SAL PAWL LAKIH SA

SAL PAWL LAKIH SAL

Hminsin: Cangantui dinhmun theifiang dingin, Casiartu Hnenah timi hi siar hmaisa aw.

[20.1]

Pathian Ih Tumtah Mi
Jesuh Khrih ih kawhhran kha dungthlun pawl ih kawhhran ti khalin kan ti thotho, cumi cu a tum zia leh a hminthan zia thu ah rel duhmi a silo, a hleice in a fate bik tualsung kawhhran zomkhawm aw mi vek tluk fang men a si. Kawhhran fate ti in kan sim duh ih a pawlnel aw mi insang, leitlun mi hmuah inhnen vekih a nelaw mi kawhhran a si. Mipum zakhat maw a thawngthawngin maw inn khat sungah umkhawm an tum dah lo, a sinan cuvek ih um aiin a bur tete'n insang khat bangin an um sawn ih, a tlangpi thu in upa minung pa sarih in hleili hrawng hi an si tlangpi ih inn khat kha an hmunpi ah hmang tahrat in an tongkhawm aw theu. Kawhhran zaten rundam mi an si thluh ih a thianghlim mi dungthluntu an si hai fawn kannih vek ih mi hnokhnai le zumlo tu sawngbawl cop men mi an si hai lo. A minung zawng cun mimal te sihman hai sehla, an pawlnel aw, insang khat nun in an nung, an umdan kan zoh tikah Khrih neitu an si zia kan hmu thei a si. Hi vanhnuai minung lak ahhin Pathian ih Thlarau cu inn tin bulpak tin hnenah a leng vel. Hi kawhhran fate mipum tla cun pasarih maw hleili ti hrawng lakah hin kan hmuh thei mi cu upa pakhat maw pahnih si maw kha Upa hruaitu (Deacon) pakhat maw pahnih pawl thawn simaw hnatuan khawmnak an nei ringring ih a then phei cu nunau tla an si men ding. Ziangtin an um ti hi na thei thei mei ding, upa pakhat lole pahnih leh hruaitu pakhat lole pahnih pawl kha pitling mi pa sarih lai lakih an tuan khawm thei dan kha, mi pakhat in pakhat cio deuhthaw an kaihruai aw thei tinak a si. Upa pakhat hin mi pakhat hrangah thlarau lamih an thansohnak ding hrangah an tuan cio ih an thlarau laksawng comi kha thlarau lam thansohnak ah an hmang aw nasa a si. Upa hruaitu pawl hi nitin tuanvo pek ringring an siih a tak in member pakhat ih nitin a tulmi a taksa hrangah, thil hi famkim takin an tuakto hai ih ei in khopkham in leh, sinfen thu khalah siseh insan man, sumlut leh harhdamnak lam hrangih an tulmi pawl kha ziangtik hmanah an rel puang dah lo. Upa pawl cazin khal kha ngan non mi le hrawhhrawlnak tivek an hngilh pang mi tivek pawl khal ah kawhhran pi hin ziangtik hmanah bangaw tengteng seh ti in zunglam ihsin hngirhngo awknak a um dah lo. Hihi a hramthokte ihsin an pianhmang umzia a si.

Jeim 1:27
27. Pathian kan Pa in biakinn lamah a taktak le a thiang mi biaknak ih a ruah mi cu- farah zonzai le nuhmei an harsaknak le an tuarnak ah thaten kilkhawi le hi leilung ih a balhter lo mi pawl an si.

Jeim 2:14-16
14. U le nau pawl, mi pakhatkhat in zumnak ka nei ti hmansehla a tuahnak ih a hmuh lo ahcun ziangso a thahnem? Cui zumnak in a runsuak thei ding maw?
15. Nan Khrihfa unau lakah mipa siseh nunau siseh hnipuan a tlasam mi le ei bar ding a nei lo mi an um ti bang sehla,
16. cubang pawl hnenah, " Pathian in lo thlawsuah hram seh. Hlum te in um uhla rawl thate in ei uh," ti ah nan timi cu an nunnak ih an tul mi nan pek silo ahcun ziangso a thahnem?

