DEHTU LEH SASEH

DEHTU LEH SASEH

Hminsin: Cangantui dinhmun theifiang dingin, Casiartu Hnenah timi hi siar hmaisa aw.

Then Khatnak

Hrinhram Ihsin Leemawknak

[23.1]

Kawhhran hmaisa pawl kha cu tihnung za Setan ih harsatnak peknak lakah leh thim khawzing sungih hnekluhnak sungah an rak um. Setan, hi leitlun pathian (II Kor. 4:4) cun a rak do hai. Cutikah Cungnungbik Bawipa cun Setan ih ramri kham mi le hi leitlun ih a hnatuannak lak ihsin a rung cangvai ve. An lakih A cangvaih men lawng silo in Setan ih ralkap burpi sungih ta rori tiangin a lakkhawm sak ve. Setan thupeknak hnuai ih ta kha ralkap pakhat hman ih bom pi velo in A nawr sak vivo ih nun thleng thar tete tla an um rero. Hiti ih a ralthiamnak ruangah Setan in a rak neh theilo. Thluntu zohman um lo Setan ih thuneihnak ihsin an thlarau luatnak a pe hai; Setan cu a duai vivo ih, culai ah Pathian ih milai cu an karhzai sinsin. Siangpahrang lak ih Siangpahrang, Bawi lakih Bawibik Khrih cun raldonak cu ralkap bur pakhat vekin a tuah. Hi ti ih a ti vivo a si ahcun a Lalram a dinso vivo ding ti kha Setan in a thei ve. Cuti Pathian ih tumtahnak cu Setan in a neh theilo ih, a hloral cuahco thlang. Anih cu vancung ram ihsin hlonthlak a si zo ruangah hi leitlun ih hmun leh ram ahhin neh ding le tibuai ding a hawl rero a si.

[23.2]

Hi Bawipai donak ruangah Setan cu a thin a ling tiatia ih, cutikah anih cun A thihnak thu tongkam kha minung in ringhnget nawn lo ding zawngih do dingin thuruahnak a nei. Khrih a lehrulnak ding hrangah a phunphun ih hnaihnoknak pe dingin leh tibuai dingin a ruat. Hiti in Setan ih donak cu tam in le a phunkim hmanseh thil phun thum hmangin a bik takin a rak nam ciamco dah zo. Cui a rak nam ciamconak hmun a ralkap burpi kha kawhhran (ekklesia) a siih a lu cu Khrih hi a si. Tuitum ah hi a rak namnak thil phun thum hi lo ruah ka duh. A pakhatnak cu "Hrinhram ihsin lem awknak", a pahnihnak ah, "Nicolas Thluntu Dinhmun", ti le a pathumnak ah cun, " Jezebel Thuthup" ti in hmin ka phuah hai. An zate hin dungthluntu pawl san hlanih rak umcia mi pawl hlir an si, a sinan tui ni tiangih mi tibuai tu pawl hlir an si hai. Curuangah tui ni ih Khrih dungthluntu, Thlarau ih hruai mi pawl hrangah pakhat ciar in an thuhla tarlang ka duh ih annih khal ih an pom ding mi hlir an siih cutin hi mi nunrawng tak kan ralpa hi hlohlo tahrat inawhhran tisiat ding lole ticah lo tumtu pa donak ding hrangah a si.

[23.3]

Setan Ih Raldo Dan
A tleu zet mi vancung mi (I Kor.11:14) bangih a tuah aw thei mi pa a si vekin Setan hi hna a tuan tikah mangbang thlak takin a hmuihmel a thup thiamih a silo bikin beiseinak nei ding talin mi a tuah ringring. Amah rian dingin Pathian mi le fa pawl kha sakhuanak thinlung nei dingin thawnginn ah a hranhram in mi a thla ih a thangkam mi sungah saseh vekah mi a tuah thluh. Mi hrekkhat pawl a ral relhnak thang sungih an tannak thu pawl kha ruat tha ringring aw, ziangkhaw sawn nawn lo dingih lem in a bum zok rero a si. Hiti ih mi a nam ciamconak hi, "Hrinhram zawngih lem awknak" kan timi a si.

[23.4]

Khrihfa mi tampi cun thlarau lam ih an thlawsuah co mi kha hla thawn, "A hmin cu Yahweh" ti in lole "Bawipa cun Jerusalem a Dinsuak" ti in an thangthat. Mi tampi cun hitin hla thawn an cawimawi hai ih Hebru tongin kimcang dik takin thu thawn an sim tlang hai. An tumtah mi cu thukam hlun in thukam thar tiangin peh lan an tum vivo. Leitlun hi thlarau in thlakthleng an zuamih kan biaknak sakhaw sungah tla'n Hebru pawlih tidan ti in ngai awknak ih zutmetawknak tla an run kengkawh lut. Hiti ih an tuahnak ruangah biaknak thangthatnak cu sa lo dai lo in a um ih, kawhhran hmaisa pawl nun kha mi a ruat ter ih lung mi a ti leng. Cutheh hnu in kan kawhhran hruaitu hmaisa pawl hnin theih lole thawn theih lo mi pawl kha Hebru mi pawl hlir ah kan can thluh, a si ko lo sawm? Cutivek ih biaknak le thangthatnak pawl hi leitlun ih thabik leh cawntlak bik vekah kan ruat ih kan hmang cio hai. Ziangruangah a si pei? Ziangahtile hitivek cun kiangkap ngaisannak thuthang tha in coter. Ziangtin a si hrih ding?

[23.5]

Mi tampi in tulai kawhhran ih hrampi hi thukam hlun a si tiin an zum. Hihi thudik a si maw lole kan kawhhran pawl hin Khrih ah hram an thla cio maw? Judah biaknak hram hin mi rundam theinak huham a neih a sile ziangruangah Pathian in a fapa neihsun pek a tul? Ziangruangah
Pathian ih a kawhhran (ekklesia), a hran te ih a kawh mi pawl kan tulnak? Thuthlung Hlun hi thlarau thutak langfiahnak Thuthlung Thar ih phenthlam thutak a si timi elnak thu hi theih theilomi thil a si. Ziangkhal a sile cuti ih Thlungthar kha Thlunghlun ah hram a toh ti ih kan pom cengmang a sile Pathian ih zangfahnak thu khal hi dan thu parah a hram a bun ve tinak a si. Cutivek ruahnak cu Thuthlung Thar thu zirhnak thaw cun an halh aw hlehle a si. Thuthimnak ah:

Rom 7:6
6. Sikhalsehla a tu ahcun Dan ihsin kan luat zo; ziangtin tile sal ih in rak tuahtu dan hrang ahcun mithi kan si zo. Ca in ngan mi dan ih lamzin thlun thawn silo in Thlarau ih in hmuh mi zin thar sungah Pathian kan rian a si.

Rom 9:30-33
30. Cu a si ruangah, hitin kan sim; Pathian thawn rualremnak tuah a tum dah lo mi Zentel mi pawl cu an zumnak thawngin Pathian thawn an rem aw zo.
31. A sinan Pathian ih minung pawl, Pathian thawn rualrem duh ah dan a hawl rero tu pawl cun cui remnak cu an tong lo.
32. Ziangruangahso a si? Zumnak rinsan lo in an tuah mi an rinsan sawn ruangah a si. Cuti cun, " bahnak lungto" parah an bah a si.
33. Cui lungto thu ah Ca Thianghlim in; " Zohhnik, Zion ah lungto pakhat ka ret, cumi ruangah mi tampi an bah an sawn ding, cui lungto in mi a tlukter hai ding, sikhalsehla cumi a zumtu cu an bei a dong lo ding," ti ah a ti.

Rom 10:4-5
4. Khrih in dan cu a cemter zo ruangah zokhal a zumtu poh cu Pathian thawn rualremnak an ngah a si.
5. Moses in Pathian thawn remawknak cu Dan thlunnak thawngin a si, tiah a ngan ih, "Zokhal Dan ih thupek mi a thluntu cu a nung ding," a ti.

Galati 5:3-4
3. Ralrinnak thu kan nolhsal ding; zokhal vunzim a tan ter awk a si ahcun dan a zaten a thlun theh a tul.
4. Nanmah lakah Dan thlun tahrat in Pathian hmai ah thiamcoternak ngah a tumtu cu Khrih thawn nan pehzom awknak hri nan sat tan zo a si. Culawng silo, Pathian zangfahnak ih lenglam ah nan thleng zo.

Hebru 8:6-7
6. Sikhalsehla nannih tuan mi hnakin a tha deuh mi Puithiam hnatuannak cu Jesuh hnenah pek a si zo. Pathian leh a minung karlak ih Jesuh in a tuah mi thukamnak cu a tha deuh mi kamawknak a si bangtuk in a puithiam hnatuannak khal cu a tha deuh mi a si.
7. A hmaisa thukamnak ah famkim lonak um hlah sehla a neta deuh ih thukamnak cu a tul lo ding.

Hebru 8:13
13. Hibangtuk in thukam thar thu Pathian in a sim ruangah a thukamnak a hmaisa cu a hlun ah a cang zo; cule a hlun zo mi leh a tet zo mi pawl cu a rei hlanah a hloral ding a si.

[23.6]

Hi bungcang thawi a bangaw mi tampi a um lai, tawi takte ih zirh ding a tam tuk. Pathian cun minung hin amah le mah a duhdwt awk zia hi a rak thei cia ih a catuan remruahnak sungah minung ih cah lonak sualnak kha a rak ruatcia sak zo. Zianghman a silo mi minung hin thil titheinak nei lo hmansehla amai dingfelnak khan Pathian hmai ah huh awk a tum aw thotho. Minung ih uanthuannak hi khekkuai dingin leh a sinak sualnak mizia hmusuak aw thei dingah khawrtu a um a tul ti kha Pathian in a thei. Cui a khawrtu kan timi cu dan hi a si.

Galati 3:24-25
24. Curuangah zumnak thawngin Pathian hmai ih thiamcoter mi kan si lehnak dingah, dan cu Khrih a rat hlan sung in khawrtu a si.
25. A tu cu zumnak tikcu a ra thlen zo ruangah dan cu in khawrtu a si nawn lo.

[23.7]

Misual dan thu hnuai ih retnak hi, minung hi Pathian ih dan thianghlim a zawh theilo ti thei cingin taksa dan ih nung mi a si. Minung hin amah te'i hawlsuahnak in thu a thlun theilo ih, fapa tlan hlo pa thawn an bangaw, a parah vansiatnak lawng a thleng sawn a si. A tithei mi sawn cu ngaithiamnak thu kha a Pai hnenah dil in, van ih a Pai hnen lawngah a ngah thei a si. Dan thu cun minung ih cah lonak le tlin lonak a lailang ih curuangah Pathian zangfahnak in dawi hloh a si hnu A zangfahnak cohlan sal leh ding hi Pathian ih duhbik mi a si. Hi thukam thar zangfahnak cu run tuaithar in midang pi rak si zo hnu kha thukamnak tha sawn a run tuahsak a si.

Hebru 7:22
22. Hibangtuk ih an dan awknak in Jesuh cu a tha deuh mi thukamnak a-mah-khan tu a cang fawn a si.

Hebru 8:6
6. Sikhalsehla nannih tuan mi hnakin a tha deuh mi puithiam hnatuannak cu Jesuh hnenah pek a si zo. Pathian leh a minung karlak ih Jesuh in a tuah mi thukamnak cu a tha deuh mi kam awknak a si bangtuk in a puithiam hnatuannak khal cu a tha deuh mi a si.

Hi thukamnak hi Pathian ih fapa neihsun ih pek mi thisen in a hram a thokih a thawhlehnak in a run ti famkim.

[23.8]

Dungthluntu Pawl
Hnial ruallo in dungthluntu pawl kha Judah mi hlir an siih Hebru pawl cun an Hebru dan a si mi leh an phunhnam dan pawl, an puai ni pawl leh an ni thianghlim pawl an ul. Taksa in vunzim an tan ih, an hminsin aw aw, Abraham ih tefa vekin an ruat aw hai. Cutin Judah dan ih mi ruh deuh pawl kha Khrihfa ah an thangharh vivo ih an dan ih an ngaisan le ulh mi leh thlun mi dan thu pawl ah thusuhnak a rung suak vivo thlang. Hi thusuhnak pawl hi Judah pawl ih tuah mi hmaisa ah a rungcang ih Judah Khrihfa pawl hmuah a ti mangbang thluh, Zentel pawl khal Khrihfa, Pathian insang ah an tel ve thlang, ih theihpi mi an rung si ve, cutin Thlarau Thianghlim in a umpi ve hai a si. Anmah te thuthennak nei in an rung um. Hi thukam thar can ahhin thukam hlun dan leh nunphung pawl hi paziat ha hman thei mi um lai hrih? Zentel pawl lakah teh ziangtluk thathnemnak a pe thei? Judah pawl leh hnam dang Zentel pawl hrangah teh tuah ding ringring tlak thil a si maw? Dungthluntu pawl hin anmai can lai ih Judah pawl dan le an nunphung pawl hi kawhhran sungah an rak zirhter hai a sile tulai ah a rung um vivo ding. Ziangah a si pei? Ziangruangah tile hi hruaitu hmaisa pawl hi Judah pawl nunphung ihsin rak piangthar an rak si hai lo. Ziangruangah hitin Judah pawl dan hi kawhhran sungah nasa ten an rak hmang tile an dan khan a ciahneh tuk lai ruangah tlan a si theilo ding maw? An tel lo men lawng silo in Kawhhran sung khalah an zirh awk tuk lonak ruangah khalah a si.

