THLARAU PHARNAK

Hminsin:  Cangantui dinhmun theifiang dingin, “ Casiartu Hnenah” timi hi siar hmaisa aw.

[21.1]

Thil Harsa
Kan Thuthlung Thar Bible ca hi ngan theh thluh a si tikah Khrihfa pawl unau bangih an rak umtlannak hi manglam vek a sinan a taktak mi a si. Hi Thlung Thar hi kan zoh tikah Pathian ih duhnak cu zumtu zatei’ rualremnak (I Kor. 1:10) a si zia kan hmu thei. Cun teh ziangtin a si, kawhhran hin kum thawnghnih lai tehton mi nei rero cingin a tlaksiat thotho. Ziangruangah a si pei kawhhran hin Pathian thu a donson duh nawn lo? A va mak thlang em, mi hmuahhmuah hin kan zate'n thilsual khal poi ti nawn lo in kan ngankhum hluahhlo thlang hi, tisa ih kan zuam paih lo mi tiangin poitinak a um nawn lo. Pawlkom awk ding hna kan parih a rung thlen tik can khalah, kan hotu pawl khalin thulolak men ah an can thluh thlang, minung hin mai duh zawngin thu an botcat thluh mei. Dan thu hmangin a falte ih um dingin mi an tawlrel ih a pawl thlarau zawngin kan Khrihfa sinak hi an hmang thluh ih, kan tawlrel awk dan ahhin Pathian thu zawngin hmuh ding kan um nawn lo, lole Khrih le dungthlun pawlih rak din mi vek khalin a si thei nawn lo, milai ih thluak fimnak lawng kan hmang thlang a si. Curuangah milai zuamnak le ruahsuak mi cu rintlak le sortlak a si nawn lo ih kan pawl hi tak nawn lo in a lem ah an cang thluh thlangnak a si. Hitivek kan hmannak ihsin pehzomnak, lungkim tlangnak, thurin relkhawmnak ti pawl hi cui kawhhran lemte pawl cun pumkhawmnak tla ah an runsuah pi hai. Ca hnah parih hmin ngan khennak hin kan rualrem aw hmang ding ti’n an ruat aw hai nan fiangfai lo thusuh awknak lawng a suahter men. Mi hrekkhat tla cu an kawm aw hai! Zo a dik lole a sual tiin kawmawknak tla an nei hai ih an ruahdan in an tuan theu hai. Sakhuanak lam zirh awknak tlawng tla an dinkhawm ih anmai ngaidan zawngin Pathian langnak thu an simfiang ih kan zoh a sile bible sirhsannak zianghman an nei lo a si.  

II Piter 1:20-21
20. Thildang hmuahhmuah hnakin hi mi hi cing tha uh – zokhal amah bulin Ca Thianghlim sungih profet thusim mi kha a fiangter theilo ding.
21. Ziangahtile profet ih thusim mi cu milai duhnak men ihsin a ra mi a si dah lo; Pathian hnenihsin a ra mi thuthang tha an phuan tikah Thlarau Thianghlim forhfialnak in an sim mi a si.

[21.2]

A Suahpi Mi
Hibang pawlih tumtahnak zuamnak cu an ruahnak vek silo in an tum lo zawngin a hlawh an suah. Kan zatei’ finkhawm ding hi an tumtah mi cu a si, a sinan finkhawmnak silo in darhdainak an hringsuak sawn. Aa takih pumkhat awknak ding an hawl laiah anmah te lawng an pumkhat aw thei ih, Pathian thaw cun an pumkhat aw thei ta lo. Rei tuk lemlo lai ih mi hlei hnih rak thi pawl ai khan hibang pawl hin hngal burbo in mi an kaihruai hai ih, Pathian thu rel fiangnak nei phah in an pawl dan a hngeh theinak ding a si ahcun bet tul an tinak ah Pathian hmin in leh thildang tla an belhcih mei hai a si. Anmai dan thupek mi tla an belhcih ih Pathian thu ih a kalh khal len poi an ti lo. (Matt. 15:9) Milai tuahcop mi dan kha, Pathian pek mi dan vekin an zirh ruangah..

[21.3]

Kan Zum Mi
Mi pakhat hi America ram, Mirang ram, Africa ram, lole Asia khawmual ih suak mi a si. Cule a mit pawl riairi lole dum kelki sihmansehla khui hmun ih a va suah khal a sile, ziangvek mitmeng mi va si khal sehla, a san sungih dam ding mi a si thotho. A suahnak hmun le ram ah hin thil malte maw zianghman tuah mi nei theilo khal sehla cu tawkah a um thotho. Cuvek in kannih khal zumnak lakih kan umtlan ve a si ahcun an zumnak kan tawmpi ve mei theu. R.C. insang ih kan piang ngah a si ahcun R.C. kan si ve mei. Cuvekin hi kan san sung ahhin Baptist ih kan luh a si ahcun Baptist kan si ve mei. Kan thlarau rokhawm mi khal hi cutivek ciah in a thleng aw dah lo mi ihsin kan ngah mi a si.  