[20.2]

Upa hi kan ni tuahcop mi silo in Pathian tuah a si. Kannih cun ol-ai te thil ah kan ngai men theu. Dungthlungtu 6:3, nak kan zoh tikah dungthlungtu pawl khan mipi lak ihsin mi ziaza tha mi minung pasarih Thlarau le fimnak ih khat pawl hawl uh an ti. Hibang pawl kan zoh tikah fimnak sang nei ih zirnak lam nei mi pawl an silo ti cu a fiang, an lakih tel men mi, mi tha satliah men pawl fang an si. Annih cu hitivek hna tha tuan tlak ih ruah mi an sinan hmailam an feh vivonak ding khal ih bom tul mi pawl an si. Tulai san khalah hitivek mi dik pawl hi a si kawhhran ih mi hman tlak. Hi Upa kan timi pawl hi Pastor pawl vekin nemhngetnak (ordain) nak capi pek an tul hai lo. Missionary pawl leh Thuthang Tha simtu pawl khal hin an tul hai lo, amah lawngte Profet diktak pawl hi cun dokalhnak an ton can ahcun an tul ka zum.

[20.3]

Kannih khal kawhhran hruaitu kan si vekin, upa kan hril tikah mi diktak pawl hi kan hril ngah thei lo tla a si men thei, a sinan kan theih tul mi cu kan unau lakah zo ha upa dingih a tling timi hi hawl hmaisat ding a si. Mi pahnih lai lawng kan hmuh thei khal a sile kha ti'n si hrih ko seh. Hmai thla maw hna kum lamah maw a tam a mal in hril leh men ding a si. Kan hrangah teh ziangti hi ha a tha bik ding? Hi hi Pathian in in pe leh mei ding. Kan pomrem mei ding mi le kan hman mei ding mi cu Pathian ih kutcak hngah hi a si.

[20.4]

Hruaitu Upa (Deacon) Timi Tongfang
Deacon timi tongfang hi Greek tong, "diakoneo" timi ihsin ra suak mi a siih telve lole hnatuan tinak a si. A simduh mi leh cu, hnatuannak le thil tha tuahnak kha zuamnak in leh a tulnak ih khual naite tlawngtu ti tla a si thei. Deacon timi hna hi Dungthluntu bung ruk hin a thok ih an lak ihsin Sakhuanak a thlengtu pawl an sosannak ruangah le Hebrai nuhmei in duhsak biknak hi nitin ei in thu ah an neihnak ruangih ra cang suak mi a si. Cutikah dungthluntu pawl hin thil a felfai theinak dingah tikcu can an khiah ih Bawipa hngak thiam dingin leh Pathian thu ah pum ap aw cio dingin leh thlacam cio dingin an forhfial hai a sinan rinsan tlak nun an neih theihnak dingin lamzin dik an khihhmuh sak hai ih Thlarau Thianghlim in an khat hai ih nitin ti rawl an zem hai. Hi ti ih an tuahnak in minung paziat an si ti kan thei thei. Kannih khalin deacon kan hril tikah daihnak a duhtu le phunciar a hmanglo tu pawl hi hril ding kan si. Thil an zem hai tikah mi pakhat ih a covo ding hi felfai diktak in an pe suak hai. Kan zirsuah thei mi cu hiti an rak hril awk tikah pacang pawl lak ihsin rintlak mi pawl an hril suak ih cu pawl tla cu mi thinlung tha Thlarau Thianghlim ih khat pawl an si. An hram rak thawh dan ihsi kan zir thei leh mi cu mipa le nunau hi an rawi aw ruri hai lo. Hiti hnatuan dingah a langte sungin an hril aw ih a langte in an tuan cio ko nan a neta lamih kan thlir tik ahcun Pathian ih tumtah mi kawhhran sungih rawlbawltu a kum khua ih run tuantu pawl ah an rungcang thlang ta a si. Zokhal hi hna rak tuan hmaisatu pawl hi lom leh fak an rak hlawh cio hai. Khrihfa lakih Hremthahtuar (Marty) hmaisa biktu Stefen le a net nak ih thusimtu (evangelist) ih ra cang suaktu Filip pawl nundan tla hi lom tlak ngaingai an si. Culawng silo in midang tampi pawl Prokhoras, Nikanor le Parmenas pawl hi pipu thuro siah ih rel dan vekin mi ropi an siih an zaten Filipi khua ah hremthat tuar in thah thluh an si an ti, Nikholas kha Antiok khua ah an rak that ih an zate hremthah in; an pa sarih khan cutiangin an nun an rak hlan a si.