[23.9]

America mi pawl in an hnam dan ih an hman mi Lungawi Colhpi Ni tivek hi anmai phunhnam hrang lawng a siih pawl dang zomkhawmnak ti vek pawl thaw cun kaihhnoih awknak an nei lo, cuvek in Judah pawl in an dan ih an tuah mi le an ulh mi ni pawl cu midang nunphung thaw cun zianghman a kaihhnoih aw ve lo. Judah mi pawl hin an phunhnam dan ih an ulh mi ni ai in miphun hleice kan si an tinak a thuanthu zawngih ni tla an ulhnak hi a sual sawn ih hitivek hi leitlun kawhhran Jesuh Khrih ih kawhhran sungih putluh tlak a si nawn lo. Mexico mi pawl cun an zalennak ni kha September thla ni 16, sun ah an hmang ih America mi pawl cun July thla a zarh linak ah an hmang ve thung, Judah mi pawl cun Izip sal ih an luatnak tikcu can an Lantak Puai kha a thla khatnak thla ni 14 (Abib) sun ah an hmang. Hi ni pawl hi kawhhran sungah hman ding ti a silo ih himi pawl cu ram thianghlim siangpahrang ih puithiam pawl a si mi in kanmah le kan nunphung dan ciar in kan dan vek ih kan serh leh sang vek in leh kan tuahdan kelte ih tuah leh hman ding lawng a si. Hi Khrih ih ram thianghlim hmun ahcun Judah mi ti a um lo ih Zentel mi ti khal a um nawn lo a si. Khrih kha kawhhran lu bik a siih duh bulce le voh bik hleice tivek khal a um nawn lo a si.

I Piter 2:9
9. Sikhalsehla nannih cu hrilcia mi miphun, Siangpahrang ih puithiam, miphun thianghlim, Pathian ih miphun bulce an si,

Galati 3:28
28. Curuangah Judah mi leh Zentel mi ti ah thleidannak a um nawn lo; sal leh a luat mi karlak ah siseh, nunau le mipa karlak khalah siseh, thleidannak a um nawn lo.

Kolose 1:18
18. Kawhhran cu Khrih ruangpum a siih Khrih cu a lu a si. A pum ruangpi nunnak hrampi cu Amah Khrih a si. Amah cu Fapa tir a siih ziang hmuahhmuah lakah pakhatnak le a zik a si ringringnak dingah thihnak ihsin thawhter a si zo.

Dungthluntu 10:34
34. Piter cun a thawh ih, Pathian cun zozo khal bangrep ten mi a zoh a si, ti kha a tu ihsin ka thei.

[23.10]

Ziangruangah Zentel kawhhran pawl lole kawhhran dangah, Zentel lole Judah pawl kawhhran sungah Lantak puai, Pentikos puai, Tawtawrawt puai, Puanthlam puai, Hanukkah lole Purim puai tivek pawl hi kan tuahnak ding san um? Pentikos puai cu kumvoi puaipi a si, Tawtawrawt puai cu, kum thar puai tuahnak, Puanthlam puai cu ramtiam ih umtu pawl hrangah, Hanukkah cu ralkap pawlih ral nehnak leh Purim puaipi cu Lalnu Ester san lai ih thah ding hngakih thurel cia zo mi pawlih rak tuah mi puai a si. Hibang pawl hi Judah pawl hrang ahcun anmah le sidan vekin san leh vang an nei cio hai nan kawhhran hrang lawngte ahcun ngialngan ih hmailam thil ra um ding hmuhsaknak hrangah zianghman ti duh le tisan an nei cio hai lo.

[23.11]

A tu cun kannih cu leitlun pumhuap in ram khat ih puithiam thianghlim ah tuah mi kan si. Taksa pumkhat Bawi pakhat, zumnak pakhat, Pathian pakhat le Pa pakhat tlunah kan nei ih amah ihsin a zaten an si thluh a si (Efe. 4:4-6). Curuangah kannih cun Yom Kipper puai, Rualremnak ni puai, ran thisen ih thawi awknak ti pawl hi kan tuah ding mi an si nan, tufano thisen ih ngaidamnak co zo hnu ah, A Fapa neihsun co zo si in kan tuah hrih lai ding maw si? Tuah lamlam hlah e!

[23.12]

Judah pawl dan le nunphung hi dungthluntu pawl in an thehlarnak kan hmu thei maw lole kawhhran sungih biakdan ah lole Thuthlung Thar Cabu sungah teh hmannak kan hmu thei maw? Hihi ziangruangah a si pei? Kannih hi Thuthlung Thar Cangantu kan silo, Judah pawl ih nunphung le dan pawl ngantu khal kan si hai lo a silo maw? Himi pawl ngan ih kaihruaitu ding khal kan silo ti aw? Judah dan kan thlun a sile an nunphung lole an serh leh sang pawl hi kawhhran sungah kan run hmang vivo lanta ding, hitivek hi kan hmang cio lo a silo maw? Cu aiin a
ti awtu pawl hin "vun zim tannak" leh a thildang tiangin kawhhran sungah run ken luh an tum theu.

[23.13]

Hrinhram zawngih thlem awknak hin nasa zetin hmakhatte ah mi a fimvar ter ih, Piter le Barnabas pawl tiangin thang sungah an rak awk ngah (Gal. 2:11-13). Dungthluntu ropi Piter khan thil a rak ti sualnak kan hmuh tikah kannih khal ziagtluk in thlem kan ol ti kan thei thei. Thutak kan timi hi thil thangtlam te a siih a tlaitluan in a dik mi a si. Judah pawl ruahdan ahcun annih kha Pathian hnamthlan in an ruat aw ih Khrih khal kha a tlaitluan in ol-ai te ih ngah mei dingin an
ruat aw aw (Rom 2:28-29). Israel pawl hmuahhmuah Pathian ih ram thianghlim, kan timi cu Israel ram hi a silo, mi phunhnam umnak ram, hi a silo, ziangahtile Pathian ih ram thianghlim kan timi cu A kawhhran amai kawhhran ngei sawn hi a si (Rom 9:6). Tulai san ahcun Judah zumtu le Zentel zumtu ti a um hran nawn cuang lo, Khrihfa pakhat lawng a um. Judah khrihfa le Zentel khrihfa pawl hi kan bangaw thluh ih thlarau ah Israel thar kan siih, Abraham le Khrih thawi roco tlangtu ding kan siih, tu ahcun a mi hril ah kan rung cang ih a hril mi phunhnam ah kan rung cang a si.

Rom 4:13
13. Pathian in Abraham le a fate pawl cu, hi leilung hi na ta a si ding, ti ah thu a kam tikah Abraham in Dan a thlun ruangah a timi a silo, sikhalsehla Abraham in a zum ih Pathian in miding ah a cohlan ruangah a si.

[23.14]

Voikhat cu Pathian mi pawl lakah nasa te ih cangvaihnak a rak um, duhdawtnak hmaisa tiin an ko aw ih hmaisa hnatuannak ah kirsal ih a tluangtlam theibik in an um ih anmah cu kum zabi pakhatnak ih dungthlun kawhhran pawl kha an si (Thup. 2:4-5). Voikhat leh cu Setan pa hin kawhhran hlun lai ih mi ti kherkher Farasi pawl bangin vunzim tannak thu in kawhhran a run dodal ciamco. Cubang pawl cun phunhnam dan ih thukam hlun leh thisen ih lei mi thukam thar kha an run cawhpolh ciamco. Awnmawi taktak an hmangih thiamtak in kawhhran sungah Saam hla tla hmangin an cangvai ciamco. Jesuh ih hmin kha Hebru hmin in an lei ciamco ih, "Yah Shua" timi hmangin leh an zirhtu pawl kha Rabbi ti in an ko aw hai. An zirhter awknak hi Thlunghlun dan an hmangih hlanlai ih Judah pawlih hman mi puai ni pawl kha an ul hai. Cutin kan lakah nuam tete'n in neih vivo hai ih mi thinlung hip thei zet le la thei zet mi pangpar vekin thinlung ah mi a luah vivo. Hebru thuanthu ngainuam taktak leh hla pawl thawn an thok ih an dan thlun ve dingin thiam takin mi thinlung lak an tumih kan ruahnak hmuahhmuah kha thukam thar ruahnak ihsin in laksak theu a si. Kawhhran hmaisa pawl ih biak dan kan cawng an ti nan a taktak ahcun an mi bumnak sawn a si. Kanmah tei' thu kan suhawk ding mi cu Galati 4:9 thu hin ziang thu a sim timi hi a si.

Galati 4:9
9. Sikhalsehla a tu ahcun Pathian an thei ngah zo, a si lole Pathian in a lo thei ngah zo, kan ti pei; cubangtuk hnu in ziangtin so khabangtuk thlarau tawntai leh thathnemnak neilo pawl hnen ih kir nan duh sal? An sal sisal ding cu ziangah so nan duh.

[23.15]

Zu thar (thukam thar) kha zu hlun (thukam hlun) tithawl sungah kan thun lehsal taktak ding maw si?

Matthai 9:17
17. Cuvek thotho in zohman in savun thawl hlun sungah sabit ti thar an thun dah lo; an thun asile savun thawl cu a kuai dingih sabit ti kha a zun hlo theh dingih savun thawl cu a siatral ta ding a si. Cu hnakin sabit ti thar savun thawl thar sungih thun a si ah cun siatnak zianghman um lo in an pahnih in a tha ding, ti ah a ti.

[23.16]

Dan sal hnuai ih um kir sal cu kan duh taktak cio maw?

Galati 5:1
1. Khrih in in luatter zo ih kannih cu a luat mi kan si zo. Curuangah miluat nan sinak ah khan fekten ding uh la sal cangsal nawn hlah uh.

[23.17]

Kannih teh Samson vekin mitcaw ko ih bum ton kan duh lai maw? Hitivek ih thilsual hi cu tuah hram hlah uhsi, a thang sung khalah awk aw nawn hram hlah uhsi. Himi hi ziang a si ti kan zoh ta duak kei uh. Thuthlung Hlun Ca siar le Hebru hla mawi tete sak hi a sual mi an silo. An pahnih in an tha veve ko a sinan Thuthlung Hlun ih phungdan pawl lawngte kenluh ding hi kan sian ding a silo, thurin pawl lole cawhpolh hnuaihni ih nunnak lole Thuthlung Thar ih thisen tlennak ti vek thu pawl khal hi kan thlun ding mi an silo.

[23.18]

Zarhtin Sabbath Thusuhnak
Judah miphun (Hebru) cun Sabbath ni an colhni hi Zirtawp zanlam ni a tlak ihsin Zarhte sun ni a tlak tiang hi an phunhnam dan ih an ulh dan a si. Israel fate pawl hin an pupa dan in Sabbath ni an ul taktak a si ahcun an duhtawk ih tuah thei cu an si ko, a sinan hi thukamnak hi an
mah Israel pawl hrang lawngih tuahsak an siih Thuthlung Thar Kawhhran hrangah a silo ti kha cu an theih a tul. Himi cu phunhnam pakhat hrang lawngah Moses hmangih rak tuah mi a si ih annih cun taksa serh an rak tan. Himi hi Israel pawl hrangih rak tuah mi thukam hlun dan a siih cui dan cu thukam thar in a run khuh ih cumi cu a tha sawn mi le thutiam tha sawn ih hrampi khal a si fawn.

Suahlannak 31:12-17
12. BAWIPA in Moses hnenah,
13. Israel pawl hnenah, Keimah ih colhni cu nan ul pei, ziangahtile a cui ni cu keimah leh nanmah le nan tefa sin karlak ah BAWIPA keimah in nanmah cu keimah ih minung ngaingai ah ka lo tuah zo a si ti langternak ah hminsinnak a si.
14. Colhni cu nan Ul pei, ziangahtile nan hrangah thianter mi ni a si zo. Zokhal colhni Ul lo in hna a tuan a sile thah a si pei.
15. Ni ruk sung nan hna tuannak can nan nei; sikhalsehla ni sarih ni cu a thianghlim mi colhni a siih BAWIPA hrangah ni thianghlim a si. Zokhal sisehla a cui ni ah hna a tuan a sile thah tengteng ding a si pei.
16. Kumkhaw daih thukam a si bangtuk in Israel mi pawl in colhni cu an ul pei ih an tefa sin san khalah an ul ringring pei.
17. A thih ni cu keimah le Israel mi karlak ah kumkhua ih hminsinnak a si, ziangahtile BAWIPA keimah in van le leilung cu ni ruk sungah ka tuah theh ih ni sarih ni ah hnatuan lo in ka cawl hrangah a si, tin sim aw, ti ah a ti.

