CABUAI LEH TÎRÎL

Hminsin:  Cangantui dinhmun theifiang dingin, “ Casiartu Hnenah” timi hi siar hmaisa aw.

[22.1]

Tuah Ding Mi Pali
Pathian, vancungih kan Pa cun a Fapa neihsun kha tuan theh dingah hnapi phun li a rak pek. Cubang pawl tla cu (1) Danthu ti famkim, (2) leiltlun ih rundamnak run thlen, (3) A Pai sinak phuansuah ding le a netabik ah (4) A kawhhran rung dinthok ding ti pawl hi an si. Tui tum ahcun a palinak thu fakselnak lam uar deuh in kan zoh hrih ding.

[22.2]

Kawhhran
Khrih kha thlarau inn ih a kilban ah a rungcang ih a hram run tohtu pawl cu a dungthluntu pawl an si. Amai hram a toh mi pakhatte lo kha cu zohman in hram dang an toh theilo a si. Hi hram par lawng ahhin Pathian in a kawhhran a din thei ding a si. A tlunlam ih hman ding mi thilri pawl khal a nung mi lungto kha khatlam khatlam ah an um veve, neih aw ten an um ih Hell ram sangka in a neh thei nawn lo ding a si.

I Korin 3:11-12
11. Ziangahtile Pathian in Jesuh Khrih cu inhram thupi bik dingah a ret zo ih inhram dang phun bet a tul lo.
12. Cuih inhram phun mi parih sak dingah mi hrekkhat in sui a si lole ngun a si lole lungman khung an hmangih midang in zanthing maw, hrampi maw, a si lole fangcang kung pawl maw an hmang.
13. Cun an hnatuan mi fingfing kha ziangbangtuk an si ti cu Khrih Ni ah a lang leh ding. Ziangahtile cui Ni ah an hnatuan mi cu meisa in a langter ding; ziangbangtuk hnatuan so a si ti kha meisa in a hniksak dingih a fianter ding.

Efesa 2:20
20. Nannih khal dungthluntu leh profet pawlin a hram an phunsuak mi parih sak mi inn nan si ve zo ih a kil ih lungphun cu amah Khrih Jesuh a si.

I Piter 2:5
5. Nanmah khal ra uh la a nung mi lungto bangtuk in thlarau biakinn saknak hrangih Pathian ih hman mi lungto si uh. Cutawk ah puithiam hnatuan thianghlim nan tuan dingih cohlan tlak mi thlarau raithawinak kha Jesuh thawngin Pathiang hnenah nan pe ding.

I Piter 2:9
9. Sikhal sehla nannih cu hrilcia miphun, Siangpahrang ih puithiam, miphun thianghlim Pathian ih miphun bulce nan si. Khawthim sung ihsin khawruah har za tleunak sungih a lo kotu Pathian in mangbang za a tuahmi pawl tlangau pi dingih hril mi nan si.

Matthai 16:18
18. Ka lo sim Piter, nang cu lungto na si; hi lungpi par ahhin ka kawhhran kan din dingih thihnak hman in a neh thei dah lo ding.

[22.3]

Lungrualnak, A Kiantu Phengphehlep
Khrih ih taksa a si mi kannih hi a kawhhran hrangih a nung mi lungto si dingih kawh mi kan si. Kannih cu Lal cithlah ih puithiam hnatuantu dingih kawh mi, Pathian ih minung hleice leh a sunglawi mi ramthianghlim ih lengtu ding kan si. Amai kawhhran ahcun Khrih Amah pakhat lawng hi a lu bikin a dingih a hril mi pawl hnenah puithiam sang sinak a tuan dingih a cem dah lo mi A lalram ah Siangpahrang a tuan ding, a sinan Herod ih biakinn pi bangin a haidarh thluh leh ding. A lungto pawl kan thendarh aw thluh dingih kan cah lonak langternak ah lungrual
lonak in a langsuak ding a si.

[22.4]

Lungrualnak sangbik kan dinsuah theinak dingah a tul mi a hramthawhnak thil phun thum a um a si.
Zate ih sihcih awknak, thimnak ah- duhdawtnak
Zate ih tumtah tlangnak, thimnak ah- Pathianih duh mi tlinternak
Zate ih theihfiang tlangnak, thimnak ah- a dik mi thurin ti pawl tla an si.

[22.5]

Kan lungrualnak hin Khrih ih lung a awiter zia kha A thlacamnak thu ihsin kan hmu thei ih a hleice in Thuthang Tha Johan bung hlei sarih sungah a si.

Johan 17:11
11. Cun a tu ah nan hnenah ka ra ding; keicu leilungah ka um nawn lo ding, a sinan annih cu leilungah an um hrih ding. A thiang mi ka Pa nangmah le keimah cu pakhat kan si vekin leilungih a um hrih mi pawl cu pakhat an si theinak dingah i pek mi na hmin ih huham in humhim hai aw.

Johan 17:20, 21
20. Anmah hrang lawngah thla ka cam a silo; an thusim mi a thei ih keimah i zumtu ding pawl hrang tla ah thla ka cam.
21. An zaten pakhat an si theinak dingah thla ka cam a si. Kapa nangmah cu ka sungah na um ih kei khal na sungih ka um vekin annih khal kan sungah um ve hram hai seh. Nangmah in i thlah ih leilung in an zum theinak dingah annih cu pumkhat ah cang hram hai seh.
Kan zate'i a hran tete ih kan um thluh a sile hi leitlun hin ziangtinso a zum thei ding?

[22.6]

Mi Tampi In An Zuam, Hlawhtling An Um Lo
Mi Tampi in Khrih ih tasa sungah lungkhat lungrualnak tuah an tum ringring theu nan zohman in hlawhtlinnak an hmu theilo. Luther hin a rak zuam nasa, cuvek in Calvin, Zwingli, Wycliff, Tyndale, Wesley, Williams, Knox, Spurgen, Moody leh midangdang, a dang pawl khal hin an rak zuam cio hai. A phun dangdangin an rak zuam ciar nan Khrih ih taksa ah lungrualnak an rak hlawhsam thotho. Dokalhnak le hnaihnoknak an tong deuh ringring ih an then awknak a zual sinsin. Lungrualnak dingin a tu le tu an hawl rero a sinan mi ih hrialnak lawng hi an rak hlawh men theu; cutin a rei hlanah an tumtah mi hi hlawhtling theilo in an tum an thelh ringring; cuvekin kannih khalin hnatuan thei dingih lungrualnak hram kan tohnak ahhin kan hlawhtling theu lo a si. Ziangha kan sam mi a um lai ding?

[22.7]

Lungrualnak hi khai unau malte pawl Pathianih a lamzin sialnak hrangih a rak thansoh ter mi pawl hnen lawngah a rak um thei. Kan thurin hin hmun kan luahter tuk a si ahcun, thansohnak ding tikcu tha a um thei lo; ziang kan cang ding tile " a hit-khal zo mi hril mi" vek kan si leh ding. Kan lak ahhin kawhhran ih sutpi ban kan tam tuk lawmmam. Kan thurin te hi a bible bik in kan pom. Cutikah mai zumnak kha ruahthat leh sal kan remti nawn lo, cu lole kan theih hrih lo mi thutak hawl khal kan tum nawn lo. Cutin zirh theih mi kan si nawn lo ih kawhhran ih sutpi ban vekin thawn theihlo in kan um tenten men.

[22.8]

Thlarau ih a thangso mi unau pawl hnen lawngah thutak ih an sualnak pawl a laihlang sak tikah anmah ah lungawinak an nei thei theu. Cu pawl cu a tlaitluan ih thutak thudik hawltu pawl an siih bible ih an rinnak kha ziangtik hman ih cem ti nei lotu pawl kha an si. Bible thu thar phuansuah awknak ding hrangah ziangtik hmanah an sangka pi khar dah lotu pawl an si; cabu cem ko ih an thurin theih mi kha ret men an remti hai lo ih cuvek thinlung le ruahnak kha an tlansan hai, Cule Pathian thu ngaihtuahnak le thu thar phuansuah awknak ding hrangah an thinlung le ruahnak kha an ong aw ringring a si.