[20.5]

A Danglam Hleice Mi Hnatuan
Hi hnatuannak ahhin midang hrangih tuah mi thil pakhat a nei ti a fiang, thimnak ah- dungthluntu pawl, profet pawl, thusimtu pawl, saza pawl leh pastor pawl hman ih rak neih lo mi tiang an rak nei tinak a si. A dang hnatuannak pawl hi cun mai hnatuan an nei cio ih a thupi biknak hmun a si ruangah an thlakthleng aw dah lo. An hnatuannak hi thansoh lole tumsuk ding cu a si ko, a sinan a tlangpi thu in a kimvel kan zoh tikah reidaih ding mi thil a si. Hihi upa pawl lawngih hna a si cuang lo. Upa pawl leh a dang rongbawltu pawl a bawmtu pawl lakin pakhat cu thawn aw thei dingin, upa hnatuannak ih telpi thei dingin an um ding a si. Kan sim cia zo vekin a hramthawhnak ahcun mipa lak ihsin rak hrilsuak an si ko nan Rom 16:1,2 lam kan zoh tikahcun nunau an telnak thu kan run hmu thei, Fibi ih hmin ra langnak kan hmu thei. Tongkam sunglawi "Deacon" timi tongfang ih duhsan mi cu " Sal " tinak a siih hi hnatuan ahhin nunau khal an tel thei ve thu kan hmu thei a si.

Rom 16:1-2
1. Kenkhria khua kawhhran ih hnatuantu kan farnu Fibi hi nan theihthiam mi siseh ti ka duh.
2. Pathian zumtu pawlih tuah ding mi a si vekin Bawipai hmin in amah cu rak cohlang uhla bomnak a tul ahcun rak bawm uh. Amah hi mi tampi hrangah sisehla, keimai hrang khalah siseh, rualpi tha, mi thahnem zet a si.

[20.6]

Mi hrekkhat cun Fibi hin upa (deacon) hna a tuan lo timi hi an el men ding ziangahtile anih cu mipa a silo ruangah a si. Paul hin a sinak thu hi fiangten ziang a tuah ti a sim, thimnak ah, a tuannak hi zungih tuan in a rel lo. I Timote 3:12 sungih upa mizia tlinnak Paul ih sim mi ahhin thu elnak a suak thei men thei, "Upa cu nunau pakhat ih pasal a si ding" timi hi. Nunau thusimnak ahhin a har zet mi cu "nunau pakhat" hi "pasal pakhat" ih nupi pakhat si ding hi thil harsa tak cu a si. Himi hi ziangvek pawlkomnak khal ih ruah theihlo mi a si, khuahlan khalah siseh lole tulai khalah siseh, nunau hin pasal pakhat aiih tam an rak nei theu. Khui ram hmun khalih umdan vek ah a cang men, hlanlai ihsin tulai san tiang hin, mipa hin nupi pakhat ai tam an rak nei aw cio a si; a hleice in Ni Suahnak laifang mi pawl tla hi cu nupi tampi nei mi hnam an si, Africa ram hrekkhat khalah nupi tampi neihnak an hmannak hi an hnam dan a siih ka zumnakah leitlun hmunkip khalah an hmang hnuaihni lai ko ding. Hihi ziangruangah tile Africa ram lam ahcun an dan in a siansak fawn si culole upa kan hril zik tikah an hnam dan humhim nak a kalh ding, curuangah hi mi thu kan rel tikah nunau pawl ai in mipa pawl kan sim uar theunak a si. Hitivek thu relnak ding hrangah Timote cakuat kuat khatnak bung thum sungah a simfiangnak kan hmu thei. Kan ralrin tul zet mi thil cu bible sungih minung thuhla simnak ahhin Khrihfa ih an lut veten a hleice in mipa thu in an rel uar tam deuh sawn ringring nak a si.