[23.19]

A tlun ih thu ih kan hmuh zo vekin Sabbath dan kha cu Israel fate pawl hrang lawngah a siih thlarau ih Judah fate (Pathian ih hril mi pawl) pawl thaw cun zianghman kaihhnoih awknak an nei lo, annih cu thinlung lam ih serhtan tu pawl an siih dan ihsin mi zalen pawl an si, thimnak ah- Zangfahnak dan ah miluat pawl an si. Hi zangfahnak cu leisak leh pek an siih Khrih in a tuahsak, cutin thukam thar sungah a hruailut hai a si. Kannih, a kawhhran pawl cu tu ahcun Pathian ih hril mi miphun ah kan cang ih Thuthlung Thar ih a sim vekin a hnuailam ah kan hmu thei. Kannih cu thlarau in Israel fate kan siih thukam thar ih Judah mi pawl kan si.

I Piter 2:9-10
9. Sikhalsehla nannih cu hrilcia mi miphun, siangpahrang ih puithiam, miphun thianghlim, Pathian ih miphun bulce nan si. Khawthim sung ihsin khawruah har za tleunak sungih a lo kotu Pathian in mangbangza thil a tuah mi pawl tlang aupi dingih hril mi nan si.
10.Tui hlan ahcun Pathian ih minung nan silo, sikhalsehla a tu ahcun amai ta nan si; tuihlan ahcun Pathian ih zangfahnak nan theilo; sikhalsehla a tu ahcun a zangfahnak nan co zo. Thukam thar hnuai ahcun kannih hi tulai san ih Judah pawl kan si.

Filipi 3:3
3. Nannih silo in kanmah sawn hi a dik mi vunzim tannak a cotu kan si; ziangahtile thlarau thawngin Pathian kan bia ih kan nunnak cu Khrih Jesuh thawn kan pehzom awknak ruangah lungawinak in a khat. A lenglam ih tuah mi parah zianghman rinsannak kan nei lo.

Rom 2:28-29
28. Thungai in kan ti a sile, zoso Judah mi taktak, vunzim tan ngaingai mi cu an si? A lenglam lawngin Judah mi siih vunzim tannak kha taksa parih tuah mi thil lawng a si ahcun Judah mi
taktak a silo.
29. A sunglam sawn in Judah mi, thinlung vunzim tannak a ngahtu pawl kha Judah mi ngaingai mi an si sawn. Cumi cu ngan mi dan ih tuah mi a silo, Pathian thlarau ih tuah mi a si. Cubangtuk minung cu milai hnen ihsin silo Pathian hnen ihsin thangthatnak ngahtu a si.

[23.20]

Israel fate pawl cu ti thianghlim mi an si, thimnak ah-Pathian ih hril hran mi a dangte ih vunzim tannak ih ret mi, Ama'n Abrahram hnenah thukham a rak pe. Hi thukham dan pawl cu Israel pawl hnenah Moses in an thlun dingah a rak pe hai ih, dan (10) a tel. Hi dan hin Israel pawl kha a fa le pawl ti a langfiang ter ih ram hmuahhmuah lakih ram cungnung ah a tuah ih an mipa pawl hmuahhmuah in an serh vunzim tannak in hminsin an rak si.

[23.21]

Hi Moses ih dan pawl lole an rak tuah mi pawl thukham pahra tel hin tulai kan kawhhran thar sungih hman a tul lai a si ahcun Israel fate pawl kha hi thukam thar can ahcun nemhngeh sal leh an tul ding. Thukam hlun ih serh leh sang dan pawl hmuahhmuah then hra then khat tel
in nemhnget salnak a um lo a sinan pahra sungah pakua pawl hi cu thukam thar sungah ti thar in an um a si. Pathian ihThukam Thar dan pakhat a hlawhtling lomi a um mi cu a dan thumnak Sabbath ni ulh ding cungcang thu hi a si, thimnak ah- zarhtin ih a ni sarih ni ulhnak cungcang thu ah a hlawhsam. Hi dan pakhat te hi cu thukam hlun ih Israel mi pawl hrang lawngah hminsinnak a rak si (Suah. 31:123-17).

[23.22]

Zarh khat sungih a ni khatnak ahhin kawhhran ah tonkhawmnak an tuah, thimnak ah- cui ni cu Pentekos puai a si (Pui. 23:15,16; Dung. 2:1-47). Hi ni can hi Bawipa Jesuh khan a dungthluntu pawl a thawhsal hnu ih a ton ni a siih (Jn. 20:19), cuitlun ah hi a ni khat ni hi Paul ih thusim mi a dungthluntu pawl in ngai khawm in sanghlom an ei tlang ni khal a si (Dung. 20:7). Cutin thukam thar cun tuah dingih a run fial mi cu then hra then khat pek ding leh Sabbath ni kha danglam deuh ih tuah ih ul dingin a sim a si.

[23.23]

Peknak thu thawn pehpar aw in: Then hra then khat pek hi thukam pakhat hman ah a tel lo. Hi thil hi taksa dan in Israel mi pawl in an ram sungih cawmdawl awknak ding hrangih an rak tuah mi a si. Milai somdawl awknak hrangah a si, a cawmdawl tu cu amah Pathian a siih run
tuah vivo dingih a fial mi, rual ban lo leh mi farah pawl hrangih tuahsak mi thil a si. Hi thil hi thukam thar hnuai ih fial mi a silo vekin thukam hlun khal ih tuah fial mi a si fawn lo.

Efesa 2:15
15. Judah dan cu thukam leh thupek mi pawl thawn a phiat theh. Cuti ih a tuahnak cu amah Khrih thawn an pehzom awknak ruangah miphun phun hnih cu miphun thar pakhat ih canter dingah a si. Cutin a tuah ruangah remnak a umter.

Kolose 2:13-14
13. Hlanlai ah nan sualnak ruangah le dan leng ih a um mi Zentel mi nan si ruangah thlarau lam ahcun mithi nan rak si. Sikhalsehla a tu cun Khrih thawn hmunkhat ah Pathian in a lo nung ter zo. Pathian in kan sual mawhnak hmuahhmuah in ngaidam zo.
14. Kan sual leiba ngannak cazin cu a sungih um mi, mi a temtawn tu dan terek pawl thawn thinglamtah parah khencih in a phiatfai theh zo.

[23.24]

Thukam Thar cun peknak thu hi danglam deuh in in zirh. Dungthluntu pawl hin then hra then khat peknak thu hi ziangtik hmanah an rak rel dah lo.

Dungthluntu 2:44-45
44. Zumtu pawl hmuahhmuah cu an pawlkom aw ih thurual zetin an thil neih mi tla an tawm aw.
45. An thilri neih mi le an hlawnthil pawl tla an zuarih an ngah mi tangka cu an tulnak vekin an zem aw.

I Korin 16:22
22. Zokhal Bawipa a duh lotu cu a parah siatnak thleng seh. Maranatha-Bawipa, ra thleng aw.
II Korin 9:7
7. Zozo khal a thinlung a thencat ngah hnu ah pe seh; sir awknak thawn pe hlahseh, ka tuanvo a si ti khalin pe hlahseh, Lungawi aipuang te ih a petu lawng Pathian in a duh a si.

Sabbath thu thawn pehpar aw in:
Rom 14:5
5. Mi pakhat in ni dang tampi lakah ni nikhat cu a thupi bik ah a ruat; cule midang pakhat cun ni hmuahhmuah cu an bangrep theh ti ah a ruat. Anmah ciarin an thinlung sungah fiangter ta haiseh.

Kolose 2:16
16. Cuti a si ruangah zohman in nan ei nan in ding thu ah siseh, ulh ding ni thiang thu le thla thar puai thu ah le Sabbath thu ah siseh, dan lo tuahsak hlah haiseh.

[23.25]

Vunzim tannak hin Israel phunhnam pawl a khihhmuh ih, cui pawl cu dan hnuai ih minung an si, a sinan himi an tuahnak hi sual a silo ih curuangah Ishmael le a cithlah pawl khalin an run tuah ve ih tuisun ni tiang hi dan hi an hmang ringring lai a si (Muslim biaknak thluntu pawl).

[23.26]

Kannih zumtu dik le Khrih dung a thluntu pawl cu taksa in vunzim tan ding in fial nawn lo a sinan Thlarau ih hnatuannak in kannih cu thinlung ih serhtan mi pawl kan si. Annih cun tu ahcun Thlarau Thianghlim ih hminsinnak leh Thlarau ih hrin mi an siih Pathian ram thianghlim cotu pawl an si. Cui lalram cu hi lei ahhin run thum a si zo ih annih cu khualtlawng le cambang vek an si, curuangah kawhhran ti in kawh an si, ti thianhlim mi miphun an siih hi leitlun minung pawl lak ihsin a dangtei kawh mi pawl an si, Pathian a riantu ding le a upat sunloih tu ding pawl an si (I Pit. 2:9,10; Heb. 11:13, I Pit. 2:11).

Romans 4:9-12
9. David ih a rel mi lungawinak hi vunzim tan mi pawl lawngih ngah thei mi a si maw? Si hrimhrim hlah! Hi lungawinak cu vunzim tan lo mi pawl ih co mi khal a si ve. Ziangahtile kan sim zo mi Ca Thianghlim in, "Abraham in Pathian cu a zumnak ruangah Pathian in miding vek ah a cohlang a si,"
10. Cumi cu ziangtikah so a si? Abraham in vunzim a tan hlan ah maw, a tan hnu ah so?
11. Miding ih cohlan a si hnu ah Abraham in vunzim tannak cu a tuah. Pathian in vunzim a tan hlan hmanah a zumnak ruangah miding ah a rel ti hminsinnak ah vunzim tannak cu a tuah. Cuti a si ruangah vunzim tan lo mi pawl an zumnak ruangih Pathian in miding ah a cohlan mi
pawl hrang ahcun Abraham cu thlarau lam ih an pa bik a si.
12. Cule vunzim tan mi pawl ih pa khal a si thotho; ziangahtile vunzim tan mi pawl cu an vunzim an tan lawng silo in, kan pa Abraham vunzim a tan awk hlan ih a nun bangin zumnak thawn a nung mi pawl an si.

I Korin 7:17-24
17. Zokhal Pathian laksawng nan ngah mi vekin le a lo kawh lai ih nan sidan vekin um ko uh. Cubangtuk in Kawhhran dangdang khal ka zirh.
18. Pathian kawhnak kha vunzim tan mipa in a pom a si ahcun a vunzim tannak hmaphe kha hlo dingin ngaihtuah duh hlahseh. Pathian kawhnak kha vunzim tan lo mipa in a pom a si ahcun a vunzim kha tan duh hlahseh.
19. Ziangahtile vunzim tan le tan lo kha a thupi nawn lo; a thupi mi cu Pathian thukham thlun kha a si.
20. Zozo khal Pathian kawhnak nan rak cohlan laiih nan sidan vek khan um ko uh.
21. Pathian ih a lo kawh lai ah sal na si maw? Na va si khal le poisa duh hlah!
22. Ziangahtile Bawipa ih kawh mi sal cu Bawipai miluat a si. Cuvek thotho in miluat cia Khrih ih a kawh mi cu Khrih sal a si.
23. Man pek in Pathian ih lei mi nan si; curuangah milai ih sal ahcun cang hlah uh.
24. Ka u le ka nau tla, Pathian ih a lo kawh lai ih nan umdan vek thotho ih Pathian thaw ih pawlkomnak sungah um ko uh.

Galati 5:6-15
6. Ziangahtile Khrih Jesuh thawn kan pehzom awk ahcun vunzim tannak siseh tan lonak khal siseh a dang nawn lo. A thupi mi cu duhdawtnak sungih hna a tuan tu zumnak lawng a si.
7. Nan feh dan a rak tha zet ko. Thudik thlun cu zo ih thu in so nan colh? Ziangtinso a lo lem?
8. A lo colhter tu cu Pathian a si ual lo. Anih cu nanmah a lo kotu sawn a si.
9. Tong thimnak ih, "Thilnu fate in sanghlom zate a tho ter," an ti theu mi a kim ngaingai a si hi!
10. A sinan nan hrangah ka bei a dong lo. Kan Bawipa sungih kan pehzomawknak ruangah hin nan thinlung a dangsuak lo ding ti cu ka zum zet ko. A lo tuaitam tu cu, zo a va si hmanah, Pathian ih thuthennak a tong ding a si.
11. Ka u le ka nau tla, ka dinhmun hi ruat hnik uh. Vunzim tan a tul a si tin thu ka sim ngai si sehla ziangahso hremnak hi ka tuar hrih? Cutin thu kan sim ngaingai si sehla, Khrih thinglamtah thu ka sim mi hi mi rilhbahnak ah a cang lo ding.
12. A lo hnaihnok tu pawl hi a net tiang an zin hi zawh lawlaw in an til tla per aw lawlaw haisehla ka va duh so!
13. A sinan ka u le ka nau tla, nannih cu miluat si dingah kawh mi nan si. Sikhalsehla cui luatnak cu nan taksa diriam ternak ah canter hlah uh. Cuhnakin duhdawtnak thawn pakhat la pakhat rian aw in bawm aw ton uh.
14. Ziangahtile Dan hmuahhmuah cu, "Nangmah na duh awk vekin na inhnen na duhdaw pei," timi thukham pakhat sung ahhin a kim theh a si.
15. A sinan hramlak ramsa bangin nan nungih pakhat le pakhat nan sik nan kheuh aw a si ahcun ralring uh, nan cemral leh ding a si.