[21.4]

Pathian thu hi kanmai diknak tarlangnak ding zawngih zir dingin in siang lo.  

II Timote 2:15
15. A hnatuan a zahpi lotu leh Pathian thudik thuthang tha cu dik zetih a simfiangtu si dingah Pathian lungkimnak ngah dingin zuam aw.

Kannih cun Catholic pawl ih dan thu fah awknak lole Baptist tidan pawl hmangin hihi Catholic pawl lole Baptist pawlih dan leh dun ti in zirh aw men ding kan silo. Hitivek ih thurin in ra zirh zik tikah mitsing cingin tel kan rak tum pang theu. Hitin kan ti theu, kei cu Baptist kan si ruangah, Baptist pawlih zum mi hmuahhmuah cu ka thlun ding tla kan ti theu. Baptist pawl hin thutak hmuahhmuah an nei thluh. Kan ruahnak hi Dungthluntu bung 17 sungih rel mi Berean pawl vek kan siih kan zirhtu saza pawl hi Bible ih tah kan hmang zet nan kanmai lam cu kan tah aw ngah dah theu lo. Hitivek ih kan ti a sile a rei hlanah kan kaihhruai awknak hin in ti phuhrung aw thluh mei dingih fehsual pawl bangin thu in ngaihtuah ter leh ding. Ziangtluk raltha in lole mi pakhat hin ziangha kan zum ve ding? Zumnak kan timi cu mi pakhat ih thutak a hawlnak ih a hmuhsuah mi a si. Himi pawl vek lawng hi ren tlak leh a dikfel mi a si. Thutak ih in kawh tikah a hlan ih kan rak zum mi pawl zum sal dingin dungah kan sip kir leh mei ding a si.

[21.5]

Mi tampi cun pawl thlarau nak cu an vei tuk nawn lo, a sinan mi hrekkhat pawl lawngin hi phurrit ihsin luatnak an hmu. Hi pawl thlarau nak ih luat in mahten kan um hmanah kawhhran pawl lo pawl thlarau nak hi Dungthluntu pawl ih kawhhran ah, kawhhran hmaisa ah khan a rak lut leh ih kannih karlak tiangah Paul lole Piter ti in an thurin pawl thu ah kan el ton aw rero ih, cutin hlan lai ih mi rinum le upat tlak zirhtu pawl ih thu rosiah thlarau hi kan vei lai ringring thotho a si.  

[21.6]

Lu Le Lu Thin Le Thin
Khrihfa mi pahnih pawl bangaw lo mi veve kha a voikhat nak an tonawk tikah, rannung sualaw ding eng aw keke vek an si. Sakuh pahnih khi an rualrem aw thei ding ti ah na ruat dah maw? Buaithlak tak ti aw. Hi te pahnih hin an buanaw ih a dangdang ih an tlan tum laifang ah ka zuk ngah ngelcel dah. Kannih Khrihfa pawl khal hi kan hmuh awk hmaisa biknak ahcun hitivek kan si ve ko. Pakhat le pakhat an hro aw kukko ih naih aw ih tuahmawh aw lok ngam lo dingin an hro aw ciamco hai. An duhnak le tumtahnak hmun ah tluang tei tlansan awk veve an beisei – an duhnak lamzin ih feh ding an hngakhlap nasa. Midang ih thurin rak hrial mei ding hi thil harsa tak cu a si. Sakuh pahnih hin siatsuah aw lo te le himdam te ih um an duh veve ahcun an lu lam veve tongaw terin an hmaiton awk lawngah thilcang thei mi a si. Kannih Khrihfa mi pawl khal hi cuvek thotho in kan tuah awk a tul. Sakuh pawl vekin kan ton awk pekte ahcun nel awk theinak dingah rinum takin kan um ih, a cang theitawk ih zuamtlang ih tan lak tlang ding cu kan saduhthah a si theu. Kan lu veve kan ton awk ih kan duhthusam fiangtei kan sim awk hlan ahcun kan pehzom awknak khal hi a cak tawk thei ngaingai lo. Cuvekin kannih Khrihfa pawl khal hin kan thinlung hi Khrih ih in luahsak lo ahcun hnuai kan dor ngaingai theilo ih kan rualpi hmai khalah hnuai kan dor thei ce lo, Johan 17:21 vek hi cun thlacamnak khalah kan telh taktak theilo a si bik hi.

Johan 17:21
21. An zaten pakhat an si theinak dingah thla ka cam a si. Ka Pa, nangmah cu ka sungah na um ih kei khal na sungah ka um vekin annih khal kan sungah um ve hram hai seh. Nangmah in i thlah ih leilung in an zum theinak dingah annih cu pumkhat ah cang hram hai seuh.

[21.7]

Ziangtinso kannih teh hmunkhat; thinlung khat kan put hlan ahcun pumkhat kan si thei ve cuang ding?