[22.9]

Cutivek thurin cun mi a ticak ih thil thar phuanmi mi a hawl suak ter. Thaten ruatsal aw, kan thurin kan thleng tikah kan thangso, ziang ha na ruahnak! Mi hrekkhat pawl cun zawhte bangin mi kheuh ding lawnglawng an hawlih an zumnak nak lungawi pi ding le nemhngeh sak ding lawnglawng an duh.

[22.10]

Lungrualnak kan timi hi kan zaten kan aw-an kan theihawk tik lawngah a karhzai thei ih kan zaten kan thinlung ih kan hawl cio lawngih ra cangsuak thei mi a si. Himi hi Khrih ah thinlung zate ih a hawikir tu pawl lawngin an congah, "ka duhdan silo in, nangmai duh sawn in" a titu pawl an si. Hihi amah Pathian kan duhdawtnak lawngih ra suak thei mi a siih a thupi bik mi thurin khal a si fawn. Himi kan ngah theinak ding cu Khrih ah kan pumpuluk ih kan herkir salih amah thawi khenbeh cih kan si hnu lawngih thil ra cangsuak mi a si.

[22.11]û Lole Kêl

Tu Lole Me
Mi tamzet cu an thurin thu thawi pehpar aw ih relkhawm ding an man tete ringring a sinan annih pawl hi thutak hawltu an si ngaingai hai maw lole midang kha thu elawknak ih neh zet sawn tu si tumnak men ha a si? Tu pawl cun an khaltu pawlih aw an thei ih asinan me pawl lawngte cun amah lawngte, amah lawngte, amah lawngte ti lawnglawng an thei. Hi hi me pawlih tidan, amah lawngte ti ringring hi a si mei. A sinan hibang pawl hi ziangtin a si ding, a sinan khakha ziangtin a si, a sinan sikhalsehla ti pawl hi an tanfung bik a si. Kannih cun cuvek pawl kha
an sinak kan theihfiang hmaisa ta phawt dingih kel lak ihsin tu pawl kan thliardang hai dingih thutak hawltu pawl thaw lawngin kan pehtlai aw ding a si. Relkhawmnak hrekkhat pawl cu thahnem lomi pawl an si. Hitivek tidan hi a pahnihnak thilcang theilo mi vunnel parih hram thlatu pawl an si, a aa zet mi vok hmai ih lung mankhung thlak vek a si ih zu thar hlon ih zu hlun palang sungih a thuntu pawl an si.

[22.12]

Pathian thu hi a fek zet mi lungto vek a si. Thudik leh Bible a sualpalh theilo ti a zum lotu pawl hnenih thu elnak nei dingih kan feh zik tikah kannih cun zianghman a tlangpi thu in pompinak kan nei lo, thudang hawlnak ah zianghman a dang kan nei theilo, lungrual pi tlang dingin tikcu can khal kan pe theilo. An lakih kan telve a sile kan hrampi kha thawn tahrat in vunnel parih bun a tum saltu vek men kan si ding. Curuangah kannih cun a pakhatnak ah Bible vek a sile kan zum dingih cunah Pathian thutak kan nei a si.

II Timote 3:16
16. Ca Thianghlim hmuahhmuah hi Pathian ih fialnak in ngan mi an siih thudik zirhnak ah leh zirhsualnak elnak ah le a sual mi remsalnak ah leh dingte ih nitin nunnak ih zirhawknak ah a tha.

[22.13]

Mi ih in ra zuam tikah Thuthlung Thar ngantu pawl khal kha a san um lo in Thlarau Thianghlim in a lungliam ter meimei lo ti kha zum aw hlah, ziang ha cui an rel ding mi an thu hram cu? In ra zuamtu pawl khan Khrih ih dungthluntu pawl kha Thlarau Thianghlim ih hnatuan pek mi leh
Thlarau Thianghlim in a huham cahnak in hriak a thihnak le an mizia thu kha an zum lo a si ahcun ziangtinso thucahnak kan tuah thei ding? ("A thlahtu Khrih" a si, bung nga sungah kan hmu thei).

I Thessalon 2:6
6. Nanmai hnen in siseh, midang hnen khalin siseh thangthatnak ngah ka duh mi a silo.

II Korin 10:8
8. Bawipa ih i pek mi thuneihnak cu a luan deuh in ka porh awknak ihka hman khal le ka ning a zak lo; cui thuneihnak cu nanmah siatbal nak hrangah a silo. Nanmah tundinnak hrangah a si sawn.

Johan 20:21
21. Jesuh in an hnenah; "nan hnenah daihnak um ko seh; ka Pa in i thlah vekin nannih khal ka lo thlah ve a si" ti ah a ti.

Dungthlungtu 2:42
42. Dungthluntu pawl hnen ihsin an zir ih, ti rawl ei tlannak leh thlacam tlangnak thawn pawlkomnak an nei ringring.

[22.14]

Kan Bible hi a sualnak a um lo a silo ahcun thutak ti in kan rinsan theilo ding. Thuthlung Thar ngantu pawl hi Pathian ih thawkkhumnak um lo a sile anmai ruahnak tla an telh thei, milai tipalhnak le anmai ngaidan pawlin Bible a ti borhhlawh thluh ding, pomtlak lo ah a cang thluh ding, a sinan hiti'n a silo (II Tim. 3:16)! Mi zokhal hi thurel tlang a tumtu cun Bible thutak in thu sut aw hai seh, cu lole vokpi hmai ih lungman khung pawl thlak an bang pang ding.

[22.15]

Cuitlunah hnaihnawhnak le thu borhhlawh pawl hi voi hnihkhat a ra can theunak cu thuthlung hlun thukamnak kha thlung thar thukamnak thawi pehzom kan tum theunak ruangah tla a si theu. Thukam hlun tahthimnak pawl ih sunlawinak pawl kha thukam thar an zirh tikah an vun sang duak theu, anmai tahthimnak thu thawn lole an phunhnam dan tibang pawl thawn an cawhrawi thluh. Kannih in kan cin ringring ding mi cu thukam thar kha thinglamtah parah hminsin zo mi sihman sehla Khrih ih dungthluntu pawlih thinlung ah timlam cia in a um ih kawhhran hin Pentekos ni a ra thlen hlan sung cu an rak hmang hai lo. Kawhhran hin Pathian ih zirhternak, kaihhruainak le a thlangam ternak tel locun zianghman a tuah dah lo a si. Hibang pawl hi Pathian thlarau huham tel locun a taw a tan aw dah lo.

Matthai 16:18
18. Cuti cun zohman in rawl nan ulh kha an lo thei lo dingih mit hmuh lo nan Pa lawngin a lo thei ding. A thupte ih nan tuah mi a hmu tu nan Pa in that man a lo pek ding.

Dungthluntu 2:38-41
38. Piter in an hnenah, "Nan zaten nan sualnak tlansan fingfing uhla Jesuh Khrih hmin in baptisma lak uh; cuti cun nan sualnak ngaidam nan si dingih Pathian laksawng Thlarau Thianghlim nan ngah ding.
39. Ziangahtile Pathian thukamnak cu nanmah le nan fate pawl hnenah leh Pathian thawn a hlat aw mi an si na'n Bawipa kan Pathian in a kawhmi pawl hmuahhmuah hnenah a si" ti ah a ti.
40. Piter in tong tampi in a zirh ih a forh hai. "Hi mi thalo parih a thleng ding mi hremnak ihsin luatnak dingah zuam uh," ti ah a sim.
41. Piter ih sim mi cu mi tampi in an zumih baptisma an lak; cui ni nikhat ah an pawl cu mi thawng thum tlukin an karh.