[20.7]

Fibi thuhla hi kan zingzoi tikah, kan ralrin ding mi cu, bible hi ruat cih ringring aw, dungthluntu pawl ih in rak sim mi kha, annih cu Thlarau Thianghlim kutcak ih hruai mi an siih an tong mi zate hin duhsan mi a rak nei thluh. Pathian hin a duhmi a sim ih a sim mi a duh. Fibi hi upa ti ih kawh a si. Strong's Greek,# 1249, cabu sungah "diakonos" tiin a hmangih hi tongfang hi Thuthlung Thar lawngah thlarau lam thurelnak lawngih rak hman mi a si. Sal ti tongfang hi a tlangpi thu ih hmannak ah cun "doulos" ti in Strong's Greek dictionary, # 1401, sungah fiangten kan hmu thei. Jesuh Khrih kha leitlun a len lai ih a thluntu pawl thawn sal hnatuan ih khual an
rak tlawnnak ah nunau pawl kha an rak tel ve. An inn an rak on cio ih Khrih an rak rian hai, thimnak ah- Mary le Martha, annih unau hin mi farah (Dorcas) an cawmdawl, kawhhran hrangah an inn an on sak (Lydia), an ti tha cio ko, Fibi bang khan dungthluntu pawl hnenah an cengkual. Hi tongkam vek hin a thianghlim thei bik, sinak hi sal timi ih duhsan mi a siih, kei cun bible lo vek cun ka hmu dah lo cu lole thupek lan ti in nunau pawl ih hnatuannak hi ka hmuhsak hai lo a si.

[20.8]

Serhhran Awknak
Upa hrangih rak hril mi pawl kha a lenglam midang hrilsuah an si thu kan ruat tha sal leh kei uh.

Matthai 23:11
11. Nan lakih a tumbik mi cu nan hnen um si ding a si.

[20.9]

Hi hnatuantu dingih hril mi pawl hi cu Amah Pathian thawi rak fehtlang ciatu pawl lawng hrilsuah an si. Annih cu mi dik le mi fim pawl an si. Annih pawl hi Thlarau Thianghlim in an khat ih a luangliam mi kan sim bet a sile an Bawipai hna an tuannak ahhin thungaithlak le titak ih tuantu pawl an si. An hmel phun hnih in an langter loih, thimnak ah- milai ti lungawinak zawngih tuantu an silo. Tlu ol dingin zuri le sabah in an um ti tla theihnak kan nei lo, an duhham ti tla'n theihnak kan nei lo. Titer aw in an um hai lo ih anmahte um can ih an umdan le milak ih an umtlan dan a danglam aw cuang lo ih cule Khrihfa hnatuantu mi thar khal an si fawn hai lo a sinan kawhhran ih hna an tuan ding ahcun fiah awknak an neih hnu lawngah an la aw aw, ih hlanlai vek thotho khan an duhkhung a si. Nupi nei cia zo pawl an silen nupi pakhat tlun lam nei dah lo mi leh an insang zate ih hnatuantu ti ih mi ih theihpi tlak mi an si ding a si.