Filipi 2:1-8
1. Khrih thawn nan pehzom awknak ruangah nan nunnak a hnget cuang ih a duhdawtnak in nan hna a lo ngamter. Thlarau thawn pawlkomnak nan nei ih pakhat le pakhat parah zangfah lainatnak nan nei a silo maw?
2. Cuti a sile hitin ka lo forh duh; nan ruahnak hmunkhat seh, duhdawtnak khal ah pakhat le pakhat duhdawt ton aw uh, nan thinlung le nan tum mi khal bangrep aw sehla cuti cun lungawinak ka neih mi hi nan kimter ding.
3. Mi nahsuahnak nei in mai zawn lawng ruat ih, hmin thatnak lawng in zianghman tuah hlah uh. Pakhat le pa khat tangdor tonnak nei uhla midang hnakin ka tha deuh ti ah ruat aw hlah uh.
4. Nanmah duhnak lawng silo in midang in an hrangah a thupi bikih an ruah mi kha a hmuhzia thiam ve uh.
5. Nan thinlung putdan cu Khrih Jesuh ih thinlung putdan vekin siseh.
6. Khrih cu Pathian sinak a nei ringring, a sinan Pathian bang dingah hramhram in a tum dah lo.
7. Cu aiah amai lungtho te in, a sinak hmuahhmuah a tlansan ih hnenum vekin a um. Minung ah a cangih minung pianzia in a piang.
8. Tangdornak thinlung a neiih Pathian thu thlun in, thinglamtah thihnak tiangin a tuar.

[21.8]

Thlarau Pharnak
Curuangah kannih Khrihfa pawl hi midang pawl thawn Jesuh hmin in kan zomkhawm aw ih, midang pawl khalin kanmah bangin nasa ten hna an tuan ve cio hai a si. Kan ton awk tikah lung a awi ih pumkhat awknak thinlung in neih ter. Cutheh hnuah bulpak cio ih umtu ziaza kan thlingthla aw ih thurin lamih kan bangawk lonak pawl tla kan phorhsuak aw. Cutikah kan pom mi thurin hi thlakthleng kher kan tum lai thotho ding maw? Hihi thil tul lo mi a si! Hmakhatte ah, hnaihnoknak hruang sung ihsin kan suakih pharnat a veitu thawn kan pehzom aw ngah theu, hihi thlarau pharnatnak kan timi cu a si. Cutikah an thurin thlun dingah hmakhatte ah kan thleng awk hngalh a tul. Cule kan thu kha hi pharnat veitu pawl thawn hmunkhatte ah kan rel tlang. Kan mithmai hi a tha thei bikin kan um aw terih kan mizia khal kha thup tahrat in kan ziaza hlun kan somso vivo ih, pakhat le pakhat thuphan kan per ciamco ih, hi ti in “Nikhat nini ah  ton sal ding ka hngakhlap e” ti in, kan mitkil ih mitthli tla hnul hul kan tumih kan sansung ih in hnaihnoktu pawl ihsin luatnak hawlin kan zuam theu.  

[21.9]

Mi pakhat hi thlarau lam ih pharnat neitu pa thawn an feh thei, hi pa bomnak ding ahcun tidan tlangpi silo in danglam deuh in na va tong thei. Nangmah kha thutak kengkawh tu na si ahcun ziangkhal a sile mangbang thlak zetin cui mina pa cun thutak pomnak lole a lo tlansan ding. Zokhal cabuai parih ret a duh lo ahcun midang zumnak le a zumnak a buk ton tikah leh Pathian phuan awknak thawi buk ton a si tikah a zumnak kha a khuaidarh sak thluh ding ti hi a pomrem thei a tul a si. A hlun tuk mi thil hi cu thlarau pharnatnak thawn a bang aw ih, uanthuannak hi a ti luarkai duh. Cui uanthuannak cun in cok-harh sal ih kan zaten kan vei thluh thlang a si. Hi uanthuannak cun uang aw takin midang unau pawl ih thuhla pawl kha ngai duh nawn lo dingin in siang lo. Hi uanthuannak hin thu in then ter ih kan pawlkomnak in thiat sak, cutin a thanglian vivo ziangruangah tile an thu ngai nawn lo dingih in dilnak ruangah a si.

[21.10]

Thurin Hi A Borhhlawh Maw?
Tulai san ah thurin timi tongfang hi borhhlawh ih mi ih an ruahnak cu unau lakih mi thenthektu vek ih an ruah ruangah a si. Hi thurin ruangah maw kan then awk lole thentheknak hi amahte ra suak hrimhrim ha? Thentheknak hi kanmai uanthuannak ruangah a si sawn lo maw ziangahtile kan thulun duh lonak lole tu ih kan rinmi thu hi cekfel aw tahrat in a sang sawn le tha sawn ih kan ruah mi thlun kan tumnak lole thutak ruang sawn ah a si? Tui kan thurin dinpi ding hin malte tal kan ngam hlenghleng lo maw si?