[22.16]

Bible thutak elawknak ah thukam hlun le thar zangfahnak a rawi ih cawhpolh tu pawl hin a pahnih in an siatsuah hai a si. Thukam hlun hi cu a tlangpi thu in dan ah a thum aw ih miphun hleice mi ruat mi pawl hnenah a langsuak. Cuvekin thukam thar zangfahnak khal cu a thar parah a thum aw ih a tha sawn mi thutiam ah leh Pathian ih lalram hi leitlun zapi hrangah a si. Mi zokhal thukam a cawhrawi tumtu cu mi bulpak ihsin mi a siatsuah ih zu thar kha palang hlunih thun tumtu thawn bangaw mi an si.

[22.17]

Mahte thutak hawl awter pawl cun kawhhran hi thuh a silo mi puanawknak a si ti'n an zum, Pathian hin san khat hnu san khat ah mipi ih an tuldan ih an hman dingah thil a thlakthlengnak hi a tumtah zawng a si an ti. Dungthlun pawl ih kawhhran kha Pathian ih thawkkhum mi a si ahcun a thlakthleng sak ding ti ih ruahnak le cuti ih A duhnak cu san khat hnu san khat ah an tuldan vekin A kawhhran ah a rung langsuak a si ti in an pom.

[22.18]

Hi ti kan tinak hi a tha tla a si mei thei, hibang pawl hi cun Khrih ih lubik sinak kha minung ih thuneihnak in an thlakthleng. Himi pawl hin Thuthlung Thar kawhhran kha mi bang nawn lo ah an tuah ih minung hi Pathian in a rak thawkkhum ih cutin a thil tum mi dungthlun hna a tuan ter hai ti in an pom hai. Hi Thuthlung Thar kawhhran hi hman tlak nawn lo mi sun zan ih thuthang ca vekah an can thluh. An pom dan cun Pathian in minung hi san man dingin sinak leh A tuah theh lomi hnatuan suak thluhtu dingah sinak a pe a si ti in an ti. Cumi theih theinak cu minung ih uanthuan awknak le mi zohtham lonak le hihi khuitawk in a ra ti khal kan thei thei a si ko lo maw? Cutivekin kawhhran ah Thlarau ih tongkam a theih theih nawn lo. Tulai kawhhran le Thuthlung Thar san kawhhran kha vun khaikhin hnik hman, cule nangmah te thusut aw aw,
tulai ih zirhter awknak tlawng pawl hin Pathian an neih deuhnak le an rualrem deuhnak lole an feh hlat deuh thu le Thuhlung Thar mi pawl hnakih an thenthek awk deuhnak na thei suak mai ding.

[22.19]

Tuar Theih Ding A Silo
I Korin 3:2
2. Rawl ngai nan ei thei hrih lo hrangah cawhnawi ka lo pek a si. A tu khalah rawl ngai nan ei thei hrih lo;

[22.20]

Paul in hitin a ti, "rawl silo in cawhnawi in ka lo cawm hai: a sinan tu tiangin nan tuar thei hrih cuang lo, tu tiang zianghman nan ti thei hrih cuang lo" ti ah a ti. Kan zaten thutak kan hawl tikah, mi tampi cun an thinlung ten dikcia in thutak theicia ah an ruataw aw ih ziang dang hman harsatnak um nawn lo in an ruat aw theu. Hi a nauhak lai mi farnu lole tapa pawl hin thil pakhat lawng an tumtah. Thu elawknak ah nehtu si ding an duh, midang ai in an tuahmi hi tha deuh sawn in an hmuhnak le thutak ih a dodal hmanah anmah kha a sibik vekin an thei aw thotho. An thuphan lolaknak le an uanawknak leh an au aw khawk cu a thupibik ah an ret. An thansoh lonak hi a sual an ti duh cuang lo, mi relsiat an hmangih lole an ruahnak in thlakthleng awk an tul thu a sim hmanah, an thansohnak ding a si hmanah an zum in an thlun duh cuang lo.  Hiti an sinak ruangah ol-ai tei thangso mei ding khal an tuar thei nawn lo. Thla kan cam dan dingah: "Bawipa Pathian, thutak hmuahhmuah khal mai theihnak parih a hngattu pawl hnen in in runhim aw la cutivek a hawl rero tu pawlih kut sungin in runsuak hram aw" ti in.

[22.21]

Lungkimpi Lo Dingih Lungkim Tlangnak
Lungkimpi lo dingih lungkim tlang nak timi hi kan tuah dingih thabik a si maw? A diklo mi unau dang pawl thawn kan rual aw tinak a si ih, thenthek awknak ah kan lungrual ti thawn a bangaw a si. Cuvek cu kan tuah ding mi a si hrimhrim lo! Midang pawl hi cu sualnak an nei thluh timi thurin kan zumpi a si ahcun, kan bangawk lonak ruangah, a si men ding tiin, hihi kan thurin ti lok meinak leh kan remawknak ding hrangih kan tulmi a si ti lok mei ding a silo. Kan thinlung ong aw takin kan ruahnak in a si thei maw theilo ti ruatin, in ra zuamtu pawlih sinak pawl kha rak ruahsak phah in upat takih an thu rak ngaisak ding cu a si.

Dungthluntu 18:24-26
24. Culai ah Alexandria ih a suak mi Judah mi Apollos an timi kha Efesa khua ah a ra thleng. Amah cu tong a thiam zetih Ca Thianhlim tla a thei ngaingai mi a si.
25. Bawipa ih lamzin thuhla ah zirh zomi a siih, thinlung thozet leh fel zetin Jesuh ih thuhla cu a sim ih a zirh. A sinan a theih mi cu Johan ih baptisma laknak thu lawnglawng a si.
26. Raltha zet in Sinakok ah thu a sim. A thusim mi cu Priscilla leh Aquila in an theih tikah an inn ah an sawm ih Pathian lamzin thuhla kha fel deuh in an sim.

[22.22]

Hi pai thu hi zangfah ten ruat tha aw, Bible sungih mi ropi, hi mi tongthiampa hi zirh theih mi asi ih Khrihfa mahte ke ih dingtu tei nupa in an rak rem tha. Anih cu tu ahcun a thangso zo!

[22.23]

Pathian In Ziang A Duh
Pathian in kanmah ihsin ziang a duh timi hi kan zoh hnik kei uh.

I Korin 1:10
10. Ka u le ka nau tla, nan lakih thentheknak a um lonak dingah nan thinlung rual aw te in um hram uh ti ah kan Bawipa Jesuh Khrih hmin in ka lo dil a si. Rualrem zetin thinlung khat le tumtahnak bangrep in um uh.

Himi hi a si Pathian ih duhdan lungrualnak cu thildang zianghman a um nawn lo!

[22.24]

A Hlan Ih Rak Sualnak Pawl
I Korin 1:11-13
11. Ka u le ka nau tla, nan lakah tawhawknak a um ringring ti kha Khalaw ih sungkhat pawlin fiangte in in sim.
12. Ka simduh mi cu, mi hrekkhat in "kannih cu Paul ih dungthlun kan si," an ti; mi hrekkhat in kannih cu, "Apollos ih dungthlun kan si," an ti; mi hrekkhat in kannih cu, " Piter ih dungthlun kan si," nan ti ih mi hrekkhat in kannih cu, " Khrih ih dungthlun kan si," ti ah a dangdang ciar ih nan timi hi a si.
13. Khrih cu a thenthek mi a si maw? Nan hrangah thinglamtah parih an thah mi cu Paul maw a si? Paul hmin in maw baptisma nan lak?