[23.27]

Curuangah a tlun Bible catlang ih kan hmuh zo mi bangin vunzim khal tan lo, Sabbath khal ul lo cu lole then hra then khat pek dah lonak pawl hi thukam thar ih fialmi le a tha sawn mi thukam a si.

Hebru 8:6-13
6. Sikhalsehla annih tuan mi hnakin a tha deuh mi puithiam hnatuannak cu Jesuh hnenah pek a si zo. Pathian le minung karlak ih Jesuh in a tuah mi thukamnak cu a tha deuh mi kam awknak a si bangtuk in a puithiam hantuannak khal cu a tha deuh mi a si.
7. A hmaisa thukamnak ah famkim lonak um hlah sehla a neta deuh ih thukamnak cu a tul lo ding.
8. Sikhalsehla Pathian in a minung pawl a mawhthluk ih, "Bawipa in hitin a sim: Israel mi le Judah mi pawl thawn thukamnak a thar ih kan tuah ding can a ra thleng cing ding.
9. Sikhalsehla an pipu pawl an kut in ka hruai ih Izip ram ihsin ka suah lai ih ka tuah mi thukamnak bangtuk cu a silo ding. An hnen ih ka tuah mi thukamnak cu an thlun duh lo ruangah kei khal in zianghman ah ka siar hai lo," a ti.
10. Cule Bawipa in: "A ra ding mi tikcu can ah Israel mi pawl thawn hibangtuk in thukamnak ka tuah ding; ka daan cu an ruahnak parah ka ret dingih, an thinlung sungah ka ngan ding. Keimah hi an Pathian ka si dingih annih cu ka minung an si ding.
11. Zohman in an unau siseh an ram sungih an phunpi siseh, 'Bawipa thei uh,' an ti awk a tul lo ding. Ziangahtile upa bik in nauta bik tiang an zaten in thei theh ding.
12. An sualnak ka ngaidam dingih, an mawhnak khal ka cing nawn lo ding," ti ah a ti.
13. Hibangtuk in thukam thar thu Pathian in a sim ruangah a thukamnak a hmaisa cu a hlun ah a cang zo; cule a hlun zo mi le a tet zo mi pawl cu a rei hlanah an hloral ding a si.

[23.28]

Tui san Farasi pawl cun Jesuh hi Yashua tin an ko ding ih, Thuthlung Hlun leh Thar ih thu hrek khat pawl kha thlun tum in, Hebru pawl ih dan Sabbath ni, Judah pawl ih puai ni pawl an ul tum hai ih an zirhtu saza pawl kha Rabbi ti'n an ko, a sinnan an cangvaih dan hi Thuthlung Thar
Cabu cun khuitawk hmanah tha a peknak kan hmu theilo. Hi Farasi pawl hi a thokpek ihsin a lemte zawngin an rak cangvai ciamco hai ih cutin tuisun ni tiangah an tang lai hrih a si hi. Curuangah ralring uh, "nan ralpa cu kiosa bangin zo ha ka deh ding tiin a vaktawi ih a huk durdo rero a si." Anih hi "a tleu zet mi vancungmi bangin a thlakthleng aw thei" ruangah mi bumtu leh tu le tu tuphan per pa khal a si.

Then Hnihnak

Nikolia Ih Dungthluntu Pawl Dinhmun

[23.29]

Thupuan cabu a bung hnihnak ah, Jesuh in mibur khat thu Nikolia ih dungthluntu pawl thu voi hnih a sim ih an tuahtuannak le an thurin mi hi A hua. Efesa kawhhran hi an tuar theinak pawl ah a fak zet ih hminsin tlak zet a ti nan, cun Pergamum kawhhran khal hin hi thurin hi Balaam ih zirhternak ihsin an rak pompi ve. Balaam ih thurin zirhternak pawl a langsuahnak cu Pathian fale pawl hi a phunphun in Pathian kha zum dingin Nikolia pawl in an zirhter hai ih hi lei kawhhran pawl kaihruai ding hi a siansak hai ih, an duhtawk ih kilkhawi ih hmang dingah le a netnak tiang anmai tanghma sial ringring dingin Amah Pathian in a on hai a si.

[23.30]

Sinakkok biakinn ih tohkham hawltu pawlih thu kha Jesuh in a rak sim leh, cubang pawl cu anmah nemhngetnak le an sunlawinak lawnglawng hawltu an si (Lk. 20:46-47). Paul khalin II Korin 11:12-15 sungah a rak sim dah ve. Piter le Johan khalin an sim ve hai (II Pit.2:1-3; IJn.4:1). An ralrin peknak pawl hi kan pompi thei ve ding maw? Pergamum kawhhran sung ahhin Nicolia ih zirhternak thlun dingin le Balaam ih zirhnak thlun dingin zirhternak a um ciamco. Hi hi Setan pai lal tohkham retnak an si ti hi mak na ti ve maw? Mi hrekkhat pawl cun Nikolia ih zirhternak le Balaam ih zirhternak pawl hi an bangaw ti in an rel, a sinan an bangaw deuh lo. Khrih khan Pergamum kawhhran thu a rel ah khan hitin a ti, (Thup. 2:15). "Curuangah nang khal Nikolia ih thurin na pompi a ti." A tongfang hman mi, 'khal' (betbang), hin fehsual pawl ih dinhmun hi fiangfai ten an danglamnak A rel. Curuangah Pergamum kawhhran ah an pahnih in ziang an zirhter ti thu a rel hnu ah Nikolia ih dungthlun pawl hin ziang thurin ha an pompi?

[23.31]

Nikolia ih thuhla hi a hmin ih a duhsan a tumtah mi le a dungthluntu pawl ih cangvaihnak bak hi cu theihnak dang tampi cu kan nei lo, a hmin ih duhsan cu, ' minung parih nehnak' ti a si. A hmin kan hmuh vete hin minung pawlin thuneihnak an pe dingih, cule Nikolia a sinak a sorbawk ding a si. Kawhhran thuanthu khal khan hi a thuhla relnak hi a remti pi ih a rel tum mi khal a si. Kawhhran thuanthu a langdan kan zoh tikah a cangvaihnak hi a tir te ihsin a rak thlaktleng awknak kan hmu thei. Hiti ih thil a rak thlakthleng awknak ruangah ngainuam tak le mi thinlung latak thuhla pawl tla kan hmu thei, kan theih dingmi cu a tikcu le can cu tikcu can hminsinnak a rak um hlan ih ta an si ti kan theih a tul. Zinagtin a rak thlengaw ih Nikolia ih zirhternak a thluntu pawl in teh ziangtin an rak tuah ?

[23.32]

ThuthlungThar san hnu ih hruaitu hmaisa bik kan theih mi cu Clement timi kawhhran member pa a siih Rome khua ah a rak um. Clement cu A.D.100 ah khan a rak thi ih cucu kum zabi pakhat cemnet zawng kha a si. Korin khua ih a rak ngan mi ca pawl hi Thuthlung Thar bu siarlo
ahcun tui kan hmuh mi ca lakih a hmaisa bik rak ngan mi a si. Hi rak ngan mi ca pawl hi a rei hlanah kawhhran sungah dungthluntu pawl in an run thlun. An rak ngan mi ca pawl hi anmai san lai lala ah an hmang tangkai hngalh ih zo ih rak ngan mi ca hman hin mi pakhat rorelnak ih uknak (Pastor lole Upa) thurelnak a um lo ih a sinan mi burpi ih rorelnak (Pastor pawl lole Upa pawl) Bishop pawl tivek in Dungthluntu pawl ih ro a run sar aw sawng vivo a si. Smarna khua ih Clement a thih hnu ih a mahte lawng bishop ti aw pa Polycarp thaw kha cun ti le mei vek an si. Curuangah thuanthu kan zoh tikah kan theih thei mi cu dungthluntu pawl ihsin nasa ten hi thu hi an rak buaipi zo hai. Ziang a va si khal le hruaitu ding ahcun mi pakhat silo in mi burpi an si dingih mi in Pathian mi ti ih an nemhnget mi pawl an si ding a si. Tu cun, thuhla tuah hmang pawl kha thawn in an ai ah midang kawhhran hrangih tuanvo neiih thei awtu le a kaihruai theitu pawl in tualsung ah an hruai thlang a si. Kawhhran hin acozah hi a pompi vekin a sungih hnatuantu pawl khal hi acazah dan hnuai ih kaihhruai mi pawl khal an si ding a si. Hminsin tlak thil thupi zet um mi cu, kawhhran hi acozah vekin a relbawl aw dingih tlunlam ihsin a uk aw ding a si. A relbawl awk dan a thleng dingih a tuandan khal taksa pum vekin a tlakthleng aw ding (I Korin 12) ih Rom acozah vekin a kaihruai aw ding a si. A lu bik lawngte pakhat hnu pakhat in a thlakthleng aw ding a si. Jesuh Khrih ih taksa kawhhran ih lu cu Khrih a sinan minung kaihhruai tu ding kawhhran ih lu cu minung ih an hrilsuah mi Pathian mi a si ding a si. Hi ti in thlengawk ding a siih kawhhran ih thuneihnak sungah kaihhruai awk ding a si. Ruahnak le felfainak pawl hi dungthluntu pawl ih keneh a thlunnak le an thuzirh mi a thlunnak ding hrangah a thabik ih an thuneihnak zirzawnnak ding hrang khalah a hlawhtling bik mi a si, a sinan an hmabak lai mi cu thutak ih mi kaihhruai ding le kilkhawi ding lawngte ah hi cun an ti a hal deuh lai a si.

[23.33]

Nikolia ih thuzirhnak a thangso tikah mahte ih hotu sinak pek awknak pawl kha a thar te in a tan aw thok ih, milai tuahcop mi zung ihsin an dungthluntu pawl kha an uk ciamco thlang. Hi hmuh thei kawhhran hi hmuh theih milai ih kilvennak hnuai ah a tla ih Thlarau Thianghlim cu an phatsan hai. Curuangah tulai kawhhran sungah tuantlangnak tiin a ruangpi an din hai ih ziang thawn a bangaw tile Nikolia ih dungthluntu milem pi thawn an bangaw ih fihnungza tuahtu pawl an si. Hi Nikolia ih zirhternak hin tulai san ah nehnak co in kawhhran kha sal vek ah tuah tahrat in thuhla tawlrel dan a phunphun le ngaihtuahnak phunphun thawn a kaihreng thluh, a thurin leh a nunsimnak pawl, a thusal ter mi, leh a tidan kelte kha a tuahter ringring. A dincang awk dan cu a tha nasa nan Pathian thu ah a tlasam tuk lawmam. Zoh hruak ahcun mit a la zet nan a sungah thilri tak a um lo, thutak a zawi lo. Ziang thawn a bangaw tile tipithuanthum ti ih a ban nawn lomi vunnel tidai ngai vek khi a si. Thil ziangtinkim hi cu a rak tep ngah ve nan zianghman a tang nawn lo, an zaten an hloral thluh, an cemral thluh, a rak neihmi pawl khal an cemral thluh, Thlarau rak um zonak si hmansehla an cemral thluh zo a si.

[23.34]

Leitlun Leh Kawhhran
Kawhhran le leithlun hlavang tlang in an feh tlang
Tik le cu in thenhran hai
Leitlun luzing cungcin zaihla sak
Kawhhran thahlei zaihla aw sawn ve
" Ra law, na kut i san ti'n," leitlun cu vel a vun neih,
"Keimah thawn fehtlang ninglaw ti in."
Hmanseh kawhhran dik cun kut nemte thup in,
Awzai nem te'n, "aw!" a ti.
" Feh tlang duh nan karhla dan si ing ti ah,
Awzai nemte'n leitlun vun sawn ve.
"Ka kal lam cu zawhnuam ee,
Ni tleu camcin nuam diaidi."
"Na theih cia ka lamzawh mi nuam tuk,
Ka ruun sangka sangnuam kau;
"Namah le kei hrang hmun daih
Thawnsuk thawnso dualdo lang,"
Thlahrun nak kut leitlun in pharh ve
A kut nemte vun dawh phah;
A hlan rual hlun sawm ve in,
Awzai nemte sep ve phah:
"Na hruk puanzai dawh tak ngai;
Na hruk dingah Pale puan thlai pe ning law;
"Rimhmui dawh le pu pat hnipuan in thuam lang
Daimon na lu pawng sangah."
Hni le puan var duhthla la hmanseh
Kawhhran lung rethei mithmai
Pawl singseng mithmai tihnung
Huat thla laknak hnihsan hmel
"Hnipuan mankhung deuh mi thleng sal ing"
Hnihsiam bezai a vun sawn;
A var puan hlun hlit phoih in
Leitlun hrangah hlan ve ta
A mawi ngai pupat le puan mawi thawn
Rose par leh lung mankhung keplung;
A hmel samka thlai rem ngai;
Pu puan mawi ten ceimawi tak.
"Na inn hmun tualrawn hmun tha" tiin leitlun hlun zai ve ko sawh,
"Na hrang keimah telhthuam ing;
Pang pat le pupuan mawite thawn,
Mawi te'n lo siamrem sak ning tiah.
Cutin runinn nuam ah lawipi in
Ngaihnik hibang thil sunglawi;
Fanu fapa duhnung te hliahhlo,
Ar thisen leh sui vun thuam mi bang.
Runinn mawinak duhnungza zohnuam
Leitlun fale te pawl seilen nak runinn;
Lungawi hliahhlo zaihla awnmawi rem tlang in.
Aw dang silo thlacam aw si sawn.
Cung vanmi tla kawhhran hnen ra thleng,
" Na sual ka thei" ti bezai rung sawn.
Kawhhran khalin thu hnu vun thlir in
A fanau pawl ngai leh ta.
"Na kai thlun mi upa tluangtlam ngai"
Ti ah leitlun hlun in vel thangkam.
" Fale pawl tla thuanthu rapthlak in an thlem
An theih phan nak ih laiah.
"Katmei le tuarnak thu in,
Zan siartin in an hringhro;
"An hrang ruahsannak hlo viar bangin,
Hna ih ngainuam zetin an sim rel.
"Thil tha dang ih lemsiah in.
A tleu mawi le cak sawn mi,
" Milai dam theinak zo in len leh keici
Dongnak catuan ram thlen dan ding thu."
"Leitlun fa le kawhhran fa pawl nuam cen tlang,
Kutza kai le lungkhat pu te in,
A biak Mangbawi theihhngan in
Kawhhran tohmun zaihla vawr ve thlang,
"Lian ta luaimai thang ta luaimai ing
Duhtin kim in to hmun sawh thei ee,
Rian dang neilo nuam cen ding hngah lawng."
Leitlun in zokzet bia run sawn ve ta,
Nehsawh bezai run kheng lut riai ee,
"Kawhhran tlu ruaimai, Kawhhran mawite tlu ruaimai,
Tluangkhawn man zak leh keici ." ti in.