[21.11]

Thurin kan timi hin zirhnak ti hi a sawh duh mi cu a si; hi hi tong kha maw a si? A hnuailam ih Bible catlang pawl hi zohfel sal awla ruat tha sal aw;
Dung. 2:42, Rom 6:17,Rom 16:17, I Tim. 1:3, 7-10, I Tim. 4:6,16, I Tim. 6:3-5, II Tim. 3:16, II Tim. 4:2-3, Tit. 1:9, Tit. 2:1.

[21.12]

Hi thurin hi thenawknak maw remawknak a si? Mi pakhat ih cangvaihnak zirhnak lole thu el awknak men kha a silo maw? Pathian in a kawhhran hrangih a ret mi thu a si  zia hi ruattha sal aw.

I Johan 3:14
14. Kannih cu thihnak kan suahsan zo ih nunnak sungah kan lut zo, ti kan thei; cuti kan theihnak cu kan unau kan duhdawt ruangah a si. Duhdawtnak a nei lo mi cu thihnak sungah a tang lai hrih a si.

Tumtahnak hi neih mei theih thil a si maw? Pathian ahcun ziangkim hi ol-ai te hlir an si. Thil ziangkim hi Pathian ah an si maw? An si a sile ziangruangah kannih hmuah kan rualrem awk thei lo? Efesa cakuat 4:1-6 leh Kolose cakuat 3:12-17 ih tuantlang thei dingih in forhfialnak, “Thlarau in a lo pek mi pumkhat si khawmnak kha daihnak in hmun ter uh” timi hi kan ti theilo ding maw?

Efesa  4:1-6
1. Bawipai hnatuan ruangah thawng a tla mi keimah in; Pathian kawh mi nan si bangtukin nan nunnak ah Pathian kawh mi nan sinak kha langter uh, ti ah ka lo forh.
2. Thinlung nemnak nei uh; tangdor le thinsau in um uh. Duhdawtnak nan neih mi kha pakhat le pakhat theih awknak in langter uh.  
3. Thlarau in a lo pek mi pumkhat si khawmnak kha tunghmun dingah hmuhkhat ih a lo tem khawmtu daihnak in hmun ter uh.
4. Pathian in a lo kawh tikah a lo san mi ruahsannak cu pakhat a si vekin pum pakhat a um ih Thlarau khal pakhat a um.
5. Bawi pakhat a um, zumnak pakhat a um, baptisma pakhat a um.
6. Pathian pakhat a um ih mi hmuahhmuah ih pa a si. Amah cu ziang hmuahhmuah ih tlunah Bawi a si; ziang hmuahhmuah sungin hna a tuan ih ziang hmuahhmuah sungah a um.  

Kolose 3:12-17
12. Nannih cu Pathian ih minung nan si. A lo duhdawt hai ih amai hrangah a lo hril mi nan si. Curuangah zawnruahnak, zangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh.
13. Pakhat le pakhat karlak ah thinlung hmuh awk lonak le phunzainak a um ahcun pakhat le pakhat zawi awk theinak le ngaidamnak nei uh. Bawipa in a lo ngaidam vekin nannih tla pakhat le pakhat ngaidam aw uh.
14. Cule hi bangtuk ziaza tha nan neih mi tlunah duhdawtnak bet uh; ziangahtile duhdawtnak cu ziang tinkim famkim zetin a fimkhawmtu le a rem tertu a si.
15. Khrih in a lo pek mi daihnak cu thu nan ruah nan relcatnak kipah a lo hotu ah tuah uh; ziangahtile hi daihnak sungih um dingah Pathian in taksa ruang pakhat sungah a lo kawh mi nan si. Curuangah lungawi in um uh.
16. Khrih Thuthang Tha cu nan sungah a tlamtlinnak phun zakip thawn cam ringring seh. Fimnak phun zakip thawn pakhat le pakhat zirh aw in nun sim aw uh. Ap awknak hla, thangthatnak hla leh hla thiang pawl sak uh. Nan lungawinak hla in Pathian kha thangthat uh.
17. Kan Pa Pathian cu Khrih thawngin nan thangthat ruangah, ziang hmuahhmuah nan tuah ah siseh, nan sim ah siseh, Bawipa Jesuh hmin in tuah uhla sim uh.    

[21.13]

Ziangruangah ha kan finkhawm awk thei nawn lo? Hlan ih kan hruaitu pawl hin thil ziang hi ha an rak thlakthleng? Tu ah kannih in teh ziang kan tuah ve ding? Ziangtuah kan tum hrih? Tulai dinhmun thlakthleng dingin teh Pathian in ziangvek langnak ha in hmuh ter?

[21.14]

Natnak Relsual
San khat hnu san khat in Bible thurin hi thlarau lam miphar pawl in an soisel ringring. “Thurin” timi tongkam hi Pathian ih minung pawl lakah upatnak khal a um thei nawn lo. A san tha zet mi tongkam hi thu el awknak le thenthek awknak ah a rung cang riangri. Curuangah sinak cuh awknak kawhhran sungah Setan in tikcu can tha la tahrat in hi natnak relsuahnak hi an pompi cio hai. Hiti cing cun ziangtinso Pathian ih thutak cu kan hmuh thei ding; ziangtinso pumkhat si ding cun kan zom awk thei nawn ding; ziangtinso Pathian duhzawng I Korin 1:10 sungih a sim mi hi kan kimter thei ding kan thinlung le tuahrem aw duh silo in?