[22.25]

Ziangtluk Hla Kan Ra Thleng Zo?
I Korin 2:1-3:9
2:1. Ka u le ka nau tla, nan hnenah ra in Pathian thu thup ka phuan tikah tong thuk le fimnak tongkam ka hmang lo.
2. Ziangahtile nan hnenih ka um tikah Jesuh Khrih le thinglamtah parih a thihnak siarlo thildang zianghman ngaihtuah ding ka tum lo.
3. Cutin nan hnenih ka ra thlen tikah tawntai zet leh tih le thia phah in ka ra thleng;
4. Ka thu zirhnak le ka thu phuannak ah nan thinlung lut dingin milai fimnak le thiamnak tongkam a tel lo, sikhalsehla Pathian thlarau le a cahnak langternak lawng a si.
5. Ziangruangah tile nan zumnak cu minung fimnak parih phun mi silo in Pathian cahnak parih phun mi a si sawn.
6. A sinan Thlarau lamih pitling cia mi hnen ahcun fimnak thu ka lo sim. Sikhalsehla cui fimnak thu ka lo sim mi cu hi leilungih fimnak a silo, hi leilung a uktu ih cahnak khal a silo, cui cahnak pawl cu a cem rero mi cahnak lawng a si.
7. Kei ih ka phuan mi fimnak cu Pathian thuthup fimnak, milai zohman ih theih lo mi, leilung sem hlan ihsin Pathian in kanmah sunloihnak dingih a rak tuah cia mi fimnak a si.
8. Hi leilung a uktu pawl zohman in cui fimnak cu an thei dah lo. An rak theih sisehla sunlawinak Bawipa cu thinglamtah parah an that lo ding.
9. A sinan Ca Thianghlim in, "milai zohman in an hmuh dah lo mi, zohman in an theih dah lo mi, a cang thei ding ti ah zohman in an ruah dah lo mi, cumi cekci cu Pathian in amah a duhdadwt tu hrangah a tumtah mi a si," a ti.
10. Cui thuthup cu Pathian in kan hnenah Thlarau in a phuang. Thlarau in ziang hmuahmuah kha a hawlsuak ih Pathian ih tumtah mi a thuk bik mi khal a pur ngah a si.
11. Minung hi a sungih a um mi a thlarau lawngin a thinlung sung thu a thei. Cuvek thotho in Pathian Thlarau lawngin Pathian ih sung thu cu a thei a si.
12. Kan ngah mi thlarau cu leilungih thlarau a silo; Pathian ih thlah mi thlarau a si sawn. Pathian ih in pek mi laksawng hmuahhmuah kha kan theih theinak dingah Pathian Thlarau cu kan ngah zo a si.
13. Curuangah thlarau a nei mi pawl hnenih thlarau lam thudik kan simfiang tikah milai fimnak tong hmangin kan sim lo. Thlarau ih zirh mi tong kan hmang a si.
14. Thlarau minung a silo pawl cun Pathian Thlarau hnenih sin a ra mi laksawng cu an co thei lo. A theih khal an thei theilo; ziangahtile cui laksawng pawl ih sunlawi zia cu thlarau thinlung lawngih theih thei mi a si ruangah annih hrang ahcun thu lolak men a si.
15. Thlarau a neitu cun ziang hmuahhmuah kha a that a siat vekin an thleidang thiam; sikhalsehla amah cu zohman in a mawh an ti theilo.
16. Ca Thianghlim in, "Bawipai thinlung cu zo in so a thei? Zo in so ruahnak a pek thei ding?" a ti. Sikhalsehla kannih cu Khrih thinlung neitu kan si.

I Korin 3:1-9
1. Ka u le ka nau tla, thungai in kan ti a sile nannih hnen ahcun Thlarau mi pawl hnenih ka sim vek cun ka sim theilo. Hi leilung mi bangtuk leh Khrihfa zumnak lamih nauhak vek a si mi bangtukin nan hnenah ka sim a tul a si.
2. Rawl ngai nan ei thei hrih lo hrangah cawhnawi ka lo pek a si. A tu khalah rawlngai nan ei thei hrih lo,
3. Ziangahtile a tu khalah tisa minung in nan nung lai a si. Pakhat le pakhat nan iksik aw ih nan tawh awk tikah hin leilung tisa ta nan siih tisa dan in nan nung, ti kha a lang a silo maw?
4. Nannih lakah pakhat in, "kei cu Paul ih milai ka si," a ti ih a dang pakhat in, " kei cu Apollos ih milai ka si," a ti ve tikah hi leilungih milai nan sinak nan langter a silo maw?
5. Thungai ti ahcun Apollos cu zoso a si? Paul cu zoso a si? Kannih cu zumtu nan sinak dingah Pathian riantu lawng kan si. Pathian in tuanvo in pek mi kha kan tuan fingfing a si.
6. Kei cun a ci ka tuh ih Apollos in a hung kho mi tidai a toih, a sinan a thanter tu cu Pathian a si.
7. Thlaici a tuhtu le tidai a toihtu cu an thupi lo. A thupi bik cu Pathian a si, ziangahtile a thanter tu cu amah a si.
8. A tuhtu le tidai a toihtu cu an danawknak a um lo; an hnatuan mi vekin Pathian in laksawng a pe hai ding.
9. Ziangahtile kannih cu Pathian hrangah hnatuan tlang kan siih nannih cu Pathian hnatuannak lo nan si. Nannih cu Pathian ih inn nan si fawn.

[22.26]

Kannih cu nauhak pawl kan si ko, a thangso hrih lomi kan si vekin, a hnuailam ih kan hrangih a thabik mi zohthim tlak thu hi kan zohtlang hnik kei uh.

I Korin 14:20
20. Ka u le ka nau tla, nan thuruahnak ah hin nauhak bangtukin um hlah uh. Thil thalo tuahnak lam ahcun nauhak bangtuk si uh; sikhalsehla nan thuruah dan ahcun nutling patling si uh.

Matthai 18:3
3. "Fiangte in ka lo sim- nan thinlung nan thlengih hi nauhakte bangtuk nan silo ahcun vancung uknak sungah nan lut dah lo ding.

[22.27]

Hi catlang thu hi kan ruat tlang hnik kei uh. Pitling zo khal hi nauhakte vek a si sal lo ahcun, thimnak ah- piantharnak ah, nauhak thinlung pu in, cu lole annih cu vangcung ram ah an lut theilo (Matt.18:3). Cumi si thei dingah kan ralrin a tulih, tlakthleng awk ding le kan thleng awk dingah hnuaidornak thinlung le nauhak vekin thleng aw ding mi kan si.

[22.28]

Phelnak Thutak Naam
Thurin thu thawn pehpar aw in rel tlannak nei thei ding ahcun pehzom awknak nasa tei kan neih ih thu elawknak kan tuah hlan lo cu tum ding kan silo ih ti theih thil khal a silo. Duhdawt awknak thu kan sim ding mi thu pawl kha kan fiang hmaisa ding, rualrem awknak in a tumtah mi le upat awknak le Bible sirhsan ih thu pompi awknak, thurin dik ti pawl hi thlarau ih pum apawknak kan neih hlanah kan ti dingmi an si. Voi hnihkhat cu, a tha cia hman hi a siatsal leh theu. Thutak, thilri vekih a hriam mi hi ralring te ih hman ding a si.

[22.29]

A Tuamhlawm Nak
Johan 17:17
17. Annih cu an hnenah thudik in thianter hai aw; na tongkam cu thudik a si.

Hebru 4:12
12. Pathian ih thu cu a nungih a cak fawn. Kap hnih ih a hriam mi ralnam hnakin a hriam sawn. Nunnak thlarau an ton awknak le hlikhlok le thlik an peh awknak tiang tlang ko in a sun tlek thei a si. Milai thinlung ih duhnak le ruahnak tla a thei thluh a si.