[23.35]

Hitivek riahsiatnak thu hi tuisun ni tiang a cambang ringring lai ih tulai kawhhran ding thar pawl le zirhternak thar pawl ah kan hmu thei hai a si. Hi tuahdan pawl hin tui kum thawnghnih sung tiang in uk hai ih Pathian ih minung pawl hi nuam teten kan hngawng in rek rero a si. Kan zaten dungthlun pawlih kawhhran cu kan si cio vek nan kan cemral vivo hai, a sinan cimih ti ni hi cu a um thei hrih lo a si hi. Sathau far vek cu kan si thei ngai lo a si hi. Ziangruangah a si pei? Ziangruangah tile Pathian in a on lo ruangah a si ko. Anih cun A thu tantu ding a minung a dinthar sal leh dingih, a hrekkhat silo in, a zate rori in a dinthar leh ding a si. Tu ah Pathian hin amah rinsan tu mi rinum a hawl rero ih, Thuthlung Thar kawhhran a ngaina tu, amai rak dinsuah mi kawhhran hrampi, Thlarau Thianghlim ih kaihhruai mi minung, Khrih ih rak dinsuah mi pianthlam keng minung a hawl rero a si. Mi zokhal kawhhran thang sung a pal ngah tu pawl cun minung an rinsan dingih a sinan Khrih ih taksa ih a thum aw mi pawl cun thuneihnak kha amah Khrih hnen ihsin an ngah ding a si. Khrih cu a kawhhran ih lubik a siih mi zohman a kawhhran le amai lakah palai a ret dah lo a si. Curuangah kawhhran hin amah Khrih lawng a tul ih, amah pakhat lawng hi Pathian le minung karlak ih palai umsun khal a si.

[23.36]

Mi malte hrang lawng ruat ih hril mi kan si a ti aw tu pawl hi kum zabi pahnihnak san lai ihsin kanmah kan si a ti awtu pawl cu Mai ruahnak lawng pomtu bur khat cu Nikolia ih dungthluntu pawl an si, a hran ten an um hai ih kawhhran tlun ah an ding. Hiti a si ruangah kawhhran hruaitu lakah thenthek awknak a rak thlennak a siih tuisun ni tiangin kan Khrihfa sinak hmuntin ah a karhzai vivo nak a si. A pakhatnak ah, kawhhran ruangpi kha zomkhawmnak ah an thleng ih cule an hruaitu dingah Pathian ai in milai an hril sawn. Cutheh hnu in cui an hril suah mi minung pawl cu Pathian hril mi silo in zunglam upa ah an tuah aw ih, thinlung lam ah, hruaitu ah leh unau vekin an tuah aw. Cutin an zomkhawmnak cu an ticak vivo ih hrinhram bangaw mi pawl in an hruaikhawm hai ih thiam awter takin voi hnih khat le phei cu hnipuan hleice hruknak in, fimthiamnak pawl le thuneihnak pawl thawn hruaitu ah an tuah aw theu a si.

[23.37]

Jesuh ih din mi kawhhran ahcun hruaitu hleice tivek an um cuang lo, zumtu hmuahhmuah cu puithiam an si thluh hai. Bulpak zumtu ciar hin an co mi laksawng hleice lole mipi hrangah cui an co ngah mi laksawng cu thahnem takin an hmangsuak hai a si. Kaihhruai awknak hi an ngaisang. Cui hruai awknak cun kum upa leh upa deuh pawl insang kha a mangsuak ringring ih nitin ten dingnak in an feh ih an nuncan ah an Pathian mi ih annih pawl cu hruaitu diktak an si. A hrekkhat burpi pawl cun zirhnak lam an thiam ih, a hrek in thuphuan suahnak lam lole midang tha va peknak tivek in an tuan tlang hai a si. Cuvek mi pawl cun kawhhran ah hna an tuan ih mino pawl kha an hruai kai hai; an thansoh theinak dingin mi bomnak le Pathian laksawng Thlarau ih pek mi pawl kha an hmangsuak ih mi thazang an tlungter ringring. Hibang pawl ih nunnak sung ihsin Thlarau Thianghlim rah a suahter hai ih annih cu a hril mi pawl le hnatuan a pek mi pawl an si. Minung ih tulmi pawl an theihsak ih an tehton mi in an phuangsuak ih tulai san khalah mi parah an kut an hngat hai. Thuthlung Thar kawhhran ih hruaitu pawl tlinnak hi fimthiamnak parah a thum aw lo a sinan Jesuh Khrih kha a upat ih thinlung tha a kengkawh tu pawl hi mi tling le tlak cu an si.

[23.38]

Nikolia ih zirhternak hin ziangha in tan mi ro a um? An ro kan khawm mi hi ziang a um hrih? Milem leh zuk pawl, hnipuan le thuamhnaw pawl, an ralvennak le an lamzin pawl, rialno le tohkham sau pawl, an pulpit le an khukbilnak pawl hi in tan mi a um lai maw. Raithawinak thar in tuahter sal. Tu ahcun, rannung ih thawinak ai ah leitlun ih nauhak rilrawng pawl kan hmang ih an ei in ding hrangah sumpai ih peknak remti lo in lung tumpi pi kan dawl ih cucu kawhhran biakinn kan ti. Minung tuahcop mi thurin phuansuahnak hin Khrih ih thinglamtah par ih thawinak zalennak kha kan temtawn sal. Pathian laksawng le thilthiam kan neih mi pawl khal tohkham tha ngahnak ding hrangih thawi awknak ah kan hmang thlang a si. Nunau hrekkhat le phei cu hiti ih an ruahnak ruangah fate neitu dingin an nunnak an thap aw sapbai. Inn pi sungih sangvut sunkhawm mi bangin kan pumkhawm aw ciamco. Ziangruangah so tluangtlam takih um ding hi kan duh nawn lo, Thuthlung Thar kawhhran vekih din hi kan duh nawn lonak san? Nikolia dungthlun pawl hi kannih hnakin an tha deuh maw si? Kan inn ciar ih kan tlun a cu thlang lo maw si? Mi malte a si mi Thlung Thar kawhhran, inhnen thawi nom tlang dialdial nak leh insang khat nun ah khan kan kirsal thlang kei uh. Khrih ih taksa Kawhhran pakhat le khat bombawi awknak, pakhat khat ih harsatnak khal bom awknak hmun tuar tlang nom tlangnak hmunah hin kirsal thlang uhsi. Dungthluntu diktak kawhhran ahhin kirsal in, mi malte pawl um khawmnak, mi pungzai theinak tisa khatnak ah leh, unau khat ih nunnak hmunah kirleh sal in inn khat hnu inn khat bom awknak hmun ahhin kirsal thlang uhsi. Hi hmun ih kan um kulhsung ahcun kum zabi khatnak ih kawhhran vekah kan cang thei sal ding a si. Acozah dan ih kaihhruai awknak thu hi dungtun in insang khat vekin nung tlang uhsi. Ni tlaknak lam ram pawl cun leitlun hin in khuh tuk thlang ti in an ruat theu, nupa thennak in tuah, nauthlaknak le sinak bangaw khal nupa sualnak in tuahter ti in an ruat. Hibang pawl hi leitlun ih in ciahnehnak ruangah asi tin kan ti lai hrih ding maw? Kannih cu hibang pawl lak ihsin thiarfilim aw tahrat in leh taih inn kha biakinn a si tiih bumawknak tivek pawl ihsin kirsal leh in thlarau ih khat mi Pathian ih biakinn Khrih parah thum aw in leh Khrih leh a dungthlun pawl ih rak din mi kawhhran ah kirsal thlang uhsi.

Then Thumnak

Jezebel Thawi Rualremawknak

[23.39]

Kannih cu Khrihfa kan si vekin, Khrih ah a thangso vivo ding kan si, curuangah Thuthlung Thar hrekkhat pawl hi Pathian duhdan thawn an kalh aw timi thu hi rinsan hlah uhsi. Pathian kha na pasal tha si thei dingin ziangtin ha na nun ziaza na tuah theu. Hibang pawl hi teh na nunnak ah tuah na tum dah maw pum ap awknak, thu awihnak lole Khrihfa nunau vekin daitei umnak, maw a tlaitluan hin buainak hin a lo hnaihnok ringring maw? Bible na siar tikah lole Piter lole Paul ih cakuat pawl hin teh nunau thu an ngansuak ve dah maw, a hleice in kum zabi khatnak ih thu an rak ngan mi nunau thu lawng te hin a lo calkhen deuh theu maw? Mi hrekkhat pawl cun hi catlang ih a simduh mi hi misual pawl hrang lawngah a si lole Korin khua ih nunau cathiam lo pawl lawng kha a simduh mi a si an tiih tulai san thaw cun zianghman kaihhnoih awknak a nei nawn lo an ti. Hitivek in phunhnam duhdaw tu mitcaw pawl hin Paul ih ca hi ziangtivek in tuah in rel ciamco in zirh in leh ruahnak sual ah mi hruai tum hai hmanseh thlun aw hlah. Keimah hi zirhtu saza cu ka si ve ko. A hnuailam ih bible catlang pawl hi ka rak ngansuak dah lo, ziangruangah so himi ka zirhnak hin kan thin in ti thinhengnak ding a um?

I Korin 11:3
3. A sinan nan theih dingih ka duh mi cu: mi hmuahhmuah ih lu cu Khrih a si: nupi ih lu cu pasal a siih Khrih ih lu cu Pathian a si, timi hi a si.

I Korin 14:34-35
34. Pathian Kawhhran hmunkip ih an tuah ciar mi a si bangtuk in, pumkhawmnak ah nunau pawl cu daiten um haiseh. Thusim ding an silo; Judah dan ih a tivek in hotu khal an silo pei.
35.Thu pakhat khat an theih duh a sile inn ah an pasal sut haiseh. Kawhhran an pumkhawmnak ah nunau ih thusim cu ningzak za a si.

Efesa 5:22-24
22. Nupi pawl Bawipai duhnak nan tuah bangin nan pasal pawl ih duhnak thlun uh.
23. Ziangahtile Khrih cu kawhhran tlun ih thu a neih vekin pasal khalin a nupi tlunah thu a nei ve. Khrih amah rori cu kawhhran riantu a siih kawhhran cu a pum khal a si.
24. Curuangah kawhhran in Khrih duhnak a thlun bangtuk in nupi pawl khal in ziangtinkim ah an pasal pawl ih duhnak thlun haiseh.

Kolose 3:16-18
16. Khrih thuthang tha cu nan thinlung sungah a tlamtlinnak phunzakip thawn cam ringring seh. Fimnak phunzakip thawn pakhat le pakhat zirh aw in nunsim aw uh. Ap awknak hla, thangthatnak hla leh hla thiang pawl sak uh. Nan lungawinak hla in Pathian kha thangthat uh.
17. Kan Pa Pathian cu Khrih thawngin nan thangthat ruangah, ziang hmuahhmuah nan tuah ah siseh, nan sim ah siseh, Bawipa Jesuh hmin in tuah uh la sim uh.
18. Nupi pawl, nan pasal pawl ih thu ngai uh; ziangahtile Khrih thluntu nan si vekin cumi cu nan tuah ding mi a si.