[21.15]

Pakhat le pakhat thurel khawmnak kan neih tlang lo ruangah  hmunkhat ah kan um tlang thei cuang lo, Thlarau lam Pharnat nak khal a tidam thei dah lo; thil ziang simaw hi kan hrial ngah a si ahcun khua le can a rei tikah mi a ti tekdarh thluh. Kan zomkhawmnak neih malnak hin kan lungrualnak a ti sia ih hi natnak relsualnak hin tuamhlawm awknak dingah mi a ti thukthun. Thlarau Pharnat ih bulhram pi cu thurin silo in uanthuannak sawn a si. Cui uanthuan awknak cun miphun pawl hi van ah sinak mi a thensak ih cuvek thotho in tulai can khalah hi leitlun ih Pathian minung pawl khal in cui sinak duhnak cun mi a thenthek thluh thlang a si.

Isaiah 14:12-15
12. Maw Balylon siangpahrang deirel arsi, nang cu van ihsin na tla zo! Tuhlan ahcun ram tampi na neh, a tu ahcun leilung ah vuakthlak na si!
13. Van ah kai na tum ih a sangbik arsi tlunah na tohkham ret na tum. Khuavang pawl an tonkhawmnak saklam tlangpar ah siangpahrang bangtuk ih to ding na rak ruat.
14. Khawdur thlun ah ka kai dingih cungnung bangtuk ka si ding, na ti.
15. A sinan a thuknak bik hmuh mithi khua ah dirhtlak na si zo.

Ezekiel 28:14-17
14. Tihnung za vancung mi cu nangmah kil dingah ka ret. Ka tlang thianghlim ah na um ih a tleu zuahzo mi lung mankhung lakah na feh.
15. Semsuah na si ni in thil thalo ruah na thawh ni tiang na nuncan cu soisel ding zianghman a um lo.
16. Thil na lei na zuarih na buai ih cin le dan nei lo in sualnak ah na thleng a si. Curuangah ka tlang thianghlim in ka lo dawi ih a lo kiltu vancung mi in a lo dawi hlo a si.
17. Mi piang na si ruangah na hngal ih na hminthan nak in mi aa hnatuan a lo tuanter. Curuangah leilung ah ka lo hlon ih siangpahrang dangdang ih ralrinnak dingah ka lo tlansan.

[21.16]

Thlarau Mina Zohnak Khan
Tisa natnak hi ziangvek khal sisehla thlacamnak, sivai, ah-awknak lole an zate hin tuamhlawm lo ti a um dah lo. An zate ih tuamhlawm awk ding tikah ap awknak an tul thluh. Thlacamnak khal hin tikcu le thinlung tak ih cam a tul, sivai ei tik khalah voi hnihkhat cu a harsa ih cun a ah ih at awknak khal hi a hma damsal nak ding hrangah tikcu rei zet hngah a tul thotho.

[21.17]

An zate ih tul cio mi cu sumkephah (tangka hram ret) an tul thluh, hihi lungrualnak thawn a bang aw. Kannih Khrihfa cun a hmaisabik ah thurin relkhawmnak kan nei hmaisa dingih mina pawl sivai ih kilkhawi dan bangin a pakhat nak ah thlarau pum ahnak kan nei hmaisa ding a si. Mi pakhat ciar ih thinlung rak dokalh tu an thinnatnak a dam thluh theinak dingin kan ah sak hmaisa ding a si. Mi pakhat ciar ih thlarau natnak kan tuamhlawm hlanah kan pawlkomnak hi kan ticak hmaisa dingih cule then awknak dawm tha hi a tha thei nawn lo ding a si. Mi pakhat ih a rak vei mi khensa natnak ih thi ding mi kan tidam sak thei ahcun ziangtluk ih thil tha ha a si ding? Pawlkomnak fek hi duhdawtnak leh pakhat le pakhat rinsan awknak thawi kan din thei hlan kulhsung ahcun zianghman kan danglam thei dah lo ding a si.     

[21.18]