Thil hmuahhmuah ah Thutak hi a hriam bik mi thilri a si, kan taksa kan ahpemnak namte vek a siih kan thlarau tiangin a suntlang thei thluh. Thutak namte hin kan unau at bang sehla ziangha a thathnemnak a um, a sual pawl kha hlonhlo in, a sinan kan ahnak ruangah a thaw cem
in thi bang sehla ziangso a thathnemnak a um ding?

[22.30]

Kan unau hi kan va rem tum khal a sile kan pehtlaih awknak hi siatsuah lo te'n, thubuai tenau lawng kan remsak theu a sinan thubuai pakhat kan suakter sawn theu. Unau duhdawt awknak thurin le lungrualnak hi a pahnihnak ih kan Bawipa Pathian ih in pek mi thukham a si. Kan duhhamnak ruangih kan unau va rem tumnak hi a dik lo, voi hnihkhat cu kan pehtlaih awknak a fek hrih lo timi kan theihhngilh theu ih kan lungrualnak a ti se lehsal theu, cutin kan pehtlaih awknak kan siatsuah ter theu. Pehtlaih awknak hi ziangtluk ih thupi ha a si?

Efesa  4:1-3
1. Bawipai hnatuan ruangih thawng a tla mi keimah in; Pathian kawh mi nan si bangtukin nan nunnak ah Pathian kawh mi nan sinak kha langter uh ti ah ka lo forh.
2. Thinlung nemnak nei uh; tangdor le thinsau in um uh. Duhdawtnak nan neih mi kha pakhat le pakhat nan zawi awk theinak in langter uh.
3. Thlarau in a lo pek mi pumkhat si khawmnak kha tunghmun dingah hmuhkhat ih a lo rem khawm tu daihnak in hmun ter uh.

Filipi 2:1-5
1. Khrih thawn nan pehzom awknak ruangah nan nunnak a hnget cuangih a duhdawtnak in nan hna a lo ngam ter. Thlarau thawn pawlkomnak nan nei ih pakhat le pakhat parah zangfah lainatnak nan nei a silo maw?
2. Cuti a sile hitin ka lo forh duh; nan ruahnak hmunkhat seh, duhdawtnak khalah pakhat le pakhat duhdawt ton aw uh, nan thinlung le nan tum mi khal bangrep aw sehla cuti cun lungawinak ka neih mi nan kimter ding a si.
3. Mi nahsuahnak nei in, mai zawn lawng ruatih, mai hminthatnak lawng hawlin zianghman tuah hlah uh. Pakhat le pakhat tangdor tonnak thinlung nei uhla midang hnakin ka tha deuh ti ah ziangtik hmanah ruat aw hlah uh.
4. Nanmah duhnak lawng silo in midang in an hrangah a thupi bik ih an ruah mi kha a hmuh zia thiam ve uh.
5. Nan thinlung put dan cu Khrih Jesuh ih thinlung put dan in siseh.

[22.31]
>> Tîrîl Ihsin Cabuai Ah
Tiril Ihsin Cabuai Ah
Mi pahnin lole cu ai tam khal sisehla thutak kha rinum zetih an hawl lai ah an lamzin hrekkhat kha ti pihsak in an um theu. Cu theh hnu ah teh ziang a cang bet? Hi tikah kannih cun kan lamzin hrekkhat a pih hmanah Pathian kan rinsan dingih kan zum fawn ding, kanmah le mah cek aw in kan thiamthu rel lo in lungrualnak sawn kan hawl ding a si.

[22.32]

Thurin thu relkhawmnak thawn pehpar aw in kan theitawk in hmai ah nawr thei nawn lo in kan thansoh thei nawn lo a si ahcun, cui thurin thu cu kan cabuai ah kan run keng dingih, thimnak ah- thu elawknak cabuai ah, leh tiril ah hun ret aw, thimnak ah- thinsaunak tiril ah leh mi ngaithiamnak pawl kha. Ziangkhal a sile theihhngilh aw hlah la, kha kha theh hrih lo ih tanta mi hna a si, cabuai parah a rang thei bikih ra thleng ngeingei ding mi thil thupi lungrualnak kan ngah hlan lo tiangih tuan zom ding mi hna a si.

[22.33]

Thu kan elawk zo mi kha tule tu kan elaw leuhleuh ding a silo. Thil luan cia mi tule tu phorhsuahnak hi cun a silo zawngin thil a ra cang duh sawn. Cui ra cangsuak mi cun kan pehzom awknak a tise duh. Cu ai in kan buaipi mi thurin kha tiril ah kan ret lawk dingih zohfelnak nei in kan ti reh tum ding a si. Hmailamah cun nithla leh tikcu can ruahman in cabuai ih kan theh thei lomi thurin thu kha kan zohsal dingih kan zirsuah mi le kan zohfel mi pawl thawn hmunkhat ah kan ti fel thluh dingih a tul a sile a thleng tla kan thleng aw ding a si. Thurin thu thawn pehpar aw in kan thubuai kan theh lai hlan lo theitawk in kan zuam dingih cutin Pathian kha kan lungrualnak ihsin a rung sunglawi vivo ding a si.

[22.34]

Thutak Hrampi Pawl
Kan zaten a hnuailam ih tarsuah mi kan neih hlan kulhsung ahcun thurin thu in lungrualnak kan hawl mi hi tamzet hmansehla malte lawng a rah suak ding. Bible zumtu unau pawl lak ahhin a hrekkhat pawlih thurin lawng hi thuhram vek thupi ih ruahsak ding a si. Cui thurin hrampi pawl cun a rak um cia mi thutak kha ralring ten an rak hliakhlai hai ih a si maw silo ti tahnak dingah le sinsiahnak ding ah, lole thudik a silo ti theihnak le tha takih zirh awknak ding hrangah a
si. Ziangvek thurin khal hi hibang pawl thawi a kalh aw pang a si ahcun ngaihtuah tlak ding thil a silo tinak a si.

[22.35]

Kan Khrihfa sinak ahhin pakhat le pakhat kan lungkim pi aw dingih kawhhran sungah a hnuailam ih thutak phuansuah mi pawl hi kan pom thluh ding a si:

Bible a palh thei lo.
Dungthluntu pawlih huham kan pomnak dingah, thimnak ah- cui a dungthlun kawhhran pawl cun A thuneihnak an run kengkawh vivo, Anih in a Pai thuneihnak a kenkawh bangin. Cui Thuthlung Thar kawhhran cu kan zum ding mi le kan thlun ding mi a siih a pumpuhlum in remsalnak khal a um lo, belh mi khal a um lo, phunhnam ngaithahnak ruangih lak mi khal a um lo, nu nau mipa thurelnak, fimthiamnak lam thu lole san ih kipih ngaituah ding ti pawl khal an tel cih thluh a si. Kawhhran cun a thisen ih a leitu Khrih lawng a nei dingih Amah lawng hi a lu a si. Kawhhran hin san ih kipah thuphuannak thu hi a pompi ding a silo, a sinan hi mi cu dungthluntu pawl hrang lawngih rak tumtah mi a famkim zo mi Thuthlung Thar lailangtu a si. Kawhhran tin hin midang kawhhran pawl thawn lungrualnak neih ding a siih mi pakhat ih sinak tarlangnak lawngte cu pompi lo in Khrih ih sinak lawng kha kan zate'h hawl ding mi a si. A dan le dun zawng leh a pawl thlarau zawng silo in lole zomkhawmnak tivek khal silo in thlarau a duh ih a hawltu a haltu insang pawlih tul mi thinlung, thimnak ah- Pathian ih sungkua pawl hnenah kan sim ding a si. A komkhawm aw mi zom awknak cio hin Pathian hi an zum dingih cui a belruat a hril mi pawl ihsin an sim dingih ziangha A duh ti leh A duh mi thu, ziang a sim ti pawl kha kan ruat thiam ding a si.