[20.10]

Kan theih dingih a tha mi pakhat cu mi upa tuan a duhtu cun a tlinnak hi thei ta sehla a thabik. Upa pawl hi mi hmai ih zirhnak lam ahcun sinak pek kher an tul hai lo. Curuangah upa pawl hi mipa pawl lawngin hi hna hi rak tuan theu hman hai sehla tulai ahcun a nu a pa in tuan theih thluh mi ah a rungcang. Cutin thil hi a rung thleng aw vivo ih a langte ih tuanvo pek awk mi kha tu cun hna hnget ah a rungcang thlang a si. An hnatuan rawl zemnak ihsin khual naite tlawnnak ih hoha tu ah a rung thleng aw aw, a sinnan a thupibik a thleng awlo mi a tanglai mi cu upa timi hi a hlo theilo. A tanglai hrih mi upa, sal vek hin a hnatuan ding cu kawhhran member pawl tisa ih an tul mi bom ding hi a si, lole a tuansak hai ding hi a si. Sinak dang profet pawl, dungthluntu pawl, thuthang tha simtu pawl lole pastor pawl vekih dan le dun tuahsak ciamco lawngte a tul hran lo. Ziangkim ah tuanthok tu, dinthok tu a si ding a sinnan pawl ih sinak hi cu a dang pawl vek silo in kawhhran mi pawl ih taksa lam poihai nak ih bawmtu ding leh an thansohnak ding lam a tawlrel tu a si, cucu tui ni tiangih an hnatuan thupi bik a si.

[20.11]

Bumawknak
Upa pawlih dinhmun hi uar ciamco theih a silo, lole duh ciamco theih khal a silo. Hi sinak hi hlawhtlinnak kha a dang tawhfung lole kawhhran diktak ihsin tlaksiatnak kha a tawhfung cu a si mai. Tulai kawhhran ih a ningzah thlak bik thil pakhat cu Setan hin kan sinnak pawl in laksak
thluh ih mai sinak hman theifiang aw thei tuk lo rau duadi mawlmang vekih in tuah thluhnak hi a si. Kan ruahnak kha thildang ngaihtuah dingin in herkual sak thluh. Tulai kawhhran hrekkhat ahcun upa hi kawhhran upa cei ih ceibawlnak tla kan hmu thei, a sinan kawhhran dang pawl va pehtlaihnak ahcun zianghman tuanvo khal pe cuang si loin, lam khihnak hmun ih mikhual hmuaktu pawl bangin leh mipi ih an hngahhlap zet mi cui lamkhihnak an can thok zawngih an
puanzar rak hlip saktu, can puangtu, tonak remsaktu pawl vek fangah an tuah thluh hai a si. Hitluk a mankhung mi upa pawlih dinhmun hi mak lo men ih kan can thluh leh thil poimawh tak kan zalen ter hi cu riahsiatnak ngaingai a siih hmuntin kan zoh sal a sile khuitawk hmun hmanah danglam nawn lo in lom leh upat an co ngah thei nawn lo a si.

[20.12]

A Thlengaw Rero Mi Leitlun
A thlengaw rero mi kan leitlun tikcu le can sung ahhin, Pathian in kan tul mi phuhhruksak dingah a sal cu a timtuah. Tulai ih kan kawhhran upa pawl hin teh hi hna hi an tuan hai maw? Kan upa mi paziat in ha unau dang pawlih taksa poimawhnak hrang a tuansak tu um? Hiti a si ruangah kawhhran tampi cun hi sinak dinhmun an bansan theu mei nak a si, mi harsa pawlih neihsun te kha an rorelnak sangbik assembly in an lonsak thluh theu ruangah a si.

Thufim 14:31
31. Mi farah pawl na hrem ahcun, mi farah pawl sersiamtu Pathian na nautat a si. A sinan farah pawl zangfahtu cu Pathian tihzah mi a si.

