Bang Ding
Tuisan khawvel ih nunau cawisannak cangvaihnak hin, tenumnak sisi in, Pathian lalram ah hmun a khuar rero thlang. Langhngan zetin, nunau pawl hi pathian vek an si thei, pathian vek an si theilo hmanah, tirhmi, profet, evangelist, pastor lole mipa zirhtu an si thei tiih zirhtirtu thlarau sual hi hmun tin ah a um. An innsang ih remawknak a um theinak dingah hi zumnak tha a petu mipa pawl le an um lailai. A si, remnak, ziang ih lei mi remnak so? Midang hnenah kannih cu Khrih ih siahhlawh kan si ti cingin Khrih ih thlah mi pawl ih thu cu ziangsiarlo in kan um ding maw si? Hihi a silo sawn depdetnak ih sungmuril rori cu? Hlanlai kawhhran in hi zirhtirnak pawl hmuahhmuah hi phunzai lo ten an rak thlun thluh ti hi thei ringring hram uhsi. Cuti a si ahcun, cui zirhtirnak pawl cu ziangsiar loin kan um a si lole Pathian thu mai duh mi mi lawng thlunnak, cucu mai duh mi lak ih, a dang tanta tinak a si, cu pom thotho si in, ziangtinso kirsal in hnatuan hmaisa pawl kan tuan sal ding timi ruahsannak cu kan neih thei ding?

[16.55]

Mi tampi in hlanlai kawhhran, Thukham Thar hi dungthluntu pawl ih zirhtirnak a si tiin an pom ih, zumtu pawl in cui zirhtirnak cu hngetkhoh zetih an rak thlun lai can le hmun ih kirsal ding hi a tul rori a si ti an theifiang thlang. Tuisan ah mi hrekkhat cu lamzin hrek in an bangsal ti kan hmu. Ziangruangah? An innsang thatei an kilkhawi theilo ruangah a si.

[16.56]

An theih khal le theihlo khal le, hi thlarau lam kawhnak, kan duhdawtnak hmaisa ih kirsal ding le hnatuan hmaisa pawl tuansal dingin hlawhtlinnak lole tlaksiatnak cu nunau pawl ih kut sungah a um a si. Kan innsang, kan sungkua pawl ah hnuaidornak, nupi pawl le fanu pawl lungrualnak a um lo ahcun pumkhat lungrualnak a um theilo dingih, kawhhran sungih cui kan sungkua pawl in thukhat kan rel tlang lo, thinlung hmunkhat le ruahnak hmunkhat kan neih lai hlanlo cu kan kawhhran pawl khal lungrualnak ah kan thleng thei dah lo ding a si.

[16.57]

Hlanlai kawhhran ahcun, nunau pawl cu nu dingah, innsang tuangtim tu le bawmtu dingih dinsuah an rak si. Hihi a tir ihsin thil umdan cu a rak si. Curuangah hlanlai kawhhran ahcun pasal hnenih tuhlut awknak a si lole thlarau lam ih kaihhruainak ih tuhlut awknak cu nunaupawl hrangah a hleice in tihnungza a rak si hrimhrim lo.

[16.58]

Curuang ahcun, khawvel hi hmuhtheih in a thlengaw thlang a si. Tuisan nunau pawl hin thil thupi sawn tampi an thelh ih, thil thar pawl an thlun sawn a si. Thlengawk an duh; mi hrekkhat cun pathian si an tum, thihnak le nunnak, naute nunnak le thihnak parih thuneihnak nei ah an ruat aw. Pawlkom hnatuan, a hleice in mipa hnatuan pawl ah tong ve an duh, tuan ve an duh, tel ve an duh. Hiti ih cangvaihnak hin nunau cu khawvel mi diktak ah a can hai ding, a si lole khatlam zawngih kan ti a sile, khawvel mi nunau diktak an si ding. Hihi Khrihfa nunau ih si tumdan ding awm a si maw? Khawvel ih simfaknak co a tumtu nunau cun ni khat ni ni ahcun khawvel ih simfaknak cu a co mai thei, a sinan cucun Pathian ih cohlannak cu a pe lo ding a si.

[16.59]

Duh khal len, duh lo khal len, a fiangzet mi cu, ziang kawhhran pawlkom khalah hlanlai kawhhran cangvaihnak a tak ih a umsal theinak ding ahcun nunau pawl in cuvek cangvaihnak a um ding an lung a kim rori a tul, an lung a kim hlanlo ziangtilam hman in a cangsuak dah lo ding ti hi a si. Nunau pawl in kawhhran sungih Pathian ih tuanvo a pek mi dinhmun cu cohlang in a dang tuanvo lak tum loin le a dang sersuah tum loin hnuaidor ten Pathian thu an pom ih an thlun tik lawngah cucu a cang thei a si.

[16.60]

Nunau pakhat in thungai in Khrih hnenih a pekawk a si ahcun, amai thuthu in a um thei nawn lo a si. Man ih lei mi a si kha a theihfiangih a pom a si. Bawipa Jesuh Khrih ih siahhlawh ah a cang zo a si. Khrih ih siahhlawh a si vekin, Pathian thuneihnak ih pek mi dan vekin anih cu lukhuh dingih fial a si tikah, ziangahso cucu a el rero duh? Siahhlawh a si vekin, anih cu biakkhawmnak ah daitei um dingih fial a si tikah le thusuh duh mi a neih a sile inn ah a pasal a sut ding tiih fial a si tikah, ziangahso cucu a el rero ding? Anih cu upa pawl le Pathian mi nunau pawl hnen ihsin fimnak le nunsimnak a la ding a si lole cutivek nunsimnak cu nauhak pawl hnenah a pe ding tiih fial a si tikah, ziangruangahso a ngailo nak ding?

[16.61]

Nunau le nauhak tampi in kaihhruainak le nunsimnak a tul laiah ziangruangahso mipa pawl va zirh kherkher a tul? A dang tampi ei thei na cingin le ngaihsak ding nei na cingin ziangruangahso ei lo ding tiih kham mi thingrah kherkher cu ei an tum rero? Siahhlawh a si vekin, midang ih it ding zawng silo in, mawi takih thuam aw dingin fial a si tikah, a si lole nunnem takih tong dingin le nungcang dingin fial a si tikah, ziangahso cucu a el rero ding; Khrih a rak cohlannak cu himi pawl tuah dingin a silo maw si? Kanmai ta kan si nawn lo a si ahcun, ziangruangahso Pathian ih pek mi, cathianghlim ih fial mi pawl cu kan dokalh rero ding? Pathian ih thupek pawl hi thlun harsa tuk maw an si?

1 Johan 5:3
3 Ziangahtile a thupek pawl kan thlun hi Pathian kan duhdawtnak cu a si: cun a thupek pawl cu thlun harsa tuk an silo a si.

[16.62]

Pathian lam tang kan si lo ahcun Pathian dodaltu kan si. Kawhhran ih kan kirsal ceng a sile, ziangruangahso zin hrek tiang lawng kan kir ding? Ziangruangahso a net tiang kan kir lonak ding? Kawhhran ah kan kirsal lo ding maw si?