I Piter 3:1-6
1. Cubangtuk thotho in nupi pawl nan pasal ih thu cu ngai uh; cutin nan tuah a sile nan pasal Pathian thu a zumlo tu pakhat khat an um a si ahcun nan ziaza thatnak in zumtu ah a canter ding. Kam khat hman nannih nan tong a tul lo ding.
2. Ziangahtile, felfai zet leh upatnak nei ih nan nun kha an hmu ding.
3. A lenglam mawi ternak nan sam nan tuahdan, nan hlawnthil nan thuam awk dan leh nan hnipuan hruk dan in mawinak hawl hlah uh.
4. Pathian ih mit ah a man a sunglawi bik mi mawinak taktak cu, nan thinlung sungih a um mi, a tar theilo mi thinlung nemnak le thin daihnak sawn ah a um a si.
5. Pathian a tihzah tu khuahlan nunau, Pathian ah ruahsannak a neitu pawl ih mawinak cu an pasal thu an ngainak ah a um a si.
6. Sarah cu cubangtuk a rak si. Abraham a upat ih, "ka bawipa," ti in a ko. Nannih pawl tla thil tha nan tuah ih tih mi zianghman neilo in nan um ahcun Sarah ih fanu nan si.

[23.40]

Dungthlun pawl ih serhsang hi kan tuah ve a si ahcun hi hi kum zabi khatnak ihsin rak hman mi a siih tulai san khalah a hman theih, an danglam awknak ah teh ziangtin ha kan tuah ding? Thlarau Thianghlim ih lemnak kan ton hin tuahsak a si ahcun hihi Thlarau ih thawkkhumnak ti
kha kanmah ten kan thei mei dingih ziangkim hi a hmaisabik ah kan ngah thei mei ding a si. Pathian hi a thlengaw dah maw si? A kawhhran hi mi hrekkhat hrang lawng ah thuthlunnak a tuah ding maw si (kum zabi khatnak kawhhran) pawl vekin thil pakhat tuah dingin le nunphung dan pawl leh tulai san ih cutivek ih thukamnak neitu pawl kha kan zawm thei hai ding maw? Tulai san ahhin Pathian hin bangrep in in dawr lai hai maw, kan sidan vek ciah in,dan leng in lole dan um lo vekin in dawr hai maw? Korin khua pawl hnenih Paul ih cakuat mi hi Korin nunau pawl hrang lawng ih kan ruahsak a si ahcun a dang cakuat pawl khal kha Korin cakuat vekin kan hrial thluh tinak a si. Cuvekin Thuthlung Thar bu hi an zate deuhthaw in kan hnawl ve tinak a si.

[23.41]

Mi hrekkhat in hitivek ih an rak rinnak san cu khai kum zabi khatnak nunau pawl kha cu cathiam an rak um lo ih mi aa tete le nuncan lam ah nun zirh lo mi pawl an si an ti ruangah a si. Ziangkhal a sile khai kum zabi khatnak nunau pawl lawng hi Thuthlung Thar ah kan ben thluh tinak a si. Jesuh rak thluntu nunau pawl thawn kan khaikhin ding lole cuvek in dungthluntu tiang in, cu theh hnu in khai kum zabi khatnak nunau pawl kha cu insang ih um men pawl, kutzung thiam pawl ih nupi le ngakai pawl ih nupi tivek in a si thluh ti aw? An si thluh a sile Mary Magdalene le Jesuh nu Mary pawl khal kha kan hrial thluh ding tinak a siih midang nunau pawl Anna, Elizabeth, Afia, Lidia, Klaudia, Dorkas, Zunis, Timote nu, Lois a pinu, Euodios, Martha leh a nau nu te, Mary, Persis, Fibi, Priscilla, Aquilla ih nupi, Susanna, Syntyche, Tryphena le Tryphosa pawl hmuahhmuah tla kan siar telh nawn thluh hai lo tinak an si.

[23.42]

Kum zabi khatnak ih nunau pawl kha Biakinn (Temple) ih tonawk an hmang zet.Judah pawl cu an biakinn pawl leh an sinakok pawl ah an tongaw theu hai ih Zentel pawl le hmuntin ih a um mi biakinn pohpoh ah leh an rinsan mi an khuavang dik lo pawl biaknak hmunah an tongaw theu hai a si. Hitin an biak dan kalhmang hi an rak bangaw lo nasa, a sinan bangawknak te cu an rak nei. Thuthimnak ah- biak dan, thlacam dan, thawi awknak dan, leh a dangte ciarih rirai an rak rinnak thu ah bangawknak an rak nei hai a si. Curuangah thil a rak can theinak bik cu thil fiangfai rak theih mi an neih lo a si ahcun hi can lai ih nunau pawl hi mi zah um taktak pawl leh upat tlak le biaknak lam ih mahte thunun aw thei tuk mi pawl an rak si. Curuangah hiti ih thu elnak a rak suah ciamco nak hi cu thuphan lolak men thil, thuanthu lenglawng lole thinlung ih suangtuahnak men fang a rak si. Ka simsal hrih ding, kum zabi pakhatnak ih a rak piangthar mi Zentel nunau pawl kha cu hlanlai ahcun khawsia khuavang hrangih rak sak sak mi biakinn ah Pathian an rak be ter hai. Hiti ih an urhsun nak hi a hrekkhat an rak sual deuh hai, cawn tlak le zir tlak ih biaknak nuncan an rak thupi nasa. Cuti a sile hi nunau pawl hin an sinak sang deuh dingin fimnak lam an rak zir lonak hi mi lakah daiten an um thei ding ruangah maw si? Mi hrekkhat lephei tla cu biakinn ah an mikhual lo nasa hokhaw. Dikari ngahnak dingih zir kan si ahcun zirnak lam hi kan uar vivo mei ding.
Fimthiamnak kan timi hi tlawng ihsin zirsuah mi hlir an silo. Hi san lai ih nunau pawl hin fimthiamnak lam an zirsuah a sile midang an va zirh sawng vivo ih cunah cun ei in suan thiamnak tiangin a tel thluh ih rawl hun dan le tuangtim dan tivek leh hang dum tuah dan, rannung zuat dan, pat tham dan, bazaar dan, sumpai kilkhawi dan le nauhak pawl kilkhawi dan tiangin an zirh aw thlun a sinan hi hi mi malte pawl lawngin an rak tuah dah mi a si. Mina tuamhlawm dan le tawlrel dan pawl hi mipa khal in an rak tuah bawm hai a si.

[23.43]

Fimthiamnak suangih dungthluntu ka si a ti awtu pawlih umtu ziaza kha ruat ta aw. Annih pawl hi cathiam pawl maw cathiam lo pawl ha an si? Pehzom awknak lam a tlasam mi pawl khi cathiam lo kan ti a si ahcun a dik ve ko e, khai nunau pawl khal kha a tlangpi thu in cathiam lo tete pawl an si hai. A khatlam zawngih kan zoh a sile annih pawl kha theitawk ih Pathian hnatuan tu pawl an si. Tukhaltu hna ah thiam emem le ngakaih hna khal ih mi pitling pawl, mai hnatuan mi parih mi rintlak pawl hlir an rak siih hnatuan nei mi hlir an si. An hna parah an thiam ngaingai ih midang pawl khal an nunnak ding hrang tiang zirh ih bawm theitu pawl hlir an si. Khai kum zabi khatnak nunau pawl kha fimnak nei lo le mi aa te le kilkhawi lomi hlir an si ahcun an mipa pawl khal kha cuvek hlir an si ve ti kha kan theih tul mi a si. Pentekos ni ih mipi pawl an ra suahnak ah khan dungthluntu pawl kha cathiam lo an si ti kha an thei cia lo maw si? Annih pawl kha biakinn sungah teh daiten an um hai maw? Ziangtizawng khalin an um lamlam lo! Daiten um hai seh timi hin an cathiam le thiam lo thu ah zianghman pehparnak a nei lo a sinan Pathian thu kha a sidan vekvek te ih an ngainak sawn ruangah a si. Paul in Korin cakuat pakhatnak 11:1-3 sungah fiangfai ten a simnak kan hmu thei.

I Korin 11:1-3
1. Khrih nundan ka cawn vekin nannih khalin i cawng ve uh.
2. Ka lo zirhsin mi thuzirhnak nan thei ringring ih keimah khal in hngilh lo ruangah ka lo porh zet a si.
3. A sinan nan theih dingih ka duh mi cu; mi hmuahhmuah ih lu cu Khrih a si; nupi ih lu cu a pasal a siih Khrih ih lu cu Pathian a si, timi hi a si.

[23.44]

Fimnak hi Jesuh in a run keng a si tiin mi tampi cun an ti men thei. Hi a hnuailam ih bungcang pawl ahhin kan hmuh thei mi cu dungthluntu pawl kha cathiam lo te le mi ih ziangih an ngaitlak lo pawl, an thih hnu leh Khrih ih thawhsal hnu khal ih ngaisan tong theilo pawl, cuvek mi pawl cu an si kawhhran sungih roreltu pawl cu.

Dungthluntu 4:13
13. Khawnsil upa pawlin Piter le Johan cu fimnak le thiamnak a neilo mi mi menmen an si na in ziangtluk in an ral a tha ti kha an hmuh tikah an mang a bang ngaingai. Cule annih cu Jesuh ih rualpi an si ti kha an mang sal.

[23.45]

Jesuh Khrih hin fimnak hi a pek ngaingai a si ahcun Anih kha nunau pawl lakah a um ringring ding tinak a si a sinan mipa pawl vek cun silo in kawhhran sungih daitei um men dingin a zirhter hai. Hiti ih kum zabi khatnak ih nunau pawl an rak tidan hi a dik kan ti thei maw, mipa pawl hmuah an rak ti hai si lo? Hiti ih an rak umdan hi kan pompi ve a sile mipa khal siseh nunau khal siseh an tuah ding mi awm-ang thil an tuah lo tinak a si. A hlan ih kan sim zo vekin, "Fimthiamnak cun pehtlaih mi a nei." Ngakai tu pawl khal kha thlipi lakih umdan an thiam ih tipithuanthum lole tili tumpi sung tivek pawl ah an lawng mawng in, an duhnak nak ah feh ih, an sur tla vorh phah vivo in le thi/belh phah vivo in zianghman pontam hnuaihni lo in nga an kai, an ret tha, an thenhlim ih dawr ah an va zuar.

[23.46]

Ka nauhak lai ahcun phunhra ong pawl hi cathiam pawl an si tiin ka rak ruat ih cunah cun mipa nunau in an tel thluh. Ka hung upa deuh vivo ih ka ruahnak a thlengaw sal. Phunsang tlawngta pawl le dikari ngahtu pawl khi cathiam ah ka ret leh hai. Tu cun Master dikari ngahtu pawl
ka hmuh leh tikah ka thinlung ah thusuhnak a suak vivo. Hibang cathiam pawl doctor tiang a ngahtu pawl hi thuamhnaw tah le sursak teh an thiam hai ding maw? Cuti a silen kannih in teh hi thuamhnaw tahtu pawl le ngakai tu pawl ih tuan mi hi annih cu nunau an si em mei tiin kawhhran sungah kan ngaihthah sak hai ding maw si?

[23.47]

Kawhhran sung nunau burpi lakih thuzirhnak ka neih tikah nunau thu thawn pehpar aw in thusuhnak kan tuah theu ih a netnak ahcun thazang cak lo a ti aw mi bungbel (an tam sinsin) pawl khalin in pompi thei hai. Ziangruangah a si pei? Thinlung ah thu hnih in a ra suak mi cu uanawknak le tihnak ti pawl hi an ra lang hngalh. Hi thil ra lang mi pawl hi khawsia ih hmanrua hriamnam retnak hmunpi an si.

[23.48]

Uanthuannak

Uanthuannak au aw cun hi tin a ti, "Na pasal ih na ap awk a sile thlacamnak le profet thusimnak pawl a kham ih kawhhran sungah daite in na um ding cule hitivek ih khuahkhirhnak ruangah mi ai in na tlaniam sawn ding a ti." A tawkfang te ih na um a sile hnuaidornak le thinlung nomnak, mah le mah thupi bikih ruah awknak kha na hlitthla dingih, na insang thaten na fingkhawi thei dingih na thinlung in tulmi le sam mi nei vekin na ruat aw dingih ngaitlawmnak nun na nei vivo ding a si. A sile hitivek ih zohthim tlak sinak hin a lo ti tla deuhdeuh dah maw si? A thuralkah zawngin kan ruat hnik kei uh ziangahtile Pathian thu zawng ih tumsuk ding kan si ahcun cuti lo zawng ih nun a tha in a dik sawn lo ding maw?

[23.49]

Curuangah hihi buaithlak na ti ahcun na pasal ih na ap awk lo ni ihsin na lung a awi dingih na di a riam ding, kawhhran lengah thu na rel thei ding, lole Pathian thu kha na thlun theilo dingih na el fawn ding. Cutin na hlat vivo dingih na sual vivo ding, na hnipuan kendan in mi na to mei dingih, milian le mi tha pawl bangin na tlang thluaithlo thlang dingih mipi pawl siseh na pasal parah siseh na tuanvo na daithlan vivo dingih na insang le sungkua pawl khal na ngaihsak thei nawn lo ding a si. Hi thu hi a dik a si ahcun ziangruangah so nunau pawl hi an uanthuan awk lemlo ke, mahte uar awknak lole Pathian an rak upat theinak pawl hi? Cuti a sile ziangruangah si pei duhnungza nunau, pasal hrangih mi rinum, thinlung thianghlim, insang kilkhawi thiam pawl le fale nun simnak ih awka thlum hmangthiam pawl le upat tlak le cawimawi tlak nunau pawl hi kan hril thiam theu lo?