[20.13]

Hruaitu Upa (Deacon) Ih Cabu
Khrihfa hmuahhmuah hrangah an san sungih thupi bik cabu cu Bible, Pathian thu leh hihi upa pawl khalih kutkaih a si ngeingei ding a si. Thuron ka pek duh lai mi cu hi zalennak hi ka co duh ve a si ahcun upa pawl hin cabu a dangten nei hai seh, Pathian in a phunphun ih an hnatuannak a mal ter vivo nak pawl hminsin ih ngankhumnak dingah leh Pathian thlarau lam sungkua Amah betu pawl hi harsat ton pang olte a sizia theihfiangnak ding hrangah a si. Hi upa cabu cu ha tuahnak le harhdamnak lam kilhim awknak ih thilri pawl vek, cui cabu cu hnatuan zalennak lole thilman napi ih thumnak tivek pawl hrangih a hramthawhnak cabu a si. Cui upa cabu sung ahcun kawhhran thil leh ri pawl nganluh thluh ding a siih an bulpak thil cu telhcih ding a silo. Zo ha Khrihfa hnatuannak ahhin tha tei a tuantu ti pawl khal ngan thluh ding a si. Cutin ei in siseh sinfen siseh khuitawk ah an tul tile an tul tam maw mal lole tulpoi an nei lo, ti bang pawl hi ngan thluh ding a si. Pathian hin kan taksa hrampi in kan hmuh awk ton theinak ding hrangah kan lakah annih hi a rak ret hai, a sinan kan zate'n in funkhawm tu bik an si. Ei in ding hi voi hnihkhat cu kan member pawlin inn remcang an neih a si ahcun tam deuh lei khawl tla hi thil tha zet a siih, cutin amai hrang khalah a tha ih lole a thuamhnaw retnak tla ah a canglan thei a si. Curuangah kan member zaten mi zokhal hin mai neih mi ei tha khal siseh hi khawlkhawmnak hmun ahhin thil tuahnak hrangah a run keng thei a si.

[20.14]

Voi hnihkhat cu missionary bur lole Khrihfa kawhhran burpi hi veng tin ah hman theih in an u m. Zovek an si ti hi ka hliakhlai hmaisa dingih, khui in an ra ih ziangtin an cangvai ti kha theihfiang hmaisat a tul. Hnatuan petu pa hin a hnatuan pawl hi a rinsan ngeingei ding a si. Khrihfa mifel ai hin zo si mifel a um thei nawn ding? Kannih hi kawhhran mi kan si vekin kan ai awhtu dingah upa pawl kan tul ih hnatuan in petu thawi kan karlak ih lai in relsak tu dingah leh kan tul mi dang hnatuan khal ih a zamrang theibik ih in tawlrel saktu dingah le bawmtu dingah kan tulnak a si.

I Johan 3:17
17. Milian pakhat in a tlasam zet mi a unau a hmu na in a thinlung sangka a khar hloh san men a si ahcun Pathian ka duhdawt ti ah ziangtinso a ti thei ding?

[20.15]

Kawhhran member zaten hna hi tuan thluh ding a si; a si ko, a cang thei kan ti tikah nunau pawl le nauhak pawl lawng kha cu inn lamah an um ding. Nu pa pakhat lawng neitu pawl hin an fale pawl hi a upa te ten sumpai an tul can ih bawmtu dingah hna tuanter hai ding an siih, voi hnihkhat cu an fale pawl hi an ra tlun zawngah sumpai ih bom an tul can a um theu. Hitivek hi upa pawl hrangah can tha a siih nuhmei pahnih umkhawm pawl lole pahmei pahnih um pawl hnenah an sumpai hmansuahnak hi relkhawmnak neih pi ding a si. Pathian zahtu upa deuh
pawl cun an sumpai kha an ai ih nauta deuh pawl vehnak ah an hmang tla a si thei; Pathian mi nunau upa pawl khalin cuvek thotho in nunau nauhak deuh pawl kaihhruainak ah an sumpai an hmangsuak tla a si ve men ding. Hibang pawl hi a zaten upa pawl thawn theihter awk ton thluh ding a si. Nunau upa pawl lawng hin nunau pawl an harsat tikah nunau hnenah feh seh. Mipa upa lole upa dang pawl hin mipa pawl par lawngah tuan ve hai seh, cule thlemnak a ra lut lo ding. Nei aw zo pawl hi an buai tikah upa lole upa lakih rinsan tlak pawlin a tha theibik in va rem ton hai sehla cule an nupi pawlin thlun ve hai seh cutin remnak thu tha hawlin va tuah hai seh, cutin Pathian ih fimnak an ngah thei lehsal ding a si. Cuvek thotho in nu le pa zozo khalin harsatnak an neih a si ahcun nupa sinak ih a thiam le a thei zo pawl in, lole fale pawl thawi buainak rak tong dah zo pawl rak rem theitu upa pakhat khat kha hril ih va remsak ding a si. Kan lakih mi zokhal thinlung in maw taksa in simaw a cak lotu kan um a sile kan cahsal theinak dingin upa pawl hin a hramthok ten an cah sal theinak ding an hawlsak hrimhrim ding a si.