Neihawknak Hlawhtling Lo
Khrihfa mi pahnih hin hi thutak an hawlnak ah, an silbai awknak ding hi a rak umcia ringring a si. Ah awknak hi a na ih khensa natnak khal a rehsal thei nan, an thitnak a that lo pang a si ahcun thisen tampi a suak leh theu. Cuvek khensa natnak thawi a bangaw mi thurin sual in thenthek tu thawn din hi ziangso a thathnemnak a um, kan unau pawl hman tlansan seksek ih cabuai ih kan to thumthi nak hi. Khensa natnak cu a dam ding ti a fiangfai ko; mi khal a siatsuah nawn lo, a sinan a hma thitnak khan thli a lut sal thei theu ih thihnak tiang ah kan hman phah theu a si. Voikhat lai cu kan thenthek awknak mitkharh kan hlit vukvi theu, kan ruahthat sal lohli ding mi cu kan pehzom awknak thu hi a si. Kan thu elawknak hlun hin in siatsuah sal leh thei. Pehzom awknak hi a siatsal hlanah tikcu tampi’n la ringring aw. Kan thurin dan awknak pawl hi fekte ih kan kaihhngeh thei a si ahcun pakhat le pakhat kan neih aw thei sal dingih kan hlat aw nawn lo ding a si. Hiti in tong theu aw, voi hnihkhat cu ka ruahnak thar leh ka theihnak thar ka lo ruah ding, ti in daihnak na ngah zo mi kha lonsal na si lonak dingah felten can tha lak dan thiam aw. Voi hnihkhat cu thuruahnak in le thlacamnak hi lungrualnak na tuah hlanah tuah theu aw. Na rualpi pawl ih zutmet ban dingah to awla, a sinan a forh lawngte a hranhram cun forhfial hai aw hlah lole hi na can tha lak mi te hi relsiat awknak ah a cang sawn pang ding.

[21.19]

Mi Dik Lole Thutak Hawl
Thlarau lam langsarnak ahhin Khrihfa pawl hi phun hnih in kan hmu thei. A pakhatnak pawl hi kan dik ter hnik ding. An unau pawl hnen ih a sim leh ding mi thu hi nasa takin an ruatcia theu. An thawhdan ihsin an thinlung sungten an ruahcia mi cu midang hi an sual ih anmah cu dikcia in an ngai aw aw. Mi hnen ihsin thu thar kan zir ding timi thinlung hi an nei dah lo, ziangahtile anmai ziangkim an tuahnak ruangah a si. Mi thusim mi hi ziangah an siar lo ih an unau pawl ih ngen mi hrang khalah can tha an hawlsak dah lo. An tuahsak pang a si khal le cui unau pawl hnen ihsin thil ngah ding beiseinak in an khat.

[21.20]

A pahnihnak Khrihfa pawl cu mai thurin khal kaihnget lemlo tu pawl, ziangvek kawhhran pawl khal dodal lo, a kilkhawinak lam khal ih hngalhngawnnak neilo mi pawl an si; thutak lawng ngaina mi an si. Thifahnukcat ih thurin kaitu khal an silo, a sinan Pathian thu lam ahcun thlarau tleunak lamzin ih tluksan ding cu an ralring cia. An duhbik mi cu Bible zirhtu saza tha bik si ding a siih a cangthei tawk ih thutak khawlkhawm ding hi a si. Midang pawl hnen in theihnak ngah ding an remti ringring ih thutak cawhpolhnak pawlkom hi an duh lo an hnong hngalh. Hi pawl nundan hi Berean pawl Bible thutak hawl ih zirsuak duhtu pawl an si.

[21.21]

Naaman san lai ihsin Jesuh leh a dungthluntu pawl san khal ih kan hmuh thei ringring mi cu milai hrangih nat siava a si mi pharnat hi a si. Hi natnak hin insang mi a then aw ter ih, sungkhat awknak khal mi a siatsuah thluh, hi natnak ruangah hnon awknak, huphurh awknak le hmuhsakhi awknak tiang mi a thlen ih cucun taksa sungah hram a thla ih thihnak hnai a khuar. Hi natnak hi kan thih in a cem ve fangih, voi hnihkhat tla cu cui thihnak ruangah mi a ti harsa ih mi a ti farah theu. Thlarau pharnatnak kan timi khal hi taksa natnak khal va si sehla zoh awknak thlalang tluk a si. Cutivek thotho in sungkhat awknak a tisia ih kan thinlung khal a ti molhmeh ih zohmawi lo Khrihfa ah mi a tuah thluh a si. Hiti a si ruangah kan taksa peng pakhat kan sun bangin kan unau khal kan can phah aw theu ih an tlulan ta theu, hiti an si cing hin Khrih ih taksa peng an si lai thotho. Thurin hi thlarau pharnatnak ih bulhram a si lo. Thlarau pharnatnak ih bulhrampi sawn cu kanmai hrinsuah mi “kanmah”  ti leh “annih” ti mi thinlung ih thenhran awknak hi a si. Cucu a uangthuang ih, thiam a coh aw fawn, mi a hmu tlaklo ih a uang aw. Kawhhran hin thlarau pharnatnak hi a vei ih a tuamhlawm lo a si ahcun hi natsia hi a rak um dah lo tinak a si. Hiti a si ko! Cutikah Pathian in hi thlarau pharnatnak tuamhlawm dingin a run theihter. Kan lakah a rung langsuak ih a sal le pawl hi hmuntin le ramtin leitlun khua zakip ah a thlahsuak hai a si.