[22.36]

Unau hrekkhat an thansoh zet laiah a thangso theilo mi unau khal an rak um ve. A thangso theilo mi unau pawl cun thurin ih palhnak an hawl ih a cangthei mi thil riangri hi ruat lo in an hnawl, an rinnak kha a sual maw sual lo ti hmuah an cek aw duh dah lo. A hnuailam ih Bible catlang hi an rak ngansuah ihsin thlun tlak le tui ni tiangih tlaihsan tlak mi a si.

Matthai 7:3-5
3. Na mit sungih a um mi mithnawm tumpi hman poisa lo in na unau mit sungih mithnawm fate kha ziangahso na poisat?
4. Na mit sungih hnawm tumpi a um na cingin ziangahso na unau cu na mithnawm ka lo cawih ding ti in na ti ngam?
5. Mi ti ter aw pa! Na mit sung hnawm tumpi kha suah hmaisa ta awla cuti cun na unau mit sungih mithnawm cu fiangten na hmu thei dingih na coihsak thei ding.

[22.37]

Lehlin Mi Ca Pawl Ih Danglamawknak
Mi hrekkhat in thudik hmuhnak dingah thu elawknak an tuah uar, lole an duh mi lehlin mi bible pawl kha uar takin an sim, thimnak ah- King James, New International Version, New American Standard Version, Revised Standard Version tivek pawl kha. Pathian hnenah lungawi thu  kan sim ding mi cu Greek le Hebru simfiangnak rak ngantu Strong's ih ngan mi Concordance bu in rak ngansak hi lung awi um za a si. Hebru ca ih voi khat lawng kan rak theih mi lole Greek mifim pawl khal in hi cabu sung ihsin ca an rak ngansuak hai, cun thildang pawl khal mipi ih run hman theih dingin kan nei zo a si.

[22.38]

Ziangruangah tile hibang pawl hi an langdan cun lehlin mi cabu cu a dangdang cio hi thudik hawlnak ah hmang cio hai seh, cui hawlsuah salnak ihsin lungkim tlangnak tla a ra suak sal thei. Mi hrekkhat pawl lephei cun kannih cu lehlin mi bu khat lawng kan hmang ding an tiih midang hmuahhmuah pawl hi Pathian thutak kengkawhtu hmanah an rel nawn theu lo. Curuangah zo simaw pawl cun a sualmi lehlin bu rak hmang ngahtu an um ding ti cu rinhlelh ding a um lo, lole thurin tanfung ah an sual ko ding a sinan an duhbik mi lehlin bu le an rak puangsuak laklawh zo si. Ka zumnak ah annih pawl hi thutak thu khihhmuhnak ahcun an rinum tawk pam hai ko ding, hiti an si cingin kan lakah a rak uartu tla kan rak um lai sapbai.

[22.39]

Lehlin mi ca pawl reltlangnak nei lo in thurin puansuah mi thu lawng thu elawknak nei tu an tam tawk thlang. Liberal pawlih thurin hi liberal pawlih lehlin mi cabu pawlin a rak thok ih a reihlanah ziang a ra cang tile kannih phungnunthlun (conservative) pawl hin lehlin bu tha kan hril thiam a tul in a poimawh nasa. Lehlin bu hlun bik Hebru le Greek tong ih rak ngansuah mi ca pawl hi a dik tiih kan hmang ding a si ahcun thildang hi cu cawhpolh kan tum lo hram kei uh. Tu ah, tu rori ahhin thudik phuansuah hi a thupi sinsin.

[22.40]

El Theihlo Thupek Khirhkhan
Tui tumih kan rel ding mi hi tha tei siar rori hnu ih relkhawm ding mi a si, hi hi kan thu ih a thupi laimu khal a si. Hi thupek khirh thurin kan timi hi el theihlo mi thu ziangkim ih thum awknak asi ih, hihi Khrihfa pawl le unau dang pawl tiangin a va rem tha, cumi cun canbi nei ding a silo lole bulpak zumnak hi can bi nei ding a silo, lole tel ding khal a silo, cuti a si ruangah bible ih phuansuah mi thutak kha a rei hlanah a ra langsuak ding a si. Khrihfa pawl hmuahhmuah hin a hlan ih thurin thu ih an rak tisual mi, thutak theitu mithar pawl hnenih, an rak tisual pang mi hmuahhmuah ruangah dunglam ah an kirsal ngeingei ding a si. Cutivek ih a tuahtu pawl cun
thutak kha nasa ten an hawl ngah dingih an hrangih a tul nawn lo mi thil ih bum theih dingin an um ding hi a si nawn lo.

[22.41]

Milai Nunnak Hi Sang Lawng In A Silo
Matthai 4:4
4. A sinan Jesuh cun, "Ca Thianghlim in milai nunnak cu rawl lawngin a silo Pathian hmurka in a suak mi tongkam in a si sawn, a ti," ti ah a let.

Johan 6:12
12. Rawl an ei khawh tikah a dungthluntu pawl hnen ahcun, "an hlah mi kha sar theh uh; malte hman hlonlak hlah uhsi," ti ah a ti.

[22.42]

I Korin 13:9
9. Ziangahtile thiamnak laksawng kan ngah mi le profet thusim thiamnak kan co pawl hi cu a hrekkhat te lawnglawng an si.

[22.43]

Efesa 4:13
13. Cuti cun kan zumnak ah leh Pathian fapa kan theihnak pakhat sungah kan finkhawm aw theh ding; patling kan si dingih Khrih patling a sinak a sannak bik hmun khal kan thleng ve ding.
Hi a thekdarh aw mi pawl sar khawm lehsal dingah hin ziangtik tiang so kan rei hrih ding? "Zumnak ah lungrualnak thawn kan feh lai hlanlo, leh Pathian ih fapa milai famkim a sinak kan theihfiang hlan ahcun (a famkimnak #5046), Jesuh Khrih ih pianzia kan theih lai hlan lo kan khawm rero a tul a si.

[22.44]

Pastor John Robinson cun Holland ram tlansan in Lei Thar ih a feh suah hlan, Pupa Khual Tlawng pawl timi thu a rel laiah hitin a rak sim:

"U le nau pawl kan zate'n reipi kan then aw dingih Pathian in nan hmel voiziat ka lo hmusal leh ding timi a thei thluh; a sinan Pathian in a fial maw fial lo simaw, Pathian le a vancung mi pawl theih ah ka lo cah duh, kan nun laiih Khrih dung ka rak thlunnak hnakih hla cu run thlun pang hlah uh. Pathian in a sinak kha nangmah hmangin thildang ih a phuan awk tikah ka thu thang tha sim mi thutak kha pom mei dingin rak tiar cia uh; ka Pathian in thutak le a lamzin tleunak ding hrangah tleunak a nei ti hi ka thei fiang nasa tuk zo. Kei ka lam ahcun, kawhhran tuah thatnak lam ahcun ka ti theilo thu, ka lungngai thu leh annih ai cun ka ti thei nawn lo thu ka theifiang aw. Luther ih dungthlun tu pawl hin Luther ih fehdan vek cun an rung feh thei hai lo, cuvek thotho in Calvin ih zirhnak run thluntu pawl khal hin a zirhdan vek cun an run thlun thei hai nawn lo, Pathian mi pawl ih fehnak hi kan run thlun thei nawn lo, ka thlun a ti aw pawl khal hin an thlun thei nawn hai lo. Hi thil hi lungzur takih tahpi nguaingo tlak mi thil a si; an san laiah hin rak ropi in rak hminthang hai khal sehla Pathian ih remrelnak zate cun an rak thei thei ve cuang hai lo, a sinan tu ahcun nung lai hai sehla cu a hlan aiin Pathian an pom hnget deuhdeuh ding".