Matthai 25:34-45
34. Cule Siangpahrang cun a vorh lam ih, a um mi pawl hnenah 'Ra uh, ka Pa ih a thlawsuah mi pawl ra uh la leilung tuah tir ihsin nan hrangih remcia mi vancung uknak hi ra co uh.
35. Ziangahtile ka ril a rawn tikah rawl in pe; ka ti a hal tikah ti in pe; mikhual ka si laiah nan inn ah in tlun ter;
36. Hnipuan nei lo ka si tikah hnipuan in pek; ka nat laiah in tuamhlawm; thawng ka tlak laiah in veh; ti ah a ti ding.
37. Cule miding pawl cun, Bawipa ziangtikah so na ril a rawn kan lo hmuh ih rawl kan lo pek; na ti a hal kan lo hmuh ih tidai kan lo pek?
38. Ziangtikah so mikhual na si kan lo hmuh ih kan inn ih kan lo tlun ter; hnipuan nei lo ih hnipuan kan lo pek?
39. Ziangtikah so na nat le thawng na tlak kan lo hmuh ih kan lo veh? ti ah an ti ding.
40. Siangpahrang in, Thungai in ka lo sim: hi ka unau nautabik pakhat parih nan tuah mi cu ka parah nan tuah a si, a ti ding.
41. Cun a kehlam ih a um mi pawl hnen ahcun nannih Pathian ih siatserh mi pawl ka hnen in tlan hlo uh. Setan le a dungthlun pawl hrangih ngaihtuah mi a mit dah lo mi meisa sungah va feh uh.
42. Ziangahtile ka ril a rawng na in rawl in pe lo; ka ti a hal na in tidai in pe lo;
43. Mikhual ka si laiah nan inn ah in tlun ter lo; hnipuan nei lo ka si laiah hnipuan in pe lo; ka na ih thawng ka tlak laiah in tuamhlawm duh lo, ti ah a ti ding.
44. Cule annih in Bawipa ziangtikah so na ril a rawn, na ti a hal, mikhual na si, hnipuan nei lo in na um, na nat ih thawng na tlak kan lo hmuh ih kan lo bom duh lo? ti ah an ti ding.
45. Siangpahrang in Thungai in ka lo sim; mi nautabik pakhat nan bom duh lo kha keimah in bawm duh lo a si a ti ding.

[20.16]