[23.50]

Tihhrutnak
Tihhrut aw cun hitin a ti, "Ka pasal leh Pathian thu ih ka ap awk a si ahcun sal vek ka si ding, in hmuhsuam dingih in nautat fawn ding a ti. Ka pasal hrangah ka si dingih ka sinak hmuah ka hloh thluh ding." Hihi ka tuah ding mi a si maw? Hiti'n na pasal hrangah na nun a sile Khrih ah na nun na hloh vivo dingih A ram na kauh vivo thei ding a si. Zangfahten timi tongkam hi zawi hnenah ha na dil ding? Leitlun thawi rualrem awknak hi na duh hrih lai maw? Nangmai cakhiarnak lamah nangmah kha a sangbik ah ret aw tahrat ih feh kha na duh hrih lai maw? Kei ka danglamnak cu hitivek ih neksawr nak hnuai ih ka um tikah kan nun kha Khrih ah ka kirsal leh ih A sal ka si leh sal. Pathian ih mi lole kanmai mi sinak hi ha kan hril deuh ding? Kei hi ka ti sual maw? Leiltlun thawi kan thenawk ngam vulvo tikah zawi dung ha kan thlun ding? Hifang ahhin thu ka lo sut duh. Ziangruangah so nunau pawl hin sin leh fen in, lole an pum ap awknak lawngih an koppi an pasal parih an nunnak an hmuh theu? An neihawk veten thildang hmuh ding le langter ding dang teh an nei hai lo mawsi?

[23.51]

Mipa le nunau tahthimnak thu hi ngai dingin kan zuam nasa theu. Ka hlawhsam ringring. Paanti le serthlum rah pawl hi an hlum veve, thingkung par rah an siih an rah sungah an ci an pai cio a sinan an bangaw hai maw? A si an bangaw ta lo. A pakhat ai khan a pakhat sawntu kha a tha deuh cuang maw lole a danglam aw ve meimei ha? Paanti rah leh serthlum rah pawl hi tahthim ding thil teh an si hai maw? Cuvek in mipa pawl khal hi nunau hnakin cuanghmuarnak an nei cuang lo. A danglam aw mi an si hrimhrim hai. Mipa le nunau hi ziangti zawng hman ih bangaw theilo mi, tahthim tum ding an silo. Kom tum ding thil an si hai lo ih a sinan a then aw mi kha pumkhat ih tuah sawn ding a si. Annih pahnih pawl hi a dangdang veve mi kom aw tahrat ih tumtahnak khat nei dingih sersiam mi an si. Khrih ah pumkhat an si. Neihawknak
cungcang thu ah pahnih kha pakhat ih kom mi an si. Hiti in mi pahnih komawknak ruangah fanu le fapa an nei thei hai a si. A eng lai mi meiinn kan mih a si ahcun tleunak a um nawn lo ih cutin a dang khal a siatsuah thluh hai a si. Phartlang ih an pehzomnak hin tleunak a suah thei lo ih a sinan a pehtuahnak pawl hi an rualrem awk ahcun cumi ihsin tha a suah thei ih insung zaten a ti eng thluh thei a si. Tisanak ah mipa le nunau hi phurnak, fim thiamnak le thlarau lam hrang tiangih kom mi an siih lungrual ten tuan tlang dingih sersiam an si. Hiti si cingin ziangruangah so nunau pawl hi mipa pawl thawi kan tahthim theu? Pathian hin mipa ding vek hlir si dingin tumtah sehla mipa lawng a rak sersiam ding a si si.

[23.52]

Pathian hin mipa i tuahsak. A hril dan ding thuhla ahcun kei in zianghman thuneihnak ka nei lo. Ziangruangah tile Amah in hihi a tuah ih nau neihnak ah ziangtluk ih lungawi za a si timi hi ka thei dah lo. Pathian ih ka parih i pek mi nunau hi a hleihluat tuk deuh ti ah ka ti hrih ding maw? A zirhtu saza dingih i rak hriltu hi Amah a si a sinan thuphuan suah phuan ding hi thil tha sawn a si i ti. Cuti a si ruangah tu ahhin mibum ka tum hrih lai ding maw ziangruangah tile hi
hnatuan tu dingah keimah silo in midang le a hril ta riai si ti in? Pathian hin kei hi i duh lo deuh teh ka ti thei maw? Pa pakhat hin fanu le fapa tampi a rak nei. A hrek cu an khan a sangih a hrekkhat pawl cu an niam. Mi hrekkhat pawl cu an taksa zoh hin it-umza zet an si laiah a hrekkhat ve thung cu mi meimei an siih an hmel tla a se zet. Ziangkhal a sile pai hrang ahcun a fale an si thluh ko. A hrekkhat pawl cu sibawi lole sih-ni tla an tuan men thei, cun a hrekkhat pawl cu rawlsuang men le lettama tla an tuan men hai ding a sinan anmah duhdawtu an pa ih duhnak kha a bangrep thluh hai a si. Anih hrang ahcun mipa nunau, mi niam mi sang, mi mawi le mi tha ti um cuang lo in leh hmelsia leh mawi ti khal a um lo. Ziangvek hna an va tuan khal le an pai hrang ahcun an bangaw thluh ih ziangvek an thiam khal len an bangaw thotho hai, ziangtluk thiam in ziang hna khal tuan hai seh an bangrep aw thluh a si, an pa hin bangrep ten a zoh thluh a si. Kan zate hin sibawi si thluh sehla zo in kan rawl ei ding in tuahsak ding, inn in saksak ding, lole thlaici in cinsak ding? Kan zate hin mipa hlir rak si bang sehla zo in kan fale in von sak ding? Curuangah Pathian thu cun Galati 3:28 sungah felfai ten a rak rel. Tui can hi mai hrang lawng ruat ih cangvaihnak, thil ziangkim hi thuh thluh can a si tiin ruat aw hlah. Pathian thu thawn pehpar aw in a cang kulhluan-ruk nak hin a simfiang ih, Paul ih rak sim mi kha kan zoh a sile A insang le Khrih ih pehtlaihawknak thu a rak rel mi thu kha hitawk ih kan sim duh mi pawl hi a si..

[23.53]

Hitivek ih hnatuantu ding kan sinak ah a dangdang in in rak tuah lole mipa nunau hnak ih mankhung deuh ding tivek hi sersiamtu ih sersiam tumtah mi a si kher lo. Hi sinak bangaw mi a tluse zo mi kannih pawl hi kanmai hmin thannak ding hrang, huham, lennak, lar duhnak, leh taksa mawinak hrang lawng kan tuah theu, a sinan Pathian in sersiamnak ih a rak hmanrua cu an silo lawlaw. Anih cun mi rinum le thuthlun tu pawl lawng a cawmdawl hai a si. Voihnih khat cu na hrangah khal tampi na rak hai ve theu ding lole malte tal cu na rak ti ve ko ding. A netnak ah, a zat kha cu ret tha awla, ziang an si timi na rak hril zo si. Pathian Lalram hrangah malte lawng na hman a si ahcun na laksawng cu a menmen te a si ding lole tamsawn petu na si ahcun a tum sawn tla a si men ding. Pakhatte lawng na tuah a sile a thupi lo em mei tiin daithlan cuang aw hlah, zianghman ngah khal tum aw hlah. Pathian in nunau tlingbik si dingah a lo hril maw? A lo hril le, Bawipa ih nu tlingbik le fanu tlingbik si tum aw. Pathian in mipa tlingbik si dingah a lo hril maw? A Lo hril a sile patling le fapa tlingbik si tum aw. Hlawnthil ah siseh, thlarau la ah siseh Pathian in midang hnen ih a pek mi pawl beisei in thlir nawn hlah. Pathian ih sunloih leh cawimawi mi pawl cu an ropi vivo ti thu kha ruat sawn aw. Mipa na si ahcun, A thu kha thukpin lai awla, na hrangah Pathian in ziang a lo retsak ti kha na hmusuak ding, cun na duhdawtnak thukbik thawn na pum ap aw aw. Nunau na si khal le Pathian in ziang tuah ding a lo duh ti kha hawlsuak awla, cule duhdawtnak hringsuak tu ding na sinak na hmusuak aw dingih na thinlung in a tlamtling mi pum ap awknak thinlung thiang na nei thei ding a si.

[23.54]

Nunau pawl, nannih vek cu ka si theilo, profet khal ka si lo nan Pathian zangfahnak le Thlarau bomnak in keimai hrang ih thabik mi ka sinak te hi cu ka si thei, cun nan hrangah a thabik mi A thu zirhtu saza diktak khal ka si thei. Anih cun nanmah vek thotho in a tawkfang te in laksawng khal i zem ve. Curuangah zovek khal kanmah le kan rinum dan cio in kan ngah ding. In fial mi kan hnatuan mi cu an dangdang aw thluh nan duhnungza le thu lung te ih kan um a si ahcun kan co ding laksawng pawl cu an bangaw thluh cio ding a si.

I Samuel 30:22-25
22. A sinan David hnen ih a feh ve mi halhsiknak nei mi le hawizawnglo hrekkhat pawl in "annih cu kan hnen ih an feh ve lo ruangah thilri kan lakmi pawl hi kan zem hai lo ding. An nupi le an fale pawl hi lak hai sehla feh ko hai seh", ti ah an ti.
23. A sinan David in, u le nau uh, " Bawipa ih in pek mi thilri parah cutiin nan tuah theilo ding. Amah in in kilkhawi ih miramtu pawl ih parah nehnak in pek.
24. Nan sim mi cu zohman an lung a kim theilo ding. Zozo khal bangrep ten co ciar ding a si. Thilri kan tan mi hnen ih a rungtang mi khalin raldonak ih a feh mi co zat thotho in a co ve pei," ti ah a ti.
25. Cumi cu David in dan ah a tuah ih Israel ram sungah a tu tiangin an thlun dah ta a si.

[23.55]

Thuneihnak
Kawhhran hi a hram hnget zet hmansehla thil thlakthleng awknak in a nauneh zik theu. Hi thil thlakthleng aw pawl hi dan lo vekih thil ra cangsuak mi pawl an si. A hrekkhat pawl ra cangter tu pawl cu kanmah milai, mai tanghma lawng sialtu pawlih cangvaihnak ruangin a si theu ih
a dang pakhat tu cu mi hrekkhat kawhhran sungih sinak hlohtu pawl thlakthleng awknak duh lonak ruangih ra suak mi an si. Ziangkhal a sile mi thuhmun veve an si; kawhhran hi an thendarh ih malte ten an um ter. Mi pakhat a nun a thlengaw ih dungthlun pawl ih din mi kawhhran in a bang ih tualto a lem kawhhran ah a thawn, cumi cu a tak silo larnak ih dinmi, mi phunhnam thenhran awknak, zomkhawmnak ai in mai pumpi hrang ruatih din mi kawhhran a si. Tulai kan leitlun ahhin mi tampi in a ol-ai mi lamzin zawh an tum ih, duhdawtnak, kum zabi khatnak ih rak din mi dungthlun kawhhran ihsin dung an sip ciamco hai. An tumtah mi kha ziangtik hmanah an hlawhtling theilo ding ti kha an theithiam lo ih, hi lungrualnak umnak, ziangtin kan duhdawt aw ding, bible sirhsannak, thukam thar, kum zabi khatnak insang kha an phatsan vivo
thlang a si. Kannih Khrihfa pawl khal hin khai kum zabi khatnak ih Khrihfa insang nun kha kan hawl sal hmanah tawn a theih nawn lo. Kawhhran hin insang khat nun a nei thei maw? Khai a kil ih lungphum diktak thlarau pianhmang kha kan cawhpolh thluh (cang thei nawn lo in) a si ahcun ziangtin so tlakrawh inn tha khal kha a din ringring thei ding?

[23.56]

Kum zabi khatnak nunau pawl thu ah thufiang a um, annih cun an pasal hnenah ziangtin kan um ding ti an theifiang, ziangtin upatnak kan pe ding ti leh cuvek thotho in an pasal le pawl khalin an nupi pawl leh an fate pawl parih an tuanvo an thei. Hruaitu hi ziangvek an si ti an thei ih bulpak thu neihnak tivek an rak thei lo; insang hrangah ziang tuah le a thabik ding timi an thei ih pum ap awknak nei in an nupi thawn an rak um tlang. An duhdaw aw tuk ih, an upat aw fawn, an pahnih in an kil him aw aw ih tuah leh ding mi thil zianghman an ruahman lo, anmai duhnak lawng an fehpi mei lo. Can nom bik le harsat bik can khalah an to tlang thei ih hremnak sung khalah siseh leng khalah siseh an to tlang thei hai a si. Rom acozah ih hremnak khalah an tuartlang thei ih ramsa le sahrang rawl ding an si tiangah lungawi tlang ten an um thei hai a si. Nun ah an nung tlangih insang zaten Pathian an rian, cutin tuisan harsatnak tivek khalah an thi tlang ngam hai a si. Kannih Pathian ih kawh mi pawl hin leitlun hi kan kawm sawn ih kan ruahnak pawl khal in herh vetvet sak ih, kan sinak tiang in laihlang sak ih ziangtin neihawknak dik tuah ding ti khal kan ruat thei nawn lo. Fala pawl, nannih cu nunau sinak neitu nan si kha, duhthlannak (nau thlaknak ah), hmunkhat ih tuan tlangnak leh nupa hrialawknak tikcu tivek pawl kha duh hlah uh. Hibang pawl hi Thlawsuah maw ansia ha an si?