[22.45]

Tlunta Khan
Tulai san ah kan zaten Pathian ih thilmak tuah mi hi ngah thei tlakih kan ngai aw a si ahcun Pathian ih thu in suh duh mi hi mi pakhat hin duhdawtnak le thansohnak lawngin a ngah thei. Cucun kan thinlung in bumsak ih, cutin tulai san ah, tu ihsin, thlarau inn tlunta khan ah, lungrualnak kan neih a tul, kan nunnak khal thurin ah lungrual tlang dingih kan pek awknak, kum thawngkhat laiih an rak hman zo mi kha ngah kan tum ve ding mi a si. Hi pumpekawknak ding hrang ahhin kan man taktak cio zo hai maw?

[22.46]

Ziangtik hmanah lungkimnak in lungkim sal lonak ti thu hi diriam tak cun kan ngah thei ti cu a um zik lo, a sinan a cang theitawk in lungkimnak hi kan hawl tlang ding mi a si, lungkimnak in lungkim sinnak ah leh cawhpolh hnuaihni lo ding hi kan zuam tlang ding mi cu a si. Hi hnatuannak hi cabuai par in tiril ah tiril ihsin cabuai parah tiin kan tuah lai hlan lo, ti in Pathian ih zangfahnak leh Thlarau Thianghlim kaihhruainak lawngin kan bangaw thei dingih lungrualnak famkim thawn, thinlung khat kan pu thei dingih bangrep ten thu khal kan then thei ding a si, thimnak ah-kan ruahnak a bangaw thei ding a si. Pathian ih duhnak hi ziang a si ti voikhat ten kan ruat tlang sal kei uh.

I Korin 1:10
10. Ka u le ka nau tla, nan lakih thentheknak a um lonak dingah nan thinlung rual aw te in um hram uh ti ah kan Bawipa Jesuh Khrih hmin in ka lo dil a si. Rualrem zetin, thinlung khat le tumtahnak bangrep in um uh.

[22.47]

Ziangahtile hi thu hi Pathian thu ih a rel mi a si, A duhdan khal kan thei thei, ziangahtile hi hi Pathian duhzawng a si ruangah kan zum in kan pom dingih Khrih ah hibang pawl hi an cang thei theh a si. Hibang pawl hi Pathian duhdan leh thilcang thei an si ahcun ziangkim kan tuah mal vivo a sile an cang thei zik lo e tiin a thu thlun lonak lam kan ruat tam vivo ding tinak a si.

[22.48]

Rosiah thurin cun a tir ihsin zumnak thu khal ah kan thinlung in rak luahkhat zo. Hi ruahnak hi a hrampi kan duhdawtnak le kan rinsannak ruangah a si. Cucun in thenthek aw terih kan thinlung sungah nasa ten a cam ringring ih ziang thawn a bangaw tile nauhak puanhlum sin thawn kan bang aw. A sinan tu hi ruah that awknak can a siih kan nauhak lai ahcun nauhak pawl vekin kan tong theu ih nauhak vekin a theih khal kan rak thei, nauhak pawl vekin thu kan rak ruat; a sinan kan hung pitlin tik ahcun kan nauhak thinlung kha cu kan hlonhloh thluh a rung tul thlang ta a si (I Kor.13:11).

[22.49]

Reipi kan rak din zonak zumnak thleng hi kan thinlung a hram pi'h phawh vek a si; kan thinlung in tina zet theu a sinan thutak ih kan thansoh theinak ding hrang ahcun hi mi thin natnak hi kan tuar ding hrimhrim mi a si. Amai hmuihmel vek si dingih kan thlengawknak ding ahcun hi tivek hi kan suahsan ngeingei ding mi thil a si, cucu Khrih ih hmuihmel kennak a si.

[22.50]

A langsar zet mi zawi thurin khal sisehla Bible ih on mi hlir an si tiin kan pompi sak mei theu.  Bible hi thil fiangfai lomi a silo ti cu kan thei thluh fawn; curuangah hokhaw pakhat le pakhat kan pomrem pi awk thei theu lo. Cuti si sehla ziangtinso kawhhran tin hin thurin dangdang an phuansuah cio hai nak? Kan si cio ko ti auh law. Cuti a si ruangah kan theihdan le ruahnak pawl khal an danglam aw ih an pial aw thluh. Bible kan zoh khal le thu el awknak hlir a tisuak ih ziangtin kan ti aw ding ti hmuah cu kan thei leh silo, a sinan a thuk cia mi kha kan lai thuk sin a sile kan thinlung in a canthei dan ding thil thar kan theisuak thei ih, a hlan ih kan rak tidan pawl kha kan duh nawn lo ih rosiah thurin buainak, timi pawl kha kan duh nawn lo, hibang pawl hi thutak bu sungah kan hmu thei ih a rak umcia-zo mi thil hokhaw a si.

[22.51]

Kannih cun kan rak zumnak ziangtivek ih rak buaibai in rak kalh aw in kan ruahnak rak dang lam zet khal sehla a tha sawn mi Bible ih zirhdan in kan thlaktleng thlang ding a si. Curuangah zumnak in thil cangthei lo mi kha thil cangthei ah kan can sal ding; kannih cu Khrih ih duhdawtnak ruangah amah thlunnak ding ahcun ziangvek ih buainak a ra thlen khal a sile kan thleng aw ding a si.

Luka 18:27
27. Jesuh in, "minung hrangih a cangthei lo timi hi Pathian hrang ahcun a cangthei a si," ti ah a ti.

Filipi 4:13
13. Khrih ih i pek mi cahnak thawn ziangbangtuk hman neh theinak thazang ka nei zo.

Johan 14:15
15. Jesuh in "keimah in duhdawt ahcun ka thukam pawl nan thlun ding."

[22.52]

Mi Phun Thianghlim, Siangpahrang Ih Puithiam
(1 Piter 2:5, 9) Hi hi ni thar leh thil thar kan tuah ding mi thurelnak a si. Kannih cun a thenthek aw zo mi pawl kha kan sarkhawm thluh sal ding a si. Simlawknak thu lole thlarau laksawng pawl kan ti hloh thluh lole kan hman cem thluh khal a sile kan tuan ding mi thil a si. A darhdai aw mi pawl kha bawm khat sung te ah kan san leh sal cio kei uh.

[22.53]

Pehtlaih Awknak Leh Rongbawl Hna
Tulai san cu mangbang thlak takin cakuat pawl hi computer in email thawn a kuat theih thluh. Khrihfa ca pawl lawng hi cu rel langsuah lomi siseh hman nawn lomi pawl khal siseh hitivek cun tuah ding a silo. Insang kawhhran tin hin, tualsung kawhhran pawl thawi pehtlaih awknak ah hin tha tei kilhim cio ding a siih cuisin ram sung ahcun ramleng zomkhawm awknak tiangin kilhim cio ding a si.

[22.54]

Aw khumnak cet fate zet pawl hin kawhhran awnmawi le awmawi dangdang pawl kha pakhat le pakhat theihter aw ton dingah mi a tidanglam in mi a ti thar thei. Himi pawl hi thlirsalnak ih a thabik mi cu hiti ih thil a ra can tikah a tanglai mi a dang pawl khal an corcer thluh ve. Nang teh nan assembly khawmpi can ah hla thar pawl kha Ghana tong, Nigeria lole India tong tivekin nan sak ve dah maw?

[22.55]

Thusuhnak hi pakhat cio ih kan san tikah leh a dik mi Khrihfa unau pawl hnen ihsin email cakuat pawl kan ngahnak hi rongbawlnak hrangah a rinum mi rualpi thabik ah an rungcang a si. Pakhat nu hi rualpi ngaina mi a si ruangah midang pawl pehtlaihnak kha ramsung ah siseh ramleng ah siseh a tuah in a hawl ciamco. A mission ram hrangah thusuhnak pawl hi ni thum sungah a let ringring hai ih thusuhnak let lo in a um dah lo.