Hmailam Hrang Teh Ziangtin?
Kawhhran upa pawl hi, Pathian thu ih a simdan vekin tuahnak thawn thlacamnak an neih tikah an insang ih tul mi thilri pawl kha zo in a rak pe hai ding? An nitin nunnak ding hrangih tulmi mamawh pawl kha zo in a rak ngaihven sak ding? Nuhmei lole nu pa nei lo nauhak pawl hi teh zohzun an tul tikah zo ih tuanvo ha a si? Kan kawhhran sungih mi harsa sungkaw hrangih ei in dingah teh mi zo in ha khopkham ko a tuahsak dahtu a um dah? Hnatuan nei pawl kha zo in hnatuan a hawlsak dahtu a um, lole mi na pawl lole mi hliam aw pawl hrangih an sivai hrang sumpai a suahtu um dah? Zo ha umhmun nei lo lole thawngtla pawl hnenih vehnak sumpai suah ih a thursuak tu um dah? Mi zo saw a kawhhran member umnak nei pawl umnak a ngaituah saktu lole umnak ngaihtuah pi phah ih Pathian thu a ruahtu um? Kan upa te pawl hin hi
hna hi an tuan thei nawn lo tikah, an nunnak hrang hi teh zo in a ngaihtuahsak tu ding? Nupinu note pawl hi an pasal in farual thawn an thihsan tikah teh a cang theitawk in zo in a bawm in a fale pawl hrang a ngaituah sak ding? Upa pawl hin nunau nauhak deuh pawl kha hmin thar tla an sak hai dingih amah le a sungte pawl ih tulhai mi pawl hrangah sumlut an neih theinak dingah hna an tuan dingih cutin an nu le pawl an cawm hai ding a si. Mahte a um mi nunau kha cu bom a tul rero dingih cule a lunglennak kha an inn ih an pawl awknak ruangah a nep deuh tla a si thei lole inkhan sungih a um mi amah vek nunau dang pawl hnenah tla'n a ruah dingih cutin an upa pawl thawn an lengkhawm ding a si. Upa pawlih tuah tawlrel mi zohawknak tlawng ah tlan, an hna ding ruahsak ih pawlkomnak le nunau upa pawl lakah hnatuan tla hawlsak ding an si. Mipa upa pawl hrang ahcun thilri kilhimnak hmun tivek ah hnatuan ruahsak theih an si lole kutthiam thil tuahnak hmun tivek pawl ah tuanter ding an si.

[20.17]

Upa pawl hin khawruahnak mal pawl hrang ahcun thil malte lawng an tuahsak thei. Kawhhran hin rawl khawlnak rukbeng neih ding a thawh a sile a pakhatnak ah kawhhran sungih mi harsa pawl thinlung ten thlingthla in ngaihtuah deuh ding a si. Kan sunzom vivo tikah mi farah le harsa pawl hrang hi kan tuahsak ding mi a si. Saam cabu sungah upa Khrih ih mizia relnak kan hmu thei.

Saam 23:1-24:1
1. Bawipa cu ka tukhal a si; sammi zianghman ka nei lo.
2. Tlimno lakah i bawh terih a thiang mi tidai kiangah i hruai.
3. Ka thazang a tlungter sal ih, i tiamcia vek in lamzin dingah i hruai.
4. Thimnak horkuam sung zawh hman ningla, maw Bawipa ka tih lo ding, ziangahtile nang cu ka hnenah na um. Na talhtum leh na kianghrol in ka hna i ngam ter.
5. Ka ral pawlih mithmuh ah ka hmai ah rawl i hun. Ka lu ah hriak na culh ih, ka khuathai cu na liam ter.
6. Ka nun sung hmuahhmuah ah thatnak le duhdawtnak cun pelh lo in i thlun ringring ding, Bawipai inn ah kumkhua in ka um ding.

Kan cinken ringring dingih tha upa pawl ih hnatuannak hi Khrih ih hnatuan dan cawnnak a si ih, cui hna cu "thu" ih rongbawlnak a si. Hiti a sile upa pawlih hnatuannak khal hi Thlarau Thianghlim ih hnatuannak cawnnak a siih cucun hnangamnak, tidamnak, zangfahnak le cawmdawlnak ti pawl kha Khrih ih kawhhran sungah a run kenglut a si. Dungthluntu pawl ih kawhhran, Thuthlung Thar kawhhran din kan tumsal a sile duhdawtnak hna a tuantu upa pawl an thupit zia kha kan hmu thei sal ih kan tuan ve ding mi a si.