[21.22]

Bawipai kawhhran hi a tlaitluan in famkim takih rem awk ringring a tul maw? Kannih teh nikhat nini ah hi natsia hin kan dam thei leh kei maw? Tulai san ahcun kei cun ka tih nawn lo! Mi tampi in an thei ding, hrekkhat in an thlun ding, a dang pawl in a hlan bangin pakhat le pakhat an rem aw lo ding cule thim lakih feh cu an el hai ding. A tuamhlawmnak ding hrangah a ngan ih ngansuahnak lawng hi a tawk hrih lo; a zaten kan tuah thluh dingih a lak tiangin kan la ding a si. Naaman khan a dam lo lai ih a tidan kha cing ringring aw (I Siang. 5:1-5). Anih khal simnak cu a thei ngah ko nan a cangvaih tum dan a sualih curuangah a siatsuah aw thluh dengdeng. A salnu te ih a forhfialnak kha a damnak ah a cang. Kan zate hrangih ka beisei mi cu Pathian ih sal aw hi ngaisak ding hi a si, Pathian ih sim mi thlunnak leh thlarau pharnatnak a si mi tu ih Khrih taksa thlektu ti damnak hi a si. Culo a sile kan daithlang vivo dingih sakuh bangin hmunkhat ih um tho si in kan tuah duhmi tuah thei cuang silo in kan um pang ding.

[21.23]

Thil Pakhat
Thil pakhatte kan tuah lo ding mi cu kan rak tuahsual zo mi tuah sal nawn lo ding hi a si. Kannih in kanmai san ahhin kan tuah dingih neta ih thlarau pa rung si ding pawl kha kanmai ruangah ziangtlukin an rung tluse leh ding. Thurin felfai kengkawh ih zirhtu tha si dingin in rak zirh ti ah an run ti leh ding lole kan pawlih pom mi tlawng pawl ah mankhung takin in rak zirter a si si an run ti leh ding. An zate in zo in tile ziang in thlarau lamah in rak zirh ti in tu le tu kan thurin kha an run phorh ringring leh ding. An rak sual a si, in kaihhruainak hin Khrih ih taksa an hliam ih an rak siatsuah a si hi an run ti leh ding. Curuangah kannih cun thilsual hi tuah nawn hlah uhsi. Tui can hi Khrih ih taksa pawl zomkhawm awk tikcu cu a si. Kannih cu thu kan zirnak in kan zumnak kha pawl thlaraunak uanthuan zetnak um khal seh a thleng awk kan tum ding a si. Tik le cu hi an rung tawi vivo ih Khrih ih ratsalnak ding can khal a nai cuahco; tu ih kan man lo ah teh, ziantik ah a si ding?    

[21.24]

Cabuai le Tiril
Kan tuah tengteng ding thil pakhat leh cu cabuai parah thil ziangkim hi kan ret ding a si. Ziangvek thurin khal siseh, ziangvek can khal siseh, bible thu mi in an theih ih an rinhmai mi hmuahhmuah zalen takih lehnak bangih tuahkhawm ding a si. Kan bible pomdan hi mi zapi ih theih ding in kan phuangsuak tengteng dingih, thinlung diktak kan pu ding a si. Kan cangvaih ih kan tuah duh mi kan tuah zik tikah thuthennak fel kan rak nei cia ding a si. Kan unau pawl ih sualnak kan hawl hrih ding maw? Nehtu si ding teh kan tum hrih lai ding maw, lole thutak teh hi tlaitluang takin kan zawm duh mei maw? Curuangah thil ziangkim hi cabuai ih thawh ding a siih kan thurin zaten, thil zingkim hi cawhpolh loten a ti reh kan zuam ding a si. Tui ni ahhin ziang thubuainak ha kan ti daih theilo mi a um? Hivek a um pang a sile tiril ah thaizing hrangah kan ret ta lawk dingih a can a kim tikah kan tharthawh leh ding a si. Kan cabuai le tiril pawl hi an thianfai lai hlan lo cu kan thian rero ding a si. Mi zovek khal tluangtlam te ih a tuldan vekin thlarau lamah thanso a duh ahcun hihi tuah tul mi ngeingei thil thupi a siih thu el awknak tuahnak vek thaw cun khuimawkhua in a hlawk dan a tan aw, tuahrem awknak khalah a tha sawn a si. Mi zokhal a thansohnak ding hrangah nun simnak a ngaina tu cu fimnak le theihnak a co ngahtu a si. Tui sun ih an rem awk hnu nun hi mizan sun ai in an tha sawn. Zokhal midik cun (diktak ih a tuahtu) hnuaidor ten thlacamnak le midang pawl hnen ihsin a tul tikcu te ah theihternak kha a zumnak in ngah ding a beisei ringring fawn. Hitivek pawl siatsuahnak ding thil umsun cu uanthuannak, mahte thiamcoh awknak leh thinlung hahnak (Lungruhnak) ti pawl hi an si.   