[23.57]

Kan nun sung ahhin thuneihnak le thuthlunnak hi khuitawk vek khalah a tul ti kan thei zet, a sinan thil pahnih ahcun a tul lo lala. Ralkap thusuak, mipi-cozah khal siseh, zirnak lam khalah siseh, hnatuannak hmuntin ahhin a tulzia kan thei thluh ko, a sinan hibang pawl hi insang leh kawhhran sung ahcun neih lo ding mi an si. Ziangruangah? Bawi upa pawl le saza pawl lole milian pawl khal hi kannih hnak in an tha ce cuang lo. Hmuhsuam awk khal ah ngai ding an si cuang lo. Thleidan a nei ti zawngin Pathian hi mawhthluk ding kan silo, ziangahtile annih pawl kha kan tlunih uktu dingih Pathian ret mi an si. Kan insang, kawhhran sung le kiangkap thupit bik nak hmun vek ahhin cun cuvek hriamhma cu kan tuar ko lo maw. Zohman in " Khai palik bawi tuanpek khal ziangtin mawtaw mawn ding ti sim theinak a nei lo" kan ti dah lo. Kan tlunlam upa pawl le ralkap bawi pawlih in fial mi thu khalah ziangtik hmanah thu kan sut kir fawn lo ding. Kan tuah hrimhrim lo ding mi cu tisinnak le mi zuamnak, thu elnak leh a khirhkhan zawngih dodalnak, thil thupi bik mi, kan san sungah kanmah thawi minung dan ih a kaihkuah awtu pawl kha kan ti se hrimhrim lo ding mi an si. Ziangruangah? Pathian ih ralpa hin thutak a ra merhkawi can lole kan pehtlaih awknak tisiat a tum can ah A Lalram tisiat tum in, A kawhhran le a inn pawl tisiat a tum can pawlah kan dodal ding a si. Cuvek insang in kawhhran biakinn tla an sak ih an tha a cah lo bik can ah thlarau thazang khal a cak lo duh nasa. Kan insang ah hin thlarau lam ih hruaitu dingah mipa an silo ahcun bible ih duhdan a silo ih thukam thar ih zirhternak hi kan kawhhran ah a um theilo ding a si. Hivek mi pawl in tulai kawhhran an hruai ruangah kan ngaihtuahnak in ti siat ih kan tlaksamnak lole sualnak lawnglawng an lailang hai, cule kan kawhhran kan uiret san ih midang tla kan va pawk mei, cutin midang in kan theih duh zawng in rak zirh leh sawng, cutivek in kan koppi par khalah tu le tu kan tuah duh thlang a si.

[23.58]

Jezebel Thawi Rualremawknak
Nunau pawl hi an pasal pawl thu vekih an um ih insang ih an hlawhtlin tikah, kawhhran sung khalah a tlaitluang zawngin an hlawhtling theu. Hruaitu tampi pawl hin an sinak an tlansan theunak hi an nupi pawl ih tong tamtuknak ruangah tla a si theu. Mi pawl hin bible hi an duh mi bungcang hril in an siar theu ruangah bible ih tiduh mi theithiam lo in an duhnak in an fehpi mei theunak ruangah an nupi pawl thawn an hnialkalh aw lok mei theu ih Pathian thutak rori hmanah an thu hmuhdan a bangaw thei hrimhrim lo. Hivek minung pawl cu an neihawk ni dokalhtu, upat lotu pawl an si. An nupi pawl kha Pathian ai in an tih sawn. Thuthlung Thar Ca hi an duhnak nak an hril ih lole an lasuak ih an nupi pawl ih lungkim theilo mi bungcang pawl cu an phiat hluahhlo hai ih anmai duhdan in an tuah thluh mei. Kei cun hivek minung pawl cu mi cak lo pawl tiin ka ti men hai. Mi uarnak ding lawng a zohtu nunau pawl cu an hloral vivo ih thulunnak an tlasam, curuangah an thangso theilo. Kum zabi khatnak ih an thuzirh mi pawl kha kan duhnak nak kan la ih kan hlonsak ahcun mi pakhat hin rundamnak cu kum zabi pakhatnak pawl hrang lawngah a si in ti tariai sehla ziangtin ha kan san ding?

[23.59]

Kaihhruai awknak ahhin a hro zawngih hro awknak hi cu nunau pawl in an dinhmun an cuh duh nasa. Curuangah mipa hin an nupi ruangah an thlarau fale pawl an kiam ding hi a thupten an phang ve nasa ih an nupi pawl le an fale pawl an member pawl ruangah zirhtu le pastor tiang an si theinak a si. Na ti thei a silen hi thusuhnak hi i sang ve hnik. Kan nupi hi kan kawhhran ah pastor si bang sehla kei hi inn lamah a thlarau kaihruai tu si thotho sehla ziangtin na ruat? Cu lole kawhhran sungah a kaihhruainak hnuai ah kei khal um bang sehla, thlarau lam khalah zianghman thil ti theinak neilo sehla teh? Kan fale pawl hi thlarau lam ah zo in a kaihruai hai dingih insang ah a zirh hai tu ding? Pathian ih duhnak ti famkimnak ah kan ti hnok in kan ti buai aw thluh lo ding sawm, cuvek ih kan um ciamco ahcun? Fala pawl, nan zawh mi zalam cu a sau zet nan zin an lo simnak kha zin sual a si. A hnuailam ih bible cangte hin na hnak a lo doh nasa maw? Hihi Pathian maw Paul ih rak thawkkhum mi ha a si, cu lole mipa ngaisan tuknak ha a si kei le?

I Timote 2:12
12. Zirhtu an si ding cu ka duh lo; mipa tlun khalah thu nei hlah haiseh. Daiten um hai seh.

[23.60]

Nunau Pathian Mi
Pathian mi tak nunau pawl hi cun uanthuannak le a tul lomi hi an tuah dah lo. Zianghman kaihhnget ding an tul nawn lo ih nauhakte bangin mi pawk khal an tul nawn lo. Pathian thu ih a fial mi pawl kha ziangtik can khal ah a tuah ding le a hnatuannak ah hna nauta ti in zianghman an ruat dah lo. Hihi ziangruangah a si pei? Ziangruangah tile Khrih ah an thi zo ih; an nunnak kha anmah ah a si nawn lo. Galati cakuat sungih Paul ih a nunnak thuhla a rak sim zo vek kha an si, Galati 2:20.

Galati 2:20
20. Curuangah a nung mi cu kei ka si nawn lo; ka sungih a nung mi Khrih sawn a si. A tu ih ka nung ka timi hi cu i duhdaw ih ka hrangah a nunnak a petu Pathian fapa sungah zumnak in ka nung a si.

[23.61]

Pathian mi nunau pawl cun ziang hnatuan khal beisei cuang mi nei hran lo in an tuan ih mipa pawl ih pek mi hnatuan kha an tuan mei ziangruangah tile ziangvek hnatuan khal tuan dingin an man ringring ih thil ziangkim hi Pathian duhzawng a si an ti thei ringring. Nunau hrekkhat pawl cun lamzin hrek lawng an thlun ruangah Thuthlung Thar ih dan thu pawl hi a hrekkhat te lawng an thlun ngah hai a si. Hiti ih an tuah vivo nak ruangah Pathian khal in a thu tummi kha a hrekkhat te lawng a phuansak hai, nupi tha si dingah a hrekkhat lawng tlinnak an nei, fate nu an sinak khal ah a nu hrek lawng an si, ih Khrihfa sinak khalah a hrek lawng an si. Thlarau lam ih an tisa sinak a san biknak ah hlum huamhi fang lawng an si thei. Curuangah tulai ih mahte zumtu ka si a ti awtu nunau pawl hin thuzirhnak an neih tikah leitlun thuhla thawn Bible hmangin Pathian thu kha an cawhpolh ringring. Hivek nunau pawl cun an koppi, an fate leh an kawhhran khal siseh an di an riam ter thei dah lo. An cangvaihnak pawl hi mipa hrek nunau hrekin an rawi culci ziangruangah tile Pathian in a fanu tling si dingih a hawlnak a thu tummi kha ziangtik hmanah hawl an tum dah lo. Tulai ih nunau tampi pawl cu mipa ih a kumkhaw nupi ding si ai in an lehpi men ding fang mi nunau an tam sawn. Hi mipa khawvel ahhin an zuam bik mi thu cu an ngaihtuahnak a kim tikah mipa thu ruah nawn lo ding hi a si. Nu tling si thei dingahcun thutin ngaituahnak ai in thudik pomnak sawn hi a si.

[23.62]

Bible sung nunau pawl ih dinhmun hi a sang tuk ih nun cak lo nunau pawl cun an thlun sual theu. An uanthuannak kha hlirsang in, tihnak nei phah si in Pathian ih tumtah mi famkim ter dingah an tum theu. Jesuh in hitin a ti, "A kau mi lamzin cu zawh a nuam a sinan nunnak lamzin cu a bi ih mi malte lawngin an zawh ngah," a ti. Nang teh cui mi malte lak ahcun na tel ve maw? Nunau pawl, hi bungcang a siar ngahtu pawl hrekkhat cu an bei a dong theu, lole mi malte lawngin an siar duh, nang teh na remti ve maw. Jesuh in hitin a ti leh, "Keimai thuhla ah thinlung thukthunnak a neilo tu pawl cu mi thlawsuak an si," a ti (Matt. 11:6). Nunau pawl, tu hi tisa caknak leh mai duhnak hlawnthlak nak tikcu can a siih Thlarau ih cangvaih a cu tuk zo a si.

Rom 12:1-2
1. U le nau tla, Thlarau Thianghlim ih pek mi laksawng thu ah ca nan rak ngah mi thuhla ah theihter ka lo duh mi a um ih cui thu cu nan theih dingah ka duh a si;
2. Khawvel mi nan rak si lai ahcun zinpeng nan rak zawh ih nunnak nei lo milem pawl nan rak bia.

[23.63]

Mi tampi ih lom ding beiseinak thawn hi ca hi ka ngan lo, hi ca ka ngannak san cu thutak leh Thalrau Thianghlim thu a ngaitu pawl hrang sawn ah a si. Thu netnak ih ka sim duh mi cu, na inn kha thaten kilkhawi awla, cui na insang pawl kha duhdawtnak le upatnak thawn kaihhruai tum aw, na nupi hrangah zohthim tlak si awla na nupi kha ziangtik hmanah Pathian thu a suahsan ding khal siang dah aw hlah lole hmailam hrangih thlarau lamih na hna kha tuah ringring aw.

Hosea 2:19-20
19. Maw, Israel, ka nupi ah ka lo tuah ding; mifel le rintlak ka si ding, a hmun mi duhddawtnak le zangfahnak na parah ka langter ding ih, kumkhua in ka ta na si ding.
20. Ka thukam ka hnget ter dingih ka ta na si ding; kei hi BAWIPA ka si kha nan thei ding.

[23.64]

Tuisun ih hna kan tuannak ahhin Jezebel ih thlarau cotu kan lakah kan um lai hrih, nunau thuthang tha simtu pawl, pastor pawl, zirhtu saza pawl leh profet pawl kawhhran ka hruai ve e a titu pawl, mipi zirhtu pawl, nunau mipa khal tel in, mi tampi pawl hin Thuthlung Thar ih sim lomi vek ih thusim leh zirhtu an um hnuaihni. Ziangtin so nunau nu in amah hman in bible thlun silo in midang cu a zirh thei ding? Nu titer nu a si men lo sawm? Kei cun hitivek ih nunau pawl ih thu zirhnak hi poi ka ti lemlo lole thlarau lam ih hruaitu an si ding khal ka poisa lo. Ziangahtile nunau cun anmah nunau pawl hnen leh nauhak pawl hnenah rongbawlnak nei hai seh. Curuangah an lakah theinak nei mi zirh theitu hi mi malte lawng an si. Ziangruangah so zirhnak dan ih an thawh lo ding, hi dan in zirhtu pawl kha Khrih ih dungthluntu pawl kha an silo mawsi? Nunau pawl kha zirhtu ding ahcun Pathian ih a rak kham tikah kan zirhter thotho ding mawsi? Dingfelnak thu hi Pathian thu in an herhkawi in an ti hnaihnok hrih ding mawsi? Pathian cun a duh mi thu a sim ih a sim mi thu hi a duh mi a si kan ti rero zo kha. Ziangruangah thulunnak thawn upatnak kan pek mei theilo, a dan thlun in a thu kan zom theilo nak hi. Kawhhran hin Pathian thu vekih a um mi nunau, zumnak thawi a nunnak pe aw theitu, leh Pathian lawng rinsan tu nu tampi a mamawh hrih a si.