[22.56]

Kan member nu midang khal in a mission calai leh hla thar pawl hmuahhmuah hi kan zung computer in file ah a ret ciamco. Cutin calai lam ih a hnatuannak ruangah kan kawhhran sungah thlarau khat ah thukhat ah in tuah thei a si.

[22.57]

Kan kawhhran member pawl hin awnmawi lam ih rongbawlnak talent an co hai vekin a zir khal an paih. Pathian ih pek mi rongbawlnak thuhla hrangah ziangtik lai can khalah man-cia in an um ringring a si. Mi zokhal zir a duhtu pawl hnenah tikcu can bikhiah sakin zirh can tla ruat in a dangdang an zirh khawm hai.

[22.58]

Cutin email thawi kan tuannak kawhhran dang pawl hi kanmai kawhhran sungkua ah kan relcih hai ih, tulai kan san rori ahhin kan tongaw thei hai a si. Zokhal hi hnatuannak ih rin a umtu pawl cu Bawipai cabuai parih pacang raltha pawl an si. Cu tiin calai lam ih pehtlaihnak an tlaksam pang hman ah assembly in thlauthla hai lo in kan pehtlaih awk sal thei lai hlanlo ca in pehtlaihnak kan tuah ringring thotho a si.

[22.59]

Cutin kan hnenih a totu pawl cu awnmawi ngaina tu pawl an si. Kan hnenih a teltu pawl cu hla phuah thiam, bezai ngan thiamtu pawl leh zuk ngan thiamtu pawl khal an si fawn. Cuitlun ah hlasak thiam leh ca nganthiam pawl, zirhtu pawl le rongbawlnak hrangih mi thurawn tlak pawl hlir an si. Hitivek mi pawl hi kan mamawh bik mi cu an si. Nauhak pawl leh thalai pawl hrangah thuanthu tawi ngan mi calai lam kan mamawh hrih. Kan tul bet mi cu Bible ih tahthimnak thu thawi a pehpar aw mi thuanthu le bezai ih ngan mi thuanthu lole hivek tuan duhtu pawl kan tul lai. Zuk ngan thiam lole suai thiam khal kan duh lai ih midang ngan mi vekin zuk lam ihsin thuanthu phuan thiamtu lole thlamte lak tivek khal ih kimcang takih tong in silo'n thuanthu rel
theitu ti pawl kan tul a si. Thusimnak thu thar awnmawi thangthatnak kan duh fawn ih, pum a pe awtu le Pathian duhtu pawl kan poimawh ringring a si.

[22.60]

Mi hrekkhat hin, keicu thuanthu ka ngan dah lo, zuk suai leh bezai ngan khal ka thiam lo, ziangha ka ti ding? a ti men ding. Anih kha a ngan lampang ai in thuanthu rel lam ah tla'n a neh sawntu tla a si men thei, lole thuthang ca leh thuanthu ngan mi rak kilh khawmtu lole midang ih
rel mi tahthimnak thuhla pawl rak finkhawmtu tla na si thei a si si. Cu lole nang cu a thekdarh aw mi pawl lakih thu va simtu lole pakhat hnu pakhat sim sawngtu tla na si men thei hokhaw. A thenhran aw mi pawl kha sar kirsal aw.

[22.61]

Kan assembly sung ahhin kan theih ding mi cu laksawng, talent cotu le mithiam pawl an um ti hi a si, cubang pawl cu an tuldan vekin zalen takih cangvaih ter ding an siih mahte todelh aw lo pawl kha bawm hai ding an si. Hi fang ahhin kut zungthiam pawl, sursak thiamtu, lectric lam thiamtu, cet tuah thiamtu, computer cet lam thiamtu ti pawl hi kawhhran sungah lakkhawm hai ding an siih cutivek in a thiam zet mi sibawi, nurse pawl leh sihni ti pawl thawn tuankhawm ding a si.

[22.62]

Kan tul hrih mi cu kan unau pawl dang hnen ih pek ding mi Kawhhran upa kutken cabu timi zem suahnak ding le hnatuannak ih hman thei mei ding mi pawl kan duh lai a si (Bung 20 nak ih ngan mi "Thurin Dik" timi ah khan kan hmu thei, thimnak ah- "Sal Pawl Lakih Sal," catlang [20.13] in [20.16] tiang ah).

[22.63]

Mi hrekkhat cun nunau mipa bangrep awknak an ngai poimawh ih cuisin mipa lole nunau mithiam kha an hrilsuak. Kum upa deuh pawl an kokhawm hai ih an tlin a sile zirhtu ah lole hmundangih neih awknak lamah thuron dingah, sumpai kilkhawitu ah, tleirawl mizia lamah rit theih
lam leh nupa sualnak lam thu ih an thu rawn dingah hna an pe aw theu.

[22.64]

Cu tivekin nunau kum upa deuh pawl khal an tlin ve a sile zirhtu, tha petu lole thuron dingah hman ding an si lole nunau nauta deuh pawl kha fate kilkhawi dan thawn pehpar aw in thuron petu dingah, insang tuangtimnak lamah, sumpai kilkhawinak lam, neih awknak thu, rit theih thil thu lam leh nupa sualnak lamih kilven awknak thuhla tla zirhtu dingih hman hai ding an si. Cun nunau upa lam deuh pawlin pitar pawl leh tleirawl hnenah Pathian thu ih thazang peknak neih ter hai ding an si. Cuitlunah mithiam hleice deuh leh zirh theitu pawlin nauhak pawl khal kaihhruai hai ding an si. Lungrualnak, duhdawtnak, cahnak leh thilmak pawl hi tuah ve dingin Thuthlung Thar kawhhran hin in hngak ringring a si. Kan zatei kan tulsam mi bik cu ol-ai tei Thuthlung Thar dungthluntu pawlih kawhhran ah duhdawtnak thawi kir lehsal ding hi a si. Thusuhnak tang lai mi cu kannih teh fehtlan thei kan tum thlang maw (Rom 11:29)?

[22.65]

Ralrin Peknak
Himi bungcang ih kan tarlang mi hi a taw thawhnak lawng a si lai; Bawipa'n ruahnak dang tampi in pi vivo lai ding. Hi tongkam pawl hi kan unau hrekkhat pawl tla cun an thei zo ko ding, an theih pekte ahcun an phur hluahhlo vek nan a rei deuh vivo tikah nuam tete'n anmah ten an diriam in an ril ngal vivo hai a si. Voi hnihkhat cu thil hi an thleng aw ko ding, a sinan mi thawi an fehtlang theilo tikah an ra kir leh sal theu. Mi hrekkhat pawl cun an thlun theu a sinan unau hrekkhat pawl hin an sinak an lonsak theu. Mipum an mal ter rero cingin, unau hrekkhat pawl cun an ruahnak leng thil pawl kha a tak ih tuahsuak an tum lai thotho. Mi hrekkhat ve thung cun manglam thil vekah an ruat ih, suangtuahnak men, ngaihtuahnak men le khurkhaw ruattu men fang a si an ti. Hitivek mi pawl cun thu an theih tikah thu elawknak men, ngaihtuah pi tlak thil a silo ti in an pom duh lo, thitha in an thu an ngaihtuah sak duh lo ih an hnawl san men theu. Cubang pawl hnen ihsin leitlun ih mi zapi theih mi an nun thuleng tongkam ngan mi in ka thu kan cawlter ding.

"A riahsiat thlak bik tongkam lole ngan mi ca cu hi pawl hi an si, Thil ziangkim hi an kim thluh leh ding" ti mi hi a si.

<Bung Hmaisa I A Sung Um Thu I Bung Neta>