[21.25]

Thin Hnangam Daihnak Thawn
Efesa cakuat 4:1-6 sungah Paul in a unau Efesa khua pawl hnenah khan kawh an sinak ah feh ve tlak an si zia thu a sim. Cule hitawk ah tlingtlak timi tongkam tla simfiangnak a nei. Tlingtlaknak timi a simfiangnak cu “thinlung ih ngaitlawm awknak le hnuaidornak, tuar theinak (thinsaunak), pa khat le pakhat duhdawtnak neih tlang, Thlarau ah rualrem daihnak ih tawntem awk zuamnak” ti pawl hi an si. Thildang hmuahhmuah ai in, sualtuahnak ih telve nak, rualrannak hrang ih can remcan hawlnak (zoh rem nun) ti pawl hi Pathian ih kawhnak hrangah a tlingtlak lo mi pawl an si. Khrihfa pawl hi midang thawi thurin rel tlangnak nei tahrat in mah le mah dungtolh hi kan um zo, cumi pawl cu Pathian ih insang then silo in lole an thupom mi ih cangkang hrih lotu pawl lole thurin dik midang pe tahrat in voiziat ha kan vahtoih hrih ding? Voiziat meng ha midang ih simmi ah kannih cu pehtlaih awknak kan nei lo zianghman kan ti ve a tul lo timi tongkam ih in lemnak aw hin in fial ringring hrih ding? Thu elawknak ih nehtu siih unau farnu pawl sunthluh hi teh ziangha a thathnem nak um? Midang pawl thawi thurel ih kan to hlanah kanmah ten Bible thu in thusuh awknak thupi pawl kha thukpin kan nei aw ta hmaisa ding a si.    

[21.26]

Tu ih kan nuncan parah hin midang leh ka unau pawl tiangin ziang titluk in in rinsan ih in uar hai? Kan pahnih hin thutak kan hawl veve nak ahhin teh thleidan nak kan nei lai hrih maw? Kan pahnih veve hin teh thutak thu kan theih tam sinsin nak dingah a tu in kan sinak dinhmun hi teh kan tan in kan suahsan vulvo ngam cio maw?

[21.27]

Khrih ih taksa, Pathian ta pawl hin lungrualnak neih ziangtluk in a tul ti thu kha Korin cakuat pakhatnak bungkhat le bung hlei hnihnak, Efesa cakuat bung li, leh Filipi cakuat bung hnihnak pawl ah fiangfai ten hmakhatte ah in simnak kan hmu thei. Kan lungrualnak kha thurin ih kan siatsuah a sile Pathian a lungawi kem? Cu cun Khrih ih taksa a ticak thei maw si? A tlun ih kan sim mi veve hin ziangvek dinhmun a si hmanah Khrih ih kan unau lole farnu pawl thawi reltlangnak kan nei ngeingei ding a si. Thudik ih kan ruah mi hi Khrihfa dik tak kan unau lole farnu pawl kha relkhawm nak kan neih pi ngeingei dingih, a cang theitawk in kan thiamnak hmangih kan sim aw hai ding, cutin a tawpnak kan tuahpi theu ding a si. Kan unau pawl hi kan rinsan in kan cohlang hngalh ding a si.

[21.28]

Cabuai Thu Ah Kirsal In
Jesuh in a dungthluntu pawl thawn zanriah kilkhawm dingin cabuai ih an um lai ah, sang a la ih a phel hnu ah, “hihi ka taksa, nan hrangih kan khuai ding mi a si” ti ah a ti. Cui sang a phelnak cun a lei taksa a hmuhsak ih minung pawl sualnak hrangih Thinglamtah parih a pek ding thu a simduh mi a si. A thlarau taksa lawngte cu kawhhran hi a si. Voikhat ten, kannih a dung run thluntu pawl khal hi a cabuai ih a kawhkir mi pawl kan si, a sinan tui can hi tidam awknak  can tha leh Thlarau Thianghlim ah duhdawtnak le hnangam daihnak ih zomawknak can cu a si.

[21.29]

Kannih cu zirh theih mi thinlung kan nei ngeingei dingih, cucu hnuaidornak le thinsau tak ih thungai theinak, “Thlarau ah daihnak hri khat kaitlangin lungrualnak hi zuam uhsi” ti in. Thlarau ih tuai tharnak co kan duh a sile cabuai ah kan feh ngeingei a tul thlang a si.

Sam 34:18
18. Bawipa in thinnau mi pawl cu a naih ih, beiseinak zianghman a neilo tu pawl cu a run hai a si.

Sam 51:17
17. Maw Pathian ka lo pek mi thawinak cu a kuai mi thinlung a si. A kuai mi le sualsir mi thinlung cu na hnong lo ding.  

Isaiah 57:15
15. Keimah cu kumkhua ih a nungmi Pathian, a sang mi le a thianghlim mi Pathian ka si. A sang le a thianghlim mi hmun ah ka um; a sinan rinsannak le beiseinak na neihsal nak dingah thinlung kuai mi le thinlung nem mi hnen khalah ka um a si.

[21.30]

Kan zaten thla kan cam tlang cio dingih a tlun ih bible cang hin kan thutak ngaihtuahnak cabuai cu a langfiang ter ding, unau khatnak ih kan komawknak cabuai kan theihnak kha lungrual te’i pakhat le pakhat kan thutak hawlnak kan langter ringring nak dingah a si.    

Pathian thutak cun zawi zuamnak hman a tih dah lo!